Mə́líʼkus 9

1Yə́sus ayɛ́bodɛánɛ kə́mmú ɔnɔ́: «A fɔ́lɔ́b ndabodɛ́anɛ lɛ́, a pəŋi póonɛ pá polɛɛ́ póob, pə́mmú pálɛ kɔ pá pádɛndɛ́ɛ́ kugúú ná pádɛ́ʼtála Nɛlaamɛʼ nɛ́ Táán níəgiim na toɛn tuim.»

Yə́sus ayɛ́ɛ́n agaáyáánɛ a oʼkon a mɔɛn

(Maʼt 17.1-9; Lóʼk 9.28-36; 2Pí 1.17-18)

2Mədúg máʼtáan na úmmuʼ a ngim yɛ́ɛy, Yə́sus yiísiə́d lɛ́ na Píɛ, na Sɛ́ag, na Sɛ́aŋ, amɛ́ɛn na pɔ́lɛ́ a oʼkon a mɔɛn lóóŋ. Páyɛ́ɛ kɔ́gɔ́ɔg əgín pɔ́lɛ́bə́əsíŋ. Ná páyɛ́ɛ́n əgiig kɔ, Yə́sus ayáyáánɛ́ɛ́ a əngis yɔ́ɔ́bɔn páamodɛ́ʼtɛg. 3Pilə́ə́ piə́ŋ pɛ́anom wɔnɔ́ wɔɔ́s, píəfúŋə náan púyúŋ púyúŋ, ombod wó mɔɔd ɔdɛɔ́gɔ ogosog kilə́ə́ kɛ́yɛɛn náan. 4Paaʼkan pə́ə́ŋ póob pádáád píídíin pádála agá, nto ɛ pɔɔd ɛ́baan foáy lɛ́ na Ɛlɛ́as na Moyíis, pálɛ agosɔyɔ na nyɔ́lɛ́. 5Náa Píɛ ɔnɔ́ na Yə́sus: «Kɛlág, kɛ́lɛ kɔŋɛʼ lɛ́ tɛ́lɔb áanɛ. Tɛabowáagɛn piób pɛ́dáád lɛ́ wɛ kímuʼ, Moyíis kímuʼ, Ɛlɛ́as kímuʼ.» 6Píɛ ayɛ́ɛ aándaadába agá tɔgɛ́ɛ́ lɛ́ wɛɛ́y óyɛ́ɛ wə́ʼkubuúgumin pɔ́lɛ́ póob piim pádáád. 7Mbálámɔɛn iyílígən, kɛnɔ kɛáság kəə́súʼkin na kɛbɛd. Nɛŋo níyíím nɛ́lon kɔ a kɛbɛd kɛ́ɛg, nɛɔ́nɔ́: «Taa, nyóonɛ alɛ mɛ Mɔɔ́n wo ɔʼtɛ́m, pómoyóóbɛn aá!» 8Əgín ná nɛŋo nɛ́ɛn nɛ́ɛ́mán kosɔ́yɔ, pa Píɛ pádála, Yə́sus aándɛ nyɔ́lɛ́nyɔ́əsíŋ, fiɛ́d mɔɔd kə́mmú a ɛbá yə́ə́ŋ. 9Ná páyɛ́ɛ pə́ndəgiim pə́suu oʼkon, Yə́sus ayɛ́boyáágánan mbaŋ, ɔnɔ́: «Ná tiə́ndəsuulií, podɛʼtɛánɛ na mɔɔd nkə kɛ́ɛnɛ kɛ́ kɛ́másánɛ́ɛ́ a oʼkon! Polɛ́ɛ́ kudíin púsəə kɛ́lɛ́ ná páʼkɛnjoon mɛ Mɔɔ́n o mɔɔd, mbə́ʼkiiʼkini kiim nyóndɛg a pɛlóŋ.» 10Píínúŋ unuʼ wɔ́ɔ́bɔn, pámóóbɛn nkə kɛ́ Yə́sus ayɛ́bodɛánɛ. Náa, kɛbán kɛ́ɛnɛ kɛ́ Yə́sus yiísə́ə́ lɛ́: «Páagɛnjoon, ndəgiiʼkini kiim ndon a kəəniʼ ongóm.» Kɛ́lɛ́ kɛ́go aa kɛ́yɛ́ɛ agoboonɛ ɔʼtɛ́m, pádɛób. Páyɛ́ɛ əgəə́ŋíənə kɔ pɔ́lɛ́ na pɔ́lɛ́ pɔ́nɔ́ əə, nkə aa ayɛ́ɛ anyɔ́ŋɛn kobodɛ́anɛ náan əə́?

