Hiburunima 5

1Maligumaaniba zuɣulan’ kam yirila o tab’ sunsuuni na ni o ʒe bɛ zaani n-zaŋdi pina mini sara maani maligu niriba daalahichi zuɣu Naawuni sani. 2Ka omaŋmaŋ’ ni ka yaa yɛla pam ni zuɣu, o ni tooi di suɣilo o tuma ni zaŋ chaŋ ninvuɣ’ shɛb’ bɛn be ʒilinsi ni mini bɛn chirindi polo. 3#Lɛv 9.7 O ni ka yaa maa zuɣu, di nyɛla talahi ni o maani maligu omaŋmaŋ’ daalahichi zuɣu kaman o ni maani niriba daalahichi zuɣu shɛm. 4#Yibu 28.1 So bi piiri maligumaaniba zuɣulaantali mini di jilima o tolitoli; kulla Naawuni maŋmaŋa m-piiri nir’ leeri maligumaaniba zuɣulana kaman o ni daa piig’ Aduna shɛm la.

5 # Yila 2.7 Masia gba daa bi pii maligumaaniba zuɣulaantali mini di jilima. Naawuni n-daa lee piig’ o ka yɛl’ o:

“A nyɛla m Bia;

zuŋɔ dabisili ŋɔ ka n leeg’ a Ba.” 6#Yila 110.4 O lan yɛli luɣ’ shɛli yaha:

“A nyɛla maligumaana ŋun tuma ni be

kaman Mɛlikizɛdɛk tuma la hal ni saha din ka bahigu.”

7 # Mat 26.36-46; Maak 14.32-42; Luk 22.39-46 Yisa ni daa be dunia ŋɔ ni saha shɛli, o daa suhiri Naawuni yɛr’ o o ni bɔri shɛli, ka duhir’ o yee kuhiri ni nintam niŋdi Naawuni ŋun ni tooi tilig’ o kum ni la. Ka Naawuni daa wum o suhigu maa o ni daa zɔri ŋun’ Naawuni la zuɣu. 8O ni daa kul nyɛ Naawuni Bia maa zaa yoli, o daa bɔhim nɔdeebo wahala dibu puuni. 9O ni daa leei ŋun be tibi maa zuɣu, ka o leei bɛnkam zaa deer’ o noli tiliginsim din ka bahigu ni yiri so sanna. 10Naawuni n-daa zal’ o ni o nyɛ maligumaaniba zuɣulan’ ŋun tuma ni be kaman Mɛlikizɛdɛk tuma ni daa be shɛm.

Zuɣu ni kpahibu zaŋ chaŋ lubu polo

11Ti mali yɛla pam ni ti yɛli ya zaŋ chaŋ yɛla ŋɔ polo ka di mi kahigibu to, dama yi nyɛla suhutunanima. 12Zaŋ kana pumpɔŋɔ di di simdi ni yi nyɛla yi tab’ sowuhiriba, amaa ka yi ti na bɔrimi ni so n-wuhi ya Naawuni yɛtɔɣa bɔhimbu piligu ni yɛla. Yi na kul nyurila bihim, ka pa ni bindir’ maŋli, 13#1 Kɔr 3.2 dama ŋunkam kul nyurila bihim nyɛla ŋun yɛm na bi goligi wuntia yɛtɔɣa puuni, ka o na kul nyɛla bia. 14Bindir’ maŋli nyɛla ninkura bɛn zaŋ bɛ tɛha bɔhim baŋ zaɣ’ suŋ mini zaɣ’ biɛɣu woligibu ni nyɛ shɛm dini.

Currently Selected:

Hiburunima 5: DBwDB

Highlight

Copy