Yohanes 18

Yesu léle.

1Esi Yesu gblɔ esiawo vɔ la, eya kple eƒe nusrɔ̃lawo do go yi ɖatso Kidron-tɔʋu la, afisi abɔa ɖe le, si me eya kple eƒe nusrɔ̃lawo yi ɖo. 2Ke Yuda hã, amesi fia eyome mo la, nya teƒe la; elabena enuenu la Yesu kple eƒe nusrɔ̃lawo ƒoa ƒu ɖe afima. 3Azɔ, esi Yuda xɔ asrafoha kpe de nunɔlagãwo kple farisitɔwo ƒe dɔlawo ŋu la, egbɔna afima kple akakatiwo kple akaɖiwo kpakple aʋawɔnuwo. 4Ke esi Yesu nya nusiwo katã le edzi va ge la, edo go, eye wògblɔ na wo bena: Ameka dim miele? 5Woɖo ŋu nɛ bena: Yesu, Nazaretetɔ lae! Yesu gblɔ na wo bena: Nyee nye esi! Ke Yuda hã, amesi fia eyome mɔ la, le tsitre ɖe wo gbɔ. 6Azɔ, esi wògblɔ na wo bena: Nyee nye esi la, wozɔ gbugbɔɖemegbee, eye wodze anyi. 7Tete wògabia wo bena: Ameka dim miele? Eye wogblɔ bena: Yesu, Nazaretetɔ lae! 8Yesu ɖo ŋu bena: Megblɔe na mi xoxo bena, nyee nye esi: eyaŋuti nenye nye dim miele la, ekema mina mɔ amesiawo, be woadzo ayi, 9bena woawu nya, si wogblɔ ɖi la nu bena: „Amesiwo nètsɔ nam la, nyemebu wo dometɔa ɖeke o.“ 10Tete Simon Petro ɖi yi, si le esi la, heda nunɔlagã la ƒe dɔla, eye wòkpa eƒe nuɖusimeto, eye dɔla ma ƒe ŋkɔe nye Malxo. 11Tete Yesu gblɔ na Petro bena: Tsɔ yi la de aku; kplu, si Fofo la tsɔ nam la, ɖe nyemanoe o mahã?

Yesu le nunɔlagãwo ŋku me. Petro gbe nu le Yesu gbɔ.

12Azɔ asrafoha kple aʋafia gã la kple Yudatɔwo ƒe dɔlawo lé Yesu, eye wobiae, 13eye wokplɔe yi Hana gbɔ gbã, elabena enye Kayafa, si nye nunɔlagã le ƒe ma me la, ƒe to. 14Ke Kayafa ye nye amesi ɖo aɖaŋu na Yudatɔwo bena, enyo bena, ame ɖeka naku ɖe dukɔ la ta. 15Eye Simon Petro kple nusrɔ̃la bubu la dze Yesu yome. Ke nusrɔ̃la la enye nunɔlagã la ƒe ame nyanyɛ, eye wòkpe ɖe Yesu ŋuti yi ɖe mɔ̃ la me. 16Ke Petro le tsitre ɖe ʋotru la nu le gota. Tete nusrɔ̃la keme, si nye nunɔlagã la ƒe ame nyanyɛ la, do go, eye wòƒo nu kple nyɔnu ʋɔtrunudzɔla la, eye wòkplɔ Petro yi ɖe eme. 17Tete dɔlanyɔnu, si nye ʋɔtrunudzɔla la, gblɔ na Petro bena: Wò hã, ɖe menye amesia ƒe nusrɔ̃lawo dometɔ ɖeka nènye o mahã? 18Eye kluviawo kple dolawo le tsitre, eye wodo akadzo; elabena vuvɔ le wɔwɔm, eye wole dzo la ƒum, eye Petro hã tsi tre ɖe wo gbɔ le dzo la ƒum.