(Maʼt 17.10-13)

11Náa pə́əmuŋíən pɔ́nɔ́ əə: «A igə aa palɛŋ pɛcɛm pálɛɛ́ əgusəə lɛ́ Ɛlɛ́as ogóódi lɛ́ áyag kiim əə́#9.11 Pódála tɛn náan a kálaʼtaʼ ɛ Məl 3.23 ?» 12Yə́sus əyíbuyúlísíni ɔnɔ́ na pɔ́lɛ́: «Ɛɛ́ɛ, kɛ́lɛ náan fɔ́lɔ́b lɛ́ Ɛlɛ́as ogóódi lɛ́ áyag kiim lɛ́ yíim ədə́nigəni pɛbán wɔnɔ́ ná kíəguunə lɛ́ píɛn. Náa, a oʼto ó kɛbán igə aa kɛ́lɛɛ́ kidiídílə́ tɛn a Kálaʼtaʼ lɛ́: Mɔɔ́n o mɔɔd alɛ́ɛ́ konɛ ntɔ́b kɛ́fɔlɛ́, pálɛ́ɛ́ komosɛ́ɛdɛ ə́#9.12 Kɛ́lɛ náan a kálaʼtaʼ yɛ Ɛsa 53.3; Pɛʼk 22.1-18 ? 13Náa a mɛ, ndabodɛ́anɛ lɛ́ Ɛlɛ́as əyíím, pɔɔd pámɛ́ɛ́lɛ na nyɔ́lɛ́ wɔnɔ́ ná pɛ́ɛ́nyɔ́ŋɛn, əgín wɔnɔ́ ná kíyə́dílə́ə́ lɛ́ páagɛɛlɛ náan na nyɔ́lɛ́.»

Yə́sus ɔyɔ́ɔ́yɛ moóngaa nyɔ́ uŋun wó ɔmbɛ́ óyɛ́ɛ əguyə́bi

(Maʼt 17.14-21; Lóʼk 9.37-43)

