Mose I, 16
16
A fɔ Ishmael
1Abram yo Sarai ɔ fɔ we ha lɛ. Se e ngɛ mawayo ko nɛ je Egipt. A tsɛɛ lɛ Hagar. 2Sarai de Abram ke, “Yawɛ tsi ye fɔmi nya. Ngɔɔ ye mawayo nɛ ɔ nɛ o kɛ lɛ nɛ hwɔ; alini e ma fɔ bimɛ ha mi.” Abram kplɛɛ nɔ́ nɛ e de lɛ ɔ nɔ. 3Lɔ ɔ he ɔ, Sarai ngɔ e mawayo Hagar, Egipt no ɔ ngɔ ha e huno Abram kaa e yo. Jamɛ a be ɔ mi ɔ, Abram na jeha nyɔngma momo ngɛ Kanaan zugba a nɔ. 4Abram kɛ Hagar na bɔmi, nɛ e ngɔ hɔ. Benɛ Hagar na kaa mi ba e he pɛ, e bɔni e he nɔ womi ngɛ Sarai nɔ, nɛ e bui lɛ hu.
5Kɛkɛ nɛ Sarai de Abram ke, “Mo lɛ o pee loko Hagar ngɛ e he nɔ woe ngɛ ye nɔ, nɛ e pa bui mi hu ɔ nɛ. Imi nitsɛ lɛ i ngɔ lɛ kɛ ha mo. Se kɛ je benɛ e na kaa mi ba e he ɔ, e bɔni e he nɔ womi ngɛ ye nɔ, nɛ e bui mi hu. Yawɛ nɛ kojo wɔ, nɛ e tsɔɔ nɔ nɛ nɔ́ da, mo jio, imi jio!”
6Abram he nɔ ke, “Saminya! O mawayo ji lɛ; e ngɛ o dɛ mi. Nɔ́ tsuaa nɔ́ nɛ o suɔ kaa o maa pee lɛ ɔ, pee lɛ.” Lɔ ɔ he ɔ, Sarai doo Hagar nya wawɛɛ nitsɛ, nɛ Hagar tu fo kɛ je e he.
7Yawɛ bɔfo ɔ kɛ Hagar kpe ngɛ pa ko nya, ngɛ Shur blɔ ɔ nɔ, 8nɛ e bi lɛ ke, “Hagar, Sarai mawayo, jije o je, nɛ jije o yaa?”
E he nɔ ke, “I tu fo kɛ je ye nyɛ Sarai he.”
9Yawɛ bɔfo ɔ de lɛ ke, “Kpale o se kɛ ya e ngɔ, nɛ o ya ba o he si ha lɛ.” 10Yawɛ bɔfo ɔ de kɛ piɛ he ke, “Ma ha o nina maa hiɛ babauu nɛ nɔ ko be nyɛe maa kane mɛ. 11Hyɛ, mi ngɛ o he; o ma fɔ binyumu, nɛ o maa wo lɛ biɛ ke Ishmael,#16.11 Ishmael: Biɛ nɛ ɔ sisi ngɛ Hebri gbi mi ji “Mawu nuɔ nɔ gbi.” ejakaa Yawɛ nu o we amanehlu kue fami ɔ. 12Se o binyumu ɔ lɛɛ e hɛ mi maa hi klamaklama kaa nga mi teji; e kɛ nɔ ko nɔ ko be yee; nɔ tsuaa nɔ kɛ lɛ maa pɛ. Lɛ nɔ kake too e maa hɛɛ e blɔ ngɛ e nyɛmimɛ ɔmɛ tsuo a kpɛti.”
13Hagar bi e he ke, “Anɛ i na Mawu niinɛ, nɛ ye hɛ ngɛ kɛ mwɔɔ lo?” Lɔ ɔ he ɔ, e tsɛ Yawɛ nɛ kɛ lɛ ba tu munyu ɔ ke, “Mawu nɛ hyɛɛ nɔ.” 14Enɛ ɔ he je nɛ a tsɛɛ vu ɔ nɛ ngɛ Kadesh kɛ Bered a kpɛti ɔ ke “Hɛ kalɔ ɔ nɛ hyɛɛ mi ɔ vu” ɔ nɛ.
15 #
Gal 4.22
Hagar fɔ binyumu ha Abram, nɛ Abram wo lɛ biɛ ke Ishmael. 16Jamɛ a be ɔ mi ɔ, Abram ye jeha nyingmi kpaanyɔ kɛ ekpa.
Currently Selected:
Mose I, 16: Dangme
Highlight
Share
Copy
Want to have your highlights saved across all your devices? Sign up or sign in
Bible in Dangme © Bible Society of Ghana, 2018.
