LÓʼKAS 7

Yə́sus ayóómɛ uʼkudin wo nkúm ɛ pasɔ́njaa yimmú

(Maʼt 8.5-13; Sɛ́a 4.46-54)

1Ná Yə́sus ayɛ́ɛ aáʼkoman kosɔyɔ na pɔɔd pá páyɛ́ɛ kɔ áay, aáság kodɛ́ɛmɛn, amɛ́ɛn a Kaʼpɛlɛnáyum. 2Kɔ́gɔ́ɔg, nkúm ɛ kiʼtúú kɛ́ pasɔ́njaa əʼtin áʼtáan yimmú ɛyɛ́ɛ kɔ. Nkúm ɛ pasɔ́njaa yɛ́ɛy yiígóodi uʼkudin wəəŋ nyummú nyɔ́ ayɛ́ɛ anyɔ́ŋɛn kɛ́fɔlɛ́. Uʼkudin wəəŋ ogo nyóon ayɛ́ɛ abany na toɛn, ayɛ́ɛ ɔɔ́ndɔɔʼkɔŋ kugu. 3Ná nkúm ɛ kiʼtúú kɛ́ pasɔ́njaa yɛ́ɛy ɛyóób pɔ́ɔsɔyɔ pɛbán pɛ́ Yə́sus ayɛ́ɛ agɛɛlanɛ, ayɛ́modómɛn ngab ɛ ponnom pó pɔɔd pó Yúdɛn lɛ́ pɛ́ɛn amoyɔ́sɔ́gɔlɔn, yíim agoómɛ uʼkudin wəəŋ. 4Pɔɔd póob pááság kɛɛn. Pɔ́mɔ́sɔ́gɔ́lɔ́nɛ́ɛ́ Yə́sus na toɛn, pɔ́nɔ́ na nyɔ́lɛ́: «Sɛ́gɔɔ tod, sɔ́njaa yɛ́ɛy ɛlɛ yɛ́ɛnɛ lɛ́ ómoɛ́bɛ fɔ́lɔ́b 5lɛ́, alɛ mɔɔd nyɔ́ alɛɛ́ anyɔ́ŋɛn nigúu niə́s. Na náan kɛ́, nyɔ́lɛ́ aa ayɛ́bɛwágɛn yoog yəəs ɛ pɛɔ́sɔ́gɔ́lɔ́n.» 6Pə́ə́bə́ə́ kɛɛn na Yə́sus. Ná páyɛ́ɛ pándɛ ndúmiʼ, nkúm ɛ kiʼtúú kɛ́ pasɔ́njaa yɛ́ɛy yaáság kiim ɛ́dom pɔsɔ́sɔ́g pə́ə́ŋ lɛ́ píim adɛ́anɛ na Yə́sus pɔ́nɔ́: «Sə́dúk, odɛnjáyɛ́ʼkɛ́nɛ́ɛ́ ntɔ́b əgiim lɛ́ ntiigin nyóonɛ lɛ́ ósɔd a yoog yaam. 7Kólɛ́ aa ntiiminií mɛɛ́nyɔ́amɔɛ́d a ɛbá yááŋ lɛ́ mbáádáláá lɛ́ ntiigin nyóonɛ lɛ́ ntɛ́lɛm a udi wááŋ. Wɛ, səə əgín nɔgɛ́ɛ́ noáŋ númuʼ ná uʼkudin waam yɔ́ɔy. 8Kɛ́lɛ lɛ́, mɛɛ́nyɔ́amɔɛ́d nyóonɛ ndɛ na pəsə́dúg pá pálɛɛ́ agɛʼkɔmɔn. Nkóódi tɛn pasɔ́njaa pá mɛ ndɛɛ́ agoʼkɔmɔn. Nyɔ́ mbádóm, aagɛɛn. Nyɔ́ mbɔ́dɔ́ŋɔn, əəgiim. Mbaʼkodɛ́anɛ na nyummú lɛ́ yɛ́ɛn agɛɛlɛ yoom yɛ́ɛnɛ, aagɛɛn agɛɛlɛ.» 9Ná Yə́sus ayóób tɔgɛ́ɛ́ tóod, yɛɛ́nyɔ́ga kɛ́fɔlɛ́ na sɔ́njaa yɛ́ɛy. Aáság kaágasɛ ná kiʼtúú kɛ́ pɔɔd kɛ́ kɛ́yɛ́ɛ əgiim kímuyə́ən, ɔnɔ́ na pɔ́lɛ́: «Ndabodɛ́anɛ nyɔʼkɔ́: Ɔmbɔ́ əgín a nigúu nɛ́ Ɛ́sɛlayɛl, ntɛ́ʼtála mɔɔd nyummú nyɔ́ yaágɛ́nɛ́ɛ́ oʼto na Táán wɔnɔ́ mɔɔd nyóonɛ.» 10Pɔɔd póob pá sɔ́njaa iyíím ɛ́dom pááság kuúlini a noádɛʼ. Ná páyɛ́ɛ́n əgiig, pɛ́ɛ́bóan lɛ́ uʼkudin nyóon aándɛ cacalaʼ.

