Tom 3

Piita Naŋ Saŋ Dɔɔ Gbɛre Kaŋ

1Daare kaŋ Piita ane Gyɔɔn da duoro gɛrɛ la a Naaŋmen die, a ŋmenaa gbelli ata puoruu saŋ. 2Noba da tuo la dɔɔ kaŋ naŋ da gbɛre a yi o biiluŋ saŋ zaa a wa kpɛ ne. Bebiri zaa ba da maŋ te zegle o la a Naaŋmen die dendɔre na ba naŋ boɔlɔ Veɛloŋ Dendɔre ka o na sɔrɔ boma yire noba naŋ maŋ wa kpeɛrɛ a Naaŋmen die poɔ. 3O naŋ da wa nyɛ a Piita ane Gyɔɔn ka ba wa kpeɛrɛ a Naaŋmen die, o da sɔre la boma ba zie. 4A Piita ane a Gyɔɔn da kpa la ba nimie eŋ o kyɛ ka a Piita yeli, “Kaa te nyɛ.” 5O da kaara ba la polipoli a teɛre ka ba na ko o la bonkaŋ. 6Kyɛ ka Piita yeli, “N ba taa libiri bee salema, kyɛ bon N naŋ taa ona ka N na ko fo; a Yeezu Kirista a Naazɛrɛ Bie yuori eŋɛ, vaa-iri kyɛnɛ.” 7O da nyɔge la o nuduluŋ a e ka o iri, ka a tɔntɔbaalɛ, ka o gbɛɛ ne o nɔɔkyoomɔ deɛ e kpeɛne. 8Ka o vaa-iri are a kyɛnɛ, a tu ba kpɛ a Naaŋmen die, a kyɛnɛ kyɛ vara kyinne a puuro Naaŋmen. 9A noba zaa da nyɛ o la ka o kyɛnɛ kyɛ puuro Naaŋmen, 10ka ba da baŋ ka ona la da maŋ zeŋ a Naaŋmen die dendɔre ba naŋ boɔlɔ a Veɛloŋ Dendɔre a sɔrɔ boma. Dabeɛ̃ ne nɔmaa da kpɛ ba la ne a yeli ŋa naŋ da e a gbɛre ŋa zie.

Piita Naŋ Yeli Yɛlɛ A Naaŋmen Die Poɔ

11A dɔɔ naŋ da naŋ vara mara a Piita ane a Gyɔɔn, a noba zaa nɔɛ da maaɛ la ka ba da laŋ zo gaa ba zie a dendɔre na ba naŋ boɔlɔ ‘Solomɔn Kyaaraa’. 12A Piita naŋ da wa nyɛ lɛ, o da yeli ko la a noba, “Yɛnee Izerayɛl noba, bonso ka a yeli ŋa e yɛ nɔmaa, bee bonso ka yɛ yage nimie eŋ te lɛ, aŋa temenne kpeɛ̃õ bee te sonnoŋ la so ka te e ka a gbɛre ŋa iri kyɛnɛ? 13A Aboraham Naaŋmen, a Aziki Naaŋmen ane a Gyekɔb Naaŋmen ane a te sããkommine Naaŋmen la e ka o tontonɔ Yeezu nyɛ puubu, Ona la ka yɛ da de tere, a gyɛ O bare a Pilato niŋesogɔ, aneazaa ka a Pilato da boɔrɔ la ka o bare O. 14Kyɛ yɛ da gyɛ la a Nensoŋ ane a Nemmeŋɛ bare kyɛ da sage e ka ba ko yɛ a neŋkoorɔ, 15kyɛ ka yɛ da ko a Nyɔvore zaa soba, a Onaŋ Naaŋmen naŋ da e ka o leɛ-iri a kuuni poɔ, tenee la a yeli ŋa dansediribe. 16A Yeezu yɛlɛ sagedeebo ane O yuori zuiŋ la so ka a dɔɔ ŋa yɛ naŋ kaara kyɛ baŋ nyɛ laafeɛ a yɛ niŋesogɔ.”

17“Kyɛ pampana ŋa, n bamine, N baŋ ka babammo la so ka yɛnee ane a yɛ namine da e a lɛ. 18A ŋaa la ka a yɛlɛ na Naaŋmen naŋ da tu a Ŋmen-yelmanneba zaa zie a yeli ka a O Mɛzaaya#3:18 Mɛzaaya: A Mɛzaaya tɛgɛ la a ‘Kirista.’ na woŋ la tuo da tu a tuubu. 19A lɛ zuiŋ, yɛ leɛ yɛ eebo, a leɛ gaa Naaŋmen zie kyɛ yɛ na nyɛ la yelbebe sudi. 20Lɛ la ka faŋ paalaa naŋ yi a Daana zie na wa kyɛ ka O pãã toŋ a Mɛzaaya O naŋ kaa-iri a yɛ zuiŋ. Ona la a Yeezu. 21A ferɛɛ la ka a Yeezu be tenvelaa#3:21 Tenvelaa: A Kiristabiiri mine maŋ boɔle la a yelbiri ŋa ka ‘Dapare.’ poɔ te ta saŋ na a yɛlɛ zaa a Naaŋmen naŋ da tu a O dakoroŋ Ŋmen-yelmanneba zie yeli nyɛ eebo. 22Moozul da yelee la, ‘A Daana a yɛ Naaŋmen na iri la Ŋmen-yelmanna a yɛ meŋɛ noba poɔ ka o waa aŋa maa. A ferɛɛ la ka yɛ kyɛllɛ yelzaa O naŋ na yeli ko yɛ. 23Kyɛ soba na zaa naŋ koŋ kyɛlle woŋ a Ŋmen-yelmanna ŋa yɛlɛ, ba na wɛle o la bare a Naaŋmen noba poɔ.’ 24A Ŋmen-yelmanneba na zaa naŋ da yeli a yɛlɛ, a piili ne Saamuwɛl ane a banaŋ naŋ tu o puori meŋ da yeli la a bebie ama yɛlɛ. 25Yɛ waa la a Ŋmen-yelmanneba biiri ane a nɔ-eŋnaa na Naaŋmen naŋ da eŋ ko a yɛ sããkommine. Naaŋmen da yeli ko la Aboraham, ‘A fo boorɔ poɔ la ka a teŋɛzu nensaalboorɔ zaa na nyɛ maaloo.’ 26A Naaŋmen naŋ da kaa-iri a O tontonɔ, O da daŋ toŋ o la yɛ zie, ka O wa ko yɛ maaloo kyɛ e ka yɛ zaa leɛ yi a yɛ potuoloŋ sobie poɔ.”

Currently Selected:

Tom 3: DNTTP

Highlight

Copy