Mat 15

A Sããkommine Yeltuuri Yɛlɛ

(Mak 7:1-13)

1A Faraziimine ane a Naaŋmen begɛ wulwulibo da yi la Gyɛruzɛlɛm a wa a Yeezu zie a wa soore: 2“Bonso ka fo potuuribo ba tuuro a te sããkommine yelwulii? Ba ba maŋ pɛge ba nuuri kyɛ dire.” 3Ka Yeezu yeli sɔge ba, “Ka bonso, ka yɛ meŋ zagra a Naaŋmen nɔɛ, a yɛ sããkommine yelwulii zuiŋ? 4Bonso, Naaŋmen yelee la, ‘Eŋnɛ fo saa ane fo ma,’ kyɛ ‘Soba na zaa naŋ yeli yelfaa ko o saa bee o ma, a seŋɛɛ la ka ba ko o.’ 5Kyɛ ka yɛnee yeli ka, soba na zaa naŋ yeli ko o saa bee o ma, ‘Sommo na zaa yɛ naŋ da na nyɛ yi n zie, N de a la ko Naaŋmen.’ Lɛ eŋ, a ba la fere ka a soba ŋa eŋ o saa. 6A yɛ sããkommine yelwulii zuiŋ, yɛ vɛŋɛɛ la ka a Naaŋmen yelbiri ba taa tɔnɔ. 7Yɛnee bampuori-kombampoɔ mine! A Ŋmen-yelmanna Azaaya da yelee yelmeŋɛ kyaare ne yɛ, o naŋ da yeli:

8‘A noba ŋa eŋnɛ ma la ne ba nɔɛ,

kyɛ a ba sukyie waa tɔɔre ne ma,

9ba puoro ma la weɛlɛ,

a wullo nensaalba begɛ aŋa a naŋ waa Naaŋmen begɛ.’ ”

Boma Naŋ Maŋ Dɛge Nensaala

(Mak 7:14-23)

10Lɛ la ka a Yeezu da boɔle a nembeɛoŋ a yeli ko ba, “Yɛ kyɛlle woŋ a baŋ a tɛgɛ: 11a ba e bon naŋ kpɛ neɛ noɔre a sigi la maŋ dɛge a nensaala, kyɛ bon naŋ tu a noɔre yi la maŋ dɛge a nensaala.” 12Lɛ la ka a potuuribo da wa O zie a wa yeli ko O, “Fo baŋ ka a Faraziimine suuri da iri ne la a yɛlɛ ŋa fo naŋ da yeli?” 13Ka a Yeezu yeli sɔge ba, “Teɛ na zaa N Saa naŋ be tenvelaa#15:13 Tenvelaa: A Kiristabiiri mine maŋ boɔle la a yelbiri ŋa ka ‘Dapare.’ poɔ naŋ ba sɛle, ba na voɔ o la bare. 14Yɛ bare ba; ba waa la zɔnne naŋ tagra ba zɔntaaba. Kyɛ ka zɔŋ wa tagra o zɔŋ tɔ, ba zaa na laŋ le la bogi poɔ.” 15Ka Piita yeli ko O, “Iri a sekpɔgre ŋa pare ko te.” 16Ka a Yeezu yeli, “Ka lɛ yɛ meŋ naŋ ba baŋ a yɛlɛ tɛgɛ? 17Yɛ mɔɔ ba nyɛ ka bonna zaa naŋ maŋ kpɛ nensaala noɔre maŋ sigi te kpɛ la o poɔ, ka o nyɛ bare? 18Kyɛ bonna zaa naŋ yire nensaala noɔreŋ, maŋ yi la o sukyiri poɔ, ana la maŋ dɛge a nensaala. 19Bonso, a sukyiri poɔ la ka teɛre faare maŋ yi, neŋko, moɔrɔ yɛlɛ, peɛ̃mo toma, nannyigri, danse-zirii, ane yosãã. 20A ama la maŋ dɛge nensaala, kyɛ bondirii diibu ne nudɛgre naane maŋ dɛge nensaala.”

