Yohanes 11

Yesu fɔ Lazaro ɖe tsitre tso ame kukuwo dome.

1Eye amea ɖe le dɔ lém, eŋkɔe nye Lazaro tso Betania, si nye Maria kple nɔvianyɔnu Marta ƒe kɔƒe la. 2Eye eya enye Maria, si tsɔ ami ʋeʋẽe si na Aƒetɔ la, eye wòtutu eƒe afɔwo ŋuti kple eƒe taɖa, amesia ƒe nɔviŋutsu enye Lazaro, si le dɔ lém la. 3Eyaŋuti nɔvianyɔnuawo ɖɔ ame ɖo de egbɔ hegblɔ bena: Aƒetɔ, kpɔ ɖa, amesi mèlɔ̃a nu egbɔ o la, le dɔ lém. 4Eye esi Yesu see la, egblɔ bena: Dɔ sia menye kudɔe o, ke boŋ hena Mawu ƒe ŋutikɔkɔe, bena woakɔ Mawuvi la ŋuti to eyama me. 5Eye Yesu lɔ̃a Marta kple nɔvianyɔnua kpakple Lazaro. 6Eye esi wose bena, ele dɔ lém la, etsi afisi wòle la xɔ ŋkeke eve. 7Esia megbe la egblɔ na nusrɔ̃lawo bena: Mina, ne míagayi ɖe Yudea. 8Nusiawo gblɔ ne bena: Rabi, nyitsɔ laa Yudatɔwo ɖi be, yewoaƒu kpe wò, eye nègale afima yi gea? 9Yesu ɖo ŋu bena: Alo menye gaƒoƒo wuievee le ŋkeke ɖeka me oa? Ne amea ɖe zɔ le ŋkeke me la, meklia nu o, elabena ele xexe sia me ƒe kekeli la kpɔm. 10Ke ne amea ɖe zã zã la, eklia nu, elabena kekeli la mele eyama me o. 11Esiawo wògblɔ, eye le esia megbe la egblɔ na wo bena: Mia xɔlɔ̃ Lazaro le alɔ̃ dɔm; gake la mieyina, bena maɖanyɔe atso alɔ̃ me. 12Tete nusrɔ̃lawo gblɔ nɛ bena: Aƒetɔ, ne ele alɔ̃ dɔm la, ekema eƒe lãme asẽ. 13Ke Yesu ƒo nu le eƒe ku ŋuti; ke woa wobu xa bena, eƒo nu le alɔ̃dɔdɔ ŋutɔ ŋuti. 14Azɔ Yesu ʋu me na wo faa bena: Lazaro ku. 15Eye dzi dzɔm le mia ta bena, nyemele afima o, be miaxɔ ase; ke mina, ne míayi ɖe egbɔ. 16Tete Toma, si woyɔna be Venɔvi la, gblɔ na nɔvia nusrɔ̃lawo bena: Mina, ne miawo hã míayi, bena miaku kpakplii.

