LÓʼKAS 2

Niə́bíən nɛ́ Yə́sus na waany wə́ə́ŋ

1A kɛnɛŋ kɛ́go kɛ́ɛg, Sɛsáal Ogúustə#2.1 Sɛsáal Ogúustə yiílə́ndin nkúm yɛ́ nkóʼkóón a Ɔlɔ́ma pɛag 29 ná Yə́sus Kilíʼtus ədínjə́bíən, súʼtə́ə́ a pɛag 14 a ngim ɛ kəə́bíən kó Yə́sus Kilíʼtus., nkúm yɛ́ nkóʼkóón yɛ́ a Ɔlɔ́ma yiísə́ə́ lɛ́ pábana pɔɔd pá a nsí ngim. 2Ɔmban ó na oʼto na oʼto wóow óyáyɛ́lɛ́ɛ́ a kɛnɛŋ kɛ́ Kiliníyus ayɛ́ɛ ngɔ́mɛnaʼ a Silíi. 3Ungim yiígóodi lɛ́ yɛ́ɛn əgəə́dilə. Na wɛ ogo, a pálɛ́ɛg yaaŋ ɛ wɛɛ́nyɔ́amɔɛ́d. 4Náan aa Yósɛb yɛɛ́dɛ́ɛ́mɛn tɛn a Násalɛd, pálɛ́ɛg yimmú yɛ́ a nigúu nɛ́ Kalilə́ə, aáság kɛɛn a Pɛ́ʼtɛlɛɛm, pálɛ́ɛg yɛ́ Tə́fid əyə́biə́níí a yɛ́lɛ́, a nigúu nɛ́ Siudə́ə, lɛ́ ayɛ́ɛ mɔɔd nyɔ́ a yoog ɛ pɔɔd ɛ Tə́fid. 5Páyɛ́ɛ́n kɔ əgəə́dilə na oʼkán Malɛ́a, ná kaadɛ kə́ə́ŋ kándɛ kúŋ.

6Pálɛ anɛ́ɛ́n kɔ a Pɛ́ʼtɛlɛɛm a, wɔɔ́s ó Malɛ́a kubíən wááság kiim əgiig. 7Əə́bíən mɔɔ́n wəəŋ o na oʼto na oʼto, mɔɔ́n ɔnɔ́mɛɛd, aágóda na pilə́ə́, əmə́muyíngígi a kɛlɛ́ʼtɛ́g kɛ́ ándɛ mudúg móanɛ́ɛnɛ a kɛ́lɛ́ lɛ́ pɛ́ɛ́ʼtáŋ oʼkɔɔ a yoog ɛ pəən.

8Kɔ a nigúu nɛ́go nɛ́ɛn, pənuŋ mudúg páyɛ́ɛ əgubúlimən kɔ́gɔ́ɔg a ɔdɛ, əgunuŋ mudúg moɔ́bɔn. 9Uŋun ó maʼtom ó Sə́dúk wááság kɛɛn aboolónɛn kɔ, kisəə kɛ́ Sə́dúk kɛ́máboyágóʼkɛ́nɛ́ɛ́. Wɛɛ́y úyíbugúmin. 10Náa uŋun ó maʼtom wɔnɔ́ na pɔ́lɛ́: «Podɛʼtámmána! Pódála, mbíim aboólɔɛgɛnɛ Tɔsɔm Tólaŋ tó tóagɛɛlɛ lɛ́ nigúu niim nɛ́nyɔ́ga. 11Kɛ́lɛ lɛ́, udúg ó naánɛ́ yɛ́ɛnɛ, a pálɛ́ɛg ɛ Tə́fid, Ongɔɔyɛʼ əmə́biə́níí a oʼto wááŋan. Alɛ Sə́dúk, alɛ Məsíi. 12Táá nkə kɛ́ kɛ́agɛɛlɛ lɛ́ pómoólɛŋ a kɛ́ɛnɛ: Poaboan mɔɔ́n nyɔ́ uʼtom oʼkódágódá na pilə́ə́, ungiíngiə́n a kɛlɛ́ʼtɛ́g kɛ́ ándɛ mudúg móanɛ́ɛnɛ a kɛ́lɛ́.» 13Kiʼtúú kɛ́ məŋun má maʼtom foáy kɔ, kímə́búlídíí na wóow, pə́ə́bə́ə́ kudúmə nugəm nó Táán, pɔ́nɔ́:

14«Nugəm nóɛn na Táán nyɔ́ alɛɛ́ a mɔɛmɔɛ́n.