Yə́sus ayóndɛ́gɛ mɔɔ́n ó kidí kɛ́ ɔʼkɛ́ɛd

11A ngim yɛ́ɛy, Yə́sus aáság kɛɛn a pálɛ́ɛg yimmú, pɔ́ɔdɔ́ŋɔn lɛ́ Nəyíin. Páyɛ́ɛ́n ondáŋ na paaʼkan pə́ə́ŋ, na kiʼtúú kɛ́ pɔɔd a ngim súuu. 12A niɛn əgiig nɛ́ɛn a udíyoog wó a nɛsɔd nɛ́ a pálɛ́ɛg, pááság kəə́bun na pɔɔd pándagɛɛn əni kɛlóŋ. Kɛ́yɛ́ɛ kɛmbóg kɛ́ mɔɔ́n, ŋŋí ayɛ́ɛ kidí. Pɔɔd piíŋ pá a pálɛ́ɛg yɛ́ɛy, kiʼtúú kilúd kɛ́yɛ́ɛ a ngim yɔɔbɔn súuu. 13Ná Sə́dúk ayɛ́moodála náan, maan mááság kumuúsiəd, náa ɔnɔ́ na nyɔ́lɛ́: «Íyowó, odɛndɛ́ɛ́ áaá!» 14Aáság kaáyɛʼtɛnɛ a ɛbá ɛ́ kɛlóŋ, ɔɔ́dɔ́bɛd igóó. Pɔɔd pá pɛ́nyáŋɛnɛn igóó yɛ́ɛy pááság kodɛ́lɛm. Náa Yə́sus ɔnɔ́: «Ɔnyɔmmɔ́n, mbágodɛánɛ, tɛ́ɛ́mɛn! Mbə́səə lɛ́ ódɛ́ɛmɛn!» 15Moóngaa aáság kodɛ́ɛmɛn ŋwaád, əə́ləndin na nsun, əə́bə́ə́ kosɔyɔ. Yə́sus aáság kumuúsiəd, əmə́muyúlísi na ŋŋí. 16Wɛɛ́y wááság kugumin ungim nyɔ́ ayɛ́ɛ kɔ áay. Pə́ə́bə́ə́ kɛɛ́ʼkɛn nugəm na Táán, pɔ́nɔ́ ɔndɔɛgɛʼ pɛbán o Táán nyɔ́ oʼkóʼkóón aálón a kɛgaágadɛ kɛɔ́bɔn. Táán əmíim ɔgɔɔyɛ ndɛg yəəŋ. 17Nkə kɛ́ Yə́sus ayɛ́ɛ́lɛ kɛ́ɛ́lám nigúu nɛ́ Siudə́ə niim, na əʼkúu tɛn yɛ́ a mobá əngim.

