Luk 22

Ba Naŋ Bo Ka Ba Ko Yeezu

(Mat 26:1-5; Mak 14:1-2; Gyn 11:45-53)

1A Boroboro Dambo tigri ba naŋ boɔlɔ Ista tigri saŋ da tara la. 2A Naaŋmen bagmaalkare ane a Naaŋmen bege wulwulibo da boɔrɔ la sori ba naŋ na tu kyɛ ko a Yeezu, bonso, ba da zoro la a noba dabeɛ̃.

3Lɛ la ka Setaana da wa kpɛ Gyudase banaŋ boɔlɔ Ezekarɔte. O da waa la a Yeezu potuuribo pie ne bayi na kaŋ. 4A Gyudase pãã da gaa te nyɛ la a Naaŋmen bagmaalkare ane a Naaŋmen die polisiri nembɛrɛ, ka ba bo lɛ o naŋ na e a iri a Yeezu ko ba. 5Ba poore da pɛlɛɛ la yaga ne a lɛ, ka ba da sage ka ba ko a Gyudase libie. 6A Gyudase da sagɛɛ la, a pãã da piili boɔrɔ sori na o naŋ na tu a iri a Yeezu ko ba, saŋ na noba yaga naŋ koŋ kyebe.

A Ista tigri Naroo

(Mat 26:17-25; Mak 14:12-21; Gyn 13:21-30)

7A Boroboro Dambo tigri bebiri pãã da taɛ la. A bebiri ŋa daare la ka ba da maŋ ko a Ista tigri pilee. 8Lɛ la ka Yeezu da toŋ Piita ane Gyɔɔn, a yele, “Yɛ gaa te nare a Ista tigri bondiraa ka te di.” 9Ka ba soore O, “Yeŋ la ka fo boɔrɔ ka te gaa te nare a tigri?” 10Lɛ la ka O yeli ko ba, “Yɛ kyɛllɛ, ka yɛnee wa te kpɛ a teŋɛ poɔ, dɔɔ kaŋ naŋ tuo koɔ̃#22:10 Dɔɔ naŋ tuo koɔ̃: A Gyuumine poɔ dɔɔ da ba tuoro koɔ̃. na tuori yɛ la. Yɛ tuuro o, a te kpɛ a yiri na poɔ o naŋ na kpɛ. 11Yɛ te yeli ko a yidandɔɔ, ‘A wulwullo soorɔ la, “Yeŋ ka a saama die be, ka maa ne a N potuuribo na wa di a Ista tigri?” ’ 12O na wuli yɛ la peɛzu die kaŋ naŋ e yɛloŋ kyɛ ka bonzaa bebe. Yɛ nare a tigri boma a be.” 13Lɛ la ka ba gaa te nyɛ ka a waa seŋ a lɛ a Yeezu naŋ da yeli ko ba. Ka ba da nare a tigri boma a be.

A Daana Bondiraa Pare Bimmu

(Mat 26:26-30; Mak 14:22-26; 1 Kor 11:23-25)

14A saŋ naŋ da wa ta, Yeezu da zeŋ la O zenzie a diibu zie ane a apostoliimine. 15Ka O yeli ko ba, “N boɔrɔ la ne N poɔ zaa ka N di a Ista tigri ne yɛ, kyɛ pãã nyɛ dɔgɛɛ. 16N yele korɔ yɛ la, N koŋ la di o zaa kyɛ te ta a daare na a yɛlɛ zaa naŋ na tu a tuubu a Naaŋmen Naaloŋ poɔ.” 17Lɛ la ka O da de ŋmanlee, a puori Naaŋmen bareka kyɛ yeli, “Yɛ de poŋ ko taa; 18N yele korɔ yɛ la, a yi ŋaa kyɛ gɛrɛ, N koŋ la nyu a tewɔmɔ dãã kyɛ te ta a saŋ na a Naaŋmen Naaloŋ naŋ wa.” 19O pãã da de la boroboro, a puori Naaŋmen bareka, kyɛ nyɔge ŋmaa a de ko ba kyɛ yele, “A N eŋɛ la a ŋa, ka N de tere a yɛ zuiŋ. Yɛ maŋ e a ŋaa a leɛ-teɛrɛ N yɛlɛ.” 20Ba naŋ da wa di baare, O da de la ŋmanlee meŋ e a lɛ ne o zu kyɛ yele, “A ŋmanlee ŋa poɔ boma naŋ kyire a yɛ zuiŋ, e la a N nɔpaalaa zẽẽ. 21Kyɛ yɛ nyɛ, a neɛ na naŋ na iri ma tere, laŋne ma la a kyɛ a laŋ dire ne ma. 22A Nensaala Bie eŋ gɛrɛ la a seŋ lɛ ba naŋ sɛgre biŋ, kyɛ zubie soba la neɛ na naŋ na de O tere!” 23Lɛ la ka a potuuribo da piili soorɔ taa, ba buo soba la na e a yeli ŋa.