Kena Pɔge Kaŋ Yeldeebo Yɛlɛ

(Mak 7:24-30)

21A Yeezu da yi la a be, a gaa Taaya ane Sedɔŋ tenne paaloŋ. 22Lɛ la ka Kena teŋɛ pɔge kaŋ da wa yi piili boɔlɔ gboligboli, “Zo n nembaaloŋ, Davil Bidɔɔ; sefaa dɔgrɔ la n pɔgeyaa yaga zaa.” 23Kyɛ a Yeezu ba yeli yelzaa tɔŋ a pɔge. Ka a O potuuribo wa sɔre O, a yele, “Bare a pɔge ka o gaa, o tuuro pɔgrɔ la gɔmɔ eŋnɛ te.” 24Ka O yeli sɔge, “A Izerayɛl boorɔ noba naŋ waa ŋa peere naŋ bɔre yoŋ zie la ka ba toŋ ma.” 25Kyɛ ka a pɔge da wa gbi dumo a Yeezu niŋesogɔ a yeli, “Daana, soŋ ma.” 26Ka O yeli sɔge, “A ba seŋ ka ba de a bibiiri bondirii lɔɔ eŋ baare.” 27Ka a pɔge yeli, “Yelmeŋɛ la Daana, kyɛ a baare meŋ maŋ di la a demee bondi-purimo na naŋ lere a teŋɛŋ.” 28Lɛ la ka a Yeezu yeli ko o, “Pɔge, fo yeldeebo waa la kpoŋ! Vɛŋ ka a e seŋ lɛ fo naŋ boɔrɔ. A paretɛloŋ na poɔ ka a o pɔgeyaa da nyɛ o sammo.”

Yeezu Naŋ Saŋ Neŋyaga

29A Yeezu naŋ da wa yi a be, O da tu la a Galili mane konkooriŋ a te do zeŋ taŋzu. 30Neŋyaga da wa la O zie, a taa wɔɔre, neŋkɔgre, zɔnne, muuni ane baalba yaga wa ne. Ba da wa ne ba la a Yeezu niŋesogɔ, ka O saŋ ba. 31A noba nɔɛ da maaɛ la, ba naŋ da wa nyɛ ka a muuni yele yɛlɛ, ka neŋkɔgre leɛ neŋkpeɛne, ka wɔɔre kyɛnɛ, kyɛ ka a zɔnne nyɛrɛ. Ka ba da puu a Izerayɛl Naaŋmen.

Yeezu Naŋ Ko Noba Turi Anaare Bondirii Ka Ba Di

(Mak 8:1-10)

32Lɛ la ka a Yeezu da boɔle a O potuuribo ka ba wa O zie, ka O yeli, “N nyɛ la a noba ka ba nembaaloŋ kpeɛrɛ ma, bonso, beri ata la ŋaa ba naŋ be N zie, kyɛ ba di bonzaa. Kyɛ N ba boɔrɔ ka N bare ba ka ba gɛrɛ ne kɔŋ, ka lɛnaane ba na pɔɔ wa yĩĩe la a sobiriŋ.” 33Ka a potuuribo yeli ko O, “Yeŋ ka te na nyɛ bondirii a dalempoɔ ŋa poɔ a ko a neŋyaga bama ka ba di tege?” 34Ka a Yeezu soore ba, “Boroboro awola la ka yɛ taa?” Ka ba yeli ko O, “Boroboro ayopoĩ ane zombilii belaa mine.” 35A Yeezu naŋ wa tere noɔre ka a noba zaa zeŋ teŋɛ, 36O da de la a boroboro ayopoĩ ane a zombilii, a puori Naaŋmen bareka, kyɛ nyɔge ŋmaa a de ko a potuuribo ka ba meŋ de ko a noba. 37A noba zaa da die la a tege, kyɛ ka ba wuo a boŋkpaa ka a pa pɛre ayopoĩ. 38A banaŋ naŋ da di a diibu da waa la dɔbɔ turi anaare, ka a pɔgeba ane bibiiri ba poɔ. 39A Yeezu naŋ da wa bare a noba baare, O pãã da kpɛ la gbori a gaa Magadan paaloŋ.

Currently Selected:

Mat 15: DNTTP

Highlight

Copy