Piligu 48

Yaakubu niŋ alibarika niŋ Ifriim mini Manaasa ni

1Dimbɔŋɔ nyaaŋa ka bɛ daa ti yɛli Yisifu, “A ba ka alaafee”; ka o daa zaŋ o bidibis’ ayi la, Manaasa mini Ifriim chaŋ o sani. 2Ka bɛ daa yɛli Yaakubu, “A bia Yisifu kana”; ka o daa kpaŋ omaŋ’ yiɣisi ʒin’ o bindoo zuɣu. 3#Pil 28.13-14 Ka Yaakubu daa yɛli Yisifu, “Naawuni ŋun nyɛ Kpiɔŋlan’ Naa ŋɔ daa yi n zuɣu Luz Keenan tiŋgbɔŋ ni n-niŋ alibarika niŋ n ni 4ka yɛli ma, ‘N ni chɛ ka a dɔɣi bihi, ka chɛ ka a zuliya nab’ pam. Ka n ti chɛ ka zuliya gbaliŋ yi a zuliya maa ni na, ka n ti zaŋ tiŋgbɔŋ ŋɔ ti a zuliya ka bɛ su li sahakam.’ ”

5Ka a bih’ ayi shɛb’ a ni pun dɔɣi Ijipti tiŋgbɔŋ ŋɔ ni pɔi ka n naanyi kul’ a sanna Ijipti tiŋgbɔŋ ŋɔ ni na la nyɛla m bihi. Ifriim mini Manaasa nyɛla m bihi kaman Rubin mini Simiɔn ni nyɛ m bihi shɛm la. 6Ka bi’ shɛb’ a ni yɛn dɔɣi ka bɛ doli bɛ nyaaŋa n-yɛn nyɛ a bihi. Bɛ biɛyanim’ maa yuya ka bɛ ti yɛn zaŋ nya bɛ tarili. 7#Pil 35.16-19 Dama n ni daa yi Mɛsopoteemia labirina saha shɛli, ka Reechɛl daa kpi sol’ ni Keenan tiŋgbɔŋ ni, ka nimaani mini Ɛfirat daa na wɔɣa. Ka n daa sɔɣ’ o Ɛfirat soli maa ni (Bɛtilihɛm m-bala); ka di daa ti ma suhugarigu pam.

8Izraɛl ni daa nya Yisifu bihi maa, o daa bɔhimi, “Ka banima n-lee bɔŋɔ?”

9Ka o yɛl’ o ba, “M bihi m-bala, Naawuni ni ti ma bi’ shɛb’ ya ŋɔ m-bala.”

Ka’ o daa yɛl’ o, “Niŋm’ ania, zaŋm’ ba ti ma na ka n niŋ alibarika niŋ bɛ ni.” 10Izraɛl ni daa kurigi maa zuɣu daa chɛ ka o nina bi lan ne viɛnyɛliŋga, ka o ni tooi nya. Ka Yisifu daa zaŋ bihi maa mir’ o, ka o daa zaŋ o nuhi bɔb’ gbaai ba n-vooi ba tabil’ omaŋa, ka mɔɣisi bɛ kparima. 11Ka Izraɛl daa lan yɛli Yisifu, “N daa bi tɛhi ni n ni lan nya a ni n nini, amaa ka Naawuni mi ti chɛ ka n nya a bihi gba.” 12Di saha ka Yisifu daa kpuɣi bihi maa o naba zuɣu, ka damdi n-zaŋ o zuɣu silim tiŋa.

13Ka Yisifu daa zaŋ o nudirigu gbaai Ifriim n-zaŋ o zali tuhi Izraɛl nuzaa, ka zaŋ o nuzaa gbaai Manaasa n-zaŋ o mi zali tuhi Izraɛl nudirigu n-zaŋ ba na ti chɛ ka bɛ damd’ o tooni. 14Amaa ka Izraɛl daa zaŋ o nuhi puli pa tab’ zuɣu n-zaŋ o nudirigu pa Ifriim ŋun daa nyɛ biasan’ la zuɣu ni, ka zaŋ o nuzaa mi pa Manaasa ŋun daa nyɛ bituuli maa zuɣu ni. 15Ka o daa niŋ alibarika niŋ Yisifu ni ka yɛli:

“Naawuni ŋun nyɛ n yab’ Ibrahimma

mini m ba Yisahaku ni daa jɛm so ŋɔ,

niŋm’ alibarika niŋ bihi ŋɔ ni!

Naawuni ŋun gbib’ ma

hal ti paai zuŋɔ dabisili ŋɔ,

niŋm’ alibarika niŋ bɛ ni!

16Malaika so ŋun daa

yihi ma yɛl’ biɛri ni la,

niŋm’ alibarika niŋ bɛ ni!

Naawuni chɛ ka bihi ŋɔ zuɣu

ti chɛ ka m mini n yab’ Ibrahimma

ni m ba Yisahaku yuya ku kpi!

Naawuni tim’ ba bihi pam,

ka chɛ ka bɛ zuliya nabi!”

17Yisifu ni daa nya ka o ba zaŋ o nudirigu pa Ifriim zuɣu ni maa, di daa bi niŋ o nyaɣisim, ka o daa gbaag’ o ba nuu ni o paai li Ifriim zuɣu ni n-zaŋ li pa Manaasa zuɣu ni; 18ka yɛl’ o, “M ba, pa lala; dama ŋumbɔŋɔ n-nyɛ kpɛma. Zaŋm’ a nudirigu maa pala o zuɣu ni.” 19Amaa ka o ba daa zaɣisi ka yɛli, “M bia, m mi ni Manaasa gba zuliya ni ti galisi; amaa o tizo ŋɔ ni ti gar’ o, ka o zuliya ni ti galisi pam.”

20 # Hib 11.21 Di saha ka o daa niŋ alibarika niŋ bɛ ni dindali maa ka yɛli, “Izraɛlnim’ yi ti yɛn suhi alibarika, bɛ ni zaŋla yi yuya suhi li. Bɛ ni ti yɛli, ‘Naawuni chɛ ka yi be kaman Ifriim mini Manaasa.’ ” Lala ka o daa niŋ n-zaŋ Ifriim leei toondana ka chɛ Manaasa.

21Di saha ka Izraɛl daa yɛli Yisifu, “Di ku lan yuui ka n kpi, amaa Naawuni ni be yi sani, ka ti zaŋ ya labisi yi yaannim’ tiŋgbɔŋ la ni yaha. 22Ka din pahi nyɛla, n zaŋ n ni daa zaŋ n takɔb’ mini n tɔbu tuhi Amɔrinim’ ka fa bɛ tiŋgban’ shɛli din nyɛ Shɛkɛm la ti a, ka a mabihi la nuu ka di ni.”

Currently Selected:

Piligu 48: DBwDB

Highlight

Copy