Piligu 14

Ibram fa Lɔt bahi

1Shiina Naa Amirafɛl mini Ɛlasa Naa Ariok ni Ɛlam Naa Chɛdolaoma ni Goiim Naa Tidal 2daa ti lo tɔbu bɛ ʒiɛman’ ni n-chaŋ ni bɛ ti tuhi Sɔdom Naa Bɛra mini Gomɔra Naa Birisha ni Adima Naa Shinab ni Zɛbɔiim Naa Shɛmɛba ni Bɛla bee Zɔa naa. 3Nanim’ ŋɔ zaa daa naala noli n-laɣim bɛ tɔbbihi ti do Siddim vinvamli ni luɣ’ shɛli bɛ ni booni Teeku Kpiŋ pumpɔŋɔ ŋɔ. 4Bɛ daa jɛm Chɛdolaoma la yuun’ pinaayi, amaa yuun’ shɛli din daa pahiri yuun’ pinaata la ni ka bɛ daa zaɣisi ni bɛ ku lan jɛm o. 5Yuun’ shɛli din daa ti pahiri yuun’ pinaanahi ni, ka Chɛdolaoma mini na’ shɛb’ bɛn daa sɔŋd’ o daa chaŋ ti tuhi nyaŋ Rɛfaim din be Ashitɛrɔtikarinaim tiŋgbɔŋ ni mini Zuzim din be Ham tiŋgbɔŋ ni ni Ɛmim din be Shavɛkiriataim tiŋgbɔŋ ni 6ni Hɔrinim’ bɛn be Ɛdom#14.6 ƐDOM: Hiburuli ni di nyɛla Siɛr. Ɛdom mini Siɛr nyɛla yim. zoya ni la n-doli ba hal ni Ɛliparan din be mɔɣu ni tintariga la shee. 7Ka bɛ daa ŋmaligi lab’ Ɛnmishipat bɛ ni booni luɣ’ shɛli Kadɛshi la. Ka bɛ daa tuhi nyaŋ Amalɛk tiŋgbɔŋ ni nim’ mini Amɔrinim’ bɛn daa be Hazazɔntarima la zaa.

8Di saha maa ka Sɔdom naa mini Gomɔra naa ni Adima naa ni Zɛbɔiim naa ni Bɛla naa bɛ ni booni luɣ’ shɛli Zɔa la daa laɣim bɛ tɔbbihi chaŋ Siddim vinvamli ni, 9ka bɛ mini Ɛlam Naa Chɛdolaoma ni Goiim Naa Tidal ni Shiina Naa Amirafɛl ni Ɛlasa Naa Ariok ti gbaai tab’ tuhibu. Nanima anahi mini nanima anu n-daa lu tab’ zuɣu maa. 10Kootaali tandɔri n-daa kul yɛrigi Siddim vinvamli maa ni; ka Sɔdom mini Gomɔra nanim’ la daa ŋmaligi guuri ka bɛ ni shɛb’ faai lu kootaali tandɔri maa ni, ka bɛn kpalim mi zo nti du zoli. 11Ka bɛ dimnim’ maa daa kana ti kpuɣi bɛn’ Sɔdomnim’ mini Gomɔranim’ maa nɛma mini bɛ binshɛɣukam zaa chaŋ. 12Hal bɛ daa gbaai Lɔt ŋun daa nyɛ Ibram tizo bia la gba, ka zaŋ o nɛma pahi chaŋ.

13Di saha ka bɛ ni yino ŋun daa zo n-tiligi daa kana ti yɛli Ibram ŋun daa nyɛ Hiburu nira ka be Mamri ŋun daa nyɛ Amɔri nir’ la oki tihi gbini. Mamri min’ o mabihi bɛn daa nyɛ Ɛshikol mini Anɛr la daa nyɛla Ibram zɔnima. 14Ibram ni daa wum ni bɛ tuhi gbaag’ o dɔɣim maa chaŋ maa, ka o daa zaŋ o tɔbbi’ shɛb’ bɛ ni daa dɔɣ’ o yiŋ’ puuni, ka bɛ nyɛ tɔbutuhiri’ biinsi la ninvuɣ’ kɔbisita ni pisaayika n-kari bɛ naba hal ti paai Dan. 15Ka Ibram daa pirigipirig’ o tɔbbihi maa n-chaŋ ti liri ba yuŋ ŋ-ŋme n-kari ba hal ti paai Hɔba din be Damaskus nuzaa polo la. 16Ka o daa va bɛ nɛma zaa, ka zaŋ o dɔɣim Lɔt min’ o nɛma gba ni ninvuɣ’ shɛba ni paɣiba m-pahi labina.

Mɛlikizɛdɛk niŋ alibarika niŋ Ibram ni

17Ibram ni daa nyaŋ Chɛdolaoma mini na’ shɛb’ bɛn be o sani ka labirina saha shɛli, ka Sɔdom naa daa chaŋ ti tuh’ o soli Shave vinvamli ni bɛ ni daa booni luɣ’ shɛli Naa Vinvamli la. 18#Hib 7.1-10 Ka Salɛm Naa Mɛlikizɛdɛk ŋun daa lan nyɛ Zallakudura Naa maligumaana la daa zaŋ bɔrɔbɔro mini wain na nti ti Ibram; 19ka suhi alibarika niŋ o ni ka yɛli,

“Zallakudura Naa ŋun nam zuɣusaa mini dunia ŋɔ

niŋm’ alibarika niŋ Ibram ni!

20Ti paɣiri Zallakudura Naa

ŋun chɛ ka a nyaŋ a dimnim’ ŋɔ!”

Ka Ibram daa zaŋ binshɛɣukam zaa pia puuni zaɣ’ yiniyini yihi Mɛlikizɛdɛk zaka.

21Ka Sɔdom naa maa daa yɛli Ibram, “Zaŋm’ niriba ŋɔ ti ma, amaa ka mali nɛma ŋɔ zaa.”

22Amaa ka Ibram daa yɛli, “M pun po Yawɛ ŋun nyɛ Zallakudura Naa ŋun nam zuɣusaa mini dunia ŋɔ 23ni n ku zaŋ a gali bee a namdili mia bee a ni su binshɛlikam, ka a ti yɛli, ‘Mani n-chɛ ka Ibram leei bundana.’ 24N ku zaŋ binshɛli naɣila n nachimba ŋɔ mini ninvuɣ’ shɛb’ bɛn doli ma chaŋ la ni pun di shɛl’ la; amaa naɣ’ chɛ ka Anɛr mini Ɛshikol ni Mamri n-yihi bɛ tarili ni nyɛ shɛli di ni.”

Currently Selected:

Piligu 14: DBwDB

Highlight

Copy