Tom 19

Pɔɔl Naŋ Be A Efesu Poɔ

1Apolo naŋ da naŋ be a Korinti poɔ, Pɔɔl da tu la a teŋɛ poɔ a wa a Efesu teŋɛ. O da wa nyɛ la a potuuribo mine a be. 2O da soore ba la, “Yɛ de la a Vooroŋ Soŋ a saŋ na yɛ naŋ da sage de a Yeezu yɛlɛ?” Ka ba leɛ yeli, “Ai, te daŋ ba woŋ ka Vooroŋ Soŋ bebe la.” 3Lɛ la ka o soore ba, “Boŋ suobu la ka yɛ da de?” Ka ba yeli, “Gyɔɔn suobu la.” 4Ka a Pɔɔl da yeli, “Gyɔɔn da tere la meŋɛ-leɛbo suobu, a da yele korɔ a noba ka, ba sage de neɛ na naŋ na tu o puori wa. Ona la Yeezu.” 5Ba naŋ da wa woŋ a lɛ, ba da de la a suobu a Daana Yeezu yuori eŋɛ. 6A Pɔɔl naŋ da wa de o nuuri pare ba zuri, a Vooroŋ Soŋ da wa la ba zie, ka ba da yele kɔkɔsaama ane Ŋmen-yelmanna yelyelii. 7Ba zaa da ta la noba pie ne bayi.

8A Pɔɔl da be la a be kyuuri ata, a da maŋ kpɛ a puoruudie a te yele yɛlɛ a ba zoro dabeɛ̃, kyɛ ŋmɛ nɔkpeɛne ne ba, a erɛ aneɛ ka ba na sage de a Naaŋmen naaloŋ yɛlɛ. 9Kyɛ ba mine naŋ da e zukpeɛ-yɛlɛ a da ba sage de a Yeezu yɛlɛ, kyɛ da yele yɛlɛ saana a Daana Sori yɛlɛ a laŋne deme niŋesogɔ zuiŋ, a Pɔɔl da ŋmaa la ba yɛlɛ bare, kyɛ bebiri zaa o da maŋ taa la a potuuribo kpɛ ne a Tirano kannoo die poɔ a te ŋmɛ nɔkpeɛne ne a Tirano kannoo die deme. 10A yɛlɛ ama da e la lɛ yuomo ayi, ka a noba zaa naŋ da kpeɛrɛ a Ezeya paaloŋ poɔ, a Gyuumine ane a Giriki noba da woŋ a Daana yelbiri.

A Siva Bidɔbɔ Yɛlɛ

11Naaŋmen da tu la a Pɔɔl zie a toŋ toŋseɛlɛ naŋ ba taa mannoo, 12ka a lɛ da vɛŋ ka ba da maŋ de a Pɔɔl hankyeɛ bee pɛn-ŋmaa zaa naŋ tɔ o eŋɛ a wa tɔ ne a baalba, ka ba baaloŋ da maŋ baare kyɛ ka sefaare yi ba enne. 13Lɛ la ka Gyuu noba mine naŋ da maŋ yoɔrɔ a digre sefaare, meŋ da de a Daana Yeezu yuori a boɔrɔ ka ba digi ne sefaare naŋ da be noba mine enneŋ a yele, “A Yeezu ŋa a Pɔɔl naŋ moɔlɔ O yɛlɛ, maa yele korɔ fo, wa yi!” 14A Gyuumine Naaŋmen bagmaale neŋkpoŋ kaŋ yuori naŋ da di Siva biiri bayopoi la da erɛ a lɛ. 15Kyɛ a sefaa da yeli sɔge ba la, “N baŋ la Yeezu, a baŋ Pɔɔl meŋ, kyɛ aŋ mine la yɛ?” 16Lɛ la ka a dɔɔ na naŋ da taa a sefaa da vare iri nyɔge ba, a da toɔ̃ ŋmɛ ba zaa, a pere ba, ka ba da zo ne parekpolo a yi a yiri poɔ. 17A noba zaa naŋ da kpeɛrɛ a Efesu poɔ, a Gyuumine ane Giriki noba da baŋ la a yeli ŋa. Dabeɛ̃ da kpɛ la ba zaa, kyɛ ka a Daana Yeezu yuori da nyɛ puubu. 18Lɛ meŋ la ka noba yaga naŋ da sage de a Yeezu yɛlɛ da wa, a wuoro bamenne kyɛ kyiire ba yelfaare. 19Noba yaga naŋ da taa gama a da erɛ ne yelbeere da wuo la a gama lantaa a nyege a noba zaa niŋesogɔ. Ba naŋ da sɔre a gama ama ba naŋ nyege libie, a da e la warbie turi lezaayi ne pie. 20Lɛ la ka a Daana yelbiri da yɛllɛ yaga kyɛ da taa faŋ.

Dɔɔne Naŋ Dɔ̃ɔ̃ A Efesu Teŋɛ Poɔ

21A yɛlɛ ama eebo puoriŋ, Pɔɔl da maale la o teɛroŋ ka o na tu la Masedoniya ane Akaaya tenne a te gaa Gyɛruzɛlɛm. O da yelee la, “Ka maa wa gaa a be baare, feroo la ka N nyɛ Urom meŋ.” 22Lɛ la ka o da toŋ a o soŋnema bayi, Timoti ane Erasetu ka ba gaa a Masedoniya kyɛ o meŋɛ eŋ da kpɛ la a Ezeya poɔ kɔɔre belaa.

