Maak 8

Yisa dihi niriba tusaanahi

(Matiu 15.32-39)

1Ka salo pam daa ti lan laɣim ka Yisa sanna, ka daa ti lan ka bindirigu din ni di, ka o daa bol’ o nyaandoliba na ti yɛli ba, 2“Salo ŋɔ yɛla niŋ ma nambɔɣu pam, dama zuŋɔ daba ata m-bɔŋɔ ka bɛ kul be n sani ka lan ka bindirigu dira. 3Bɛ ni shɛb’ yila katinsi na, dinzuɣu n yi chɛ ka bɛ kuli ni kum bɛ ni ti tarigi sol’ ni.”

4Ka o nyaandoliba maa bɔh’ o, “Ka ya polo ka nir’ lee yɛn nya bindirigu mɔɣu ŋɔ ni ti niriba ŋɔ zaa ka bɛ di n-tiɣi?”

5Ka o bɔhi ba, “Bɔrɔbɔro kpila ala ka yi lee mali?”

Ka bɛ yɛl’ o, “Diba ayopɔin.”

6Ka o yɛli salo maa ni bɛ ʒinim’ tiŋa; ka daa zaŋ bɔrɔbɔro kpila ayopɔin maa niŋ alibarika niŋ di ni, ka ŋmahiŋmahi li ti o nyaandoliba maa ni bɛ zaŋ li tari salo maa; ka bɛ daa zaŋ li tari salo maa zaa. 7O nyaandoliba maa daa mali zim’ bihi biɛla pahi, ka o daa zaŋ di gba niŋ alibarika niŋ di ni ka yɛli ba ni bɛ zaŋm’ li tari ba pahi. 8Ka bɛ zaa ha daa di li tiɣi, ka bɛ daa laɣisi bɔrɔbɔro chɛhi mini zimburisa din guui pal’ piɛr’ ayopɔin. 9Bɛn daa di li maa daa nyɛla kaman niriba tusaanahi laasabu. 10Di nyaaŋa ka Yisa daa chɛbisi ba, ka o min’ o nyaandoliba dii kpe ŋariŋ m-baai du teeku duli chaŋ Dalimanuta tiŋgbɔŋ ni.

Farisiinim’ bɔri shihirili

(Matiu 16.1-4)

11 # Mat 12.38; Luk 11.16 Ka Farisiinim’ shɛb’ daa ka Yisa sanna nti ŋmɛr’ o naŋgbankpeeni m-bɔri ni bɛ zahim o ka o wuhi ba alizanda ni shihirili. 12#Mat 12.39; Luk 11.29 Ka o daa siɣim pam ka yɛli, “Bɔ n-lee chɛ ka ʒiɛmani ŋɔ nim’ bɔri shihirili? Yɛlimaŋli ka n yɛri ya, yi ʒiɛmani ŋɔ nim’ ku nya shihirili hal baabiɛla!”

13Ka o daa chɛ ba, ka lan kpe ŋariŋ maa m-baai du dul’ din’ la ha.

Farisiinim’ mini Naa Hɛrɔd dabindi yɛla

(Matiu 16.5-12)

14Yisa nyaandoliba daa ti tam bɔrɔbɔro ʒibu yɛla, ka malila bɔrɔbɔro kpil’ yini kɔŋko bɛ ŋariŋ ni. 15#Luk 12.1 Ka o daa ti kpahi bɛ zuɣu ni yɛli, “Miriya Farisiinim’ dabindi mini Naa Hɛrɔd dabindi la.”

16Ka bɛ daa niŋ tab’ saawara yɛra, “Ti ni bi ʒi bɔrɔbɔro la na zuɣu m-bala.”

17Ka Yisa daa baŋ bɛ ni tɛhi shɛm ka yɛl’ lala maa ka ŋmaligi bɔhi ba, “Bɔ n-niŋ ka yi niŋdi tab’ saawara yi ni bi ʒi bɔrɔbɔro maa na zuɣu? Yi nini na kul bi neei bee yi na kul bi baŋ? Yi nyɛla suhutunanima? 18#Jɛr 5.21; Ɛzɛk 12.2; Maak 4.12 Yi malila nina din bi nyara? Ka mali tiba din bi wumda? Ka yi bi lan teei yaha? 19N ni daa ŋmahi bɔrɔbɔro kpila anu dihi niriba tusaanu la, piɛr’ ala ka yi daa lee laɣisi di zaɣ’ chɛhi pali?”

Ka bɛ yɛl’ o, “Piɛri pinaayi.”

20Ka o lan bɔhi ba, “Ka n ni daa ŋmahi bɔrɔbɔro kpila ayopɔin shɛli dihi niriba tusaanahi la, piɛr’ ala ka yi daa lee laɣisi di zaɣ’ chɛhi pali?”

Ka bɛ yɛl’ o, “Piɛr’ ayopɔin.”

