Gyn 5

Yeezu Naŋ Saŋ Baaloŋ A Pɛnnoo Bebiri Daare

1A yɛlɛ ama puoriŋ a Gyuumine tigri kaŋ da taɛ la, ka Yeezu da do gaa Gyɛruzɛlɛm.

2Koɔ̃-puu zie kaŋ da be la a Gyɛruzɛlɛm poɔ a peɛle a dendɔre na ba naŋ boɔlɔ Peere Dendɔre ka ba boɔlɔ o Bɛsaada a Hiburu deme kɔkɔre poɔ. A be da taa la kyaare anuu. 3Baalba yaga da maŋ gaŋ la a bafoɔle poɔ: zɔnne, wɔɔre ane gbɛrɛɛ. [4Ba da maŋ kyɛllɛ la a koɔ̃ dɔ̃ɔ̃mo saŋ, bonso, wagre mine poɔ a Daana maleke da maŋ sigi wa la a koɔ̃-puu zie, a wa dɔ̃ɔ̃ a koɔ̃. Soba na zaa naŋ wa daŋ kpɛ a koɔ̃ saŋ na ba naŋ wa dɔ̃ɔ̃ a baare, maŋ nyɛ la sammo yi o baaloŋ na zaa o naŋ beɛrɛ.] 5Dɔɔ kaŋ naŋ da le baaloŋ yuomo lezare ne pie ne anii da gaŋ la a be. 6A Yeezu naŋ da wa nyɛ a dɔɔ baala ka o gaŋ a be, kyɛ ka O da baŋ ka o gaŋ la a be ka a kɔɔre, O da soore la a dɔɔ, “Fo boɔrɔ la ka fo nyɛ laafeɛ be?” 7Ka a dɔɔ baala da yeli sɔge O, “Neŋkpoŋ, N ba taa neɛzaa naŋ na nyɔge ma eŋ a koɔ̃ poɔ saŋ na ba naŋ maŋ wa dɔ̃ɔ̃ a koɔ̃. N naŋ maŋ wa gaa ka N sigre kpeɛrɛ zaa ka n tɔ kaŋ daŋ ma la kpɛ.” 8Ka Yeezu da yeli ko o, “Vaa-iri de a fo boŋganaa kyɛnɛ gɛrɛ.” 9A daadaalɛ ka a dɔɔ deɛ nyɛ laafeɛ, a de o boŋganaa a da piili kyɛnɛ.

A bebiri ŋa da waa la a Gyuumine pɛnnoo bebiri daare. 10Lɛ la ka a Gyuumine da yeli ko a dɔɔ naŋ da nyɛ o sammo, “Zenɛ waa la a pɛnnoo bebiri, sori kyebe ka fo tuo fo boŋganaa.” 11Kyɛ ka o da yeli sɔge ba, “A dɔɔ na naŋ saŋ ma la yeli ko ma, ‘De a fo boŋganaa kyɛnɛ gɛrɛ.’ ” 12Ka ba da soore o, “Aŋ la a dɔɔ ŋa naŋ yeli ko fo, ‘De a fo boŋganaa kyɛnɛ gɛrɛ’?” 13A dɔɔ da ba baŋ a soba na naŋ saŋ o, bonso, a Yeezu da kpɛ la a nembeɛoŋ poɔ a tɔle te gaa. 14A lɛ puoriŋ, a Yeezu da te nyɛ o la a Naaŋmen die poɔ a da yeli ko o, “Nyɛ, fo nyɛ la laafeɛ! Tɔɔ daŋ la wa erɛ yelbieri zaa ka yelfaa zaa ta wa pɔge fo.” 15A dɔɔ da yi gaa te yeli ko la a Gyuumine ka a Yeezu la da saŋ o. 16A lɛ zuiŋ, a Gyuumine da piili korɔ la a Yeezu dɔgroŋ, O naŋ da erɛ a yɛlɛ ama taaba a pɛnnoo bebiri daare zuiŋ. 17Kyɛ ka a Yeezu da leɛ yeli sɔge ba, “A N Saa naŋ kyɛnɛ tonɔ la toma, ka N meŋ naŋ tonɔ.” 18A yeli ŋa zuiŋ, a Gyuumine da maaleŋ moɔ la nimiri a boɔrɔ ka ba ko O. Bonso, a pɛnnoo bebiri kyiiruŋ yoŋ naane ka O da saana, kyɛ O naŋ da boɔlɔ Naaŋmen O Saa, ka a lɛ na wuli ka O de la O meŋɛ ka O ne Naaŋmen seŋ taa.

A Bidɔɔ Naŋ Taa Kpeɛ̃õ Yɛlɛ

19Ka Yeezu da yeli ko ba, “Serɛzaa ka N yele korɔ yɛ, a Bidɔɔ koŋ baŋ e yelzaa ne O meŋɛ faŋ, ka a naŋ ba e yeli na O naŋ nyɛ a Saa ka O erɛ yoŋ naane. Bonso, yeli na zaa a Saa naŋ erɛ, a lɛ ne a zu la ka a Bidɔɔ meŋ maŋ e. 20A Saa nɔŋ la a Bidɔɔ, a maŋ wuli O a anaŋ zaa Ona meŋɛ naŋ maŋ erɛ. A Saa na wuli la a Bidɔɔ yelbɛrɛ naŋ gaŋ ŋaa, ka a na e yɛ nɔmaa. 21Serɛzaa, aŋa a Saa naŋ maŋ seŋ a kuuni lɛ, a e ka ba leɛ voorɔ, a lɛ meŋ ka a Bidɔɔ meŋ maŋ ko banaŋ zaa O naŋ boɔrɔ, nyɔvore. 22A Saa ba dire neɛzaa sɛrɛɛ, kyɛ O de la sɛrɛɛdiibu zaa ko a Bidɔɔ, 23ka ka noba zaa na de emmo ko a Bidɔɔ aŋa lɛ ba naŋ eŋnɛ a Saa. Soba na zaa naŋ ba eŋnɛ a Bidɔɔ, ba eŋnɛ a Saa naŋ toŋ a Bidɔɔ. 24Serɛzaa ka N yele korɔ yɛ, soba na zaa naŋ woŋ N yelbie, a sage de a soba na naŋ toŋ ma yɛlɛ, taa la nyɔvore naŋ ba taa baaroo. Ba koŋ di o soba sɛrɛɛ, kyɛ ka o yi kuuni poɔ a te kpɛ nyɔvore poɔ.”