Nɔkpeɛne Naŋ Kyaare Kponnuŋ Yɛlɛ

24A Yeezu potuuribo pie ne bayi da ŋmeɛrɛ la nɔkpeɛne ne taa, a kyaare ne ba buo soba naŋ la kpoŋ ba zaa poɔ. 25Ka Yeezu da yeli ko ba, “A Nemboore-yobo#22:25 Nemboore-yobo: Noba na zaa naŋ da ba waa Gyuumine la a Nemboore-yobo. namine maŋ dire la kpeɛ̃õ a ba noba zu, kyɛ ka ba boɔlɔ a noba naŋ dire a naaloŋ a noba zu, ba soŋnema. 26Kyɛ a ba waa lɛ yɛ zie. Yɛnee eŋ, a yɛ poɔ neŋkpoŋ seŋ ka o waa ŋa yɛ zaa bibile, ka a yɛ wederɛ waa ŋa yɛ tontonɔ. 27Aŋ la a neŋkpoŋ, a neɛ naŋ zeŋ dire, bee a neɛ naŋ derɛ a diibu terɛ? A neɛ naŋ zeŋ dire naane be? Kyɛ maa eŋ be la yɛ poɔ a tonɔ korɔ yɛ.”

28“Yɛnee la a noba naŋ are N puoriŋ a N dɔgɛɛ zaa poɔ. 29Kyɛ N ko yɛ la a naaloŋ a seŋ lɛ N saa naŋ de ko ma, 30ka yɛ na di kyɛ nyu a N bondirii diibu zie a N naaloŋ poɔ, kyɛ zeŋ a naaloŋ dakogri zu a dire a Izerayɛl bale pie ne bayi na sɛrɛɛ.”

Yeezu Naŋ Yeli Piita Naŋ Na Zagre O Yɛlɛ

(Mat 26:31-35; Mak 14:27-31; Gyn 13:36-38)

31“Saamon, Saamon, kyɛllɛ! Setaana sɔre la sori ka o na yeɛle yɛ zaa aŋa kyi, 32kyɛ N puori ko fo la, ka ka fo meŋɛ yeldeebo na e kpeɛŋaa. Ka fõõ wa leɛ wa a N zie, teɛ a fo yɔɔmine ka ba meŋ are.” 33Ka a Piita yeli ko O, “Daana, N narɛɛ la ka maa ne fo laŋ kpɛ a nempagdie bee a laŋ kpi!” 34Ka Yeezu leɛ yeli ko a Piita, “Maa yeli ko fo, Piita, a zenɛ ŋa nɔdaa naŋ koŋ koŋ sɛre, kyɛ ka fo kyiiri gbɛre bota ka fo ba baŋ ma.”