14Ná pə́yíím əgiig kɛnɔ kɛ́ píídí pə́mə́dí pɔsɔ́g, pɛ́ɛ́bóan kiʼtúú kɛ́ pɔɔd kɛáʼkaágoʼkɛnɛn paaʼkan. Palɛŋ pɛcɛm pálɛ agosásananɛ tɔgɛ́ɛ́ na pɔ́lɛ́. 15Əgín ná kiʼtúú kɛ́ pɔɔd kɛ́ɛg kɛ́ɛ́dála Yə́sus əə́giim, pííbúbid pɔ́lɛ́ piim, pə́míim pə́bugig agɛɛn əmuúsoyidi. 16Náa Yə́sus əə́ŋíən na paaʼkan pə́ə́ŋ pá yiídí kɔ áay ɔnɔ́ əə: «Kɛbán igə aa polɛɛ́ agosásananɛ tɔgɛ́ɛ́ na palɛŋ pɛcɛm aáŋ!» 17Mɔɔd nyummú kɔ a kiʼtúú kɛ́ɛg yiísiə́d tɔgɛ́ɛ́, ɔnɔ́ na Yə́sus: «Kɛlág, mɛ áa mbə́guyíímin na mɔɔ́n waam lɛ́ uŋun wó ɔmbɛ́ ólɛ əgumuyə́bi kɛ́fɔlɛ́. Wáʼkomoyáánɛ mummug, 18Ólɛ lɛ́ ɔmbɔ́ ə́lə́ə́ wáamoónyɔg, úyimudə́əŋi, kɛngɔŋ kɛ́amoyóo, əngiŋ yɔ́ɔgɔɔ́gɔʼtɔn, áság konasɛm wɔnɔ́ kɛlóŋ. Mbáloáŋánánɛ́ɛ́ na paaʼkan pááŋ agɛɛlɛ lɛ́ pɛ́ŋŋɛ́ŋɛn uŋun wóow wó ólɛɛ́ na mɛ mɔɔ́n. Pámáfɛ́gɛ́ɛ́, pádɛáʼkɛ.» 19Náa Yə́sus ɔnɔ́ na pɔ́lɛ́: «Pəŋi ɔsɛg wóonɛ wó podɛágaágɛ́ɛ́ oʼto na Táán! Kíəguunə lɛ́ nyɛ́ɛn na pəŋi agɛɛn əgiig súʼtə́ə́ naanɛ́g? Nkóódi lɛ́ mpoonóʼtan kə́mmú súʼtə́ə́ naanɛ́g? Púinjiimin na moóngaa nyóon.» 20Pááság kɛɛn na nyɔ́lɛ́ a ɛbá yə́ə́ŋ. Əgín ná uŋun wó ɔmbɛ́ wóow wɛ́dálá Yə́sus, wɛ́ɛ́fógɛd moóngaa nyóon na toɛn, aáság kudə́əŋ a nsí, əə́bə́ə́ kəə́miŋ, pius pɛ́amoolon a unuʼ. 21Náa Yə́sus ɔnɔ́ na sɛ a mɔɔ́n; «Móŋŋí, aándɛ pɛag pɛ́sɛ́g wɔnɔ́ ná uŋun wó ɔmbɛ́ ólɛɛ́ na moóngaa nyóonɛ?» Sɛ a mɔɔ́n əyúlísíni na Yə́sus ɔnɔ́: «Əgín kɔ nyɔ́lɛ́ ɛyaa ɛ́ moóngaa. 22Kɛnɛŋ kímmú, óomoódagɛdɛ a yug, ɔmbɔ́ lɛ́ a məní lɛ́ ná ə́gu. Náa, siəd maan na pəsi, ɛ́biɛ́bɛ nga olɛ ogɛbiɛ́bɛ.» 23Náa Yə́sus ɔnɔ́ na nyɔ́lɛ́: «A igə aa wɔʼkɔ́: “Nga ndɛ ogɛɛlɛ yoom!” Yiim ɛ́lɛ a ɔmbɔg á nyɔ́ amáág oʼto na Táán.» 24Əgín ná sɛ ɛ moóngaa nyóon ayóób náan, əə́bə́ə́ kosɔyɔ nɛŋo a mɔɛn ɔnɔ́: «Ɛɛ́ɛ, mbáág oʼto o! Ɛ́nyaábɛ́gɛn ɔmbɔg agɛɛlɛ lɛ́ nyáág oʼto na Táán». 25Yə́sus yɛɛ́dála kiʼtúú kɛ́ pɔɔd kímmú kíəgiim na ɔʼtɛ́d. Náan aa yɛɛ́sásɛ́dɛn uŋun wó ɔmbɛ́ wóow, ɔnɔ́ na wólɛ́: «Wɛ uŋun wó ólɛɛ́ agaánɛ mɔɔd mummug, óyɛmoyɛ́ʼkɛn tɛn pɛlɔ́g, lón a moóngaa nyóonɛ! Mbágosáŋɛ́nɛ́nɛ, udiyíʼkíni komoosɔd kə́mmú!» 26Əgín ná Yə́sus yiísə́ə́ náan, uŋun wóow wááság kufúgid moóngaa na toɛn, wáálón wáagaányam. Moóngaa aáság kudíin ɔ́lɔb sondooŋ wɔnɔ́ kɛlóŋ, ɛ́fɔlɛ́ ɛ́ pɔɔd ɛ́yɛ́ɛ agosɔyɔ, pɔ́nɔ́: «Óóó, əə́gú!» 27Náa, Yə́sus aáság kumuúgumin a ombɔg, əmə́mudə́ə́míni. Moóngaa ŋwaád. 28A ngim yɛ́ɛy, Yə́sus əyúúli a noádɛʼ na paaʼkan pə́ə́ŋ. Wɔnɔ́ ná páyɛ́ɛ pándɛ əgín pɔ́lɛ́bə́əsíŋ, pə́yímuŋíən pɔ́nɔ́ əə: «Sə́dúk, a igə aa pəsi tɛdɛáʼkɛnɛɛ́ koŋɛŋ uŋun wó ɔmbɛ́ wóow əə́?» 29Yə́sus əyíbuyúlísíni ɔnɔ́ na pɔ́lɛ́: «Ombod wó uŋun wɔnɔ́ wóow əgín na pɛɔ́sɔ́gɔ́lɔ́n áa mɔɔd alɛɛ́ ogaáʼkɛ koŋɛŋ wólɛ́.»