25“Serɛzaa ka N yeli ko yɛ, a saŋ tara la; a saŋ gba taɛ la pampana ŋa, ka kuuni na woŋ a Naaŋmen Bie kɔkɔre. Kyɛ banaŋ naŋ na woŋ a kɔkɔre na taa la nyɔvore. 26Aŋa a Saa naŋ e a nyɔvore zaa yiibu zie, lɛ la ka O e ka a O Bidɔɔ meŋ e a nyɔvore zaa yiibu zie. 27Kyɛ a Saa ko la a Bidɔɔ kpeɛ̃õ ka O di sɛrɛɛ, O naŋ waa a Nensaala Bie zuiŋ. 28Yɛ ta vɛŋ ka yɛ nɔɛ maa ne a ŋaa, bonso, a saŋ waana la ka banaŋ zaa naŋ be ba yaare poore na woŋ a Naaŋmen Bie kɔkɔre 29a wa yi ba yaare poore. Banaŋ naŋ da erɛ soŋ na iri voorɔ la, kyɛ ka banaŋ naŋ da erɛ faa na iri nyɛ dɔgroŋ.”

A Yeezu Dansediribe Yɛlɛ

30“N koŋ baŋ e yelzaa ne N meŋɛ kpeɛ̃õ. A lɛ Naaŋmen naŋ maŋ wuli ma, lɛ ka N maŋ di a sɛrɛɛ kyaare ne. N sɛrɛɛdiibu maŋ e meŋɛ, bonso, N meŋɛ poboɔbo naane ka N erɛ, kyɛ a soba na naŋ toŋ ma poboɔbo la.”

31“Ka maa dire N meŋɛ danseɛ, a N danseɛ ba taa yelmeŋɛ. 32Kyɛ neɛ kaŋ bebe la a dire a N danseɛ. Ka N baŋ ka a O danseɛ O naŋ dire kyaare ne ma waa la yelmeŋɛ. 33Yɛ da toŋ la yɛ noba a Gyɔɔn zie, ka o da di a yelmeŋɛ danseɛ. 34A ba e ŋa N boɔrɛɛ nensaala ka o di N danseɛ, kyɛ N yele la a yɛlɛ ama a yɛ faabo zuiŋ. 35A Gyɔɔn da waa la fentelɛ naŋ dire, a kyaana, ka yɛ da boɔrɔ ka yɛ kyelle belaa a o kyaane poɔ. 36Kyɛ N taa la danseɛ naŋ gaŋ a Gyɔɔn deni. A toma na N Saa naŋ ko ma ka N na toŋ te baare, a toma na ne a zu N naŋ tonɔ la dire danseɛ ka a Saa la toŋ ma. 37Kyɛ a Saa naŋ toŋ ma, O meŋɛ meŋ di la N danseɛ. Yɛ daŋ ba woŋ O kɔkɔre, bee a nyɛ O waaloŋ. 38Yɛ ba taa O yelbiri ka o be yɛ nyɔvore poɔ, yɛ naŋ ba sage de a soba na O naŋ toŋ yɛlɛ zuiŋ.”

39“Yɛ maŋ sɔre la, a boɔrɔ yɛlɛ a gansoŋ poɔ, bonso, yɛ teɛre ka a poɔ la ka yɛ na nyɛ nyɔvore naŋ ba taa baaroo, kyɛ a gansoŋ ŋa poɔ yɛlɛ la di N danseɛ. 40Kyɛ ka yɛ zagre ka yɛ wa N zie a wa nyɛ nyɔvore. 41N ba boɔrɔ puubu yi nensaalba zie. 42Kyɛ N baŋ ka yɛ ba taa Naaŋmen nɔmmo yɛ sukyie poore. 43N wa la N Saa yuori eŋɛ, kyɛ ka yɛ ba sage de ma. Kyɛ ka neɛ kaŋ da wa o meŋɛ yuori eŋɛ, yɛ na sage de o la. 44Wola ka yɛ na e de Naaŋmen yɛlɛ ka yɛnee sagra derɛ puubu naŋ yire yɛ nensaaltaaba zie, kyɛ ba boɔrɔ puubu naŋ yi a soba na yoŋ naŋ waa Naaŋmen? 45Yɛ ta teɛre ka N na yeli la yɛ yeli saanaa ko a N Saa. A Moozul yɛ naŋ de yɛ teɛretɔroo#5:45 Teɛretɔroo: A Dagaaba mine maŋ yeli ka ‘Kyelloo.’ eŋ, ona la na ko yɛ saanaa. 46Ka yɛnee da sage de a Moozul yɛlɛ, yɛ da na sage de la N meŋ yɛlɛ, bonso, N yɛlɛ la ka Moozul da sɛge. 47Kyɛ ka yɛnee ba sage de a yɛlɛ o naŋ sɛge, wola ka yɛ na e sage de N yɛlɛ?”

Currently Selected:

Gyn 5: DNTTP

Highlight

Copy