Ganlɔge, Woɔ Ane Zɔɔzɔɔ-soɔ Yɛlɛ

35Yeezu da soore ba la, “N naŋ da toŋ yɛ, ka yɛ da ba de libi-woɔ, woɔ bee nɔɔteɛ, yɛ da kɔŋ la bonkaŋ be?” Ka ba yeli, “Ai, bonzaa da ba kɔŋ te.” 36Ka a Yeezu yeli ko ba, “Kyɛ ŋaa eŋ, neɛ naŋ taa libi-woɔ bee woɔ, feroo la ka o de o. Kyɛ neɛ naŋ ba taa zɔɔzɔɔ-soɔ a ferɛɛ la ka o koɔre o kpar-kpoŋ a te da ne kaŋ. 37Maa yele korɔ yɛ, N zie la ka a yɛlɛ ŋa ba naŋ sɛge a ŋmen gane poɔ na tu a tuubu, ‘Ba sɔre O la eŋ a koŋwoŋwuluu deme poɔ’; kyɛ serɛzaa, a yeli ŋa nyɛ la eebo N zie.” 38Ka a potuuribo yeli, “Daana, nyɛ, zɔɔzɔɔ-sɔre ayi be la kyɛ.” Ka a Yeezu leɛ yeli, “A seŋɛɛ la.”#22:38 A seŋɛɛ la: A Yeezu yeluu ŋa da ba wuli ka a zɔɔzɔɔ-sɔre ayi seŋɛɛ la, kyɛ a wullee la ka ba da ba baŋ naŋ so ka yele a lɛ, ‘a seŋɛɛ la’.

Yeezu Naŋ Puori A Oliva Taŋzu

(Mat 26:36-46; Mak 14:32-42)

39A Yeezu da yi gaa la a Oliva Taŋzu a seŋ O naŋ da maŋ erɛ lɛ, ka a O potuuribo da tu O. 40O naŋ da wa ta a zie, O yeli ko la a potuuribo, “Yɛ puoro a ta wa kpɛ enyaabo poɔ.” 41Lɛ la ka O da gyɛŋ yi ba zie a te gbi dumo a puori, 42“N Saa, ka a naŋ wa e fo poboɔbo, de a zuŋmanekoɔ̃ ŋa yi N zie, kyɛ e seŋ lɛ fo naŋ boɔrɔ, ka a ta e lɛ maa naŋ boɔrɔ.” [43Lɛ la ka maleke deɛ uri yi tenvelaa#22:43 Tenvelaa: A Kiristabiiri mine maŋ boɔle la a yelbiri ŋa ka ‘Dapare.’ sigi wa O zie, a wa ko O faŋ. 44A Yeezu da puoree la ane O poɔ zaa a O dɔgɛɛ poɔ, a da puri wale ka a kyire binne teŋɛ aŋa zẽẽ gbulo.] 45O naŋ da wa iri a O puoruu zu a wa a O potuuribo zie, O da wa nyɛ ba la ka ba gbire, ba poore naŋ da sãã zuiŋ. 46Ka a Yeezu soore ba, “Bonso ka yɛ gbire? Yɛ iri a puori, a ta wa kpɛ enyaabo poɔ.”

Ba Naŋ Nyɔge Yeezu

(Mat 26:47-56; Mak 14:43-50; Gyn 18:3-11)

47A Yeezu naŋ da naŋ kyɛnɛ yele a yɛlɛ la ka a potuuribo pie ne bayi na kaŋ ba naŋ boɔlɔ Gyudase la lɛ a te taa neŋyaga mine a tara ne. O da wa la a Yeezu zie a wa nyɔge O moore. 48Ka a Yeezu soore o, “Gyudase, ka lɛ mooroo la ka fo na de iri ne a Nensaala Bie tere wɛ?” 49A potuuribo na naŋ da be a Yeezu zie naŋ da nyɛ lɛ a yɛlɛ naŋ kyɛnɛ, ba da soore O la, “Daana, te voɔ te zɔɔzɔɔ-sɔre a zɔɔ be?” 50Lɛ la ka a Yeezu potuuro kaŋ da kyɛ a Naaŋmen bagmaalkare neŋkpoŋ gbaŋgbaa duluŋ toori kpɛlle. 51Ka a Yeezu da yeli, “Yɛ bare lɛ!” Kyɛ deɛ seene a toori a saŋ o. 52Lɛ la ka a Yeezu da yeli ko a Naaŋmen bagmaalkare, a Naaŋmen die polisiri nembɛrɛ ane a teŋɛ nembɛrɛ naŋ da wa ka ba nyɔge O, “Yɛ yi wa ne la zɔɔzɔɔ-sɔre ane dabɔlɔ ka yɛ wa nyɔge ma aŋa N naŋ waa fafaara be? 53Bebiri zaa ka N da maŋ laŋne yɛ a Naaŋmen die poɔ, kyɛ ka yɛ kanzaa daŋ ba zɛge nu seene ma. Kyɛ a yɛ saŋ ane a ligruŋ kpeɛ̃õ la a ŋaa!”

