Maak 3

Yisa tibi bɔɣukpiŋlan’

(Matiu 12.9-14; Luk 6.6-11)

1Ka Yisa daa ti lan kpe Yɛhudianim’ jɛmbu duu, ka bɔɣukpiŋlan’ so daa be nimaani. 2Ka niriba maa ni shɛb’ daa kpahindi Yisa ni bɛ nya o ni tib’ o Vuhim Dabisili dali maa, dama bɛ daa bɔrimi ni bɛ nya o taali ka fiɣis’ o. 3Ka Yisa daa yɛli bɔɣukpiŋlan’ maa, “Mirim’ ma na!” 4Di saha maa ka Yisa daa bɔhi ba, “Tuun’ dini n-lee simdi tumbu Vuhim Dabisili dali: Tuun’ viɛlli bee tuun’ biɛɣu; din ni tiligi ninsal’ nyɛvili bee din ni di li?”

Ka bɛ daa fo. 5Di saha ka Yisa daa yuli ba ti tuui taba ni suli, ka o suhu daa lan saɣim pam bɛ ninkuunsi zuɣu, ka o ŋmaligi yɛli doo maa, “Teem’ a nuu maa!” Ka o daa tee’ li ka di dii kpaŋ zaa. 6Di saha ka Farisiinim’ daa yiɣisi yi, ka bɛ mini Naa Hɛrɔd nyaanzaaniba ti dii tɔri jina ni bɛ gbaai bɛ ni yɛn niŋ shɛm ku Yisa.

Teeku duli salo yɛla

7Ka Yisa min’ o nyaandoliba daa yiɣisi nimaani chaŋ teeku nol’ ni, ka salo pam yi Galili dol’ o; ka shɛb’ mi daa yi Judia 8mini Jɛrusalɛm ni Idumia ni Jɔɔdɛn mɔɣili duli polo hal zaŋ tabili Taai mini Sidɔn laɣim o sanna, bɛ ni daa wum o ni tumdi tuun’ kar’ shɛŋa yɛla zuɣu. 9Ka o yɛl’ o nyaandoliba ni bɛ bom’ ŋariŋ zal’ o, salo maa ti muɣi m-miris’ o pam zuɣu; 10#Maak 4.1; Luk 5.1-3 dama o daa tib’ barinim’ pam, ka di zuɣu chɛ ka ŋunkam mali dɔro ŋaɣisiri niriba maa ni ni o ti shih’ o. 11Alizin’ biɛri daa yi nya o saha shɛlikam, bɛ lurila o tooni ka kuhiri yɛra, “A nyɛla Naawuni ŋun be ŋɔ Bia!”

12Ka Yisa daa kpahi bɛ zuɣu ni yɛli ni bɛ di yɛli so o yɛla.

Yisa pii tuumba pinaayi

(Matiu 10.1-4; Luk 6.12-16)

13Di nyaaŋa ka Yisa daa du zo’ shɛli zuɣu ka boli ninvuɣ’ shɛb’ o ni bɔra, ka bɛ daa ka o sanna. 14Ka o pii ninvuɣ’ pinaayi ni bɛ be o sani, ka o timdi ba ka bɛ ti yihiri waazu, 15ka niŋ ba yiko ni bɛ karit’ alizin’ biɛri niriba zuɣu bahira.

16O ni daa pii ninvuɣ’ pinaayi shɛb’ maa yuya m-bɔŋɔ: Saimɔn, Yisa ni daa pa so yupaa Pita la 17mini Zɛbidii bihi Jeemsi ni o tizo Jɔn, o ni daa pa shɛb’ mi yupaa Bɔanɛjiiz la, (Di gbinni nyɛla, “Suhuyiɣisilinima”) 18ni Anduru ni Filip ni Baatolomiu ni Matiu ni Tomas ni Alifius bia Jeemsi ni Taddius ni Saimɔn ŋun daa nyɛ bɛn bɔri ni bɛn’ Izraɛlnim’ su bɛmaŋ’ la ni yino 19mini Judas Isikariɔt ŋun daa ti yi Yisa nyaaŋ’ la.

Yisa mini alizin’ biɛri naa Biilzibul

(Matiu 12.22-32; Luk 11.14-23; 12.10)

20Di nyaaŋa ka Yisa daa kuli; ka salo daa lan laɣim o sani hal ka o min’ o nyaandoliba ti kɔŋ bindirigu dibu. 21Ka Yisa dɔɣiriba daa wum lala, ka kana ni bɛ ti gbaag’ o, dama niriba daa yɛliya ni o zuɣu n-lɛbigi.

22 # Mat 9.34; 10.25 Ka Naawuni zaligubaŋdi’ shɛb’ bɛn daa yi Jɛrusalɛm na la yɛli, “Biilzibul n-ʒi o zuɣu. Alizin’ biɛri naa n-niŋ o yiko ka o karit’ alizin’ biɛri bahiri maa.”

23Ka Yisa boli ba na ti bɔhi ba; “Wula ka Sintani ni tooi kari Sintani?” Ka ŋahi ba ŋaha yɛli, 24“Nam yini puuni niriba yi ŋmaligi tuhiri taba, bɛ nam maa ni wurim. 25Ka yil’ yin’ nim’ yi ŋmaligi zabira, bɛ yili maa mi wurindimi. 26Ka Sintani yi ŋmaligi tuhir’ omaŋa o ku tooi be, amaa o bahigu n-yɛn bala.

27 So ku tooi kpe kpiɔŋlan’ yiŋa nti fa o nɛma ka pa ni o daŋ o la mii lɔbu pɔi. Di nyaaŋa ka o ni tooi fa o nɛma maa.”

28Yisa daa lan yɛli ba, “Yɛlimaŋli ka n yɛri ya, ninsalinim’ ni tooi nya alahichi balibu kam tumbu mini Naawuni mɔbu zaa taali chɛ m-paŋ Naawuni sani. 29#Luk 12.10 Amaa ŋunkam mo Naawuni Shia Kasi ŋun’ kul ku nya di chɛ m-paŋ Naawuni sani hal abada, amaa o daalahichi maa kul ni ʒi o zuɣu hal ni saha din ka bahigu.” 30Din daa chɛ ka Yisa yɛl’ lala maa nyɛla, bɛ ni daa yɛli ni alizin’ biɛɣu n-ʒi o zuɣu la.

Yisa tizɔbihi min’ o ma

(Matiu 12.46-50; Luk 8.19-21)

31Di saha ka Yisa tizɔbihi min’ o ma daa kana nti ʒe samban’ ni ka tim ni bɛ ti boli Yisa na. 32Ka salo pam daa ʒin’ gil’ o niŋ sunsuuni ka bɛ yɛl’ o, “A tizɔbihi min’ a ma be samban’ ni bɔr’ a.”

33Ka o bɔhi ba, “Ŋuni n-lee nyɛ m ma, ka banim’ mi nyɛ n tizɔbihi?” 34Ka o daa lihi bɛn ʒi o sani maa ti tuui taba ka yɛli, “M ma mini n tizɔbihi m-bɔŋɔ. 35Ŋunkam tumdi Naawuni yubu, ŋuna n-nyɛ n tizo ni n tizɔpaɣa ni m ma.”

Currently Selected:

Maak 3: DBwDB

Highlight

Copy