Kiwiiyiʼ kíɛn a nsí a pɔɔd pá alɛɛ́ anyɔ́ŋɛn.»

15Məŋun má maʼtom má Táán mááság kuúlini a mɔɛn, mə́mə́buudí. Pənuŋ mudúg pə́ə́bə́ə́ kosɔyɔ kɔ pɔ́lɛ́ na pɔ́lɛ́, pɔ́nɔ́: «Tiɛ́naan a Pɛ́ʼtɛlɛɛm yi. Tíɛn adála nkə kɛ́ kɛ́máyɛ́lɛ́ɛ́ kɔ. Tíɛn adála nkə kɛ́ Sə́dúk amɛ́ɛ́lɛ lɛ́ tɛ́lɛŋ.» 16Pááság kəə́bisig kɛɛn kɔ, pááboan lɛ́ na Malɛ́a na Yósɛb na mɔɔ́n nyɔ́ uʼtom ungiíngiə́n a kɛlɛ́ʼtɛ́g kɛ́ moom mó konɛ mó mudúg. 17Ná páyɛ́moodála, pə́ə́bə́ə́ kosɔyɔ nkə kɛ́ uŋun ó maʼtom ó Táán óyɛ́bodɛánɛ a kɛbán kɛ́ mɔɔ́n nyóon. 18Ungim nyɔ́ ayɛ́ɛ agoob nkə kɛ́ pənuŋ mudúg páyɛ́ɛ əgusəə, ayɛ́ɛ əgəə́wúunəni. 19Malɛ́a nyɔ́lɛ́ ayɛ́ɛ agaáyɛ́ngɛgan pɛbán pɛ́ɛb piim a oʼto, aásónkɛ pɛ́lɛ́ a ɔʼtɛ́m wə́ə́ŋ kɔŋɛʼ, kɔŋɛʼ. 20Pənuŋ mudúg pááság kusiəd ngə́ yɔɔbɔn əguúlini. Páyɛ́ɛ agɛɛn pə́əgiim pə́dúmə nugəm nó Táán, páamonyáadɛ a nkə kiim kɛ́ páyóób, na nkə kiim kɛ́ pɛ́ɛ́dála, lɛ́ pɛbán piim pɛ́yásánɛ́ɛ́ əgín wɔnɔ́ ná uŋun ó maʼtom ó Táán óyɛ́bodɛánɛ.

Páálog Yə́sus niiŋ

21A mədúg máʼtáan na mádáád má a ngim ɛ kəə́bíən kuə́ŋ, kɛnɛŋ kɛ́ komoyáanyɛ kɛáság kiim əgiig. Pááság komoólog niiŋ, pɔ́nɔ́: Yə́sus, əgín wɔnɔ́ ná uŋun ó maʼtom ó Táán oyɛ́modɔ́ŋɔn, ná ŋŋí ayɛ́ɛ adɛ́njɛ́ɛ na nium nɛ́ɛn#2.21 Kɛ́lɛ náan a kálaʼtaʼ ɛ Ləf 12.3; Lóʼk 1.31

