Mak 1

A Gyɔɔn Bati Naŋ Moɔle A Yeezu Waabo Yɛlɛ

(Mat 3:1-12; Luk 3:1-20; Gyn 1:19-28)

1A Naaŋmen Bie, Yeezu Kirista yelnoore piiluu.

2Aŋa lɛ ba naŋ sɛge a Ŋmen-yelmanna Azaaya gane poɔ:

“Nyɛ, N tonɔ la n tontonɔ ka o de fo weɛ,

O naŋ na nare a fo sori;

3kɔkɔre kaŋ ŋmeɛrɛ la kpɛlle a wɛgyɛŋ poɔ:

‘Nare a Daana sori,

maale O sobie ka a tori,’ ”

4A Gyɔɔn Bati da wa yi la a wɛgyɛŋ poɔ, a moɔlɔ a Naaŋmen yelbiri ka noba leɛ ba eebo a de suobu ka ba yelbebe nyɛ sudi. 5A Gyudiya tembilii noba zaa ane a Gyɛruzɛlɛm teŋɛ deme zaa da yire gɛrɛ la a Gyɔɔn zie, a kyiire ba yelbebe kyɛ ka o da korɔ ba suobu a Gyɔɔdan baa poɔ. 6A Gyɔɔn da su la bontaŋ kɔɔloŋ kparoo kyɛ da seɛ gane kpagre o seɛŋ, a da ɔɔrɔ sobo kyɛ dire tammalaara. 7O da moɔlɔ la a Ŋmen-yelnoore a yele, “Neɛ naŋ taa kpeɛ̃õ yaga gaŋ ma na tu la n puoriŋ wa, N gba ba seŋ ka N zuuni lori O nɔɔteɛ mie. 8N ko yɛ la suobu ne koɔ̃; kyɛ Ona na ko yɛ la suobu ne a Vooroŋ Soŋ.”

A Yeezu Suobu Deebo Yɛlɛ

(Mat 3:13—4:11; Luk 3:21-22; 4:1-13)

9A beri na poɔ, Yeezu da yi la Naazɛrɛ naŋ be Galili paaloŋ a wa ka Gyɔɔn ko O suobu a Gyɔɔdan baa poɔ. 10A Yeezu naŋ da wa yire a koɔ̃ poɔ, O da nyɛ la a saluoni ka o yuo ka a Vooroŋ Soŋ sigi wa aŋa ŋmanee a wa dɔɔ O zu. 11Ka kɔkɔre kaŋ da yi sazu a yele, “Fõõ la N Bidɔɔ, N Poyɛŋ Bie; fõõ la ka N poɔ pɛle ne yaga zaa.”

A Yeezu Enyaabo Yɛlɛ

(Mat 4:12-22; Luk 4:14-15; 5:1-11)

12A daadaalɛ ka a Vooroŋ Soŋ de a Yeezu te kpɛ ne a wɛgyɛŋ poɔ. 13O da be la a wɛgyɛŋ poɔ beri lezaayi, ka Setaana da wa e O nyɛ. O da laŋ kpeɛrɛ ne la a wɛdonne; ka a malekere da kaara O zie.

Yeezu Naŋ Piili O Toma A Galili Paaloŋ Poɔ

(Mat 4:12-22; Luk 4:14-15; 5:1-11)

14Ba naŋ da wa nyɔge a Gyɔɔn eŋ a nempagdie poɔ, a lɛ puoriŋ, Yeezu da wa la Galili poɔ a wa moɔlɔ a Ŋmen-yelnoore, 15a yele, “A saŋ taɛ la, ka a Naaŋmen naaloŋ peɛle, yɛ leɛ yɛ eebo, a sage de a Ŋmen-yelnoore.”

Yeezu Naŋ Boɔle O Dɛndɛŋ Potuuribo

16A Yeezu naŋ da wa kyɛnɛ a Galili Mane noɔreŋ, O da nyɛ la Saamon ne o yɔɔ Anduru ka ba lɔɔrɔ ba zonkyogri a mane poɔ; bonso, ba da waa la zonnyɔgrebɔ. 17Ka a Yeezu da yeli ko ba, “Yɛ wa tuuro ma, N na e la ka yɛ leɛ nyɔgrɔ nensaalba aŋa zoma.” 18A daadaalɛ ka ba deɛ bare a ba zonkyogri kyɛ tuuro O. 19O naŋ da la kyɛŋ tɔle belaa la ka O nyɛ Zɛbɛdii bidɔbɔ Gyimisi ane o yɔɔ Gyɔɔn, ka ba be ba gbori poɔ a liire ba zonkyogri. 20A daadaalɛ ka Yeezu boɔle ba; ka ba da bare a ba saa Zɛbɛdii ne a tontonema a gbori poɔ kyɛ wa tuuro a Yeezu gɛrɛ.

