Eḍighiom ạar 19

ẠPol ạghi tẸfesos

1Tamen obho Ạpolos odi mi tạKorint obho, pạPol aghiraan rạama ạnyu obho aru asi mi tẸfesos. Tesuo podi atulom mẹde arōoy ilo nẹtuonuman mạJizos, 2keḍio odi apuruan kua zeedi, “Tamen obho enyina imōruōm obho, enyina ebhin mẸmugh Iigbia bho?” Peedi ịbhagharana kua, “Ezōor dọmoghon ghạ nạ ḍio milo igboloman nꞌẸmugh Iigbia bho.” 3PạPol apuruan kua, “Kokōr oḍigh ozua ạmuum mobho enyina izua?” keḍio eedi ịbhagharana ighōl maa, “Ozua ạmuum tạJon.” 4PạPol ạkpete kua, “Ozua ạmuum obho tạJon ilꞌobo bho ighiraan tịkarabh eedi obho; keḍio odi ạkpete ạnogho marōoy Izirẹl momōruōm onyiin obo bho natu tạman odi obho — odi pạJizos.” 5Eedi ịmoghon miibha bho peedi iru izua mụum mi taḍien tạJizos Obạmọogh obho. 6PạPol aru ạḅamaghi rạvo odi mi tạruumu bhꞌeedi, pẸmugh Iigbia bho aru azuughiom zeedi, peedi ịkpaay mọnu ạraama, ịgba nạ dōm obho tẸnaan. 7Oomo eedi tegbẹbh ni maḍiōbh nꞌịzal.

8PạPol aḍigh totu iikpulughu obho, abhinom nꞌọoghuanaan ologhi ạgba ghạ ạnogho rōoy obho mi tesi ịraar ụvanyu nạkanan ghạ nꞌarōoy obho, nạva ghạ mokiton eedi mi tilo igboloman nꞌAde-Ọolema tẸnaan. 9Ẹtede eedi ịḅaar liḍim mẹmu, molo imōruōm io nẹkpeteey nạ mịkarabh ọkpo milo igboloman nꞌEbōom tObạmọogh obho mi togbo arōoy obho. PạPol ạḅele zeedi ạseghe mobo bho nẹtuonuman obho ạḍua, molo oomo aḍuma odi ạtughumiom mịtughumiom mi tobꞌotu ogbo ịtughumiom aTiranos. 10Odi aḍighi kua moomo ịzal ạsia molo oomo arōoy ibha netugh taruubhugh obhꞌEsia, arōoy aJu obho nꞌarōoy isoloman ịmoghon mọnuekpete tObạmọogh obho.

Ạnwuny taSkiva

11Ẹnaan naḍighi mịkanya ọkpo ibꞌaruugu mi tạvo tạPol, 12molo bọbon ạpoghota bolobolo ạko ukpe olo odi naaḍighiom mạar kobhin ọghiom obo bho nẹnwe bho pẹzegh obhꞌeedi ọḍua, ịkarabh ạruumugh ẹkona pọḍua. 13Ẹde arōoy aJu obho neeghiraan apirighanogh mịkarabh ạruumugh obho ẹkona, ẹva nạ mobhin aḍien obho tạJizos Obạmọogh obho moḍighiom. Eedi nẹkpete ghạ kua ẹnogho mịkarabh ạruumugh obho, “Ạami ụkpete nạnogho ạna mi taḍien tạJizos obho ạPol abhin nạgbaam obho.” 14Oḍual ạnwuny uvẹmụ iḅo miiḅua olꞌaJu obho, obho aḍien odi ughōl Skiva, pobo neḍighi ghạ miibha bho. 15Pọkarabh ẹmugh obho ạkpete kua ạnogho eedi, “ẠJizos ạami alōghōm, ạPol ẹkona ạami naalōghōm, enyina kikōr arōoy?” 16Pōoy obho ạteeny mọkarabh ẹmugh obho abhum eedi aḍulogh ạloki rạnem, molo oomo eedi ighilighu mẹduḅa imute totu obho. 17Oomo arōoy aJu obho nꞌarōoy aGris obho ibha netughogh tẸfesos obho ịmoghon ni miibha bho ẹman, molo aruugu isibh ni zeedi magey, nꞌolo uubhughumi magey maḍien obho tạJizos Obạmọogh obho. 18Ọlogh obo bho neemōruōm obho iru togbo arōoy obho neetuma ẹgba milo eedi neeḍighi. 19Ọlogh obo bho nẹetuugha mịiḍaany obho ibhinogh mịbhereer ịtuugha bhꞌeedi iru iikōbhōghi monyiin esi ịsu nyạn mi tasumusigh oomo arōoy. Uukōbhōghi ugbi mọnu ikpoki ibha ịbhereer obho ịla bho igbẹbh erubal ḍiōbh ẹḅa. 20Iibha bho iru iḍighi molo ọnuekpete tObạmọogh obho abhōbh alela magey nꞌọoghuanaan ạvo.

