Hiburunima 12

Naawuni ŋun nyɛ ti Ba

1Dinzuɣu shɛhiranim’ pam ŋɔ ni gili ti ŋɔ zuɣu, chɛliya ka ti yihi bin’ tibisili kam mini din nyɛ alahichi ni zaŋ shɛli tabili ti, ka chɛliya ka ti niŋ nimmoo zo tizɔbo shɛli din ʒe n-gul’ ti ŋɔ, 2ka kul lihiri Yisa ŋun nyɛ ti yɛda ni tam so zuɣu di piligu ni hal ti paai di bahigu ni la. O daa di dapulli wahala ka o baɣa ka di vidibo ni; ka di nyɛla o ni daa lihiri suhupiɛl’ shɛli din be o tooni la zuɣu; ka pumpɔŋɔ o ʒila Naawuni nam ʒiishee nudirigu polo.

3Tɛhimiya o ni daa di wahala alahichinim’ bɛn daa je o nuu ni shɛm yɛla, ka di chɛ ka yi ku gbarigi ka yi suhuri zɔhira. 4Yi daalahichi zaɣisibu moli mɔbu puuni bɛ na bi yihi yi ni so ʒim ku o. 5Yi tamla Naawuni ni zaŋ suhukpaŋsibo yɛtɔɣ’ shɛŋa tɔɣisi ya yi ni nyɛ omaŋmaŋ’ bihi la yɛla? O yɛliya:

“M bia, a Duuma yi saɣis’ a, nyin’ wumma;

ka o yi kpah’ a zuɣu ni, nyin’ di chɛ ka a suhu miligi.

6 # Ayu 5.17; Ŋaha 3.11-12 Dama a Duuma saɣisirila o ni yuri so,

ka fiɛbiri o ni zaŋ so leeg’ o bia.” 7Deemiya saɣisigu kaman din yi yi ba sanna, dama di wuhiri ni Naawuni lihi ya la o bihi. Bi’ ŋuni n-lee beni ka o ba bi saɣisir’ o? 8Yi yi bi nya saɣisigu kaman o bihi zaa, dindina di wuhiri ni yi pala o bihi alali, amaa yi nyɛla kaman dagɔr’ bihi. 9Zaŋ chaŋ ti dunia ŋɔ ni banim’ polo, bɛ saɣisiri ti ka ti luri ba sizuura. Ka din gari lala nyɛla, di niŋ kamaata ni ti deei ti Ba Naawuni saɣisigu ka be. 10Ti dunia ŋɔ ni banim’ daa saɣisi ti saha biɛla puuni kaman bɛ ni tɛhi ni di tuhiya shɛm zuɣu; amaa Naawuni niŋdi lala la ti zaɣ’ viɛlli nyabu zuɣu ni di chɛ ka ti min’ o laɣim mal’ o biɛrikasitali. 11Ti yi ti nya saɣisigu, di saha maa di bemi kaman din to ka pa din tiri suhupiɛlli; amaa di nyaaŋa bɛn deei saɣisigu tibidarigibo puuni ti nyari suhudoo din nyɛ wuntia biɛhigu laara.

Wuhibu mini zuɣu ni kpahibu

12 # Aiz 35.3 Dinzuɣu kpuɣimiya yi bɔɣiri din zali ŋɔ zuɣusaa, ka kpaŋsi yi dun’ gbarima ŋɔ, 13#Ŋaha 4.26 ka doli soli din tuhi ka di chɛ ka napɔn barinim’ naba ku ŋmirigi, amaa ka lee ni malila alaafee.

14Kul kpaŋmiya yimaŋ’ chɛ ka suhudoo be yi mini sokam sunsuuni, ka maliya Naawuni biɛrikasitali din nyɛ nir’ ni ka shɛli ka ku tooi nya ti Duuma la. 15#Zal 29.18 Miriya ka yi ni so ŋmaligi ka chɛ Naawuni daanfaani; ka miriya ka yi chɛ ka putɔɣu kpe yi ni so ni n-zooi muɣisi ya ka ta yi ni shɛb’ daɣiri. 16#Pil 25.29-34 Miriya ka yi ni so nyɛ niŋgbuŋ kɔrɛlana bee m-be kaman Iso ŋun baɣa daa ka Naawuni yɛla ni ka zaŋ o kpamdi taɣi saɣiŋmani yin’ la. 17#Pil 27.30-40 Yi mi ni dimbɔŋɔ nyaaŋa o ni daa ti bɔri alibarika o ba san’ la, o daa bi tooi nya li, dama o daa bi nya soli din ni doli taɣi o ni daa tum shɛm la hal o ni daa kul bo li ni nintam la zaa yoli.

