Lukas 1

Panagnaan

1Assalamo alaykom kammo, Dato Tiyopilo. Madaig da yang yamaningkamot magsorat makapantag sang mga ininang ni Isa Almasi na yatoman adi sang kanatun banwa. 2Yang syorat nilan yasobay sang gyogod kanatun nidtong mga otaw na yakakita sang kariko ng ya-inang sikun pa sang pagsogod aw yagapayapat oman ng makapantag sinyan. 3Na adon, Dato Tiyopilo, sabap ng pyagasosi ko ng madyaw yang kariko nini na mga butang sikun pa sang pagsogod, yagadumdum ako na madyaw oman kong isorat ko kammo yaning kariko sang matapid na pama-agi. 4Ininang ko yani untak makasigoro kaw na bunna yang kariko ng pyaga-indo kammo.

Pyatigam yang Pagkaotaw ni Yahiya na Magsosogboway

5Sidto na wakto na si Hirod yang soltan sa Yahodiya aon sambok na imam na pyagangaanan kang Sakariyas. Yakabilang yan sang panon ng mga imam na mga topo ni Abiyas. Yang ngaan ng asawa nan si Hashiba na topo oman ni Imam Haron. 6Si Sakariyas aw si Hashiba, matorid silan sang pagtanaw ng Tohan aw yagapangagad silan sang kariko ng mga sogowan. 7Awgaid way anak nilan kay di maka-anak si Hashiba aw silan dowa mataas da yang idad nilan.

8Ansinyan dyomatung yang wakto na si Sakariyas upud sang kadaigan pa na mga imam ng kanan panon yang maga-inang ng gawbuk nilan adto sang Baay ng Tohan. 9Yanagripa silan sobay sang kabatasanan nilan na mga imam daw sino yang magasonog ng toob adto sa suud ng Baay ng Tohan. Aw si Sakariyas yang yamapili. Agaw syomuud yan adto sang Sotti na Kowarto. 10Sarta yagasonog yan ng toob adto sa suud, madaig yang mga otaw adto sa logwa na yanagdowaa.

11Sakadyap sinyan aon sambok na malaikat na syogo ng Tohan na yagapakita kang Sakariyas. Iyan yan paga-indug apit sang karinto ng pagsosonogan ng toob. 12Pagkita ni Sakariyas sang malaikat, yakuga yan aw yasaot yan ng alluk. 13Awgaid yagalaong yang malaikat kanan, “Ayaw da pagkalluk, kay Sakariyas, kay tyarima ng Tohan yang pyangayo mo kanan. Yang kammo asawa na si Hashiba amanganak ng usug aw pagangaanan mo yan kang Yahiya. 14Amasowat kaw sabap kanan aw madaig oman yang mga otaw na amasowat kong amaotaw da yan. 15Kay ma-inang yan ng bantoganun sa atobangan ng Tohan. Di yan dait minum ng maskin ono na makalasing kay sikun pa sang paglakad ng ina nan pyagabuutan da yan ng Nyawa ng Tohan. 16Madaig yang mga topo ni Israil#1:16 Israil yang tuna na ngaan ni Yakob. Yan yang ompo ng mga bangsa Israil na tyawag oman ng mga Yahodi. na apabarikun nan adto sang Tohan na Tagallang nilan. 17Ama-ona yan sang pagdatung ng Dato na Labi na Mabarakat na iyan kanan yang kinaiya aw kabarakat na mag-onawa ng kinaiya aw kabarakat ni Nabi Iliyas. Sabap sang pag-indo nan apabarikun nan yang madyaw na relasyon ng mga ama adto sang mga anak nilan. Aw yang mga otaw na masopakun apabarikun nan sang dumduman ng mga otaw na matorid. Aw ansinyan andamun nan yang mga otaw sang pagdatung ng Dato na Labi na Mabarakat.”

18Ansinyan yaga-osip si Sakariyas sang malaikat, laong nan, “Monono ko akatigaman na amatoman yani na pyaglaongan mo? Kay ako matikadung da aw boyag da oman yang asawa ko.”

19Tyomobag yang malaikat, laong nan, “Ako si Jibrail, aw iyan ako maga-indug sa atobangan ng Tohan. Syogo nan ako untak magpatigam kammo sini na madyaw na gogodanun. 20Awgaid adon, kay wa kaw apangintoo sang pyaglaongan ko, amasiling kaw ng amang aw di da kaw makapaglaong taman sidtong wakto na amatoman da yani na pyaglaongan ko kammo. Aw amatoman yaning kariko pagdatung ng wakto na pyagakahanda ng Tohan.”

21Na, yang mga otaw adto sa logwa yabay magtagad kang Sakariyas. Yangkatingaa silan nanga yadogay yan adto sa suud ng Baay ng Tohan. 22Ansinyan paglogwa da ni Sakariyas, di da yan makapaglaong aw yagasingyas da gaid yan adto sang mga otaw. Agaw kyatigaman da nilan na aon pyakita kanan ng Tohan adto sa suud. Aw sikun sinyan amang da si Sakariyas.