Piita Naŋ Kyiiri Ka O Ba Baŋ A Yeezu

(Mat 26:57-58, 69-75; Mak 14:53-54, 66-72; Gyn 18:12-18, 25-27)

54Lɛ la ka ba da nyɔge a Yeezu a taa O gaa ne a Naaŋmen bagmaalkare neŋkpoŋ yiri. Ka a Piita da be puoriŋ zaa a tuuro. 55Ba naŋ da wa te mare vũũ a davoro sogɔŋ a zeŋ uoro, Piita meŋ da zeŋ la ba poɔ. 56Lɛ la ka pɔglee kaŋ naŋ waa tontonɔ da nyɛ a Piita ka o zeŋ a vũũ kyaane poɔ, ka o vɔ nimie eŋ o kyɛ yeli, “A dɔɔ ŋa meŋ da be la a Yeezu zie.” 57Kyɛ ka a Piita da kyiiri a yele, “Pɔge, maa ba baŋ O.” 58A ba kɔɔre yaga kyɛ ka neɛ kaŋ meŋ nyɛ a Piita a yeli o, “Fo meŋ waa la a ba kaŋ.” Ka a Piita yeli, “Dɔɔ, N ba waa kaŋ!” 59Aŋa gogo yeni puoriŋ, neɛ kaŋ meŋ da pɔ la suuri a yeli, “Yelmeŋɛ zaa, a dɔɔ ŋa meŋ da be la a Yeezu zie, bonso, o waa la Galili neɛ.” 60Ka a Piita yeli, “Dɔɔ, N ba baŋ bonna fo naŋ yele!” A Piita naŋ da naŋ yele a yɛlɛ la ka nɔdaa deɛ da koŋ. 61A Daana da leɛ kaa la a Piita. Lɛ la ka a Piita leɛ-teɛre lɛ a Daana naŋ da yeli ko o, “Zenɛ, nɔdaa koŋ koŋ sɛre kyɛ ka fo kyiiri gbɛre bota ka fo ba baŋ ma.” 62A Piita da iri yi la yeŋ a te ŋma nentaŋ yaga.

Banaŋ E Yeezu La Kyɛ Ŋmɛ O

(Mat 26:67-68; Mak 14:65)

63A noba naŋ da guuro a Yeezu da piili erɛ O la laara kyɛ ŋmeɛrɛ O. 64Ba da leŋ la O nimie pɔge kyɛ soore O, “Baŋna, baŋna! Aŋ la ŋmɛ fo?” 65Ba da to O la zombie yaga.

Banaŋ Taa Yeezu Gaa Ne A Sɛrediribe Zie

(Mat 26:59-66; Mak 14:55-64; Gyn 18:19-24)

66Zie naŋ da wa nyaa, a teŋɛ nembɛrɛ, a Naaŋmen bagmaalkare ane a Naaŋmen bege wulwulibo da laŋ la taa ka ba taa a Yeezu wa ne ba niŋesogɔ. 67Ba da soore la a Yeezu, “Ka fõõ wa la a Mɛzaaya#22:67 Mɛzaaya: A Mɛzaaya tɛgɛ la a ‘Kirista.’ yeli ko te.” Ka a Yeezu yeli ko ba, “Ka maa yeli ko yɛ, yɛ koŋ sage de; 68ka maa soore yɛ meŋ, yɛ koŋ yeli sɔge ma. 69Kyɛ a yi ŋaa gɛrɛ, a Nensaala Bie na zeŋ la a Naaŋmen Kpeɛ̃õ Zaa Daana nuduluŋ seŋ.” 70Ka ba zaa laŋ soore O, “Ka lɛ, fõõ la a Naaŋmen Bie wɛ?” Ka a Yeezu yeli sɔge ba, “Yɛnee la yeli ka maa la.” 71Lɛ la ka ba yeli, “Boŋ danseɛ la ka te na la boɔrɔ? Te meŋɛ woŋ a la a yi O meŋɛ noɔreŋ!”

Currently Selected:

Luk 22: DNTTP

Highlight

Copy