18Yi bi ka la din nyɛ Izraɛlnim’ ni daa naan ku tooi shihi shɛl’ la gbin’ na, dina n-nyɛ: Zo’ shɛli buɣim ni diri mini zibisim ni sagbana zibigibu ni sanʒiɛɣu ʒiɛbu 19#Yibu 19.16-22; 20.18-21; Zal 4.11-12; 5.22-27 ni kikahi kumsi ni kukoli yɛtɔɣa vubu din mali dabiɛm hal ka bɛn daa wum li suhi Naawuni ni o di lan tɔɣisi ba yɛtɔɣa yaha la. 20#Yibu 19.12-13 Naawuni ni daa zali ba zaligu shɛli din yɛli ni hal biŋkɔbigu yi shihi zoli maa, bɛn’ labim’ o kuɣa ku bee n-to o piɛm la daa kpɛhi ba dabiɛm ka nyaŋ ba dolibu. 21#Zal 9.19 Yɛlimaŋli, di lihibu daa mali dabiɛm hal ka Anabi Musa ti yɛli, “N ni sɔhirimi dabiɛm zuɣu.”

22Amaa yinim’ ka la Ziɔn Zoli mini Naawuni ŋun nyɛ nyɛvililan’ ŋɔ tiŋ’ din nyɛ Jɛrusalɛm m-be alizanda ni la ni malaikanim’ bɛn ka kalinli suhupiɛlli laɣiŋgu ni na; 23ka lan ka bikpamba bɛn yuya sabi alizanda ni la laɣiŋgu ni na. Yi lan kala Naawuni ŋun nyɛ sokam zaa sariakarita mini wuntizɔriba bɛn mali m-be tibi la shihi sanna. 24#Pil 4.10 Yi mi lan kala Yisa ŋun nyɛ sandaantimdi’ so ŋun zali alikauli palli min’ o ʒi’ shɛli din mihibu wuhiri ti yɛl’ shɛŋa din sɔ Ɛbɛl maŋmaŋ’ ʒim la sanna.

25 # Yibu 20.22 Miriya ka yi zaɣisi ŋun tɔɣisiri ya yɛtɔɣa yɛligu wumbu; dama bɛ ni daa zaɣisi Anabi Musa ŋun tɔɣisiri ba yɛtɔɣa dunia ŋɔ ni yɛligu wumbu ka bi tiligi la, wula ka tinim’ lee ni tiligi, ti yi zaɣisi Naawuni ŋun be alizanda ni ka saɣisiri ti ŋɔ yɛligu wumbu? 26#Hag 2.6 Naawuni kukoli daa chɛ ka tiŋgbani dam, amaa ka pumpɔŋɔ o lo alikauli yɛli, “N ku lan chɛ ka tiŋgbani kɔŋko dam, amaa n ni lan chɛ ka zuɣusaa gba dam.” 27O ni yɛli, “N ni lan chɛ ka” ŋɔ nyɛla yɛtɔɣ’ shɛli din wuhiri ni binshɛŋa din nyɛ binnamda ka damdi la ni vuui ni di chɛ ka binshɛŋa din ku tooi dam la kpalim be.

28Dinzuɣu chɛliya ka ti paɣi Naawuni ti ni deei nam shɛli din ku tooi dam ŋɔ zuɣu. Ka chɛliya ka ti lan paɣi Naawuni ka zo o n-lu o sizuura ka jɛm o la jɛmbu shɛli din ni tiɣ’ o nini; 29#Zal 4.24 dama ti Naawuni ŋɔ nyɛla buɣim din dira.

Currently Selected:

Hiburunima 12: DBwDB

Highlight

Copy