23Ansinyan pagkatapos ng gawbuk ni Sakariyas adto sang Baay ng Tohan yamori da yan. 24Wa akadogay sinyan yagkabdus da yang asawa nan na si Hashiba. Aw sa suud ng limambowan wa yan apanaw sikun sang baay. 25Laong nan, “Madyaw yang ininang kanak ng Tohan kay tyabangan nan ako aw kyamang da nan yang yagapakamomowa#1:25 Yang yagapakamomowa sang mga bobay sidto na panahon na di silan maka-anak. kanak.”

Pyatigam yang Pagkaotaw ni Isa

26Ansinyan sang ika-unum na bowan ng pagkabdus ni Hashiba syogo ng Tohan yang kanan malaikat na si Jibrail adto sang longsod ng Nasarit na sakop ng Jalil. 27Syogo yan adto sang sambok na daaga na pyagangaanan kang Mariyam. Yani si Mariyam tawas ni Yosop na topo ni Soltan Daud. 28Ansinyan dyomood yang malaikat kang Mariyam aw laong nan, “Assalamo alaykom, kay Mariyam. Kyaoyan kaw ng Tohan aw iyan yan sang masaid kammo.”

29Na, pagdungug ni Mariyam sinyan na pyaglaongan ng malaikat, bali na karido nan aw yabay nan dumdumun daw ono yang mana ng pyaglaongan nan. 30Ansinyan yagalaong yang malaikat kanan, “Ayaw da pagkalluk, kay Mariyam, kay kyaoyan kaw ng Tohan. 31Sang di amadogay amabdus kaw aw amanganak kaw ng usug aw pagangaanan mo yan kang Isa. 32Ma-inang yan ng bantoganun aw pagatawagun yan na Anak ng Labi na Makagwas. Atagan yan ng Tohan ng kapatot pagdato sang mga otaw na mag-onawa ng kapatot ni Soltan Daud na ompo nan. 33Ansinyan magadato yan sang mga topo ni Yakob taman sa taman kay way kataposan ng pagkasoltan nan.”

34Ansinyan yagalaong si Mariyam sang malaikat, “Monono yang pagpanganak ko na daaga pa sa ako?”

35Tyomobag yang malaikat aw laong nan, “Madatung kammo yang Nyawa ng Tohan aw magapabilin kammo yang kabarakat ng Labi na Makagwas. Sabap sinyan sotti yang isu na amaotaw aw pagatawagun yan na Anak ng Tohan.#1:35 Yang pyaglaongan na Anak ng Tohan sambok na ngaan atawa titolo para kang Isa Almasi na way labot sang pagpanganak kanan. Yang karim ipasabot sini na titolo na yang kariko ng kinaiya aw kabarakat ng Tohan iyan kang Isa Almasi. 36Dumduma oman yang lomon mo na si Hashiba. Yagakabdus yan aw aka-aonan yan ng anak na usug maskin boyag da. Yan na bobay na di kono maka-anak, ika-unum na bowan da adon ng pagkabdus nan 37kay way butang na di amabaoy ng Tohan.”

38Tyomobag si Mariyam, laong nan, “Idi kay ako na allang ng Tohan. Atarimaun ko yang pyagakahanda nan kanak aw amatoman pa gao yang pyaglaongan mo kanak.” Pagkatapos sinyan biniya kanan yang malaikat.

Yagabisita si Mariyam kang Hashiba

39Wa akadogay sinyan yaga-andam da si Mariyam aw yomapas-apas yan komadto sang sambok na banwa sa kabutayan ng Yahodiya. 40Pagdatung nan sidto na banwa, yamanaos yan sang baay ni Sakariyas aw yagasalam yan kang Hashiba. 41Na, pagdungug ni Hashiba sang pagsalam ni Mariyam, tyomokaw magginuk yang isu sang dubdub nan. Pyagabuutan si Hashiba ng Nyawa ng Tohan 42aw yagapiyagit yan aw laong nan, “Dakowa yang kadyawan na yatag kammo ng Tohan na labaw pa sang kariko ng kaobayan! Aw dakowa oman yang kadyawan na yatag nan adto sang anak mo. 43Na, sino kadi ako na bisitaun ako ng ina ng kanak Dato? 44Kay pagdungug pa ko gaid sang pagsalam mo, tyomokaw magginuk yang isu sang dubdub ko na maynang yamasowat yan. 45Bali na kadyaw ng ginawa mo kay yasarig kaw na amatoman yang pyaglaongan kammo ng Tohan!”

Yang Pagpoji ni Mariyam sang Tohan

46Ansinyan yagalaong si Mariyam,

“Pyoji ko yang Tohan sang kanak pangatayan,

47aw bali na kasowat ko sang Tohan na kanak Manlolowas.

48Kay kyadumduman nan ako

na kanan gaid allang.

Aw sikun adon magalaong yang kariko ng mga otaw na bali na kadyaw ng ginawa ko

49sabap sang mga katingaan na ininang kanak ng Tohan na Labi na Mabarakat.

Sotti yang ngaan nan!