Dɔɔ Kaŋ Naŋ Taa Sefaa Yɛlɛ

(Luk 4:31-37)

21Ba da gaa la Kapanum; a pɛnnoo bebiri daare naŋ da wa ta, O da kpɛ la a puoruudie a te kanne noba. 22A noba nɔɛ da maaɛ la ane a O kannoo, bonso, O da kanna ba la aŋa neɛ naŋ taa kpeɛ̃õ. A O kannoo da ba waa ŋa a Naaŋmen bege wulwulibo kannoo. 23A lɛ poɔ, dɔɔ kaŋ naŋ da taa sefaa da be la a puoruudie poɔ, 24a da ŋmɛ kpɛlle a yele, “Boŋ ka fo boɔrɔ ka fo e te, Yeezu naŋ yi Naazɛrɛ? Fo waɛ la ka fo wa sãã te be? N baŋ la neɛ na fo naŋ waa, fõõ la a Naaŋmen Nensoŋ na.” 25Ka a Yeezu da tanne o a yele, “Bare gɔnne kyɛ wa yi a dɔɔ eŋɛ!” 26Ka a sefaa e ka a dɔɔ iri gyemɛ, a kyeerɛ ne kɔkɔkpeɛŋaa kyɛ wa yi a dɔɔ eŋɛ. 27A noba zaa nɔɛ da maaɛ la, ka ba soorɔ taa, “Boŋ yeli la ŋa? Wuli paalaa naŋ taa kpeɛ̃õ! O gba maŋ ko la sefaare noɔre, ka a tu a lɛ.” 28Wieouŋ lɛ ka a Yeezu yɛlɛ da yaare a Galili paaloŋ zaa.

Yeezu Naŋ Saŋ Baalba Yaga Saamon Yiri Poɔ

(Mat 8:14-17; Luk 4:38-41)

29A Yeezu ne a O potuuribo naŋ da wa yi a puoruudie poɔ, ba da gaa te kpɛ la Saamon ane o yɔɔ Anduru yiri. Gyimisi ane Gyɔɔn meŋ da poɔ la a ba poɔ. 30A Saamon deɛmpɔge da gaŋɛɛ la ne entole, ka ba da yeli o yɛlɛ ko a Yeezu. 31Ka a Yeezu da te nyɔge o nu ka o iri. Lɛ la ka a entole da bare o, kyɛ ka o iri piili kaara ba zie.

32A zimaane na, ŋmenaa naŋ da wa te kpeɛrɛ, ba da taa la ba baalba ane banaŋ naŋ da taa sefaare wa ne a Yeezu zie. 33Ka a teŋɛ noba zaa da wa gbiŋ a Saamon yiri dendɔreŋ. 34Ka a Yeezu da saŋ noba yaga naŋ da beɛrɛ baaloŋ boorɔ zaa, kyɛ digi sefaare yaga bare. A Yeezu da ba sage ka a sefaare yeli yelzaa, bonso, a da baŋ O la.

Yeezu Naŋ Yɔ Kanna Galili Poɔ

(Luk 4:42-44)

35A baguo saŋ, zie naŋ da naŋ ba vɛle sɛre, a Yeezu da iri gaa la zie kaŋ O yoŋ a te puori. 36Ka Saamon ane a o taaba da yi yɔ boɔrɔ O. 37Ba naŋ da wa te nyɛ O, ba da yeli ko O la, “A noba zaa yɔ boɔrɔ fo la.” 38Ka a Yeezu yeli sɔge ba, “Yɛ e ka te gaa a tenne na naŋ peɛle ka N te moɔle a yelbiri a be meŋ. Bonso, a lɛ zuiŋ la ka N wa.” 39A lɛ la ka a Yeezu da yɔ a Galili paaloŋ zaa a moɔlɔ a yelbiri ba puoruuderi poore kyɛ digre sefaare bara.

Yeezu Naŋ Saŋ Kɔŋkɔŋ Kaŋ

(Mat 8:1-4; Luk 5:12-16)

40Kɔŋkɔŋ kaŋ da wa la a Yeezu zie, a wa gbi dumo kyɛ sɔre O a yele, “Ka fõõ wa boɔrɔ, fo na toɔ̃ saŋ ma la.” 41Nembaaloŋ da kpɛ la a Yeezu yaga, ka O da teɛ O nu a seene a dɔɔ, kyɛ yeli ko o, “N boɔrɔ la, nyɛ laafeɛ!” 42A daadaalɛ ka a dɔɔ kɔnnoŋ da baare, kyɛ ka o da leɛ neŋkpeɛŋaa. 43A Yeezu naŋ da wa kpãã o yaga zaa baare, O da yeli ko o la: 44“Baŋ ne a, a ta wa yele yelzaa korɔ neɛzaa, kyɛ gaa te de fo meŋɛ wuli a Naaŋmen bagmaale wederɛ#1:44 De fo meŋɛ wuli a Naaŋmen bagmaale wederɛ: A Gyuumine puoruu sobie poɔ, ka kɔŋkɔŋ wa nyɛ sammo, a ferɛɛ la ka o de o meŋɛ te wuli a Naaŋmen bagmaale wederɛ ka o kaa o nyɛ a di danseɛ ka a kɔnnoŋ sereŋ barɛɛ la., a kyɛ pãã tere a kyɔɔtaare na a Moozul naŋ biŋ noɔre ka ba maŋ tere, ka a e danseɛ ba zie ka fo sereŋ nyɛ la sammo.” A daadaalɛ ka O da bare o ka o gɛrɛ. 45Kyɛ a dɔɔ da yi te moɔle la a yɛlɛ, a ŋmɛ a yaare zie zaa. A yɛlɛ naŋ da yaare yaga zuiŋ, a Yeezu da koŋ la toɔ̃ gaa teŋɛ zaa ka a noba ba baŋ ne O yɛlɛ. A Yeezu da be la a tembilii poore kyɛ ka noba da yire ziiri zaa waana O zie.

Currently Selected:

Mak 1: DNTTP

Highlight

Copy