Eḍighiom ạar 27

Ụsaay ạPol obhin nọki taRom

1Amen nọoḍeghe ughōl ezōor tọki tItali, peedi ịseghe mạPol nꞌịnon ẹde arōoy ikoli ịlogh tạravo tạJulios. Odi onyiin ogbōgh ōoy mi tẹku iḅe rạagham arōoy ibhꞌaRom, ibha ughōl bọ “Ẹku tỌgostos obho.” 2Pezōor ụghi uḍigh toghuugh ụnwiaru olo ạḍua tAdramitiom natu, olo natu mọghi taraagbolom ibhꞌebhugh obhꞌEsia. Ezōor uḍigh pamutiom. Ạristakos, olꞌạTesalonika tebhugh obhꞌaMasidonia, ạtuonom ạni zezōor. 3Ạḅaal pezōor ụghi usi taSaidon. ẠJulios aḍighi miiḅi magey mạPol, molo odi ạḅelemaan zodi mọghi ọmiin ghạ ạburubulol odi, mobhin kạar kạar olo odi nagbẹel. 4Keḍio ezōor umina useghenyaan utẹn. Tebum ogim obho nạpibhoghom ezōor obho, pezōor ụzoghi ụgbaanemi tọtu eeghaara obꞌegbolom obhꞌạSaipros. 5Keḍio ezōor uru ụḅeeny mobꞌọbhiiny obho utẹn marisiḍia aSilisia nꞌạPamfilia, uru usi taMaira mi taLisia. 6Tesuo pogbōgh ōoy obho ạbham ezōor obho ạmiin moghuugh ụnwiaru olo ạḍua tẠleksandria natu mọghi tItali, podi ạsaay ezōor.

7Ezōor ụzoghi mịbam mịbam mi tesi ịzal aḍuma nꞌọmiinom, keḍio ugbi mọkpo oghuugh obho mi tegbolom olo atuan maKnaidos. Ogim obho omōrō ḍio nomōrō molo ezōor kọghiom oghuugh obho taghisigh, pezōor ụghiom oghuugh obho mi tekẹeny ạvo ọtu egbolom obhꞌaKrit obho adeeny obho, ụzoghi teekitena bhꞌaSalmoni. 8Ezōor ụmaar ni nọtu, ụzoghi ninii nꞌobꞌọmiinom puru usi tesi olo ughōl Egbolom Omuzōnaan, olo ogbeenyan io mẹma bhꞌaLasea.

9Ezōor obia magey tesuo molo iḍighi molo ezōor uḍigh togbōgh ịiḅaghami momutiom, tebum obho aruḍuma bho arōoy aJu nẹtologhu ghạ mọkoony mebum iikpulughu obho neetẹn nạ bho. PạPol aakiom kua zeedi, 10“Arōoy, ạami nạmiin mobho ọzoghi ezira mọḍua tesuo ọghi taghisigh ọmiinom tẹtol ni; amupẹ ọkpo bho idi bọ toghuugh obho, nꞌoghuugh obho, tẹtol ni, ụmaar io suo arōoy tẹpozu ni nạ.” 11Ogbōgh ōoy ẹgham obho ạtuonom mibha ọzoghiom oghuugh obho nꞌobo bho oghuugh obho ịkpete bho. Omōruōm io mibha tạPol. 12Egbolom obho ọneghe ḍio molo arōoy kẹrol tamen uuta; molo iḍigh tologhi ọlogh arōoy obho molo komutiom togbo ọbhiiny obho kọkparam kosi taFiniks, erumolo totue ni. Odi esi obho egbolom aKrit olo ạdaanaan mogim obho ạneghe mọrol amen uuta bho.

Ogim ọbhiiny

13Tọpaḍi obho eedi nẹva mọḅol obho, pọbam ọfefe ọpibha ạke mọbhibh, peedi ighōl meedi tetue ni eḍighi mẹzo bho eedi ịitua bho. Peedi ịkoton moghuugh obho ịmaar ịtu magey tọtu aKrit. 14Obia ḍio pọoghuanaan ọpibha, olo ughōl “Yuroklaidon”, ạbhibh ạḍua tegbolom obho aru, 15panyu moghuugh obho. Ẹzo bho oghuugh obho otue mu mọdaanaan ọpibha bho, pezōor ụḅelemaan mọpibha bho mobhin ọghi kesi kesi olo odi ạghi ạghi. 16Amen abhin ezōor asiom tọbam eeghaara egbolom obhꞌạKoda, pezōor ụteeny mọbam esi obhooghia. Tesuo, nꞌogbōgh ọmiinom, pezōor ubhin ụlokian rạvo molo ọbam oghuugh obho ụkpuom obho oḅomian abhẹ. 17Keḍio ezōor uḍur ụsaay ụseghe mẹde ooḍigh ụnwiaru obho ụkpuom. Eedi nekiil mobho eedi tẹki ni mọgbana tobꞌeekpu ọosaar ọtu ọbhiiny obhꞌaLibia; pezōor usōrōghiom marukpe ụnwiaru obho ụḅelemaan mọpibha bho moreliom. 18Ọoghuanaan ọpibha bho odi nini, molo ạḅaal peedi ịke mobhunughi ẹde ọkpo bhꞌoghuugh obho orōḅōḍi tạmuum obho. 19Amina ạḅaal peedi nꞌạravo eedi ịḅirogh mẹde ọkpo oḍighi oghuugh obho irōḅōḍi tạmuum. 20Aruḍuma nẹebugh molo aghōzōgh nꞌịinaany ezōor dọmiin io, keḍio ogim obho nạpibh ghạ ninii be mọoghuanaan ọpibha molo ezōor nooḅulooy maghuḍum ezōor.