50Yamallat yan sang mga otaw na aon alluk kanan

maskin pa sang mga katopo-topowan nilan.

51Pyakita nan yang kanan kabarakat sabap sang mga inang nan

aw pyagakanat-kanat nan yang mga otaw na yagapataas ng ginawa nilan.

52Kyamangan nan ng kapatot yang mga soltan

aw pyataas nan yang mga otaw na mababa yang kabutang nilan.

53Yatagan nan ng mangkadyaw na mga butang yang mga yamagutum

aw pyapanaw nan ng way daa yang mga sapian.

54Tyabangan nan yang bangsa Israil na kanan allang

aw tyoman nan yang kanan pasad sang kanatun kaompowan.

55Kay yagapasad yan kang Nabi Ibrahim aw yang mga topo nan

na amallat yan kanatun taman sa taman.”

56Na, ansinyan yagapabilin pa si Mariyam adto kang Hashiba ng mga toombowan. Pagkatapos, yamori da yan.

Yang Pagkaotaw ni Yahiya na Magsosogboway

57Adon dyomatung da yang wakto ng pagpanganak ni Hashiba aw yamanganak yan ng usug. 58Pagdungug ng mga simbaay kipat yang mga kalomonan ni Hashiba na dakowa yang looy na pyakita kanan ng Tohan, yamangkasowat silan upud kanan.

59Na, sang ikawaong allaw da ng isu kyomadto kanilan Hashiba yang mga simbaay aw yang mga kalomonan nan kay atoliun da nilan yang isu. Aw pagangaanan gao nilan yan kang Sakariyas mag-onawa ng ama nan. 60Awgaid yagalaong yang ina ng isu, “Ayaw, kay yang pagangaan kanan si Yahiya.”

61“Nanga kadi?” laong nilan. “Waa sabay lomon mayo na Yahiya yang ngaan.”

62Agaw siningyasan da nilan si Sakariyas daw sino yang pagangaan nan sang isu. 63Ansinyan yagapakamang si Sakariyas ng soratanan aw syorat nan, “Yang ngaan nan si Yahiya.” Aw yangkatingaa da yang kariko nilan. 64Na, pagkasorat dakoman ni Sakariyas ng ngaan ng isu, yakapaglaong da oman yan aw yagapoji sang Tohan. 65Ansinyan yangkalluk yang kariko ng mga simbaay nilan. Aw yang gogodanun makapantag sini na pangitabo yakarimpud sang kariko ng mga banwa sa kabutayan ng Yahodiya. 66Aw yang kariko ng mga yakadungug sinyan yanaglaong sang ginawa nilan, “Ono pa kowaw yang ma-inang nining isu kong dakowa da?” Kay klaro da na yagadan yan ng kabarakat ng Tohan.

Yang Pagpoji ni Sakariyas sang Tohan

67Ansinyan pyagabuutan si Sakariyas na ama ng isu ng Nyawa ng Tohan aw yakapaglaong yan ng pyaglaongan ng Tohan. Laong nan,

68“Pojiun ta yang Tohan na pyagasambayangan ng bangsa Israil

kay yakani yan untak lowasun nan kita na mga sakop nan.

69Pyadaa nan adi kanatun yang sambok na manlolowas na mabarakat

na topo ni Soltan Daud na kanan allang.

70Idto yang pyatigam nan kanatun pina-agi sang kanan mga nabi singaong ona pa.

71Yagapasad yan na alowasun nan kita sikun sang kanatun mga kalaban

aw sikun oman sang yagadumut kanatun.

72Yagalaong oman yan na amallat yan sang kanatun kaompowan

aw di nan akaringawan yang kanan pasad na inangun nan silan ng mga otaw na sakop nan.

73Idto yang kanan pasad sang kanatun ompo na si Nabi Ibrahim

74na alowasun nan kita sikun sang kanatun mga kalaban

untak kita makapangagad kanan ng way alluk

75aw untak kita ma-inang ng sotti aw matorid sa atobangan nan sang tibok natun na kinabowi.”

76Ansinyan yagalaong si Sakariyas sang anak nan,

“Ikaw, kay Itin, pagatawagun kaw na nabi ng Tohan na Labi na Makagwas

kay ama-ona kaw sang Dato na Labi na Mabarakat untak andamun mo yang agianan nan.

77Ikaw yang magapatigam sang mga otaw na sakop nan na amalowas silan

kong amangayo silan ng ampon ng mga dosa nilan.

78Kay yang kanatun Tohan labi na maoyanun.

Aw sabap sinyan apakaniun nan kanatun yang manlolowas

sikun sa sorga na mag-onawa ng pagsilat ng suga

79untak ka-allagan yang kariko ng mga otaw

na iyan sang kadugguman aw yamalluk matay,

aw untak indowan nan kita ng daan ng kalinaw.”

80Ansinyan tyomorin da yang anak ni Sakariyas aw yagakabagsug yang dumduman nan. Yaga-uya yan adto sang mamingaw na banwa taman sang wakto na yagasogod da yan mag-indo sang mga otaw na bangsa Israil.

Currently Selected:

Lukas 1: KI

Highlight

Copy