Luka 24

Yesu ƒe tsitretsitsi.

1Eye le kwasiɖa ƒe ŋkeke gbãtɔ ƒe ŋdikanya la wova yɔdo la gbɔ, eye wotsɔ atike ʋeʋẽe, si wodzra ɖo la, de asi, eye amea ɖewo hã kpe ɖe wo ŋu heva. 2Ke wokpɔ be, wòmũ kpe la ɖa le yɔdo la nu. 3Eye esi woyi de eme la, womekpɔ Aƒetɔ Yesu ƒe kuku la o. 4Eye wòva ve me, esi wotsi dzodzodzoe le esia ŋuti la, kpɔ ɖa, ŋutsu eve le tsitre de wo gbɔ le awu ʋlaya dadzowo me; 5ke esi wovɔ̃, eye wode mo to la, wogblɔ na wo bena: Nukaŋuti miele ame gbagbe dim le ame kukuwo dome mahã? 6Mele afisia o, ke boŋ etsi tre; mido ŋku edzi, alesi wògblɔ na mi, esime wogale Galilea la bena: 7Ele be, woade Amegbetɔvi la asi na nuvɔ̃wɔlawo, eye woaklãe de ati ŋuti, eye ŋkeke etɔ̃agbe la wòatsi tre! 8Eye wodo ŋku eƒe nyawo dzi, 9eye esi wogbugbɔ tso yɔdo la gbɔ la, woka nusiawo katã ta na ame wuidekɛawo kple ame mamleawo katã. 10Ke amesiwo gblɔ nusiawo na apostoloawo la, woawoe nye Maria, Magdalatɔ, kple Yohana kple Maria, Yakobo dada, kple nyɔnu mamle, siwo kpe de wo ŋuti. 11Eye nya siawo dze le woƒe ŋku me abe bometsinya ene, eye womexɔ wo dzi se o. 12Ke Petro tsi tre, eye wòƒu du yi yɔdo la gbɔ, eye esi wòdo kɔ de eme la, ekpɔ aklala ɖeɖeko, eye wòdzo yi aƒe, eye eƒe mo wo yaa le nusi va dzo la ŋuti.

Yesu ɖe eɖokui fia le Emaus-mɔ dzi.

13Eye kpɔ ɖa, le ŋkeke ma dzi la wo dome ame eve yina de kɔƒea de, si ŋkɔ nye Emaus la me, eya kple Yerusalem dome anɔ stadio blaade. 14Eye wole dze ɖom kple wo nɔewo le nusiawo katã, siwo va dzɔ la ŋuti. 15Eye wòva ve me bena, esi wole dze ɖom, eye wole wo nɔewo biam la, Yesu ŋutɔ va tu wo hele azɔli zɔm kpli wo. 16Gake woƒe ŋkuwo dzi tsyɔ, bena womedze sii o. 17Eye wògblɔ na wo bena: Nya ka ƒomeviwo nye esi ŋuti miele dze ɖom le le mia nɔewo dome le miaƒe azɔlizɔzɔ me, eye miele nublanuinu wɔm ale? 18Eye wo dometɔ ɖeka, si ŋkɔ nye Kleopa la, do ŋu gblɔ ne bena: Alo wò ɖeka koe dze Yerusalem, eye mènya nusiwo va dzɔ le eme le ŋkeke siawo me o mahã? 19Egblɔ na wo bena: Ka wòe? Eye woɖo ŋu nɛ bena: Yesu, Nazaretetɔ la, ŋutinyae, amesi nye nyagblɔɖila ŋusẽtɔ le nuwɔwɔ kple nyagbɔgblɔ me le Mawu kple dukɔ la ƒe ŋku me; 20alesi miaƒe nunɔlagãwo kple dumegãwo ɖee asi, be woatso kufia nɛ, eye woaklãe ɖe ati ŋuti. 21Ke miawo la miekpɔ mɔ bena, eyae nye amesi le Israel ɖe ge. Kpe ɖe esiawo katã ŋuti la egbee nye ŋkeke etɔ̃lia, tso esime nusiawo va ve me. 22Gawu la mia dome nyɔnua ɖewo hã, siwo de yɔdo la gbɔ ŋdikanya la, do voɖi na mí; 23eye esi womekpɔ eƒe kukua o la, wova gblɔ bena, yewokpɔ mawudɔlawo, amesiwo gblɔ bena: Ele agbe! 24Eye mía dometɔa ɖewo yi yɔdo la gbɔ, eye wokpɔe, abe alesi nyɔnuawo gblɔ ene; ke eya ŋutɔ la womekpɔe o. 25Eye wògblɔ na wo bena: O, ame masenugɔmewo kple amesiwo ƒe dzi le blewu be, woaxɔ nusiwo katã nyagblɔɖilawo gblo ɖi la, dzi ase. 26Alo mele na Kristo be, wòakpe nusiawo ƒe fu, eye wòayi ɖe eƒe ŋutikɔkɔe la me o mahã? 27Eye esi wòdze egɔme tso Mose kple nyagblɔɖilawo katã dzi la, ede nusiwo le ŋɔŋlɔawo katã me le eŋuti la, ƒe gome fia wo. 28Eye esi wogogo kɔƒe, si me yina wole la, ewɔ abe ɖe wòle eme tsom ene. 29Eye wozi edzi gblɔ bena: Na anyi kpli mí, elabena zã le dodom, eye ŋkeke la yi vɔ. Eye wòyi de eme, be yeanɔ anyi kpli wo. 30Eye wòva ve me bena, esi eya kple wo le nuɖuƒe la, etsɔ abolo la, eye esi wòyra ɖe edzi, eye wòŋe eme la, etsɔe na wo. 31Tete woƒe ŋkuwo ʋu, eye wodze sii, eye wobu vi le wo gbɔ. 32Eye wogblɔ na wo nɔewo bena: Alo míaƒe dzi melé dzo le mia me, esi wòle nu ƒom na mi le mɔa dzi, eye wòle ŋɔŋlɔawo me ɖem na mí la o mahã? 33Eye wotsi tre le gaƒoƒo ma ke dzi, eye wogbugbɔ yi Yerusalem, eye wokpɔ ame wuiɖekɛawo kple amesiwo kpe ɖe wo ŋuti la, ƒo ƒu ɖi, 34eye wogblɔ bena: Aƒetɔ la tsi tre vavã, eye wòɖe eɖokui fia Simon. 35Eye woawo la woxlẽ nusiwo va dzo le mɔa dzi kple alesi wodze sii le aboloŋeŋe la me la, fia wo.