21Amen arōoy obho nẹerologhu mọkoony mọodoony amen, keḍio ạPol aḅetunu togbo eedi ạkpete kua, “Arōoy, enyina ịmoghonyan ni bọ ẹḅele mọzoghi ọḍua taKrit, ịpueghian nꞌamupẹ ọkpo bhibha kịtol io. 22Keḍio esiibha bho, sesen ni, ịkuemi miloghi enyina! Bọbon onyiin enyina olo tạpo olo; oghuugh obho be mobho tapẹ. 23Uḍugul obho tạḅaal obho, potelema tẸnaan ạmi, obho ạami naakpulughu obho, aru tạmi 24ạkpete kua, ‘ẠPol, ughiil ghạ ruugu!’ Ạna tạmara ni taghisigh ọolema bhꞌaRom; keḍio Ẹnaan toḍighi iiḅi obhꞌodi nạanogho ạna maghuḍum oomo arōoy obho idi toghuugh obho. 25Tebum ipa bẹleni, arōoy, ịkuemi miloghi enyina! Ạami amōruōm mẸnaan mobho temute ni kẹzo bho ụgba ụnogho ạami obho. 26Tạpibh ni asiemi ezira mi teḅum onyiin egbolom.”

27Togbẹbhiōm aḍiōbh nꞌinya uḍugul aḍuma bho, pọpibha ọbhiiny aMeditarenian obho ạbhibhom ezōor. Ạteeny mogbo uḍugul, pobo bho nẹzoghiom moghuugh obho ịmiin ighōl nootuan tegbolom. 28Peedi ituḅeen mooḍigh ịva ịmiin mobho ekuḍum obho aru mịraar ạraala ịpaḍi arula; ịbam amen itẹn peedi imina iḍighi nạ monyiin ẹzo bho ịmiin mobho naasi mịzal ạraala nꞌaḍiōbh. 29Aruugu nesibh eedi mobho eedi tẹki ẹgbana tạrubharakpar, peedi isōrōghi minya arigbirigbiri mi tạman ụnwiaru obho, neekpulughu ghạ molo aḍio kẹḅaal. 30Pobo bho nẹzoghiom moghuugh obho nẹva ghạ mobhun ọḍua, peedi isōorẹ mọbam oghuugh obho iḍighi kilo eedi nẹki mosōorẹ ịnon arigbirigbiri mi taghisigh ụnwiaru obho. 31PạPol ạkpete kua ạnogho mogbōgh ōoy ẹgham obho nꞌarōoy ẹgham obho, “Erumolo obo bho nẹzoghiom oghuugh obho ịtol io suo, penyina iḍumogh mu.” 32Parōoy ẹgham obho isōbh mooḍigh oghuugh obho ịḅele odi ạtama ạḍua.

33Aḍio natu mọḅaal, keḍio ạPol aasen oomo eedi mole ịbam eḍian, ạkpete kua, “Neegbẹbh aḍiōbh nꞌinya aḍuma mobho enyina neeḅōrō, molo oomo amen bhibha enyina dele ḍio bọbon ạar. 34Ạami naasen enyina siibha bho, ile meḍian; ile molo enyina eḍum. Bọbon ạsilaan ẹmu onyiin enyina olo tapẹ olo.” 35ẠPol ạkpete miibha bho ạḅele, podi ạseghe mạbred, ạnogho lịsebh mẸnaan mi taghisigh oomo eedi, aḅigi, ạke mole. 36Peedi ịkparami mologhi eedi, oomo eedi iru ile mịbam ariḍian. 37Oomo ezōor obo bho iḍigh toghuugh obho inya ilo moḍual ạraala arōoy. 38Tamen olo kōoy kōoy naale milo ịneghiom, tẹzo olo oḍighi oghuugh obho kaabhōogh peedi ịḅirogh mạruḅa eḍian ilo idi kịbiakpa obho isumughi tọbhiiny obho.

Oghuugh obho ạveleghian

39Aḍio aru ạḅaal, obo bho nẹzoghiom moghuugh obho ịlogh io elẹgh megbolom obho, eedi ịmiin mesi olo odi kẹgul nꞌesiḍia, keḍio nẹetua ghạ mobho, erumolo eedi tetue ni, eedi tekitonom moghuugh obho mi tẹgul obho. 40Peedi iigbooy mịkpuom oghuugh obho, ịḅelemaan iḍinighu tọbhiiny obho, tonyiin amen obho peedi ịkoriom miiḍigh ibha ịbham bọ mariisi ọzoghi obho. Keḍio eedi iru iibhaghamiiy ịsiine tạnyu marukpe oghuugh obho, ibhꞌaghisigh obho, molo ọpibha bho ạpibh oghuugh obho ạki taghisigh, ọghi osi tegbolom obho. 41Poghuugh obho ạghi ạgbana teḅum ọosaar; aghisigh obho naalegheri ạtol peke peke molo onyaghaan mu, ạman obho naḅomian mebum araakpa ạmuum obho.

42Iḅe rạagham obho neḅia mọze oomo arōoy ikoli obho molo bọbon onyiin eedi olo tạmughi apun akiil ạḍua ọtol. 43Pogbōgh ōoy iḅe rạagham obho nạva mẹzo olo ọbhel ạPol, podi ạpuenaan zeedi. Kpẹlen nꞌipa odi ạto molo kōoy kōoy olo tatue ni ạmughi, mopẹl osōor ọmughi obhun; 44keḍio ipedi obho ịtuonom ịkpabhagh tạsuḍubo nꞌịpaḍi oghuugh obho. Iibha pẹzo oomo ezōor uḍighi ubhunughu ụman.

Currently Selected:

Eḍighiom ạar 27: OḌU

Highlight

Copy