19Azɔ la nunɔlagã la bia Yesu le eƒe nusrɔ̃lawo kple eƒe nufiafia ŋuti. 20Yesu ɖo ŋu nɛ bena: Nye la meƒo nu na xexeame le gaglãgbe, mefia nu ɖaa le ƒuƒoƒewo kple mawuƒe me, afisi Yudatɔwo katã ƒoa ƒu ɖo, eye nyemegblɔ nyaa ɖeke le ɣaɣlaƒe kpɔ o. 21Nukaŋuti nèle biayem? Bia amesiwo se nusi megblɔ na wo; kpɔ ɖa, woawo nya nusiwo nye la megblɔ. 22Ke esi wògblɔ nusiawo la, dɔlawo dometɔ ɖeka, si le tsitre ɖe egbɔ la, ƒo tome na Yesu gblɔ bena: Ale nèɖo ŋu na nunɔlagã la enye si mahã? 23Yesu ɖo ŋu nɛ bena: Ne megblɔ nya vɔ̃ la, ekema fia kpɔɖeŋu le nusi nye vɔ̃ la ŋu; ke ne enyo la, nukaŋuti nèle ƒoyem mahã? 24Azɔ Hana ɖoe ɖe Kayafa, nunɔlagã la gbɔ bablae. 25Ke Simon Petro le tsitre le dzo ƒum. Eye wogblɔ nɛ bena: Alo wò hã eƒe nusrɔ̃lawo dometɔ ɖeka nènye mahã? Eyama sẽ nu gblɔ bena: Menye nyee o. 26Nunɔlagã la ƒe kluviwo dometɔ ɖeka, si nye amesi ƒe to Petro kpa la ƒe ƒometɔ la, gblɔ bena: Alo ɖe nyemekpɔ wò le abɔa me kplii o mahã? 27Tete Petro gasẽ nu, eye enumake koklo ku atɔ.

Wodrɔ̃ ʋɔnu Yesu le Pilato ŋku.

28Azɔ wokplɔ Yesu tso Kayafa gbɔ heyi ɖe ʋɔnudrɔ̃ƒe la, eye fɔŋli ti, ke woa ŋutɔwo meyi de ʋɔnudrɔ̃ƒe la, bena yewomagagblẽ kɔ ɖo o, ke boŋ bena yewoate ŋu aɖu ŋutitoto la. 29Tete Pilato do go va wo gbɔ, eye wògblɔ bena: Nutsotso ka mietsɔ vɛ ɖe amesia ŋu mahã? 30Woɖo ŋu gblɔ nɛ bena: Amesia la, ɖe menye vɔ̃wɔla wònye o la, ne miele ede ge asi na wò o. 31Tete Pilato gblɔ na wo bena: Ekema mia ŋutɔwo mikplɔe yii, ne miadrɔ̃ ʋɔnui le miaƒe se la nu Yudatɔwo gblɔ nɛ bena: Womeɖe mɔ na mi bena, míawu amee, 32bena woawu nya, si Yesu gblɔ hefiã ku, si ƒomevi ku ge wòala la nu. 33Azɔ Pilato gayi ɖe ʋɔnudrɔ̃ƒe la, eye wòyɔ Yesu, eye wògblɔ ne bena: Alo wòe nye Yudatɔwo ƒe fia la mahã? 34Yesu ɖo ŋu nɛ bena: Wò ŋutɔ ɖokuiwò si nele esia gblɔm le loo, alo ame bubuwoe gblɔ ŋutinye nya na wò mahã? 35Pilato ɖo ŋu bena: Nye la Yudatɔ menye mahã? Wò ŋutɔ wò dukɔ la kple nunɔlagãwoe tsɔ wò de asi nam, nuka newɔa? 36Yesu ɖo ŋu bena: Nye fiaɖuƒe metso xexe sia me o, nye fiaɖuƒe, ɖe wòtso xexe sia me la, ne nye dɔlawo aʋli tanye, bena womãgadem asi na Yudatɔwo o, ke azɔ la nye fiaɖuƒe metso afisia o. 37Tete Pilato gblɔ nɛ bena: Ekema fia nènye ni? Yesu ɖo ŋu bena: Wòe le egblɔm bena, fia menye. Nye la, esia ta wodzim ɖo, eye esia ta meva xexeame ɖo, bena maɖi ɖase na nyateƒe la. Amesiame, si tso nyateƒe me la, ɖoa to nye gbe. 38Pilato gblɔ nɛ bena: Nukae nye nyateƒe? Eye esi wògblɔ esia la, egado go yi Yudatɔwo gbɔ, eye wògblɔ na wo bena: Nye la nyemekpɔ nya vɔ̃a ɖeke le eyama ŋuti o. 39Ke kɔnuwɔwɔ le mia si bena, maɖe asi le ame ɖeka ŋuti na mi le ŋutitoto la dzi; mielɔ̃ azɔ bena, maɖe asi le Yudatɔwo ƒe fia la ŋuti na mi mahã? 40Tete la wo katã gaɖo ɣli gblɔ bena: Menye amesia o, ke boŋ Baraba. Ke Baraba la adzodalae.

Currently Selected:

Yohanes 18: EWERV

Highlight

Copy