Malaki 2
2
1“Pumpɔŋɔ, yinim’ maligumaaniba, yi zaligu m-bɔŋɔ. 2Yi yi ku gbilisi tibili wum ka ku zaŋ li niŋ yi suhuri ni n-tiri ma jilima, dindina, n ni yɛli noli niŋ yi daalibarikanim’ ni. Yɛlimaŋli m pun yɛli noli niŋ di ni, dama yi bi zaŋ li niŋ yi suhuri ni. 3N ni darigi yi bihi tibili, ka zaŋ yi sara biŋkɔbiri bindi ʒe yi nina ni, ka kari ya n sani. 4#Kal 3.11-13 Dinzuɣu baŋmiya ni mani n-zali ya zaligu ŋɔ ni di chɛ ka n ni daa lo Lɛvi alikauli shɛl’ la zani.” Yawɛ ŋun nyɛ Tɔbbihi Naa ŋɔ n-yɛli lala maa.
5 #
Kal 25.12
“N ni daa lo o alikauli shɛli daa nyɛla nyɛvili mini alaafee alikauli din nyɛ n ni daa zaŋ shɛli ti o ka di wuhiri jilima tibu, ka o daa tiri ma jilima ka luri n yuli sizuura la. 6Yɛlimaŋli wuhibu daa be o nol’ ni, ka galimi yɛtɔɣa daa ka o nol’ ni. O daa kul doli ma mi ni nimmaŋtali mini biɛrisuntali, ka daa yihi niriba pam tuumbiɛri tumbu ni. 7Dama di simdi ni yɛm yɛtɔɣa yiri maligumaana nol’ ni na, ka niriba ni bɔr’ o wuhibu, dama o nyɛla Yawɛ ŋun nyɛ Tɔbbihi Naa ŋɔ tumo.
8“Amaa yinim’ birigimi kpe yɔɣu ka chɛ soli, ka yi wuhibu chɛ ka niriba pam tuui, yi saɣim n ni daa lo Lɛvi alikauli shɛli maa.” Yawɛ ŋun nyɛ Tɔbbihi Naa ŋɔ n-yɛli lala maa. 9“Dinzuɣu n ni chɛ ka yi nya filiŋ, ka niriba zaa ʒiɛm ya ka filim ya yi ni bi doli n soya, amaa ka chɛ ka niriba gaŋbu be yi wuhibu ni la zuɣu.”
Niriba maa ni bi ʒe Naawuni yim shɛm
10Ti zaa ba pala ba yino? Pa Naawuni yino n-nam ti? Ka wula ka ti bi ʒe tab’ yim, ka saɣindi Naawuni ni daa lo ti yaannim’ alikauli shɛli maa? 11Judanim’ bi ʒe yim, ka din chihiri kul tumdi Izraɛl mini Jɛrusalɛm puuni. Dama Judanim’ saɣim Yawɛ ni yuri o jɛmbu du’ shɛl’ la, ka kpuɣi tinzunnim’ bɛn jɛmdi buɣa bipuɣinsi. 12Yawɛ ni yihi ninvuɣ’ so ŋun niŋ lala Yaakubu zuliya ni, ka o ku lan di shɛhira bee n-garigi yɛtɔɣ’ shɛli bee n-zaŋ pina na ti ti Yawɛ ŋun nyɛ Tɔbbihi Naa ŋɔ.
13Ka yi lan niŋdi dimbɔŋɔnim’ pahira. Yi kuhira, ka fabinda, ka yi nintam tɛli Yawɛ sara maligu bimbini, o ni bi lan lihi nya yi sara bee n-deeri li yi nuu ni ni yurilim la zuɣu. 14Yi bɔhira, “Wula ka o bi lan deeri li?” Dama Yawɛ n-daa di a min’ a ni daa kpuɣi paɣ’ so a bipolitali ni shɛhira, hal paɣ’ maa ni kul nyɛ a mini ŋun be, ka lan nyɛ a daalikauli paɣ’ maa zaa yoli, a bi ʒe o yim. 15Pa Naawuni yino maa n-nam paɣ’ maa? Niŋgbina mini shia maa zaa nyɛla o dini. Ka bɔ ka o lee bɔra? O bɔri ni Naawuni biɛhigu be ti bihi ni. Dinzuɣu gbibiya yimaŋa, ka di chɛn ya ka so bi ʒe o ni daa kpuɣi paɣ’ so o bipolitali ni yim. 16Dama Yawɛ ŋun nyɛ Izraɛl Naawuni ŋɔ yɛliya “N je paɣ’ yihibo, n je ni so niŋ o paɣa kiŋkansi. Yawɛ ŋun nyɛ Tɔbbihi Naa ŋɔ n-yɛli lala maa. Dinzuɣu miriya ka yi nyɛ bɛn bi ʒe yim.”
Saria karibu dabisili miriya
17Yi chɛ ka yi yɛtɔɣa nyɔni Yawɛ nyee. Amaa ka yi bɔhira, “ Wula ka ti lee chɛ ka o nyee nyɔni?” Yi ni yɛra, “Ŋunkam tum zaɣ’ biɛɣu, di nyɛla din viɛli Yawɛ sani, ka nyɛ o ni bɔri shɛl’ la.” Bee yi ni bɔhira, “Naawuni ŋun nyɛ yɛlimaŋlilan’ maa lee be ya la?”
Currently Selected:
Malaki 2: RLDB
Highlight
Share
Copy
Want to have your highlights saved across all your devices? Sign up or sign in
Red Letter Dagbani Bible © Bible Society of Ghana, 2011