23A saŋ na poɔ, dɔɔne kpoŋ da dɔ̃ɔ̃ la a Efesu poɔ a kyaare ne a Daana Sori yɛlɛ. 24Dɔɔ kaŋ naŋ da waa kurkuro, ka o yuori da di Demeteruse, da maŋ nyɛle la salem-pelaa a maale ne boma naŋ waa Ateme puoruu boma. Ka a da korɔ noba na naŋ tonɔ a toma tɔnɔ yaga zaa. 25O da boɔle la a noba bama ane a noba na naŋ tonɔ a toma ŋa taaba lantaa, a yeli, “N ba mine, yɛ baŋ ka a toma ŋa poɔ la ka a te bondaanoŋ yire. 26Yɛ meŋ nyɛɛ la kyɛ woŋ ka a ba e a Efesu yoŋ poɔ, kyɛ a Ezeya paaloŋ yaga zie zaa ka a Pɔɔl ŋa toɔ̃ nyɛ noba yaga ka ba tu o, ne o kannoo ka a ŋmemɛ ba naŋ maale ne nuuri ba waa ŋmemɛ. 27Kyɛ dabeɛ̃ bebe la, ka a te toma ŋa yoŋ naane na di vi, kyɛ ba koŋ la boɔlɔ a pɔgŋmen Ateme ŋmen-yiri bonzaa, ka o koŋ la taa yuori na naŋ vɛŋ ka a Ezeya noba zaa ane a tendaa a puoro o.”

28Ba naŋ da wa woŋ a yeli ŋa, ba suuri da iree la yaga ka ba kyeere, “A Efesu Ateme waa la kpoŋ!” 29A teŋkpoŋ da paale ne la dɔɔne ka noba zo lantaa ŋmore te kpɛ a deɛne die poɔ, a vuuro Gayose ane Arestaku naŋ da waa Masedoniya noba a kyɛ da waa a Pɔɔl sokyɛntaaba. 30A Pɔɔl da boɔrɔ la ka o kpɛ a nembeɛoŋ poɔ, kyɛ a potuuribo da ba sage; 31a Ezeya paaloŋ tonton-nembɛrɛ mine naŋ da waa a Pɔɔl bamine meŋ gba da toŋɛɛ la ka ba sɔre o ka o ta wa kpeɛrɛ a deɛne die poɔ. 32Kyɛ a lɛ poɔ meŋ, ba mine da kyeerɛ la yele yeli ŋa, ka ba mine yele yeli yuo, bonso, buriburi da kpɛ la a kpaaroŋ noba, ka ba yaga zie da ba baŋ bon naŋ so ka ba da wa lantaa. 33A nembeɛoŋ mine da manne la a yɛlɛ ko Alɛzanda, a onaŋ a Gyuumine naŋ da e ka o de niŋe. Ka Alɛzanda da lɔɔ nu sɔre ka ba bare gɔnne kyɛ ka o toɔ̃ manne a yɛlɛ ko ba. 34Kyɛ ba naŋ da wa baŋ ka o waa la Gyuu neɛ, ba zaa da kyeerɛɛ la ane kɔkɔyeni ka a te ta ŋa gogo ayi a yele, “A Efesu Ateme la waa kpoŋ!” 35Kyɛ a teŋɛ karakye naŋ da wa te e ka a noba bare a gɔnne, o da yelee la, “Efesu noba, nembuo la bebe a ba baŋ ka a Efesu noba teŋkpoŋ la waa a Ateme ŋmen-yiri guuro ane a ŋmen-kuuri naŋ yi a sazu le guuro. 36Yɛ naŋ nyɛ ka neɛzaa kontoɔ̃ ŋmɛ nɔkpeɛne ne a yɛlɛ ama, a seŋɛɛ la ka yɛ e gbilli lɛ a ta wa e yelzaa ne suuri. 37A noba ŋa yɛ naŋ taa wa ne a kyɛ ba waa a Naaŋmen die nannyigri bee noba naŋ to a te pɔgŋmen zone zaa. 38A lɛ zuiŋ ka Dameteruse ane a o nuuri toma noba naŋ be o zie wa taa yeli kyaare ne a neɛ kanzaa, a sɛrediribe bebe la, ka a gɔbena mine bebe, vɛŋ ka ba te sɛ taa be. 39Ka yeli kanzaa la wa bebe ka yɛ boɔrɔ ka yɛ baŋ, lɛ eŋ, a ferɛɛ la ka a gaa sɛrediribe zie ka ba te maale a be. 40Te be la yɛlɛ poɔ bonso, ba na toɔ̃ yeli ka te dɔ̃ɔ̃ la a teŋɛ zenɛ, kyɛ ka te ba taa yeli zaa na yeli de temenne yi a dɔɔne ŋa poɔ.” 41O naŋ da wa te yeli a yeli ŋa baare, o da eɛɛ la ka a noba yaare.

Currently Selected:

Tom 19: DNTTP

Highlight

Copy