Sɛ́aŋ Ɔsɔgɛn pɔɔd ayɛ́ɛ əgəə́ŋíən lɛ́ ánɛ aa alɛɛ́ Yə́sus əə́

(Maʼt 11.2-6)

18Paaʼkan pá Sɛ́aŋ pááság kuúli, páádam pááloaŋanan na kɛlág kɛɔ́bɔn nkə kiim kɛ́ Yə́sus ayɛ́ɛ́lɛ. Sɛ́aŋ aáság kudə́əmini pábaan a ondáŋ wɔ́ɔ́bɔn, 19amáboodóm ná Sə́dúk alɛɛ́, ɔnɔ́ pɛ́ɛn əmuŋíən pɔ́nɔ́ əə: «Wɛ áa olɛɛ́ Məsíi ogo nyɔ́ tɛlɛɛ́ agobóŋan oóm, wɛndɛ́ŋ alɛ ngim ə́?» 20Paaʼkan póob pááság kɛɛn. Ná pə́yííg kɔ, páyɛ́modɛánɛ pɔ́nɔ́: «Sɛ́aŋ Ɔsɔgɛn pɔɔd aa amábɛɛdóm na olɛɛ́ lɛ́ tíguŋíən tɛɔʼkɔ́ əə: “Wɛ áa olɛɛ́ Məsíi ogo nyɔ́ tɛlɛɛ́ agobóŋan oóm, wɛndɛ́ŋ alɛ ngim ə́?” » 21Əgín tɛn kɔ áay a kɛnɛŋ kɛ́ɛg, Yə́sus aáság koómanɛ pɔɔd piíŋ a mabámbany mɔ́ɔ́bɔn, na a pɛnɛ́m pɛɔ́bɔn. Aáŋɛ́ŋaŋ tɛn məŋun má mabɛ́ má máyɛ́ɛ na pɔɔd, amɛ́ɛ́lɛ lɛ́ pá páyɛ́ɛ na woog píiʼkini kodɛ́ʼtɛganan. 22Náa ɔnɔ́ na pɔɔd póob pá Sɛ́aŋ əyíím ádom: «Todáan adɛ́anɛ na Sɛ́aŋ nkə kiim kɛ́ poádála, na nkə kiim kɛ́ pomóób: Táá, powongwóg pándadɛ́ʼtɛganan, pɔɔd pá pɛnɛ́m páalɛŋ kodáŋana, pá páyɛ́ɛ abany nkún pándɛ paŋɛʼ, pɔlɔ́ndɔ́g páagoóbanan, pɛlóŋ pɛ́agoóndɛgan, Tɔsɔm Tólaŋ tóagaálɔɛgɛ a nó mɔsɔ́gasɔ́gá#7.22 Kɛ́lɛ náan a kálaʼtaʼ yɛ Ɛsa 35.5-6; 61.1 23Kɔŋɛʼ na nyɔ́ adɛndɛ́ɛ́ kudə́ŋií kəə́liʼtiniʼ a oʼto wáam ó!»

Nkə kɛ́ Yə́sus yiísə́ə́ a oʼto ó Sɛ́aŋ Ɔsɔgɛn pɔɔd

(Maʼt 11.7-11)

