Mak 8

Yeezu Naŋ Ko Noba Turi Anaare Bondirii Ka Ba Di

(Mat 15:32-39)

1A beri na poɔ, nembeɛoŋ naŋ da la wa lantaa a Yeezu zie kyɛ ka bonzaa da ba kyebe ka ba na di, O da boɔle la a O potuuribo a yeli ko ba: 2“N nyɛ la a noba ka ba nembaaloŋ erɛ ma, bonso, beri ata la ŋaa ba naŋ be N zie kyɛ ba di bonzaa. 3Ka maa bare ba ne a kɔŋ ka ba kulo, ba na yĩĩe la a sobiriŋ, bonso, ba mine yi la tentɔbɔ a wa.” 4Ka a O potuuribo da soore O, “Yeŋ ka neɛ na nyɛ bondirii a dalempoɔ ŋa poɔ a ko a noba bama zaa ka ba di?” 5Ka O soore ba, “Boroboro awola la ka yɛ taa?” Ka ba yeli, “Ayopoi” 6Lɛ la ka O e ka a noba zeŋ teŋɛ; kyɛ ka O de a boroboro ayopoĩ na a puori Naaŋmen bareka, kyɛ nyɔge a ŋmaare, a de ko a potuuribo ka ba de poŋ ko a noba. Ka a potuuribo da de a poŋ ko a noba. 7Ba da taa la zoma meŋ belaa; kyɛ a Yeezu naŋ da wa puori baare, O da yeli ko la a potuuribo ka ba de a meŋ poŋ ko a noba. 8A noba zaa da di tegɛɛ la kyɛ ka ba wuo a boŋkpaa ka a pa pɛre ayopoĩ. 9A noba da ta la turi anaare. O pãã da bare ba la ka ba kuli ba yie. 10A daadaalɛ la ka a Yeezu ne a O potuuribo da kpɛ gbori a gaa a Dalemanuta paaloŋ.

Noba Naŋ Boɔrɔ Ka Yeezu Toŋ Toŋkpeɛne Ka Ba Nyɛ

(Mat 12:38-42; 16:1-4)

11A Faraziimine da wa la a Yeezu zie a wa piili ŋmeɛrɛ nɔkpeɛne ne O a yele, toŋ toŋkpeɛŋaa naŋ yi tenvelaa#8:11 Tenvelaa: A Kiristabiiri mine maŋ boɔle la a yelbiri ŋa ka ‘Dapare.’ ka te nyɛ. Ba da boɔrɔ la ka ba e O nyɛ. 12Ka a Yeezu voore fãã kyɛ yeli, “Bonso ka a zenɛ noba boorɔ boɔrɔ toŋkpeɛne ka ba nyɛ? Yelmeŋɛ ka N yele korɔ yɛ, a zenɛ noba boorɔ ŋa koŋ nyɛ toŋkpeɛŋaa zaa.” 13A Yeezu da bare ba la kyɛ leɛ kpɛ a gbori a ŋmaa a mane gaa a lambori kaŋ na.

A Faraziimine Ane Hɛrɔde Wulfaare Yɛlɛ

(Mat 16:5-12)

14A Yeezu potuuribo da innee la ka ba de boroboro a kyɛnɛ ne, kyɛ ba da taa la boroboro bon-yeni yoŋ a gbori poɔ. 15Ka a Yeezu da kpãã ba a yele, “Yɛ gu yɛmenne velaa, a baŋ ne a Faraziimine ane a Hɛrɔde gagarre yɛlɛ.” 16Ka a potuuribo leɛ yeli ko taa, “Te naŋ ba taa boroboro la so ka O yeli a ŋaa.” 17A Yeezu naŋ wa baŋ bonna yɛlɛ ba naŋ yele, O da soore ba la, “Bonso ka yɛ yele yɛ naŋ ba taa boroboro yɛlɛ? Yɛ niŋe naŋ ba vɛle ka yɛ na baŋ a yɛlɛ ŋa tɛgɛ be? A yɛ sukyie darɛɛ la be? 18Yɛ mɔɔ taa la nimie kyɛ zagre ka yɛ nyɛ be? Yɛ taa la tobo kyɛ zagre ka yɛ kyɛlle woŋ be? Yɛ ba leɛ-teɛrɛ yɛlɛ be? 19Saŋ na N naŋ da ŋmaa a boroboro anuu ko a noba turi anuu, pɛre awola la ka yɛ da wuo a bon ŋmaara ka a pa?” Ka ba yeli ko O, “Pie ne ayi.” 20Ka O la soore ba, “Kyɛ a saŋ na meŋ N naŋ da ŋmaa a boroboro ayopoĩ ko a noba turi anaare, pɛre awola meŋ la ka yɛ da wuo a bon ŋmaara ka a pa?” Ka ba la yeli ko O, “Ayopoi.” 21Lɛ la ka O da soore ba, “Yɛ mɔɔ naŋ ba baŋ a tɛgɛ?”

