Mateu 8

III: KUPARIDZWA KWOUMAMBO HWEDENGA

A: CHIKAMU CHOKUTSANANGURA NEZVISHAMISO

Jesu akarapa munhu ana maperembudzi

(Mak 1:40–45; Ruka 5:12–16)

1Jesu paakaburuka mugomo muya, vanhu vazhinji zhinji vakamutevera. 2Hoyo mumwe munhu akanga ana maperembudzi akauya kwaari akasvikopfugama pamberi pake achiti, “Tenzi, kana muchida zvenyu, munokwanisa kundiporesa muchindichenura.” 3Jesu akatambanudza ruoko rwake akamubata, achiti, “Ndinoda, natswa uchenurwe hako.” Pakarepo akabva anatswa maperembudzi ake. 4Jesu akati kwaari, “Usawane waunotaurira. Asi enda undozviratidza kumupristi upire chipo chakatemwa naMosesi, kuti chive chapupu chako kuvanhu.”

Jesu anorapa muranda womukuru wezana

(Ruka 7:1–10)

5Paakapinda muKapenaumu, mumwe mukuru wezana ramasoja akauya kwaari achimuteterera 6achiti, “Tenzi muranda wangu arere kumba; mitezo yake yatonhora uye ari kurwadziwa zvakanyanya.” 7Jesu akati kwaari, “Ndichauya ndizomurapa.” 8Asi mutungamiri wezana uya akamupindura achiti, “Tenzi handikodzeri kuti mupinde mumba mangu, ingotaurai zvenyu izwi chete, muranda wangu achapora. 9Ini ndiri munhu ari pasi pavakuru uye ndina masojawo ari pasi pangu. Ndinoti kuno mumwe, ‘Enda,’ achienda uye kune mumwe, ‘Uya,’ achiuya. Ndinoti kumuranda wangu, ‘Ita ichi,’ achichiita.” 10Jesu paakamunzwa akashamiswa. Akati kuna vaimutevera, “Zvechokwadi ndinoti kwamuri, kunyange muIsiraeri handina kumboona chitendero chakadai. 11Ndinokuudzai kuti vazhinji vachabva kumabvazuva nokumadokero vachizogara pakudya naAbhurahamu naIsaki naJakobho muumambo hwedenga, 12vana voumambo vachikandwa kurima rokunze. Ikoko vanhu vachachema vachirumanidza mazino.” 13Jesu akati kumutungamiri wezana, “Chienda zvako ngazviitike sokutenda kwako.” Muranda uya akabva apora panguva iyoyo.

Jesu akaporesa vanhu vazhinji

(Mak 1:29–34; Ruka 4:38–41)

14Jesu paakapinda mumba maPita akaona ambuya vake varere, muviri wavo uchipinda chando. 15Akavabata ruoko kurwara kwavo ndokubva kwapera, vakabva vamuka vakamushandira. 16Manheru acho, vanhu vakauya kuna Jesu navanhu vazhinji vakanga vakagarwa nemweya yakaipa. Akadzinga mweya iyoyo nokungotaura nomuromo chete. Akaporesawo vose vakanga vachirwara. 17Akaita izvi kuti azadzise zvakataurwa nomuporofita Isaya zvokuti,

“Akabvisa zvirwere zvedu

akatakura matenda edu.”

Zvinotarisirwa kune anotevera Jesu

(Ruka 9:57–62)

18Jesu, paakaona gungano guru ravanhu vakanga vamuunganira akati, ngatiyambukei mhiri. 19Imwe nyanzvi yomutemo yakauya ikati kwaari, “Mudzidzisi ini ndinoda kukuteverai kose zvako kwamunoenda.” 20Jesu akati kwaari, “Makava ana maguru, shiri dzedenga dzina matendere; asi Mwanakomana womunhu haana pokutsamira musoro wake.” 21Mumwewo akanga ari mudzidzi wake, akati kwaari, “Tenzi regai nditange ndambondoviga baba vangu.” 22Asi Jesu akati kwaari, “Nditevere, rega vakafa vavige vakafa vavo.”

Jesu anonyaradza dutu pagungwa

(Mak 4:35–41; Ruka 8:22–25)

23Jesu paakapinda mugwa, vadzidzi vake vakamutevera. 24Hero dutu guru remhepo rakamuka mugungwa zvokuti igwa rakanga rava kuda kunyudzwa namasaisai, asi Jesu akanga akakotsira zvake. 25Vadzidzi vakaenda kwaari vakamumutsa vachiti, “Tenzi tiponesei tavakupera.”

26Jesu akati kwavari, “Ko munotyireiko mukadaro? Inga muri vanhu vechitendero chidiki!” Akabva asimuka akatsiura dutu riya negungwa kukabva kwanyatsoti dzikadzika kunyarara. 27Vanhu vakashamiswa vakati, “Munhu uyu, munhu rudzii uyu, anototeererwa kunyange nemhepo negungwa?”

Jesu anorapa vaviri vaiva neMweya yakaipa

(Mak 5:1–20; Ruka 8:26–39)

28Paakasvika kumhiri kuya, kunyika yavaGadhara.#8:28 Gadhara: Vamwe vanoti Gerasini kana kuti Gerigesini. Akasangana navarume vaviri vaiva nemweya yakaipa vachibva mumakuva. Vaityisa zvikuru zvokuti hapana munhu aikwanisa kupfuura nenzira iyoyo. 29Vakabva vazhamba vachiti, “Unei nesu, Mwanakomana waMwari. Wauya kuzotirwadzisa here nguva isati yasvika.” 30Zvino pakanga pane danga renguruve dzakawanda dzakanga dzichifura zvadzo dziri chinhambwe navo. 31Mweya yakaipa iya yakamukumbira kuti kana watidzinga, tidzingire mudanga renguruve. 32Jesu akati, “Endai.” Saizvozvo yakabuda ikandopinda munguruve dziya. Hero danga rose renguruve rakati ware kumhanya. Rakateremuka napamawere echikomo ichocho ndiye mugungwa rororo. 33Vafudzi vakati ware kutiza. Pavakandopinda muguta vakataura zvose nezvakanga zvaitika kuna vakanga vakagarwa nemweya yakaipa. 34Hero guta rose rakabuda kundosangana naJesu. Pavakamuona vakamukumbira kuti abve zvake munharaunda yavo.

Currently Selected:

Mateu 8: SCLB

Highlight

Copy