24Ná pɔɔd pá Sɛ́aŋ yɛɛ́dóm páyɛ́ɛ páʼkɛɛn, Yə́sus əə́bə́ə́ kosɔyɔ kɛbán kɛ́ Sɛ́aŋ ogo nyóon na kiʼtúú kɛ́ pɔɔd pá pə́yə́yiilin kɔ áay, ɔnɔ́: «Ná poyɛ́ɛ agɛɛnan a kɛnɔ kɛ́ kifələ́ə́n ə́ə, nkə aa poyɛ́ɛ agɛɛn adɛ́ʼtɛg kɔ ə́? Niob nɛ́ ɔfɛfɛm óyɛ́ɛ əgunyigən əə́? 25Ndóo. Nkə anɛ́ɛ́n áa poyɛ́ɛ agɛɛn adɛ́ʼtɛg kɔ ə́? Mɔɔd nyummú nyɔ́ yiíníigin pisig pɛ́ pilə́ə́ ə́? Ɔmbɔ́ tɛn, lɛ́ mbod ɛ pɔɔd yɛ́ yəə́gəə́níigən pilə́ə́ pɛ́ mɔɔnɛ́ wɔnɔ́ pɛ́ɛb, páalaa a podogoloʼ, a puog pó puʼkúm áa pálɛanɛɛ́. 26Náa, nkə anɛ́ɛ́n áa poyɛ́ɛ agɛɛn adɛ́ʼtɛg əə́? Ɔndɔɛgɛʼ pɛbán o Táán á? Ɛɛ́ɛ, ndabodɛ́anɛ lɛ́ nyɔ́lɛ́. Amááyɛn kɔmɔɛ́d Ɔndɔɛgɛʼ pɛbán. 27Kɛbán kɛ́ Sɛ́aŋ ogo nyóon aa kíyə́dílə́ə́ a kálaʼtaʼ lɛ́ Táán ɔnɔ́: “Taa, mɔɔd waam wo oʼtom anyóon mbáyaŋ ádom a udi wááŋ lɛ́ yɛ́ɛn əguúbuənin ngə́#7.27 Kɛ́lɛ náan a kálaʼtaʼ ɛ Məl 3.1 ”.» 28Yə́sus ayɛ́ɛ́n na tɔgɛ́ɛ́ yuudi ɔnɔ́: «Ndabodɛ́anɛ lɛ́ úmmuʼ na úmmuʼ nyɔ́ əmə́biə́níí a nsun yɛ ɔʼkɛ́ɛd ɔdɛɔ́gɔ nyɔ́ amáábɛ́gɛn Sɛ́aŋ Ɔsɔgɛn pɔɔd ombɔg a oʼto. Kɔmɔɛ́d lɛ́ a Nɛlaamɛʼ nɛ́ Táán, ɔmbɔ́ əgín isúgəniʼ ngim ɛ́mámoyááyɛn.»

Nisiəd nɛ́ píísiə́d Sɛ́aŋ Ɔsɔgɛn pɔɔd, na nɛ́ píísiə́d Yə́sus

(Maʼt 11.16-19)

29«A tɔgɛ́ɛ́ tó Sɛ́aŋ yiísə́ə́, ungim, na Pagɔ́mmanɛʼ mag kɛ́, pə́yə́líʼtíníí lɛ́ Táán alɛ sáád, pááság kɛɛnan agaásɔgɛn a nó Sɛ́aŋ. 30Náa, Pafalɛsɛyɛ́ɛŋ, na palɛŋ pɛcɛm, pɔ́lɛ́ pɛ́ɛ́sáŋɛ́nɛ nkə kɛ́ Táán ayɛ́ɛ afɛga na pɔ́lɛ́, pááság kiin kaásɔgɛn a nó Sɛ́aŋ. 31Na ánɛ aa nfɛgɛɛ́ ɔsɛg wóonɛ ó nɛ́gɔŋ aáŋ? Pááŋwáŋánan ánɛ áŋ? 32Pálɛ wɔnɔ́ poómbaa pá pálɛɛ́ pələndínə́ə́n a kɛdom, páasásananɛ tɔgɛ́ɛ́, pɔ́nɔ́:

“Tɛyɛ́bogoɛ́n kubin a nudəə, pumbín;

Tiə́də́ə́míni mandɛɛ, podɛálɛ́lɛ́ɛ́.”