Tɔgɛ́ɛ́ tó Sɛmɛyɔ́ɔŋ, na tó Ánaʼ

22Kɛnɛŋ kɛ́ɛnɛ lɛ́ pa Yósɛb pɔ́lɛ́ ná Malɛ́a pɛ́ɛn əgəə́fúŋi wɔnɔ́ ná kɛcɛm kɛ́ Moyíis kɛ́yɛ́ɛ əgusəə kɛáság kiim əgiig#2.22 Kɛ́lɛ náan a kálaʼtaʼ ɛ Ləf 12.3, 6 Páyɛ́ɛ́n na mɔɔ́n wɔɔbɔn a Yolósalɛm lɛ́ pɛ́ɛn əmuúloodi na Sə́dúk. 23Páyɛ́ɛ́lɛ náan lɛ́ kɛ́lɛ kidiídílə́ a pɛcɛm pɛ́ Sə́dúk lɛ́: «Mɔɔ́n ɔnɔ́mɛɛd o na oʼto na oʼto ungim, alɛ lɛ́ pə́də́nigi a oʼto ó Sə́dúk#2.23 Kɛ́lɛ náan a kálaʼtaʼ yɛ Ɔsa 13.2, 12 » 24Əgín tɛn wɔnɔ́ ná kɛ́lɛɛ́ a pɛcɛm pɛ́ Sə́dúk, pígóodi tɛn lɛ́ pɛ́ɛn agɛɛ́ʼkɛn munúg móbaan, oó lɛ́ piɛm pɛ́baan, onom na oʼkán, a kɛfɔny na Táán#2.24 Kɛ́lɛ náan a kálaʼtaʼ ɛ Ləf 12.8

25Əgín a kɛnɛŋ kɛ́go kɛ́ɛg, mɔɔd nyummú ayɛ́ɛ kɔ áay a Yolósalɛm niiŋ lɛ́ Sɛmɛyɔ́ɔŋ. Ayɛ́ɛ sáád ɛ mɔɔd, əə́yə́ən pɛbán pɛ́ Táán na toɛn. Ayɛ́ɛ agobóŋan kiim kó Ongɔɔyɛʼ nyɔ́ alɛ́ɛ́ kiim ɔgɔyɛɛ́ Ɛ́sɛlayɛl. Uŋun wó Ufúlúʼtú óyɛ́ɛ na nyɔ́lɛ́. 26Óyɛ́modɛánɛ lɛ́, adɛndɛ́ɛ́ kugu ná adɛ́ʼtála Məsíi yɛ́ Sə́dúk əə́giim ádom. 27Uŋun óyɛ́ɛ́lɛ lɛ́ Sɛmɛyɔ́ɔŋ yɛ́ɛn a Tɛ́mpɛl a kɛnɛŋ kɛ́go kɛ́ɛg kɛ́ pa sɛ na ŋŋí ɛ Yə́sus pə́yíím na mɔɔ́n wɔɔbɔn, əgiim agɛɛlɛ na nyɔ́lɛ́ nkə kɛ́ kɛcɛm kɛ́yɛ́ɛ əgusəə. 28Sɛmɛyɔ́ɔŋ aáság kodam ə́siəd mɔɔ́n a ɔmbɔg yə́ə́ŋ, amɛ́ʼkɛn pisoyidiʼ na Táán, ɔnɔ́:

29«Sə́dúk, nɛ́gɔŋ yɛ́ɛnɛ waándɛ ugiʼti mɛ uʼkudin waaŋ lɛ́ nyɛ́ɛn a wiiy

lɛ́, nkə kɛ́ oyɛ́ʼkagɛn kɛáʼkaáyɛ́ɛlɛ.

30Mbádála Ongɔɔyɛʼ nyɔ́ uyííyid. Mbámoodála na əngis yáam.

31Nɛbɛyɔ́ɔyɛ nɛ́ wiísóbíni lɛ́ olɛ́ɛ́ kɔɔyɛ əʼkúu əngim.

32Alɛ kisəə kɛ́ kɛ́agɛɛlɛ lɛ́ mɔnɔŋ má mádɛgoólɛŋɛnɛɛ́,

mágoólɛŋ.

