Rwiyo 5
5
CHIKOMBA
1Ndauya ini kubindu rangu
iwe mwana wamai,
mwenga wangu.
Ndavakunongerera mura yangu
uye tunonhuwirira twangu.
Ndavakutodya zinga rouchi
uyewo uchi hwangu
ndava kutonwa ini waini nemukaka wangu.
SHAMWARI
Idyai shamwari munwe;
nwiririrai, imi vadiwa.
RWUMBO RWECHINA
MWENGA
2Ndakavata zvangu
asi kukotsira mukati umu handina.
Ndiye inzwei mudiwa achigogodza, achiti,
“Ndizarurire mwana wamai, iwe chido chemwoyo wangu,
njiva yangu
iwe wakaperera nokunaka.
Nokuti musoro wangu munyoro nedova,
vhudzi rangu ratota
namadonhwe ousiku.”
3Ndanga ndatopfekenura hanzu.
Ndidzipfeke zvakare here?
Ndanga ndashamba tsoka dzangu
ndodzisvibisazve nevhu here?
4Mudiwa wangu akapinza ruoko rwake
ndokubata chihuri
mwoyo wangu wakanzwa manyawi.
Ndakanzwa manyawi mumwoyo mangu.
5Pandakazoti regai ndimuke
ndizarurire mudiwa wangu,
maoko angu achidonha mura
minwe ichiyerera mura
ichitoyerera pane chokuzarurisa gonhi.
6Ndakazarurira mudiwa wangu
asi mudiwa wangu akanga atendeuka aenda,
zvakandipedza simba
paakadzokera.#5:6 Paakadzokera: Vamwe vanoti paakataura.
Ndakamutsvaka ndikamushaya
ndakamudaidza asi haana kupindura.
7Vachengetedzi veguta vakandiona
pavaingunofamba-famba neguta,
vakandirova vakandikuvadza
vakanditorera gemenzi rangu
ivo vachengetedzi vaparusvingo.
8Ndinokukumbirisai chaizvo vanasikana veJerusaremu
kuti kana mawana mudiwa wangu
mumutaurire kuti
ndapera ini norudo.
SHAMWARI
9Nhaiwe mukadzi akanakisisa kudai
iye mudiwa wako chii chaizvo chaanopfuura
vamwe nacho?
Iye mudiwa wako chaanopfuura
vamwe nacho chii chaizvo
zvokutotikumbirisa ukadaro?
MWENGA
10Mudiwa wangu akapenyerera, akatsvukirira,
anonyatsoonekwa mukati
mezviuru gumi zvavanhu.
11Musoro wake indarama
chaiyo yakanakisisa.
Vhudzi rake, rinoyerera
rakasviba kuti ndo-o segunguwo.
12Maziso ake anenge njiva
dziri pedyo namadziva emvura,
akanyikwa mumukaka,
akanyatsoiswa panzvimbo pawo zvakanaka.
13Matamawo ake akaita
semihomba yetwokubikisa tunonhuwirira
tunoburitsa kunhuwirira;
iyo miromo yake iyi, maruva zvawo amariri,
inodonha mura inoyerera.
14Maoko ake, heyo mibhadha zvayo yendarama
yakashongedzwa zvishongo
muviri wake ndiro#5:14 Ndiro: ChiHebheru chacho pano apa hachinzwisisike. zvayo yemunyanga wenzou
yakaiswa tutombo twesafaya.
15Iwo makumbo ake aya,
hedzo mbiru zvadzo dzakamiswa
muzvigadzikiro zvendarama
uyewo chimiro chake ungati iRebhanoni
kunaka kwazvo semiti yemisidhari.
16Zvaanotaura izvi zvinotapira samare,
iye wose, sezvaari anodiwa.
Ndiye mudiwa wangu iyeyo
ndiye shamwari yangu,
imi vanasikana veJerusaremu.
Currently Selected:
Rwiyo 5: SCLB
Highlight
Share
Copy
Want to have your highlights saved across all your devices? Sign up or sign in
Shona Common Language Bible © Bible Society of Zimbabwe, 2008.
