Piligu 49
49
Yaakubu yɛtɔɣa din bahindi nyaaŋa
1Di saha ka Yaakubu daa bol’ o bihi na nti yɛli ba, “Laɣimmiya na ka n ti yɛli ya din ti yɛn niŋ ya dahin’ shɛli ha yɛla.”
2“Yaakubu bidibisi,
Laɣimmiya na ti wum.
Wummiya yi ba Izraɛl
ni yɛn yɛli ya shɛm.
3“Rubin, nyini n-nyɛ m bituuli,
nyini n-nyɛ n kpiɔŋ;
ka lan nyɛ n dɔtali tuuli bia.
A nyɛla toondana
ka mali kpiɔŋ pam.
4A ŋmanila kom din bi do baalim,
a mi ku gari sokam,
dama a daa zaŋ a ba paɣ’ dɔni
o bindoo zuɣu n-ta li daɣiri.
A daa dɔni m bindoo zuɣu.
5“Simiɔn mini Lɛvi nyɛla
nir’ ni o mabia.
Bɛ malila bɛ bidibbina
tumdi barina.
6N ku zaŋ n nuu kpɛhi
bɛ yɛla ni.
M mi ku be bɛ laɣiŋgu ni;
dama bɛ suhuyiɣisili puuni,
bɛ kuri niriba,
ka chɛri chihiri naɣilahi jila
ni di ti ba suhupiɛlli.
7Mbusim be bɛ suhuyiɣisili maa zuɣu,
dama di kpɛm’ pam.
Mbusim be bɛ sujee zuɣu,
dama ninkuunsi be di ni.
N ni woligi ba Yaakubu daŋ ni,
ka wurim ba kpɛhi Izraɛl
tiŋgbɔŋ luɣilikam ni.
8“Juda, a mabihi ni ti paɣ’ a.
A ni ti zaŋ a nuu
gbaag’ a dimnim’ nyiŋgoya ni.
A ba bidibisi ni ti damd’ a tooni.
9 #
Kal 24.9; Kah 5.5 Juda ŋmanila gbuɣimbila.
M bia, a ku a dima,
ka ŋmaligi kpe a yiŋa.
A teeg’ amaŋ’ dɔni
kaman gbuɣinli la.
A ŋmanila gbuɣin’ nyaŋ.
Ŋuni n-lee ni tooi dam’ a?
10Nam jaaŋgbee
ti ku yi Juda nuu ni.
Nam jaaŋgbee mi
ti ku yi o zuliya nuu ni
hal ka ŋun su li ti kana.
Ka niriba ni ti deer’ o noli.
11O zaŋd’ o bumbil’ lɔri wain tia,
ka zaŋd’ o bunsaa bia lɔri
wain ti’ viɛlli.
O zaŋdi wain paɣir’ o situra,
ka zaŋdi wain wala kom
paɣir’ o binyɛr’ titali.
12O ni ti nyu wain
ka o nina mɔhi;
ka nyu bihim
ka o nyina paligi.
13“Zɛbulɔn ni ti ʒini
n-tabila teeku noli.
O kulinoli ni ti nyɛla
ŋariŋ’ kara zaashee.
O tintariga ti yɛn zaŋmi
hal ni Sidɔn.
14“Isaka ŋmanila bun’ so
ŋun mali kpiɔŋ piɛri sunsuuni.
15O nyaya ka nimaani
vuhim shee viɛla,
ka di tiŋgbani biɛhigu mali kɔre.
Dinzuɣu ka o deei talahi
n-tumdi tuma kaman dabili la.
16“Dan ni ti nyɛla o niriba naa
kaman Izraɛl zuliyanim’ ni yino.
17Dan ni ti ŋmanila
sokpaŋ’ tinvurigu.
O nyɛla sokpaŋ’ gariŋga
ŋun dimdi wɔhu napɔŋkpaa,
ka ŋun bar’ o lɛbiri
lur’ o kpali zuɣu.
18“Yawɛ, n guhirila saha shɛli
a ni yɛn tiligi ma.