21Ka o lan bɔhi ba pahi, “Ka daɣila yi na kul bi baŋ?”

Yisa tib’ Bɛtisaida zoma

22Yisa min’ o nyaandoliba daa ti paai Bɛtisaida, ka bɛ zaŋ zoon’ so tah’ o sanna nti balim o ni o zaŋ o nuu shih’ o. 23Ka o daa gbaai zom’ maa nuu ni vo o yi tiŋ’ maa tariga nti tuhi nintɔri ta o nina, ka zaŋ o nuhi shih’ o ka bɔh’ o, “A nya shɛli?”

24Ka zom’ maa kpuɣ’ o zuɣu lihi ka yɛli, “N nya niriba ka bɛ chana; amaa bɛ ŋmanila tihi.”

25Di nyaaŋa ka Yisa daa lan zaŋ o nuhi shihi o nina maa; ka zom’ maa lan neeg’ o nina lihi yaha, ka o nina maa dii neei zaa, ka o nyari binshɛɣukam viɛnyɛliŋga. 26Ka Yisa chɛbis’ o ni o kulima ka yɛl’ o, “Di lan lab’ tiŋ’ ŋɔ ni.”

Pita kahigi wuhi Yisa Masiatali ni nyɛ shɛm

(Matiu 16.13-20; Luk 9.18-21)

27Ka Yisa min’ o nyaandoliba daa chani gindi tiŋkpan’ shɛŋa din be Siizaria Filipai tiŋgbɔŋ ni; bɛ ni daa chani maa ka o ti bɔhi ba, “Niriba lee yɛri ni n nyɛla ŋuni?”

28 # Maak 6.14-15; Luk 9.7-8 Ka bɛ yɛl’ o, “Shɛb’ yɛri ni a nyɛla Jɔn Baptaizira, ka shɛb’ yɛri ni a nyɛla Anabi Ilaija, ka shɛb’ mi yɛri ni a nyɛla anabinim’ la ni yino.”

29 # Jɔn 6.68-69 Ka o ŋmaligi bɔhi ba, “Ka yi mi lee yɛli ni n nyɛla ŋuni?” Ka Pita garigi yɛl’ o, “A nyɛla Masia.” 30Ka o daa kpahi bɛ zuɣu ni yɛli ni bɛ di yɛli so di yɛla.

Yisa yɛl’ o wahala dibu min’ o kum yɛla

(Matiu 16.21-23; Luk 9.21-22)

31Ka Yisa daa piligi wuhir’ o nyaandoliba maa yɛra, “Faashee Daadam Bia nya wahala pam, ka tiŋ’ maa ni kpamba mini maligumaaniba kpamba ni Naawuni zaligubaŋdib’ zaa ti zaɣis’ o, ka chɛ ka bɛ ku o, amaa di daba ata dali o ni ti neei kum ni.” 32O daa kul kahigila dimbɔŋɔ gbinni zaa viɛnyɛliŋga wuhi ba. Ka Pita daa bol’ o yi kpaŋa nti kpahir’ o zuɣu ni. 33Di saha ka Yisa ŋmaligi yul’ o nyaandoliba maa, ka kpahi Pita zuɣu ni yɛli, “Sintani ŋɔ! Garimi n nyaaŋa! Dama a bi tɛhiri yɛl’ shɛŋa din nyɛ Naawuni dini yɛla, amaa din nyɛ salinim’ dini yɛla ka a tɛhira.”

Yisa nyaandolitali yɛla

(Matiu 16.24-28; Luk 9.23-27)

34 # Mat 10.38; Luk 14.27 Ka Yisa daa boli salo pah’ o nyaandoliba zuɣu na nti yɛli ba, “Ŋunkam bɔri ni o doli ma, ŋun’ zaɣisim’ omaŋa ka kpuɣ’ o dapulli buɣi doli ma. 35#Mat 10.39; Luk 17.33; Jɔn 12.25 Dama ŋunkam tiligir’ o nyɛvili ni ti kɔŋ li, ka ŋunkam mi kɔŋ o nyɛvili m mini n lahibal’ suŋ ŋɔ zuɣu ni ti lan nya li.” 36Ka bɔhi ba, “Ka sal’ yi lee nya dunia ŋɔ binshɛɣukam zaa ka ti kɔŋ o nyɛvili, nyɔ’ bɔ ka o lee di 37bee bin’ bɔ ka sal’ lee yɛn zaŋ o nyɛvili taɣi? 38Dinzuɣu ŋunkam zɔri vi m mini n yɛligu zuɣu ninvuɣ’ biɛri bɛn bi ʒe Naawuni yim ʒiɛmani ŋɔ ni, Daadam Bia mini malaika kasinim’ yi ti labina o Ba jilima ni, o gba ni ti zo vi ni o zaŋ dilan’ pah’ o niriba ni.”

Currently Selected:

Maak 8: RLDB

Highlight

Copy