Yə́sus yiíbíʼti a annam ábaan lɛ́ nyɔ́lɛ́ əəgu, ə́yiʼkini kiim yóndɛg

(Maʼt 17.22-23; Lóʼk 9.43-45)

30Na nyɔ́lɛ́ na paaʼkan pə́ə́ŋ pááság kodɛ́ɛmɛn áay, pááyaag a Kalilə́ə. Yə́sus adɛʼkɛ́ɛ anyɔ́ŋɛn lɛ́ pɔɔd pálɛŋ ngə́ ɛyaán áa amɛ́ɛn, 31Kɛ́lɛ lɛ́, nkə kɛ́ ayɛ́ɛ agaaʼkananɛ paaʼkan pə́ə́ŋ a kɛ́ɛnɛ, ɔnɔ́: «Pálɛ́ɛ́ kiʼkumin mɛ Mɔɔ́n o mɔɔd, páyɛndɛg. Pálɛ́ɛ́ kɛnjoon náa, mɔɔ́s mádáád a ngim yɛ́ɛy, ndəgiiʼkini kiim ndon a kəəniʼ ongóm.» 32Náa, paaʼkan pádɛʼkɛ́ɛ agoob yisí yɛ́ ɛyɛ́ɛ a tɔgɛ́ɛ́ tóod. Pɛ́ɛ́dámmána kuŋíən Yə́sus kɛbán na kɛbán.

Paaʼkan páyɛ́ɛ agobɔgɔnɔn oʼkɔɔ ó nugəm

(Maʼt 18.1-5; Lóʼk 9.46-48)