Alɛ tɛn nugəm nó Ɛ́sɛlayɛl, nigúu nɛáŋ#2.32 Pódála tɛn náan a kálaʼtaʼ yɛ Ɛsa 42.6; 49.6; 52.10 »

33Pa sɛ na ŋŋí ɛ Yə́sus páyɛ́ɛ əgəə́wúunəni na nkə kɛ́ páyɛ́ɛ əgusəə a mɔɔ́n wɔɔbɔn. 34Sɛmɛyɔ́ɔŋ aáság kusoyidəni Táán a kidíídí kɛɔ́bɔn, náa ɔnɔ́ na Malɛ́a, ŋŋí a mɔɔ́n: «Ɛ́yaʼ, pɔɔd piíŋ a Ɛ́sɛlayɛl pálɛ́ɛ́ kudə́əŋ a oʼto ó mɔɔ́n waaŋ nyóon. Piíŋ tɛn pálɛ́ɛ́ kodɛ́ɛmɛn a oʼto wə́ə́ŋ. Alɛ́ɛ́ kɛɛn kɛálɛ́ʼkán kɛ́ Táán. Kɛálɛ́ʼkán kɛ́ pɔɔd pálɛ́ɛ́ kɔnɔɛyɛɛ́. 35Alɛ́ɛ́ kosámbon a táán, mafɛgaʼ má pɔɔd piíŋ pálɛ́ɛ́ kɛɛnɛɛ́ na mɔ́lɛ́ a ntɛ́m yɔɔbɔn. A wɛ Malɛ́a, ntɔ́b yaaŋ ɛlɛ́ɛ́ kɛɛn wɔnɔ́ nɛɔŋ áa pə́mə́gudúm a ɔʼtɛ́m.»

36Ɔʼkɛ́ɛd nyummú tɛn ayɛ́ɛ kɔ niiŋ lɛ́ Ánaʼ. Ayɛ́ɛ ɔndɔɛgɛʼ pɛbán o Táán, mɔɔ́n o Fanóɛl, a kibúúm kɛ́ Asɛ́ɛl. Ayɛ́ɛ aándɛ osaá wo ɔʼkɛ́ɛd. Yɛɛ́dɔ́n, páálaa na onom pɛag pɛ́ʼtáan na pɛ́baan, onom əə́gú, 37aáság kolɔb kidí. Ayɛ́ɛ aándɛ na pɛag əʼtin ə́niʼ na píniʼ. Ayɛ́ɛ ondiogi kə́mmú ongoo a Tɛ́mpɛl, aányáadɛ Táán na udúg na wɔɔ́s, ɔɔ́gɔɔ́sɔ́gɔlɔn, əə́gəə́gili moom konɛ. 38Ɔʼkɛ́ɛd nyóon aáság kiim əgiig tɛn kɔ áay a kɛnɛŋ kɛ́go kɛ́ɛg. Əə́bə́ə́ kɛɛ́ʼkɛn pisoyidiʼ na Táán, ɔɔ́sɔyɔ kɛbán kɛ́ moóngaa nyóon na ungim nyɔ́ ayɛ́ɛ agobóŋan lɛ́ Táán yááŋɛn Yolósalɛm.

Nɛóndaa nɛ́ Yə́sus

39Ná pa sɛ na ŋŋí ɛ Yə́sus páyɛ́ɛ páʼkoman kuyə́əgi kɛcɛm kɛ́ Sə́dúk, pááság kusiəd ngə́ əguúlini a Násalɛd, pálɛ́ɛg yɔɔbɔn, a nigúu nɛ́ Kalilə́ə. 40A Yə́sus, nyɔ́lɛ́ ayɛ́ɛ əgín aman koyam, aágon, nsiŋ yəəŋ yəə́yə́əg a oʼto. Táán ayɛ́ɛ na nyɔ́lɛ́.