Yesu ɖo eɖokui fia apostoloawo.

36Ke esi wole nu ƒom le nusiawo ŋuti la, eya ŋutɔ tsi tre ɖe wo titina, eye wògblɔ na wo bena: Ŋutifafa nanɔ anyi kpli mi! 37Eye woɖi vo, eye wovɔ̃ ŋutɔ, eye wosusu bena, yewokpɔ gbɔgbɔa ɖe. 38Eye wògblɔ na wo bena: Nuka wɔ mieʋuʋu, eye nukaŋuti ɖikeke ɖo miaƒe dzi me mahã? 39Mikpɔ nye asiwo kple nye afɔwo ɖa bena, nye ŋutɔe nye esi; miƒo asi ŋunye, eye miakpɔe; elabena lã kple ƒu meli na gbɔgbɔ, abe alesi miekpɔ le ŋunye la ene o. 40Eye esi wògblɔ esia la, etso eƒe asiwo kple eƒe afɔwo hefiã wo. 41Ke esi womexɔe se o le dzi, si dzo wo kple nuku, si wòwɔ na wo ŋuti la, egblɔ na wo bena: Nuɖuɖua ɖe le mia si le afisia mahã? 42Eye wotso kalãmi kakɛa ɖe nɛ. 43Eye wòtsɔe heɖu le woƒe ŋku me. 44Eye wògblɔ na wo bena: Esiawo nye nye nya, siwo megblɔ na mi, esi megali kpli mi la bena: Ele be, woawu nusiwo katã woŋlɔ ɖe Mose ƒe se la kple nyagblɔɖilawo kpakple Psalmowo me le ŋutinye la nu. 45Tete woʋu woƒe tame, bena wòase ŋɔŋlɔawo gome; 46eye wògblɔ na wo bena: Nenema woŋlɔ ɖi bena: Kristo lakpe fu, eye wòatsi tre tso ame kukuwo dome le ŋkeke etɔ̃agbe; 47eye bena, woaɖe gbe ƒã dzimetɔtrɔ hena nuvɔ̃wo ƒe keke le eƒe ŋkɔa dzi na dukɔwo katã la, adze gɔme atso Yerusalem. 48Miawoe nye nusiawo ƒe ɖaseɖilawo. 49Eye nye la mado Fofonye ƒe ŋugbedodo la ɖe mia dzi; ke miawo la minɔ Yerusalem-du la me, vaseɖe esime woatso ŋusẽ atso dziƒo ado na mi.

Yesu ƒe dziƒoyiyi.

50Eye wòkplɔ wo do go vaseɖe Betania, eye wòkɔ eƒe asiwo dzi heyra wo. 51Eye wòva ve me, esime wòle wo yram la, wotee ɖa le wo gbɔ, eye wokɔe yi dziƒo. 52Eye esi wodze klo de ta agu nɛ la, wogbugbɔ yi Yerusalem kple dzidzɔ gã; 53eye wonɔa mawuxɔ la me ɖaa henɔa Mawu kafum.

Currently Selected:

Luka 24: EWERV

Highlight

Copy