Genesis 13

Jini Lot tsi' tʌts'ʌ i bʌ ba'an Abram

1Abram tsa' loq'ui ti Egipto. Tsa' tili ti jini lum am bʌ ti sur, yic'ot i yijñam, yic'ot pejtel i chubʌ'an, yic'ot Lot.

2Wen chumul Abram. An i cha'an wacax yic'ot plata yic'ot oro. 3Tsa' ñumi ti jini lum am bʌ ti sur. Tsa' majli ti' bijlel Betel. Tsa' c'oti ba' tsi' ñaxan wa'choco pisil bʌ i yotot, xinlʌpʌl ti' yojlil Betel yic'ot Hai, 4ya' ba' tsi' mele i pulʌntib i majtan Dios. Tsi' pejca lac Yum ti' c'aba'. 5Lot tsa' tili yic'ot Abram. An i cha'an Lot ja'el tiñʌme' yic'ot wacax yic'ot pisil tac bʌ otot. 6Mach jasʌlic jumpejt lum cha'an temel mi' yajñelob jini cha'tiquil, come cabʌl i yʌlac'. Jini cha'an ma'anic tsa' mejliyob ti tem chumtʌl. 7Jini xcʌnta wacax i cha'an Abram tsi' cha'leyob leto yic'ot xcʌnta wacax i cha'an Lot. Ya'to chumulob jini cananeojob yic'ot ferezeojob.

8Abram tsi' sube Lot: Mach yomic mi lac cha'len leto come lac pi'ʌl lac bʌ. Mach i cha'leñob leto xcʌnta wacaxob lac cha'an. 9¿Mach ba jocholic pejtel ili lum ti' tojel a wut? Yom ma' tʌts' a bʌ ba' añon. Yajcan chuqui a wom. Mi a wom jini am bʌ ti lac ts'ej, mux c majlel ti lac ñoj. Mi a wom jini am bʌ ti lac ñoj, mux c majlel ti lac ts'ej, che'en Abram. 10Lot tsi' joy q'uele lum. Tsi' q'uele jini joctʌl i c'aba Jordán ba' tsa' ñumi colem ja' ya' ti' bijlel Zoar. Che'ʌch yilal bajche' i pʌc'ʌb lac Yum, che' bajche' jini lum ti Egipto, che' maxto anic tsi' jisa Sodoma yic'ot Gomorra jini lac Yum. 11Lot tsi' yajca pejtel jini lum ti Jordán. Tsa' majli ti' tojel i pasibal q'uin. Tsi' cʌyʌyob i bʌ jini cha'tiquil. 12Abram tsa' chumle ti' lumal Canaán. Lot tsa' chumle ti tejclum tac am bʌ ti joctʌl. Tsa' c'ʌlʌl majli ti' lumal Sodoma. 13Wen jontolob winicob ti Sodoma. An cabʌl i mul ti' wut lac Yum.

14Che' bʌ tsa' ujti i tʌts' i bʌ Lot ba'an Abram, lac Yum tsi' sube Abram: Joy q'uele pañimil. Q'uele ti norte yic'ot ti sur yic'ot ba' mi' pasel q'uin yic'ot ba' mi' bʌjlel q'uin. 15Come mi caj cʌq'ueñet pejtel jini lum woli bʌ a q'uel. Mi caj cʌq'ueñob a p'olbal ti pejtelel ora. 16Mi caj c p'ojlesan a p'olbal che' bajche' jini ts'ubejn am bʌ ti lum. Mi an majqui mi' tsic jini ts'ubejn mi mejlel i tsic a p'olbal ja'el. 17Yom ma' wa'tʌl. Yom ma' xʌn ñumel ti' wa'tilel yic'ot ti c'ʌttʌlel jini lum, come mi caj cʌq'ueñet, che'en Dios. 18Jini cha'an Abram tsi' ch'ʌmʌ majlel pisil bʌ i yotot ya' ba'an c'olol te' ti Mamre am bʌ ti Hebrón. Ya'i tsi' melbe i pulʌntib i majtan lac Yum.

Currently Selected:

Genesis 13: CTU77

Highlight

Copy