33Yə́sus ayɛ́ɛ́n alon na paaʼkan pə́ə́ŋ a pálɛ́ɛg ɛ Kaʼpɛlɛnáyum. Ná páyɛ́ɛ pándɛ a yoog, Yə́sus yiíŋíən na paaʼkan pə́ə́ŋ ɔnɔ́: «Ɛ́ʼtɛánɛ́an nkə kɛ́ poyɛ́ɛ əgiim pósáŋa na ngə́ na ngə́ áŋ?» 34Náa, paaʼkan payɛ́moyáámɛ́nɛ́ɛ́, ogosɔyɛd fiɛ́d. Kɛ́lɛ lɛ́, ngə́ ngim, ɔsáŋ wɔ́ɔ́bɔn óyɛ́ɛ agɛɛlɛ lɛ́ pálɛŋ ánɛ a ondáŋ wɔ́ɔ́bɔn aa amáábɛ́gɛn pɔsɔ́g ombɔg a oʼto! 35Yə́sus yiísúid oʼkɔɔ, əə́ləndin a nsí, ɔɔ́dɔ́ŋɔn paaʼkan pə́ə́ŋ pá pówád na pábaan, ɔnɔ́ na pɔ́lɛ́: «Nyɔ́ aányɔ́ŋɛn kɛɛn oʼtɛ́lɛm yuudi, ogóódi lɛ́ yə́suuli nkó a nsí, yáyáánɛ inə́mbí ɛ́ pɔsɔ́g.» 36Aáság kodɔ́ŋɔn ɛyaa ɛ́ moóngaa, əmə́mudə́nígi a kɛgaágadɛ kɛɔ́bɔn, əmə́muyə́gúlígíí a igog, náa ɔnɔ́ na pɔ́lɛ́: 37«Nyɔ́ əə́siəd ɛyaa ɛ́ moóngaa wɔnɔ́ yɛ́ɛnɛ kɔŋɛʼ a niiŋ nɛ́am, mɛɛ́nyɔ́amɔɛ́d áa əmísiə́d náan kɔŋɛʼ. Nyɔ́ əmísiə́d mɛ kɔŋɛʼ, adɛ́njaŋ mɛnyɔ́əsíŋ áa əmísiə́d kɔŋɛʼ, náa, əə́siəd tɛn nyɔ́ əyíím yɛ́ʼtom.»

Nyɔ́ ɔdɛɔ́gɔ agosɔyɔɔ́ niiŋ niə́s kɔbɛ́, nyóon alɛ a ngim yəəs

(Lóʼk 9.49-50)

38Náa Sɛ́aŋ ɔnɔ́ na Yə́sus: «Paabá, tɛádála mɔɔd nyummú kága, aáŋɛ́ŋan məŋun má mabɛ́ a niiŋ nɛáŋ. Tɛmaʼkayɛ́mosáŋɛ́nɛ́nɛ lɛ́ tɛɔʼkɔ́ ɔdɛɔ́gɔ mɔɔd nyɔ́ alɛɛ́ a ondáŋ wə́ə́s.» 39Yə́sus əyímuyúlísíni ɔnɔ́ na nyɔ́lɛ́: «Ndóo, podɛyɛ́mosáŋɛ́nɛ́nɛ lɛ́ mɔɔd ɔdɛɔ́gɔ ogɛɛlɛ mangán a niiŋ nɛ́am, a ngim yɛ́ɛy ə́yiʼkini kɛnyaágasɛnɛ agɛsɔyɔn kɔbɛ́. 40Kɛ́lɛ lɛ́, nyɔ́ ɔdɛɔ́gɔ agɛbɛɛ́nɔɛyɛɛ́, nyóon alɛ a ngim yəəs. 41A fɔ́lɔ́b ndabodɛ́anɛ lɛ́, nyɔ́ alɛ́ɛ́ koboyɛ́ʼkɛnɛɛ́ məní má kəə́ŋ kəə́ŋ a oʼto wóonɛ lɛ́ poagoob na Kilíʼtus, nyóon adɛndɛ́ɛ́ koʼtaŋ pɛsáábɔ́n piə́ŋ.»

Nyɔ́ alɛ́ɛ́ kɛɛlɛ lɛ́ ɛyaa ɛ́ moóngaa ídə́əŋ a kɔbɛ́, nyóon amányáŋɛ́nɛ́nɛ́ɛ́ kɛnó

(Maʼt 18.6-11; Lóʼk 17.1-2)

