Tuumba Tuma 5

Ananias min’ o paɣ’ Safira

1Ka do’ so ŋun yuli daa booni Ananias min’ o paɣ’ Safira bɛn’ daa zaŋ bɛ ni su shɛli kɔhi, 2ka o daa pii di liɣiri maa shɛli sɔɣi ka o paɣ’ maa mi di yɛla. Ka Ananias daa zaŋ din kpalim maa ti sɔŋ Yisa tuumba maa tooni. 3Ka Pita daa bɔh’ o, “Ananias, bɔ n-niŋ ka a chɛ ka Sintani kpe a suhu ni ka a pii liɣiri maa shɛli sɔɣi ka ŋmari Naawuni Shia Kasi ʒiri? 4A ni daa na bi kɔhi li la, pa nyini n-daa su li? Ka a ni kɔhi li maa, pa nyini n-na kul su di liɣiri maa? Ka bɔzuɣu ka a zaŋ tɛha ŋɔ tatabo kpɛh’ a suhu ni?” Ka yɛl’ o, “Pa ninsalinim’ ka a ŋma ʒiri maa, amaa Naawuni maŋmaŋa.” 5Ka Ananias daa wum yɛligu ŋɔ ka dii lu n-kpi, ka dabiɛm daa kpe bɛnkam zaa daa wum li. 6Ka nachimba daa yiɣisi n-zaŋ bimpiɛlli niŋ o n-zaŋ o yi nti sɔɣi.

7Dimbɔŋɔ nyaaŋa zaŋ chaŋ kaman awa muna ata saha, ka Ananias paɣ’ daa kpɛna ka bi mi din niŋ maa yɛla. 8Ka Pita yɛl’ o, “Yɛlim’ ma yɛlimaŋli, yi ni shiri kɔhi yi puu la laɣ’ shɛli zaa m-bɔŋɔ?”

Ka o saɣi, “Iin, di zaa m-bala.” 9Ka Pita yɛl’ o, “Bɔzuɣu ka a min’ a yidan’ naai noli ni yi zahim ti Duuma Shia Kasi? Nyama, bɛn zaŋ a yidan’ yi nti sɔɣi n-na be soli kanna ŋɔ; bɛ ni zaŋ a gba yi.” 10Ka paɣ’ maa dii lu Pita tooni kpi. Ka nachimba maa daa kpɛna nti nya ka o kpimi doya, ka bɛ kpuɣ’ o gba yi nti sɔɣ’ o baɣil’ o yidan’ maa gballi. 11Ka dabiɛm daa kpe cheechi niriba zaa pam zaŋ tabili bɛnkam zaa daa wum di yɛla.

Alahiziba tumtumsa tumbu

12Yisa tuumba maa daa wuhiri shihira pam, ka tumd’ alahiziba tumtumsa niriba sani; ka yɛdaniŋdib’ la zaa daa laɣim be Sulemaana Kazala ni. 13Ka bɛn pa Yisa nyaandoliba daa ka suhukpeeni din ni zaŋ bɛmaŋ’ gari bɛ ni, amaa ka daa lee tiri ba jilima pam. 14Ka dɔbba mini paɣiba pam daa kul niŋdi ti Duuma yɛda pahira. 15Ka niriba daa ʒiri barinim’ bɛ bindɔhi zuɣu mini bɛ daamaŋkanim’ ni na nti sɔŋdi sɔnaŋgbanyɛhi ni Pita ti gariti ka o shilinshia mahim lee lu bɛ ni shɛb’ zuɣu. 16Ka shɛb’ gba daa ʒi barinim’ mini alizin’ biɛri ni ʒi ninvuɣ’ shɛb’ zuɣu n-yi Jɛrusalɛm tiŋkpaŋ’ kɔɣilikɔɣili kana, ka bɛ zaa daa ti nya alaafee.

Yisa tuumba nya alaka

17Di saha ka maligumaaniba zuɣulana min’ o nyaaŋa bɛn nyɛ Sadusiinim’ la daa zab’ Yisa tuumba maa nyuli 18n-gbahi ba ti kpɛhi duu. 19Amaa ka ti Duuma malaika daa chaŋ dindali yuŋ nti yooi duu maa dunoya ka yihi ba na yɛli ba, 20“Chamiya ti zani Naawuni jɛmbu duu puuni n-yɛli niriba nyɛvil’ palli ŋɔ yɛla zaa.” 21Bɛ ni daa wum lala maa ka bɛ chaŋ ti kpe Naawuni jɛmbu duu maa ni asibaasi ti wuhiri niriba.