Yə́sus əyə́díŋíníí pa sɛ na ŋŋí, aáság kolɔb agosɔyɔ a Tɛ́mpɛl

41Pa sɛ na ŋŋí ɛ Yə́sus páyɛ́ɛ pɛɛnan maag miim a Yolósalɛm, agɛɛn asánɛ wɔɔ́n ó Páska. 42Ná Yə́sus ayɛ́ɛ aándɛ na pɛag pɛówád na pɛ́baan, pa sɛ na ŋŋí pááság kɛɛn na nyɔ́lɛ́ wɔnɔ́ ná kɛ́lɛanɛɛ́ a mandoŋá mɔ́ɔ́bɔn#2.42 Kɛ́lɛ náan a kálaʼtaʼ yɛ Ɔsa 12.1-27; Tɛʼt 16.1-8. Pɛag 12 pɛ́yɛ́ɛ pɛag pɛ́ páyɛ́ɛ pəsəə lɛ́ mɔɔd əə́ʼkəə́yíís a kəə́liʼtiniʼ kó Yúdɛn. 43Ná wɔɔ́n óyɛ́ɛ wáʼkoman, pááság kusiəd ngə́ əguúli. Náa, Yə́sus nyɔ́lɛ́ aáság kolɔb a Yolósalɛm, pa sɛ na ŋŋí pádɛálɛ́ŋɛ́ɛ́. 44Páyɛ́ɛ agofɛg lɛ́ alɛ na pɔsɔ́g pɔ́ɔ́bɔn pá ngə́. Pɛ́ɛ́dáŋána wɔɔ́s kilúd, pádɛmoodála. Pə́ə́bə́ə́ kumuyúunə a ondáŋ ó pɔsɔ́sɔ́g pɔ́ɔ́bɔn, na pɔɔ́npásɛ pɔ́ɔ́bɔn, 45pádɛmoyɔ́ɔ́ŋ. Pááság kudii ngim, əguúlini a Yolósalɛm, pə́əgiim pə́muyúunə. 46A ngim ɛ mədúg mádáád aa páyɛ́ɛ́n amoóboan, alɛ a Tɛ́mpɛl. Alɛ kɔ undəndínə́ə́n a kɛgaágadɛ kɛ́ palɛŋ pɛcɛm, aágoob nkə kɛ́ pálɛɛ́ əgusəə, əə́buŋíənə tɛn pɛbán. 47Ungim nyɔ́ ayɛ́ɛ agoob nkə kɛ́ ayɛ́ɛ agosɔyɔ, ayɛ́ɛ agaáfɛ́ma wɔnɔ́ ná ayɛ́ɛ əguúlisəni pɛbán na nsiŋ. 48Ná pa sɛ na ŋŋí páyɛ́moodála, nkó yɔɔbɔn yɛɛ́bág. Náa ŋŋí ɔnɔ́ na nyɔ́lɛ́: «Mɛ mɔɔ́n! Tuə́ aa omábɛyɛ́ɛ́lɛ náan ə́? Pəsi na sɛ waaŋ tɛáʼkoság kuguyúunə, omábɛyáág ɛságág a ɔʼtɛ́m kɛ́fɔlɛ́.» 49Yə́sus aáság kubuyúlisini ɔnɔ́ na pɔ́lɛ́: «Puəginjuunə lɛ́ nkə? Pondɛŋɛn lɛ́ nkóódi lɛ́ nyɛ́ɛlɛ pɛbán pɛ́ Sɛ waam a?» 50Kɛbán kímuʼ, pɔ́lɛ́ pádɛʼkáagoob nkə kɛ́ ayɛ́ɛ anyɔ́ŋɛn kobodɛ́anɛ a tɔgɛ́ɛ́ tóod. 51Yə́sus aáság kodɛ́ɛmɛn əguúli na pɔ́lɛ́ a Násalɛd. Ayɛ́ɛ agoboyóbɛn. Pɛbán piim pɛ́ pɛ́yɛ́ɛ agaásan, ŋŋí ayɛ́ɛ agaáyɛ́ngɛgan a oʼto. 52Yə́sus nyɔ́lɛ́ ayɛ́ɛ əgín aman koyam, nsiŋ yəəŋ yaágon a oʼto, aágɛɛlɛ nkə kɛ́ kiə́gə́mmi Táán, na pɔɔd#2.52 Pódála tɛn náan a kálaʼtaʼ ɛ 1Sa 2.26; Pos 3.4

Currently Selected:

LÓʼKAS 2: yatDBL

Highlight

Copy