Elebhir olo uḅe tẸfesos

21Iibha bho imute bho iru itẹn, pạPol ạatua tologhi odi mọḅol taMasidonia nꞌaGris ọghi taJerusạlẹm. Odi nạakpete kua, “Ạami nạaghi epa, ạami tạki nạ ni mọmiin aRom.” 22Podi arōm maTimoti nꞌẸrastos, ịzal obo bho nẹloghonaan zodi mạvo, mọghi taMasidonia, podi tamina ạtol mịbam amen mi tebhugh obhꞌEsia.

23Taruḍuma bhibha pamen ogbōgh ọoḅaghami odi mịkanya mi tẸfesos mebum Ebōom obho tObạmọogh obho. 24Onyiin ọlemogh masilva olo ughōl Dimitrios nạlem ghạ masilva atuom obꞌotu eru obho ughōl bọ Ạtemis obho, molo oḍighi obhobho todi nạnogho zodi mịkanya ạsuo nꞌobo bho neḅuan nꞌodi obho. 25Podi abheleghi moomo eedi monyiin esi, nꞌobo bho neḍighi nạ moḍigh odi oḍighi obho, ạkpete kua ạnogho zeedi, “Otu, enyina meelōghōm mobho ẹela ezira idi toḍighi obhobho. 26Enyina nẹemiin ẹmoghon nꞌalōor enyina mọkpo ilo ōoy obhobho ạPol naḍighi. Odi aghōl maruru ibha arōoy ịkaay obho mẹnaan io, molo odi naakirion miloghi ọlogh arōoy, mi tesuo Ẹfesos nꞌịnon ariisi mi toomo ebhugh obhꞌEsia. 27Esiibha bho, ilo temute, oḍighi obhobho tezira tatu ạteeny mọkarabh aḍien. Ipa nạ be ḍio nạ, otu obꞌeru obho tezira Ạtemis tapẹ siibha, ụmoghon mu mogbōgh aḍien obhobho todi — eru obho kōoy kōoy mi tEsia nꞌẹmar-arōoy obho neekpulughu obho.”

28Amen arōoy obho ịmoghon mọnuekpete bhibha, pạruumu eedi ịisuuy, ịke momulughu maa, “Olo apu mẠtemis obhꞌẸfesos olo!” 29Oomo ẹma bho naazighinian. Arōoy obho ịghi ibhum mạGayos nꞌẠristakos, ịzal arōoy aMasidonia ilo nẹtuonuman mạPol, ibhin eedi ịghi tobꞌetẹrẹ ọḍe bho. 30ẠPol nịvo nịvo ạva mọghi tarōoy obho, keḍio obo bho imōruōm obho ịbham zodi. 31Ẹde ịvaruumu ạkoti obho, ạburubolol odi ẹkona, irōm dōm iruom odi mọḅele omutiom alōor odi tetẹrẹ. 32Tamen opopo oomo eedi arōoy obho nẹyaghayagha: ẹde nemulughu kẹre, ẹde nemulughu mịnon, ebum obho ạkar ẹde eedi ilōghōm io mạar obho aḍighi keedi iru isōor monyiin esi obho. 33Ẹtede eedi meeghōl mẠleksanda aḍighi, tebum obho arōoy aJu obho neebhin zodi iseeri motẹnōm taghisigh. Keḍio odi Ạleksanda aabhaghami mạvo odi molo eedi kẹḅele, odi kạkpete mạar kạgba mibhꞌọnu odi kạnogho rōoy obho. 34Amen eedi ịmiin mobho odi aru molꞌaJu obho, poomo eedi imulughu monyiin ẹzo moomo ịzal asuo ighōl kua, “Olo apu mẠtemis obhꞌẸfesos olo!”

35Ikunughi obho keḍio ọge-mọbhereer ẹma bho aru adenyemi rōoy bho ạkpete kua, “Arōoy Ẹfesos, kōoy kōoy maalōghōm mobho ẹma bhꞌẸfesos neekō ghạ mobꞌotu eru obho Ạtemis nꞌibha ọbharakpar iigbia ạḍua bọ tạnyu ameel obho. 36Bọbon ōoy olo tạparanaan miibha bho olo. Tebum ipa bẹleni, ideny, íḍighi ghạ mọkpo ilo ịneghe ḍio. 37Enyina ibhin eru suo marōoy ilo ikulaan io motu eru enyina, dẹkpete nạ ḍio mịkarabh ilo igboloman nꞌodi. 38Erumolo aDimitrios nꞌarōoy oḍighi odi ịteeny mọkpe nꞌōoy, saruḍuma ạkoti nꞌạruula bho sidi, eedi ebhin zeedi ẹghi tepa. 39Erumolo ọnon ạar odi olo enyina nẹva, pu tọki totu ẹma bho ọkpetian. 40Ezira toḍigh tọkpe bho usōorẹ mẹgham mi tiibha bho imute dodon obho. Bọbon ẹzo ọgba ọḍua mi toomo iibha bho olo, ilo ezira ụteeny nạ mọgba tibha imute bho ilo.” 41Odi ạkpete miibha bho ạḅele, podi abhirighanogh zeedi.

Currently Selected:

Eḍighiom ạar 19: OḌU

Highlight

Copy