Luka 20

Yudatɔwo ƒe amegãwo ƒe nyabiabia Yesu eƒe ŋusẽdɔ la ta.

1Eye le ŋkekeawo dometɔ ɖeka dzi, esi wòle nu fiam, eye wòle nyanyuie la gblɔm na dukɔ la le mawuƒe me la, eva ve me bena, nunɔlagãwo kple agbalẽfialawo kpakple amegãwo va tsi tre, 2eye wogblɔ nɛ bena: Gblɔe na mi, ŋusẽ ka nètsɔ wɔ esiawoe? Alo amekae tsɔ ŋusẽ sia na wò mahã? 3Eye wòɖo eŋu gblɔ na wo bena: Nye hã mabia nya ɖeka mi, ne miagblɔe nam; 4Yohanes ƒe mawutsidedetaname la, dziƒo wòtso loo, alo amewo gbɔ wòtso mahã? 5Ke woawo la woke ɖi kple wo nɔewo gblɔ bena: Ne miegblɔ bena: Dziƒo wòtso la, agblɔ bena: Ekema nukaŋuti miexɔ edzi se oa? 6Ke ne miegblɔ bena: Amewo gbɔ wòtso la, ekema dukɔ la katã laƒu kpe mí; elabena wokpɔ kakaɖedzi bena, Yohanes enye nyagblɔɖila. 7Eye woɖo ŋu bena, yewomenya afisi wòtso o. 8Eye Yesu gblɔ nɛ wo bena: Ekema nye hã nyemagblɔ ŋusẽ, si metso wɔ nusiawo na mi o.

Yesu do lo le weingbledela vɔ̃ɖiawo ŋu.

9Eye wòde asi lo sia dodo me na dukɔ la bena: Amea ɖe de weingble, eye woɖee asi na agbleŋlɔlawo, eye wòyi nugbe eteƒe didi. 10Eye le ɣeyiɣi nyui la dzi la edo dɔla ɖo ɖe agbledelawo gbɔ, bena woatsɔ weingble la ƒe kutsetsea ɖewo anɛ, ke agbledelawo ƒoe, eye wodoe ɖa asi ƒuƒlu. 11Eye wògadɔ dɔla bubu ɖa; ke woƒo eya hã, eye esi wodo ŋukpee la, wodɔe ɖa asi ƒuƒlu. 12Eye wògadɔ etɔ̃lia ɖa, ke esi woɖe abi eya ŋu la, wokɔe ƒu gbe. 13Ke weingble la ƒe aƒetɔ gblɔ bena: Nuka wɔ ge mala? Madɔ vinye lɔlɔ̃tɔ ɖa; ɖewohĩ wòasi eya ŋku me ɖa. 14Ke esi agbledelawo kpɔe la, wode adaŋu kple wo nɔewo gblɔ bena: Esia nye domenyila la, mina miawui, bena domenyinyi la nazu mía tɔ. 15Eye esi wokɔe ƒu gbe ɖe weingble la xa la, wowui. Azɔ nuka weingble la ƒe aƒetɔ awɔ wo mahã? 16Ava, eye wòatsrɔ̃ agbledela siawo, eye wòade agble la asi na ame bubuwo. Ke esi wose esia la, wogblɔ bena: Kpao, meganɔ nenema o! 17Eye wòkpɔ wo dũ gblo bena: Nuka gɔ̃e nye esia, si woŋlɔ ɖi bena: „Kpe, si xɔtulawo gbe la, eya ke tro zu dzogoekpe“ mahã? 18Amesiame, si adze kpe ma dzi la, aŋe gudugudu; ke amesi dzi wòadze la, atui memie. 19Eye agbalẽfialawo kple nunɔlagãwo di bena, yewoalée le gaƒoƒo ma me, ke wovɔ̃ dukɔ la, elabena wodze sii bena, edo lo sia ɖe yewo ŋu.

Nudzɔdzɔ na kaisaro.