Ka maligumaaniba zuɣulan’ maa min’ o nyaaŋa zaa daa tim ti boli Izraɛlnim’ kpamba bɛn daa nyɛ jintɔriba la na ni bɛ ti laɣim to jina, ka tim Naawuni jɛmbu duu tuumba ni bɛ chaŋ sarika maa ni ti yihi Yisa tuumba maa na. 22Ka bɛ daa chaŋ nti bi nya Yisa tuumba maa sarika maa ni ka labina ti yɛli, 23“Ti chaŋya ka duu maa dunoya zaa kparimi kirikiri, ka dansarika guliba ʒe dunoya ni gu, amaa ka ti kparigi ka bi nya so duu maa ni.” 24Ka Naawuni jɛmbu duu tuumba kpɛm’ mini maligumaaniba daa wum lala ka di gari ba pam, ka bɛ bi mi yɛlli maa ni yɛn bahindi shɛm. 25Di saha ka so daa kana ti yɛli ba, “Yi ni sa kpɛhi ninvuɣ’ shɛb’ duu la be Naawuni jɛmbu duu wuhiri niriba.” 26Ka Naawuni jɛmbu duu tuumba kpɛm’ maa min’ o nyaaŋa daa chaŋ ti gbahi ba na; amaa bɛ daa bi lan gbahi ba ni kiŋkansi yaha, dama bɛ daa zɔrimi ni niriba ti lab’ ba kuɣa.

27Ka bɛ daa zaŋ ba na nti zali jintɔriba maa tooni, ka maligumaaniba zuɣulan’ maa gbaai ba vihibu ka yɛli ba, 28#Mat 27.25 “Ti daa pun yɛli ya ni yi miri ka yi mali Yisa yuli ŋɔ yihiri waazu tiri niriba, amaa ka yi zaɣisi ka bahi zaŋ li moli gili Jɛrusalɛm zaa, ka bɔri ni yi zaŋ o kum zambu ʒil’ ti.”

29Ka Pita min’ o tuuntab’ maa garigi yɛli ba, “Di simdi ni ti deela Naawuni noli ka pa ni ninsalinim’ noli; 30dama ŋuna n-nyɛ ti yaannim’ Naawuni ŋun daa neei Yisa so yi ni daa zaŋ kpahi tabili dapulli zuɣu n-ku la. 31Ŋuna ka Naawuni tibigi n-zaŋ o ʒili o nudirigu polo ni o leei ti toondana ni ti tiligira n-chɛ ka Izraɛlnim’ niŋ tuuba ka nya alahichi chɛ m-paŋ. 32Tinima n-nyɛ dimbɔŋɔnim’ shɛhiranima m-pahi Shia Kasi so Naawuni ni zaŋdi tiri bɛn deeri ŋun’ Naawuni nol’ la.”

33Jintɔriba maa ni daa wum lala maa ka suli ku ba pam, ka bɛ bɔri ni bɛ ku Yisa tuumba maa. 34Amaa ka jintɔriba maa ni yino ŋun daa nyɛ Farisii, ka o yuli booni Gamaliɛl ka o daa nyɛ Naawuni fukumsi zaligu karimba so sokam ni tiri jilima la daa yiɣisi zani n-yɛli ni bɛ na zaŋmi Yisa tuumba maa yi kpaŋ’ pɔi. 35Di saha ka o daa yɛli jintɔriba maa, “Yinim’ Izraɛlnima, gbaamiya yimaŋa ni yi ni lo ni yi niŋ niriba maa shɛm maa; 36dama saha shɛli Tiudas ni daa yiɣisi n-zaŋ omaŋ’ leei wɔɣirili ka niriba paai kaman ninvuɣ’ kɔbisinahi daa dol’ o la, bɛ daa ti ku o, ka bɛn dol’ o maa zaa wurim, ka o tuma maa gba daa zan’ tariga. 37Di nyaaŋa ka Galili do’ so ŋun yuli daa booni Judas la gba daa ti yiɣisi daadam biɛligu yuya sabbu saha la n-laɣim niriba pah’ omaŋ’ zuɣu, amaa o gba ni daa ti kani, bɛn dol’ o maa zaa daa wurimmi. 38Dinzuɣu n yɛri ya mi ni yi chɛl’ yɛlli ŋɔ ka gbaaya yimaŋ’ ni Yisa tuumba maa, dama bɛ wuhibu ŋɔ mini bɛ tuma ŋɔ yi nyɛla salinim’ dini, di ni zan’ tariga; 39amaa di yi yila Naawuni sanna, dindina yi ku tooi nyaŋ ba; hal yi yi dol’ li gba, di pa shɛli yi ni ti nya ka di nyɛla Naawuni ka yi tuhiri maa.”

Ka bɛ daa deeg’ o yɛligu maa 40ka boli Yisa tuumba maa na ti fiɛb’ ba, ka yɛli ba ni bɛ miri ka bɛ lan zaŋ Yisa yuli tɔɣisiri niriba, ka daa bahi ba ka bɛ chaŋ. 41Ka bɛ daa yiɣisi jintɔriba maa sani n-yi ni suhupiɛlli Naawuni ni kali ba pahi bɛn simdi ni bɛ di vi Yisa yuli zuɣu kalinli ni maa zuɣu. 42Ka bɛ daa kul chani Naawuni jɛmbu duu mini niriba yinsi biɛɣukam nti wuhiri ba, ka yihiri waazu yɛri ni Yisa n-nyɛ Masia.

Currently Selected:

Tuumba Tuma 5: DBwDB

Highlight

Copy