17Azɔ esi Yesu de la, ekpɔ bena, exɔ ŋkeke ene xoxo le yɔ-doa me. 18Ke Betania te ɖe Yerusalem ŋu, eƒe didime anɔ stadio wuiatɔ̃; 19eye Yudatɔwo dome ame geɖewo va Marta kple Mana gbɔ, bena yewoafa akɔ na wo le wo nɔvi la ŋuti. 20Ke esi Marta se bena, Yesu gbɔna la, eyi ɖakpee, eye Mana tsi aƒea me. 21Tete la Marta gblɔ na Yesu bena: Aƒetɔ, ɖe nèle afisia la, ne nɔvinye meku o. 22Gake azɔ hã menyae bena, nusi ke nabia Mawu la, Mawu ana wò. 23Yesu gblɔ nɛ bena: Nɔviwò la atsi tre. 24Marta gblɔ nɛ bena: Menyae bena, atsi tre le tsitretsitsi la me le nuwuwuŋkeke la dzi. 25Yesu gblɔ nɛ bena: Nyee nye tsitretsitsi la kple agbe la; amesi xɔa dzinye sena la, ne eku hã la, anɔ agbe; 26eye amesiame, si le agbe, eye wòxɔa dzinye sena la, maku akpɔ o. Ele esia xɔm le sesema? 27Egblɔ ne bena: E, Aƒetɔ, mexɔe se bena, wòe nye Kristo, Mawuvi la, si gbɔna xexeame. 28Eye esi wògblɔ esia la, etɔ edzi yi ɖayɔ nɔvianyɔnu Maria dzaa, eye wògblɔ bena: Nufiala va, eye wòle yɔwòm. 29Esi eyama see la, etsi tre kaba, eye wòva egbɔ. — 30Eye Yesu mekpɔ va kɔƒea me haɖe o, ke boŋ egale afisi Marta yi ɖakpee le la ko. — 31Azɔ Yudatɔ, siwo le aƒea me kplii, eye wole akɔ fam nɛ la, esi wokpɔ bena, Maria tsi tre kaba do go la, wodze eyome hele susum bena, eyina yɔdo la gbɔ, bena yeafa avi le afima. 32Azɔ esi Maria va afisi Yesu le, eye wokpɔe la, edze klo ɖe eƒe afɔ nu hegblɔ nɛ bena: Aƒetɔ, ɖe nèle afisia la, ne nɔvinye meku o. 33Eye esi Yesu kpɔe wòle avi fam, eye Yudatɔ, siwo va kplii hã le avi fam la, edo dɔmedzoe le gbɔgbɔ la me, eye eƒe dzi ʋuʋu, 34eye wòbenã: Afika mietsɔe yi damlɔ mahã? Wogblɔ nɛ bena: Aƒetɔ, va kpɔe. 35Yesu fa avi. 36Tete Yudatɔwo gblɔ bena: Mikpɔ alesi wòlɔ̃nɛ ɖa! 37Ke wo dometɔa dewo bena: Ame sia, si ʋu ŋkuagbãtɔ ƒe ŋkuwo la, de mete ŋu wɔ, bena amesia hã nagaku o mahã? 38Tete Yesu gale dɔmedzoe dom le eɖokui me heva yɔdo la gbɔ. Ke enye ɖo, eye kpe le enu. 39Yesu gblɔ bena: Mikɔ kpe la da! Amesi ku la ƒe nɔvinyɔnu Marta gblɔ nɛ bena: Aƒetɔ, eƒaƒã xoxo, elabena exɔ ŋkeke ene sɔŋ. 40Yesu gblɔ nɛ bena: Ɖe nyemegblɔ na wò bena, ne èxɔe se la, èkpɔ Mawu ƒe ŋutikɔkɔe la o mahã? 41Tete wokɔ kpe la da. Ke Yesu wu eƒe mo dzi, eye wòbena: Fofo, meda akpe na wò bena, èdoa tom. 42Nye la menyae bena, edoa tom ɖaasi; ke le ameha, si le tsitre ƒo xlãm la ta, megblɔe ɖo, bena woaxɔ ase bena, wòedɔm ɖa. 43Eye esi wògblɔ esia la, edo ɣli kple gbe, sesẽ bena: Lazaro lee, do go! 44Eye eme kuku, si ƒe afɔwo kple asiwò le babla la, do go kple ameɖivɔwo, eye laku bla ŋku me nɛ. Yesu gblɔ bena: Mitui, eye mina wòayi.

Nunɔlagãwo de adaŋu le alesi woawɔ awu Yesu la ŋuti.

45Azɔ Yudatɔwo dome ame geɖe, siwo va Maria gbɔ, eye wokpɔ nusiwo Yesu wɔ la, woxɔ edzi se. 46Ke wo dometɔa ɖewo tɔ edzi yi farisitɔwo gbɔ, eye wogblɔ nusiwo Yesu wɔ la, na wo.

47Tete la nunɔlagãwo kple farisitɔwo kpe ta ɖe adaŋudeƒe, eye wogblɔ bena: Nuka míawɔ? Elabena amesia le dzesi geɖewo wɔm. 48Ne miena mɔe alea la, ekema amewo katã le edzi xɔ ge ase, eye Romatɔwo ava, eye woaxɔ miaƒe anyigba kple miaƒe dukɔ le mia si. 49Eye wo dometɔ ɖeka, Kayafa, si nye nunɔlagã le ƒe ma me la, gblɔ na wo bena: Miawo mienya naneke kulẽ o, 50eye miedea ŋugble ɖe eme hã o bena, enyo na mí bena, ame ɖeka naku ɖe dukɔ la ta, eye bena dukɔ blibo la nagatsrɔ̃ o. 51Gake megblɔ esia le eya ŋutɔ ɖokui si o; ke boŋ, esi wònye nunɔlagã le ƒe ma me la ŋuti, wògblɔ nya ɖi bena, Yesu laku ɖe dukɔ la ta; 52eye menye de dukɔ la ta ɖeɖeko o, ke boŋ, bena wòaƒo mawuvi, siwo kaka la, nu ƒu ɖekae. 53Azɔ tso ŋkeke ma dzi la wodo bena, yewoawui.

54Eyaŋuti Yesu megatsana le Yudatɔwo dome le gaglãgbe o, ke boŋ edzo le afima yi anyigba, si te ɖe gbedzi ŋu la dzi, ɖe dua ɖe, si woyɔna be Efrayim la me, eye eya kple eƒe nusrɔ̃lawo tsi afima. 55Eye Yudatɔwo ƒe ŋutitoto la do, eye ame gedewo dzo le anyigba la dzi heyi Yerusalem, bena wòakɔ wo dokui ŋuti, hafi ŋutitoto la naɖo. 56Eye wodi Yesu, eye woƒo nu kple wo nɔewo, esi wole tsitre le mawuƒe la me bena: Nuka susum miele, de megbɔna ŋkekenyuie la duƒe o mahã? 57Ke nunɔlagãwo kple farisitɔwo de se ɖi bena, ne amea de nya afisi wòle la, nefia, ne yewoayi aɖalée.

Currently Selected:

Yohanes 11: EWERV

Highlight

Copy