Mateo 3

Yohane nɔ sɔlelɔ ɔ fiɛmi

(Marko 1.1-8; Luka 3.1-18; Yohane 1.19-28)

1Jamɛ a be ɔ mi ɔ, Yohane nɔ sɔlelɔ ɔ ba Yudea nga a nɔ, ba bɔni fiɛmi ke, 2#Mat 4.17; Mar 1.15 “Nyɛ tsake nyɛ tsui, ejakaa hiɔwe matsɛ yemi ɔ su si ta.” 3#Yes 40.3 Yohane ji nɔ nɛ gbalɔ Yesaya de ngɛ e he ke,

“Nɔ ko ngɛ ngmlaa kpae

ngɛ nga a nɔ ke,

‘Nyɛɛ je blɔ kɛ ha Nyɔmtsɛ ɔ;

nyɛ ha e blɔ ɔ nɛ da tlɔmɔɔ.’ ”

4 # Mats II, 1.8 Yohane ɔ, afukpɔngɔ he womi a kɛ lo e tade; lohwe he womi kpa fi e mlɛ mi, nɛ e niye ní ji baalɛ kɛ nga nɔ hwo. 5Nihi je Yerusalem, Yudea, kɛ Yordan kpokpa a nɔ tsuo kɛ ba e ngɔ. 6A ba jaje a he yayamihi, nɛ e sɔle mɛ ngɛ Yordan pa a mi.

7 # Mat 12.34; 23.33 Benɛ Yohane na kaa Farisi bi, kɛ Saduki bi babauu ma e ngɔ nɛ e sɔle mɛ ɔ, e de mɛ ke, “Nyɛ sinɔhi a nina, mɛnɔ wo nyɛ ga ke nyɛɛ tu fo ngɛ tue gblami nɛ Mawu kɛ ma nyɛ nɔ ɔ nya. 8Nyɛɛ pee níhi nɛ tsɔɔ kaa nyɛ tsake nyɛ tsui. 9#Yoh 8.33 Nyɛ ko susu kaa ke nyɛ de kɛkɛ ke nyɛ nɛ̃ ji Abraham ɔ, nɛ tue gblami ko be nyɛ nɔ bae. I ngɛ nyɛ dee ke, Mawu ma nyɛ ngɔ tɛ nɛ ɔmɛ kɛ pee Abraham nina! 10#Mat 7.19 Amlɔ nɛ ɔ, gbiɛ ɔ fɔɔ si ngɛ tso sipoku ɔmɛ a nɔ momo; tso tsuaa tso nɛ wui yiblii kpakpa a, a maa po, nɛ a ma sake ngɔ fɔ la mi. 11Imi lɛɛ nyu i kɛ ngɛ nyɛ sɔlee kɛ tsɔɔ kaa nyɛ tsake nyɛ tsui. Se nɔ nɛ ma ngɛ ye se ɔ, Mumi Klɔuklɔu ɔ, kɛ la e kɛ ma tsu nɔ nɛ ɔ. Lɛɛ e pe mi; e tokota tete po, i sɛ nɔ nɛ hɛɛɔ. 12E hɛɛ e ngma mi sami tsimi ngɛ e dɛ, nɛ e kɛ maa sa e ngma a tsuo mi. E ma bua e ngma a nya kɛ wo gba mi, se tsakati ɔ lɛɛ e maa sã ngɛ la nɛ gbo we gblegbleegble mi.”

A sɔle Yesu

(Marko 1.9-11; Luka 3.21-22)

13Jamɛ a be ɔ, Yesu je Galilea kɛ ba Yohane ngɔ ngɛ Yordan pa a nya, konɛ Yohane nɛ sɔle lɛ. 14Jinɛ Yohane ka lɛ blɔ tsimi; e de Yesu ke, “Imi mohu nɛ e hia kaa o sɔle mi ɔ, nɛ moo o ma ye ngɔ nɛ ɔ?”

15Se Yesu he nɔ ke, “Oo, moo kplɛɛ kɛkɛ, ejakaa kikɛmɛ a blɔ nɔ nɛ wa maa gu kɛ pee Mawu suɔmi nya ní.” Kɛkɛ nɛ Yohane kplɛɛ.

16Benɛ a sɔle Yesu ɔ, e je kpo amlɔ kɛ je pa a mi. A bli hiɔwe nya ha lɛ, nɛ e na Mawu Mumi ɔ nɛ ngɛ si kplee kaa okpo nɛ ma e nɔ mami. 17#Mose I, 22.2; La 2.7; Yes 42.1; Mat 12.18; 17.5; Mar 1.11; Luk 9.35 Kɛkɛ nɛ gbi ko je hiɔwe de ke, “Imi nitsɛ ye bi nɛ i suɔ ji nɛ ɔ nɛ! Ee, i ngɛ e he bua jɔmi saminya.”

Currently Selected:

Mateo 3: Dangme

Highlight

Copy