42Yə́sus ayɛ́ɛ́n na tɔgɛ́ɛ́ yuudi ɔnɔ́: «Nyɔ́ alɛ́ɛ́ kɛɛlɛɛ́ lɛ́ ɛyaa ɛ́ moóngaa wɔnɔ́ yɛ́ɛnɛ yɛ́ ɛ́máág oʼto na mɛ ídə́əŋ a kɔbɛ́, kɛ́lɛ kɔŋɛʼ lɛ́ pámoodoŋ kɛdám kɛ́ nɛdáán a kɛnág, pámoódagɛdɛ a noom. 43Kɛ́maʼkɛɛn lɛ́ ombɔg wááŋ áa ólɛɛ́ agooyɛ́ɛlɛ lɛ́ údə́əŋ a kɔbɛ́, ásómɛ́ɛ́ wólɛ́. Kɛ́lɛ kɔŋɛʼ na wɛ lɛ́ ósɔd a ɔlaa ó pɛnɛŋ piim na ombɔg úmmuʼ súg, agosan lɛ́ wɛ́ɛn na ɔmbɔg yááŋ əngim ábaan a yug yɛ́ ɛgóón, yug yɛ́ ɛ́dɛndɛ́ɛ́ kuwúú. [ 44#9.44 A pagálaʼtaʼ pə́mmú pá kalaʼ pá píídílə na ombɔg, niɛŋ nɛ́ɛnɛ nɛ́lɛ kɔ lɛ́: Kɔ́gɔ́ɔg, piuy pɛ́ pɛ́abɛɛnɛ pumog pídiə́gu, yug tɛn yíngwú.] 45Kɛ́maʼkɛɛn lɛ́ ongoo wááŋ áa ólɛɛ́ agooyɛ́ɛlɛ lɛ́ údə́əŋ a kɔbɛ́, ásómɛ́ɛ́ wólɛ́. Kɛ́lɛ kɔŋɛʼ na wɛ lɛ́ ósɔd a ɔlaa ó pɛnɛŋ piim na ongoo úmmuʼ súg, agosan lɛ́ wɛ́ɛn na ambaan yááŋ əngim ábaan a yug yɛ́ ɛgóón [ 46#9.46 A pagálaʼtaʼ pə́mmú pá kalaʼ pá píídílə na ombɔg, niɛŋ nɛ́ɛnɛ nɛ́lɛ kɔ lɛ́: Kɔ́gɔ́ɔg, piuy pɛ́ pɛ́abɛɛnɛ pumog pídiə́gu, yug tɛn yíngwú.] 47Kɛ́maʼkɛɛn lɛ́ niis nɛáŋ áa nɛ́lɛɛ́ agooyɛ́ɛlɛ lɛ́ údə́əŋ a kɔbɛ́, pɛ́ʼtaʼ lɛ́ wə́ə́dus nɛ́lɛ́. Kɛ́lɛ kɔŋɛʼ na wɛ lɛ́ ósɔd a Nɛlaamɛʼ nɛ́ Táán na niis nímuʼ, agosan lɛ́ págoódagɛdɛ a yug yɛ́ ɛgóón na əngis yááŋ əngim ábaan. 48Kɔ́gɔ́ɔg, piuy pɛ́ pɛ́abɛɛnɛ pumog, pídiə́gu, yug tɛn yíngwú#9.48 Pódála tɛn náan a kálaʼtaʼ yɛ Ɛsa 66.24 49Kɛ́lɛ lɛ́, pálɛ́ɛ́ kosánɛ ungim a yug wɔnɔ́ ná ándɛ məbə́lí máagɛɛn a moom mó konɛ muim. 50Məbə́lí málɛ yoom ɛ́laŋ, tɛálɛŋ náan. Náa kɛnɛŋ kɛ́ máʼkosolɛɛ́, mə́ndigi tɛn maŋɛʼ, ngə́ igiiʼkini kɛɛlɛ lɛ́ mósob kə́mmú yindigi. Ɔlaa wááŋan tɛn ugóódi kɛɛn wɔnɔ́ məbə́lí a nsí. Laaláan pəŋi na pəŋi a uŋóón.»

Currently Selected:

Mə́líʼkus 9: yatDBL

Highlight

Copy