33«Kɛ́lɛ lɛ́, ná Sɛ́aŋ Ɔsɔgɛn pɔɔd əyíím, ayɛ́ɛ annɛ́ɛ́nɛ, aŋŋó maloʼ. Poɔʼkɔ́: “Oʼto wə́ə́ŋ wándɛ ɔmbɛ́.” 34Mɔɔ́n o mɔɔd əə́ʼkiim. Nyɔ́lɛ́ alɛ lɛ́ aánɛ, aáŋo. Poɔʼkɔ́: “Poádála ə́, alɛ na kɛniɛ́niɛ́n, na kɛŋoɛ́ŋoɛ́n! Alɛ a nɛsɔ́g na Pagɔ́mmanɛʼ mag, na pɛɛlanɛʼ mabɛ́.” 35Náa, ungim nyɔ́ alɛɛ́ əguyə́ən nsiŋ ɛ Táán, əgəə́liʼtini lɛ́ ɛlɛ sáád.»

Mɔɔd wo ɛgɔny ɛ́ Pafalɛsɛyɛ́ɛŋ nyummú yɛɛ́dɔ́ŋɔn Yə́sus agonɛ́ɛnɛ a noádɛʼ nuə́ŋ

36Mɔɔd nyummú wo ɛgɔny ɛ́ Pafalɛsɛyɛ́ɛŋ anyóon yɛɛ́dɔ́ŋɔn Yə́sus lɛ́ yíim anɛ́ɛnɛ a noádɛʼ nuə́ŋ. Yə́sus aáság kɛɛn, pə́ə́ləndin agonɛ́ɛnɛ. 37Ɔʼkɛ́ɛd nyummú, kɛdáŋanaʼ, kɛ́yɛ́ɛ kɔ a pálɛ́ɛg yɛ́ɛy. Ayóób lɛ́ Yə́sus alɛ áay a nó mɔɔ́n o Falɛsɛyɛ́ɛŋ nyóon, pálɛ agonɛ́ɛnɛ. Ɔʼkɛ́ɛd ogo nyóon yiígóodi igəd na lamɛ́ndaʼ a kaadɛ. Igəd ɛgo yɛ́ɛy páyɛ́ɛ́lɛ na nɛdáán nɛ́ pɔ́ɔdɔ́ŋɔn lɛ́ alɛbáaʼtɛlɛ. 38Yɛɛ́sán a ngim ɛ Yə́sus, əə́ləndin a ɛbá yɛ́ ambaan yə́ə́ŋ áyɛ́ɛ. Ɔʼkɛ́ɛd nyóon ayɛ́ɛ agolɛɛ, pɛlɛɛ píəsuulənən Yə́sus a ambaan, əə́ŋiənə na tuyə́ən tuə́ŋ, aánága ambaan á Yə́sus na unuʼ, əə́sumə́nə́n lamɛ́ndaʼ a yɛ́lɛ́.

39Ná mɔɔd nyɔ́ yɛɛ́dɔ́ŋɔn Yə́sus agonɛ́ɛnɛ yɛɛ́dála náan, əə́bə́ə́ kəə́lúluu kɔ na ɔʼtɛ́m, ɔnɔ́: «Mɔɔd nyóonɛ ayɛ́ɛnɛn fɔ́lɔ́b ɔndɔɛgɛʼ pɛbán o Táán ná aálɛŋ ánɛ aa alɛɛ́ ɔʼkɛ́ɛd nyóon nyɔ́ alɛɛ́ amoodɔ́bɔ. Ná aálɛŋ lɛ́ alɛ kɛdáŋanaʼ.» 40Yə́sus aáság kudə́əmini tɔgɛ́ɛ́, náa ɔnɔ́ na nyɔ́lɛ́: «Simɔ́ɔŋ, ndɛ na kɛbán kɛ́ ndányɔ́ŋɛn kogodɛ́anɛ.» Náa Simɔ́ɔŋ ɔnɔ́ na nyɔ́lɛ́: «Sɔyɔ, Kɛlág.» 41Náa Yə́sus ɔnɔ́ na nyɔ́lɛ́: «Táá, mɔɔd nyummú anyóon ayɛ́ɛ əguŋíən uŋín na nto ɛ pɔɔd ɛ́baan lɛ́ na sɔ́g nyóonɛ, əʼtin a pisúg a mɔɔnɛ́ áʼtáan, na nyummú, əʼtin a pisúg a mɔɔnɛ́ ábaan na yówád. 42Wɔnɔ́ ná ɔmbɔ́ úmmuʼ a pɔ́lɛ́ póob adɛʼkɛ́lɛɛ́ na ngə́ ɛ kumuyúlisini mɔɔnɛ́ móom, aáság kubuúlisin pɔ́lɛ́ piim uŋín wɔ́ɔ́bɔn. Náa ndə́guŋíən lɛ́ a nɛáŋ ə́ə, oyaán áa a pɔ́lɛ́ póob pábaan alɛ́ɛ́ kolaŋ kɔnyɔ́ŋɛnɛɛ́ mɔɔd nyóon agaáyɛn sɔ́g ə́?» 43Náa Simɔ́ɔŋ ɔnɔ́ na nyɔ́lɛ́: «A nɛ́am, sɔ́g nyɔ́ əyímugóodini mɔɔnɛ́ miíŋ agaáyɛn aa alɛ́ɛ́ kolaŋ komonyɔ́ŋɛnɛɛ́ agaáyɛn nyóʼkáag.» Náa Yə́sus ɔnɔ́ na nyɔ́lɛ́: «Ɛɛ́ɛ, omɔ́ɔ́ŋ.»

