Maak 2

Yisa tibi gbalikpimalana

(Matiu 9.1-8; Luk 5.17-26)

1Ka di daa niŋ daba ayi ka Yisa lan lab’ Kapɛrinium ka di mol’ gili ni o lab’ yiŋ’ na. 2Ka salo pam dii laɣimna hal ka palichee ti lan ka yili maa ni, ka so daa naan ku tooi lan miri dunol’ ni gba, ka Yisa yihiri ba waazu. 3Ka niriba anahi daa zaŋ gbalikpimalan’ so niŋ amaŋka ni ʒi o ka Yisa sanna. 4Ka salo maa galisim zuɣu daa chɛ ka bɛ kɔŋ bara maa zaŋ paai Yisa sani, ka daa dula duu maa zuɣusaa nti chib’ voli Yisa zuɣusaa dɛde. Bɛ ni daa chib’ voli maa, ka bɛ zaŋ bara maa mini amaŋka maa siɣisi li ti sɔŋ tiŋa.

5Yisa ni daa nya ka bɛ niŋ o yɛda shɛm maa ka o yɛli bara maa, “M bia, n chɛ a daalahichi paŋ a.”

6Di saha ka Naawuni zaligubaŋdi’ shɛb’ daa ʒi nimaani m-bɔhiri bɛ suhuri yɛra, 7“Bɔzuɣu ka doo ŋɔ tɔɣisiri lala? O mɔri Naawuni! Ŋuni n-lee ni tooi chɛ niriba daalahichi paŋ ba ka pa ni Naawuni kɔŋko?”

8Tɛha maa ni daa be bɛ suhuri ni saha shɛli maa ka Yisa baŋ li ka dii bɔhi ba, “Wula ka yi bɔhiri yi suhuri dimbɔŋɔnim’ zuɣu? 9Yɛla ayi ŋɔ sunsuuni, dini n-lee be asama ni nir’ yɛli: A yi yɛli gbalikpimalana ni a chɛ o daalahichi paŋ o bee a yi yɛl’ o ni o yiɣisim’ zaŋ o daamaŋka chaŋ?” 10Ka lan yɛli ba, “Amaa m bɔrimi ni yi baŋ ni Daadam Bia mali yiko din chɛri niriba daalahichi paŋdi ba dunia ŋɔ ni.” Di saha ka o daa ŋmaligi yɛli gbalikpimalan’ maa, 11N yɛr’ a mi, “Yiɣisim’ zaŋ a daamaŋka maa kuli!”

12Ka o dii yiɣisi zaŋ o daamaŋka maa yi bɛ zaa ninni. Ka di daa niŋ bɛ zaa alahiziba pam, ka bɛ paɣiri Naawuni yɛra, “Ti na ʒi n-nya alahiziba tuuni ŋɔ tatabo.”

Yisa boli Lɛvi

(Matiu 9.9-13; Luk 5.27-32)

13Ka Yisa daa lan lab’ teeku nol’ ni, ka salo maa zaa lan laɣimna nti gil’ o ka o wuhiri ba. 14Ka o daa tirisi tooni ha nti nya Alifius bia Lɛvi, ka o ʒi farigu deebu shee. Ka Yisa yɛl’ o, “Yiɣisim’ doli ma!” Ka o yiɣisi dol’ o.

15Ka bɛ daa chaŋ ti kpe Lɛvi maa yiŋa, ka Yisa min’ o nyaandoliba ni farigudeeriba pam ni alahichinim’ laɣim ʒini diri bindirigu, dama bɛ pam n-daa doli Yisa na. 16Ka Naawuni zaligubaŋdiba bɛn nyɛ Farisiinim’ ni daa nya ka Yisa mini alahichinima ni farigudeeriba laɣim diri maa, ka bɛ bɔh’ o nyaandoliba, “Bɔzuɣu ka o mini farigudeeriba ni alahichinim’ laɣim timdi dira ka nyura?”

17Ka Yisa daa wum lala maa ka yɛli ba, “Bɛn mal’ alaafee bi bɔri dɔɣite naɣila bɛn biɛra; pa wuntizɔriba zuɣu ka n kana, amaa alahichinim’ tuuba niŋbu zuɣu ka n kana.”

Nol’ lɔbu yɛla

(Matiu 9.14-17; Luk 5.33-39)

18Jɔn Baptaizira nyaandoliba mini Farisiinim’ daa ti lɔri noli; ka ninvuɣ’ shɛb’ kana nti bɔhi Yisa, “Bɔ niŋ ka Jɔn nyaandoliba mini Farisiinim’ nyaandoliba lɔri noli, ka nyin’ nyaandoliba bi lɔra?”

19Ka Yisa bɔhi ba, “Aŋgo zɔnim’ ni tooi lo noli aŋgo ni be bɛ sani saha shɛli? Aŋgo ni na be bɛ sani maa, bɛ ku tooi lo noli. 20Amaa saha kanna ka bɛ ni ti yihi aŋgo maa bɛ sani, dindali maa ka bɛ ni ti lo noli.”

21Ka o daa lan ŋahi ba ŋaha ŋɔ yɛli, “So ku saɣi zaŋ tan’ palli din na bi tiri liɣi binyɛr’ kurili, dama o yi niŋ lala, tan’ palli maa ni yaai di ko cheei ka chɛ binyɛr’ kurili maa, ka di maan chɛhi pahi. 22So mi ku saɣi zaŋ da’ palli le dakol’ kura ni, dama o yi niŋ lala da’ palli maa ni chɛhichɛhi kol’ kura maa, ka dam maa bahi yoli, ka kola maa gba saɣim. Dinzuɣu bɛ zaŋdi da’ palli lɛrila kol’ pala ni.”

Vuhim Dabisili dali yɛla

(Matiu 12.1-8; Luk 6.1-5)

23 # Zal 23.25 Di daa ti lu Vuhim Dabisili dali, ka Yisa min’ o nyaandoliba tim so puu ni garita; bɛ ni daa chani maa ka o nyaandoliba maa piligi kabisiri chi chana. 24Ka Farisiinim’ bɔh’ o, “Nyama! Bɔzuɣu ka bɛ tumdi din chihiri Vuhim Dabisili dali?”

25Ka Yisa bɔhi ba, “Yi na ʒi n-karim Naa Dauda ni daa niŋ shɛm kum ni daa ti wum o mini bɛn be o sani ka bɛ bɔri bindirigu la yɛla? 26#1 Sam 21.1-6 Abiata ni daa nyɛ maligumaaniba zuɣulana saha shɛl’ la ka ŋun’ Naa Dauda daa chaŋ ti kpe Naawuni jɛmbu duu nti ŋub’ bɔrɔbɔro shɛŋa din daa chihiri ni so ŋubi naɣila maligumaaniba kɔŋko la, hal ka daa pii li nti ti bɛn daa be o sani la?”

27 # Lɛv 24.9 Ka o daa lan yɛli ba, “Naawuni zali Vuhim Dabisili dali tila ninsalinima, amaa o bi nam ninsalinim’ ti Vuhim Dabisili dali. 28Dinzuɣu Daadam Bia n-su Vuhim Dabisili dali gba.”

Currently Selected:

Maak 2: RLDB

Highlight

Copy