20Eye wole eŋu dzɔm, eye wodo adzamenɔla, siwo da alakpa be, yewonye ame dzɔdzɔewo la ɖa, bena woalée le nya me, ne yewoadee asi na fia kple mɔ̃mefia ƒe ŋusẽ? 21Eye wobiae gblo bena: Nufiala, míenyae bena, nègblɔa nya, eye nefia nu ɖe eteƒe, eye mèkpɔa ame ŋku me o; ke boŋ nèle Mawu ƒe ma la fiãm le nyateƒe me. 22Woɖe mɔ bena, miadzɔ nu na kaisaro loo, alo womeɖe mɔ oa? 23Eye esi wòdze si woƒe aɖaŋu vɔ̃a la, egblɔ na wo bena: Nuka miele teyem kpɔ mahã? 24Mifia denario lam: ameka ƒe tata kple ŋɔŋlɔe le edzi mahã? Eye wogblɔ bena: Kaisaro tɔe. 25Eye wògblɔ na wo bena: Eyaŋuti mitsɔ nusi nye kaisaro tɔ la, na kaisaro, eye nusi nye Mawu tɔ la, na Mawu! 26Eye womete ŋu lée le eƒe nya me le dukɔ la ƒe ŋku me o, eye woƒe mo wɔ yaa le eƒe ŋuɖoɖo la ŋuti, eye wozi kpi.

La ame kukuwo ƒe tsitretsitsi ŋuti.

27Tete zadukitɔwo dometɔa ɖewo, siwo sẽa nu le tsitretsitsi ŋuti bena, meli o la, va biae bena: 28Nufiala, Mose ŋlɔ ɖi na mí bena: Ne amea ɖe nɔviŋutsu, tsi srɔ̃ le esi la ku, eye megblẽ viwo ɖi o la, nɔvia naɖe srɔ̃a, eye wòado ƒome ɖi na nɔvia. 29Azɔ nɔviŋutsu adre li, eye esi gbãtɔ ɖe srɔ̃ la, eku megblẽ viwo ɖi o; 30eye evelia 31kple etɔ̃lia hã ɖee, eye nenema ke wo ame adre la katã megblẽ viwo ɖi o, eye woku. 32Emegbe la nyɔnu la hã ku. 33Azɔ le tsitretsitsi la me ɖee, wo dometɔ ka srɔ̃ nyɔnu la azu mahã? Elabena wo ame adre la katã ɖee kpɔ. 34Eye Yesu gblɔ na wo bena: Xexe sia me viwo ɖea srɔ̃, eye wotsɔa wo nana, be woaɖe; 35ke amesiwo dze be, woƒe asi nasu xexe keme kple ame kukuwo ƒe tsitretsitsi dzi la, womeɖea srɔ̃ o, eye wometsɔa wo nana, be woaɖe hã o, 36elabena womagate ŋu aku o; elabena woɖi mawudɔlawo, eye wonye Mawu kple tsitretsitsi la ƒe viwo. 37Ke bena ame kukuwo atsi tre la, Mose hã gblɔe fia le ŋuve la gbɔ, esi wòyɔ Aƒetɔ la bena: „Abraham ƒe Mawu kple Isak ƒe Mawu kple Yakob ƒe Mawu.“ 38Ke Mawu la, menye ame kukuwo ƒe Mawu wònye o, ke boŋ ame gbagbewo tɔe; elabena wo katã wole agbe nɛ. 39Eye agbalẽfialawo dometɔa ɖewo xɔ edzi gblɔ bena: Nufiala, ègblɔe nyuie. 40Eye womegado dzi bia nyaa ɖekee o.

Ameka vi Kristo nye?

41Eye wògblɔ na wo bena: Aleke wɔ miegblɔ bena: Kristo la nye Dawid vi mahã? 42Elabena Dawid ŋutɔ gblɔ le Psalmo ƒe agbalẽ me bena: Aƒetɔ la gblɔ na nye Aƒetɔ bena: „Bɔbɔ nɔ nye nuɖusi me, 43vaseɖe esime matso wò ketɔwo awɔ wò afɔɖodzinu.“ 44Azɔ ne Dawid yɔnɛ be Aƒetɔ la, aleke wo wònye via mahã?

Yesu xlɔ̃ nu nusrɔ̃lawo le agbalẽfialawo ŋuti.

45Ke esi dukɔ la katã le to ɖomii la, egblɔ na nusrɔ̃lawo bena; 46Mikpɔ mia ɖokui dzi nyuie le agbalẽfialawo ŋuti, amesiwo lɔ̃a tsatsa le awu ʋlayawo me kple gbeɖonamewo le ablɔwo me kple nɔƒe gbãtɔwo nɔnɔ le ƒuƒoƒewo kpakple kplɔ̃ta nɔnɔwo le nuɖuƒewo; 47amesiwo mia ahosiwo ƒe aƒewo, eye wodaa alakpa nɔa gbe ɖiɖiwo dom ɖa; amesiawo laxɔ fɔbubu sesẽtɔ awu.

Currently Selected:

Luka 20: EWERV

Highlight

Copy