44Aáság kaágasɛ ná ɔʼkɛ́ɛd nyóon alɛɛ́, ɔnɔ́ na Simɔ́ɔŋ: «Waádála ɔʼkɛ́ɛd nyóonɛ ə́? Mbɔ́sɔ́d a noádɛʼ noáŋ, wɛ odɛnyɛɛ́ʼkɛnɛn məní lɛ́ nyáásog ambaan. Kɔmɔɛ́d lɛ́ nyɔ́lɛ́ amɛ́sog ambaan na pɛlɛɛ piə́ŋ, əə́ŋiənə na tuyə́ən tuə́ŋ. 45Wɛ, pɛ́go pɛ́ mbíim, udinjəə́súʼkənən. Kɔmɔɛ́d lɛ́ nyɔ́lɛ́, pɛ́ əmíím ɔ́sɔd, alɛ əgín kɛnnága ambaan na unuʼ. 46Wɛ, udingwúin məgúd a oʼto, məgúd málaŋ má mə́ənug kɔŋɛʼ#7.46 Kɛ́lɛ náan a kálaʼtaʼ ɛ Pɛʼk 23.5 Náa, nyɔ́lɛ́ əmísumə́nən lamɛ́ndaʼ a ambaan. 47Kólɛ́ aa ndágodɛ́anɛ lɛ́ a ɛdám yə́ə́ŋ ɛ́ mabɛ́ yɛ́ Táán əmə́muúlísin aa alɛɛ́ əguloodi nnyɔ́ŋánán náan kɛ́fɔlɛ́. Kɔmɔɛ́d lɛ́, sɔ́g nyɔ́ pə́ə́lisin mabɛ́ sɔɔŋ, alɛ́ɛ́ kuloodi tɛn nnyɔ́ŋánán sɔɔŋ.» 48Náa Yə́sus ɔnɔ́ na ɔʼkɛ́ɛd nyóon: «Íyowó, mbə́gulísin mabɛ́ mááŋ áaá!»

49Pɔɔd pá páyɛ́ɛ anɛ́ɛnɛ kɔ áay na nyɔ́lɛ́ pə́ə́bə́ə́ kumuə́lúluu na əŋŋúd, pɔ́nɔ́: «Nyɔ́lɛ́ aa nyóon ánɛ əgusəə ombod wóow náan lɛ́ nyɔ́lɛ́ əmə́muúlísin mabɛ́ ə́?» 50Náa Yə́sus ɔnɔ́ na ɔʼkɛ́ɛd: «Áʼoó áaá! Wɛ́ɛn kɔŋɛʼ á! Omɔ́ɔy lɛ́ omáág oʼto.»

Currently Selected:

LÓʼKAS 7: yatDBL

Highlight

Copy