Matiu 28

Yisa neei kum ni

(Maak 16.1-10; Luk 24.1-12; Jɔn 20.1-10)

1Ka Vuhim Dabisili dali maa daa gari, ka bakɔi piligu dali biɛɣu ti neerina, ka Mariama ŋun daa nyɛ Magdala tiŋbia la min’ o tɔɣima la daa chaŋ ni bɛ ti nya Yisa siliga maa. 2Yim ka tiŋgbani daa ti dam pam, dama ti Duuma malaika n-daa yi alizanda ni siɣina nti biligi siliga maa nol’ ni kuɣili la n-du n-ʒi di zuɣu. 3Malaika maa kɔtomsi daa ŋmanila saa ni yi nyaɣisi la, ka o binyɛrigu piɛli kaman gol’ la. 4Ka dabiɛm daa kpe bɛn guli siliga maa pam, ka bɛ ni sɔhira, ka bɛ be kaman kpiimba la.

5Ka malaika maa daa yɛli paɣiba maa, “Di zɔriya dabiɛm; m mi ni yi bɔrila Yisa so bɛ ni daa kpahi tabili dapulli zuɣu la. 6O lan ka kpe; o neei kum ni kaman o ni daa pun yɛli shɛm la. Kamiyana ti nya o ni daa do luɣ’ shɛli, 7ka zo yomyom ti yɛl’ o nyaandoliba ni o neei kum ni n-daŋ yi tooni chaŋ Galili; nimaani ka yi ni ti nya o. Nyamiya, mani n-yɛli ya lala maa.”

8Ka dabiɛm daa kpe ba, amaa ka bɛ suhuri lee paligi pam, ka bɛ dii ŋmaligi siliga maa gbini n-zo yomyom ni bɛ ti ti o nyaandoliba di lahibali.

9Ka Yisa daa dii chirigi ba soli maa ni puhi ba; ka bɛ chaŋ ti gban’ o tooni m-bɔbil’ o naba, ka jɛm o. 10Ka o yɛli ba, “Di zɔriya dabiɛm; chamiya ti yɛli m mabihi maa ni bɛ cham’ Galili; nimaani ka bɛ ni ti nya ma.”

Siliga guliba shɛhira dibu

11Paɣiba maa ni daa ŋmaligi chani maa, di saha ka siliga maa guliba maa ni shɛb’ daa chaŋ tiŋ’ puuni ti yɛli maligumaaniba kpamba dinkam zaa daa niŋ maa yɛla. 12Ka maligumaaniba kpamba maa daa laɣim tiŋ’ maa ni kpamba ka bɛ niŋ tab’ saawara bahi, ka bo liɣiri ti siliga guliba maa 13ka yɛli ba, “Yɛlimiya niriba ni o nyaandoliba n-kana ti zu n-yih’ o yuŋ saha shɛli yi ni daa ʒeei gom.” 14Ka hal yɛlli maa yi lula Gomna tibili ni gba, ti ni bo shɛli ti o ka o ku niŋ ya shɛli.

15Ka siliga guliba maa daa deei liɣiri maa, ka chaŋ ti shiri niŋ bɛ ni wuhi ba shɛm maa, ka Yɛhudianim’ daa deei yɛlli ŋɔ niŋ yɛlimaŋli hal ni pɔŋɔ.

Yisa yi o nyaandoliba zuɣu

(Maak 16.14-18; Luk 24.36-49; Jɔn 20.19-23)

16 # Mat 26.32; Maak 14.28 Di saha ka Yisa nyaandoliba piniyini la daa chaŋ Galili zo’ shɛli zuɣu Yisa ni daa wuhi ba la. 17Bɛ ni daa ti nya o ka bɛ jɛm o; amaa ka bɛ ni shɛb’ biɛhim o. 18Ka Yisa yɛli ba, “Naawuni zaŋ alizanda mini dunia ŋɔ yiko zaa niŋ n nuu ni. 19#Tuma 1.8 Dinzuɣu chamiya ti yɛli zuliya kam ka bɛ leei n nyaandoliba, ka yi baptaizi ba ti Ba Naawuni min’ o Bia ni o Shia Kasi yul’ ni; 20ka wuhiri ba ni bɛ doli n ni zali ya ni yi niŋ shɛlikam la. Nyamiya, n kul ni be yi sani sahakam hal ti paai dunia yiɣisibu dali.”

Currently Selected:

Matiu 28: DBwDB

Highlight

Copy