19“Ŋmɛnditɔya ni ti liri Gaad,
amaa o ni ti kari doli ba
ti fa bɛ nɛma.
20“Asha tiŋgban’ ni
ni ti mali bindir’ suma.
O ni ti mali bindir’ shɛŋa
di ni simdi ni naa di.
21“Naftali ŋmanila walinyaŋ so
ŋun gɔr’ o yubu,
ka dɔɣi bi’ viɛla.
22“Yisifu ŋmanila ti’ shɛli
din wandi wala,
ka nyɛ din ʒe n-tab’ kulibɔŋ,
ka di wula zooi yaɣi
kuligbiriŋ zuɣu.
23Peentɔriba ni ti lir’ o,
ka di bi viɛla.
Bɛ ni ti to o piɛma,
ka nahim o pam.
24Amaa o tɔbu ku kabi,
ka ti yaannim’ Naawuni
ŋun nyɛ kpiɔŋlan’ ŋɔ
ni chɛ ka o nuhi mali kpiɔŋ
ŋuna ŋun nyɛ Izraɛlnim’ gula,
ka yihiri ba barina ni ŋɔ yuli zuɣu.
25A ba Naawuni ni sɔŋ a.
Naawuni ŋun nyɛ Kpiɔŋlan’ Naa ŋɔ
ni chɛ ka saa mi a.
O ni chɛ ka kom yi
tiŋgbani puuni na a zuɣu.
O ni ti a bihi mini niɣi pam.
26A ba daalibarika mali kpiɔŋ
gari zoya din doya sahakam ŋɔ
mini kuŋkuna din kul beni sahakam ŋɔ
daalibarika.
Naawuni chɛ ka o daalibarika
ŋɔ zaa be Yisifu ŋun min’ o
mabihi daa woligi ŋɔ zuɣu ni,
ka be o gbɛɣu zuɣu.
27Bɛnjamin ŋmanila kundun biɛɣu.
O gbahiri binyara asiba
ni zaawuni ŋubira.”
28Bɛmbɔŋɔ zaa n-nyɛ Izraɛl zuliya pinaayi la. O ni daa yɛli ba shɛm ka niŋ alibarika shɛŋa din simdi bɛ zaa yinoyino niŋ bɛ ni shɛm m-bala.
Yaakubu kpiya ka bɛ sɔɣ’ o
29Dimbɔŋɔ nyaaŋa ka o daa yɛl’ o bihi maa, “N yɛn chaŋ ti pahila n yaannim’ ni pumpɔŋɔ. Zaŋmiya ma ti sɔɣi siliga din be Ɛfurɔn ŋun nyɛ Hiti nir’ la puu la ni m-pahi n yaannim’ zuɣu. 30#Pil 23.3-20 Siliga maa bela Makipɛla pu’ shɛli din be Mamri wulimpuhili polo Keenan tiŋgbɔŋ ni la. Ibrahimma n-daa da siliga maa Ɛfurɔn ŋun nyɛ Hiti nir’ la sani n-leeg’ o dini ni di nyɛ o ni yɛn sɔɣir’ o kpiimba luɣ’ shɛli. 31#Pil 25.9-10; 35.29 Nimaani ka bɛ daa sɔɣi Ibrahimma min’ o paɣ’ Zara ni Yisahaku min’ o paɣ’ Ribɛka; ka n gba daa sɔɣi Liya nimaani. 32Ti daa da puu maa mini siliga din be di ni maa la Hitinim’ sani.” 33#Tuma 7.15 Yaakubu ni daa tɔɣis’ o bihi maa yɛtɔɣa ŋɔ naai, o daa vuui la o naba pa o bindoo zuɣu dɔni n-leei Naawuni dini pah’ o yaannim’ zuɣu.
Currently Selected:
Piligu 49: DBwDB
Highlight
Share
Copy
Want to have your highlights saved across all your devices? Sign up or sign in
Dagbani Bible with Deuterocanonical Books © Bible Society of Ghana, 2011.