Yeezu Naŋ Saŋ Dɔɔ Zɔŋ Kaŋ Bɛsaada Poɔ

22A Yeezu ne O potuuribo naŋ da wa ta Bɛsaada teŋɛ, noba mine da te taa la dɔɔ zɔŋ kaŋ wa ne O zie a wa sɔre O ka O de O nu seene ne a dɔɔ. 23Ka a Yeezu nyɔge a dɔɔ nu a tage o yi ne a teŋɛ poɔ. O naŋ da wa toore nentaare eŋ a dɔɔ nimie poɔ, O da de la O nuuri pare o zu, kyɛ soore o, “Fo na toɔ̃ nyɛ la bonkaŋ be?” 24Ka a dɔɔ zɛge o zu a kyɛ yeli, “N nyɛ la noba, kyɛ ba waa ŋa teere, a kyɛnɛ.” 25Lɛ la ka a Yeezu laboreŋ de O nuuri seene a dɔɔ nimie ka a dɔɔ kaa kpeɛŋaa zaa ka a o zɔnnoŋ deɛ baare, kyɛ ka o nyɛrɛ weliweli. 26Lɛ la ka a Yeezu bare a dɔɔ ka o kulo o yiri, kyɛ yeli ko o, “Tɔɔ wa leɛ gɛrɛ a tembile na poɔ.”

Piita Naŋ Yeli Kyaare Ne Neɛ Yeezu Naŋ Waa

(Mat 16:13-20; Luk 9:18-21)

27A Yeezu ne a O potuuribo da kyɛnɛ gɛrɛ la a Sezaareya Filipae tembilii; ba naŋ da be a sobiriŋ kyɛnɛ gɛrɛ la ka O da soore a O potuuribo, “A noba yeli ka aŋ la ma?” 28Ka ba yeli sɔge O, “Ba mine yeli ka fo waa la Gyɔɔn Bati, ka ba mine meŋ yeli, Elaagya, ka ba mine meŋ yeli ka fo waa la a Ŋmen-yelmanneba na kaŋ.” 29Ka O soore ba, “Kyɛ yɛ meŋ yeli ka nembuo la ma?” Ka Piita yeli sɔge O, “Fõõ la a Mɛzaaya.”#8:29 Mɛzaaya: A Mɛzaaya tɛgɛ la a ‘Kirista.’ 30Ka a Yeezu kpãã ba ka ba ta wa yele O yɛlɛ korɔ neɛzaa.

Yeezu Naŋ Yeli O Kũũ Ane O Leɛ-iruu Yɛlɛ

(Mat 16:21-28; Luk 9:22-27)

31Lɛ la ka a Yeezu da piili kanna ba, ka a ferɛɛ la ka a Nensaala Bie di dɔgɛɛ yaga, ka a nembɛrɛ ane a Naaŋmen bagmaalkare ane a Naaŋmen bege wulwulibo zagre O bare, ka ba ko O kyɛ a beri ata puoriŋ ka O leɛ-iri yi a kũũ poɔ. 32O da yeli la a yɛlɛ ama ka a sãã weliweli lɛ. Ka Piita da taa O gyɛŋ yi ne a te nyare O zu. 33A Yeezu da leɛ kaa la a O potuuribo kyɛ tanne a Piita a yeli, “Tage yi be N zie, Setaana! Fo ba de fo teɛroŋ eŋ Naaŋmen boma eŋɛ, kyɛ nensaala boma eŋɛ la ka fo teɛroŋ be.”

34A Yeezu pãã da boɔle la a nembeɛoŋ ane a O potuuribo lantaa a yeli ko ba, “Ka neɛzaa wa boɔrɔ ka o leɛ N potuuro, a seŋ ka o soba ta taa o meŋɛ yɛlɛ a kyɛ de o dagaraa tuo tuuro ne ma. 35Bonso, banaŋ zaa naŋ boɔrɔ ka ba faa bamenne nyɔvoɛ, na kɔŋaa la, kyɛ banaŋ zaa meŋ naŋ sage ka ba kɔŋ ba nyɔvoɛ N zuiŋ ane a Ŋmen-yelnoore zuiŋ na leɛ nyɛ la a ba nyɔvoɛ. 36Boŋ tɔnɔ ka neɛ na nyɛ, ka o naŋ so a tendaa boma zaa, kyɛ kɔŋ o nyɔvore? 37Serɛzaa, boŋ ka neɛ na baŋ de leɛre ne o nyɔvore? 38Banaŋ zaa naŋ zoro N vi ane N yelbie vi a zenɛ noba naŋ ba zoro Naaŋmen ane yelbe-erebɛ zie, a Nensaala Bie meŋ na zo la ba vi ka O naŋ wa leɛ waana ne a O maleke sonne a O Saa veɛloŋ poɔ.”

Currently Selected:

Mak 8: DNTTP

Highlight

Copy