LUCAS 6

Jesusan yatiqirinakapax sábado urun trigo puyanak k'ichirapxi

(Mt 12.1-8; Mc 2.23-28)

1Mä sábado urusti, Jesusax trigo yapu taypi saraskäna. Yatiqirinakapasti uka taypi sarkasax trigo achunak k'ichirapxäna, ukatsti amparanakapampi khakhurasaw manq'apxäna. 2Fariseonakasti uk uñjasax Jesusaruw jiskt'apxäna:

—¿Kunatarak jumanakasti kunatix sábado urun jan lurañäki uk lurapxtasti? —sasa.

3Jesusasti jupanakarux sarakïnwa:

—¿Janit jumanakasti uñxatapkta kuntix Davidax masinakapamp manq'at awtjatax lurkän uksti? 4Davidax Diosan utaparuw mantäna, ukatsti Diosar luqtat t'ant'a aptasin jupampi masinakapampix manq'antapxäna, uka t'ant'ax sacerdotenakan manq'añapakïkchïn ukasa.

5Ukxarusti saskakïnwa:

—Jaqin Yuqapax sábado urxarus munañanirakiwa —sasa.

Jesusax ampar jan aytir jaqiruw sábado urun k'umaraptayi

(Mt 12.9-14; Mc 3.1-6)

6Qhipa sábado urunsti, Jesusax sinagogaruw mantäna ukat yatichañ qalltäna. Ukansti kupi ampar jan aytir jaqiw ukankaskäna; 7kamachi yatichirinakampi, fariseonakampisti Jesusarux jamasat uñch'ukisipkäna sábado urun qullanit janicha uk yatiñataki, ukhamat jupar juchañchañataki. 8Ukampis Jesusax kuntix jupanakax lup'ipkäna uk yatisinxa, ampar jan aytir jaqiruw säna:

—Sartasim, khä taypir sayt'asim —sasa.

—Uka jaqisti sartasin iyawsasaw ukkhar sayt'asïna, 9Jesusasti mayninakarux sarakïnwa:

—May jiskt'apxäma: ¿Kuna lurañas sábado urun wakisi, aski lurañati, jan ukax ñanqha lurañacha? ¿Jaqir jiwañat qhispiyañati, jan ukax jiwayañach wakisi? —sasa.

10Ukapachaw Jesusax jupar muyuntatäkän ukanakar uñkatasin usut jaqirux säna:

—Amparam ayatatam —sasa.

Jupasti iyawsasaw amparap ayatatäna, amparapasti k'umaräxänwa. 11Uka jaqinakasti uk uñjasax wal arusipxäna, ukatsti jupanakkamaw jiskt'asipxäna: ¿Kamachañänis aka Jesusaruxa? sasa.

Jesusax tunka payan apostolunak ajllisi

(Mt 10.1-4; Mc 3.13-19)

12Khä urunakan Jesusax mä qulluruw Tatitur mayisir saräna, ukansti arum paqariw Diosat mayisïna. 13Urjtanxipansti yatiqirinakaparuw jawsäna, ukatsti tunka payaniruw ajllïna, jupanakarux “apostolunaka” sasaw sutichäna. 14Jupanakasti akïrinakänwa: Simón, juparusti Jesusax Pedro sasaw sutichäna; Andrés, Simonan jilapa; Santiago, Juan, Felipe, Bartolomé, 15Mateo, Tomás, Santiago, Alfeon yuqapa, Simón, juparux cananeo sapxirïnwa. 16Judas, Santiagon yuqapa, ukhamarak Jesusar aljantir Judas Iscariote.

Jesusax walja jaqinakaruw yatichi

(Mt 4.23-25)

17Jesusax yatiqirinakapampiw qullut saraqanïna, mä pamparuw purïna. Ukansti jupan walja arkirinakapaw tantacht'asïna, ukhamarakiw Judeata, Jerusalenata, Tiro, Sidón uksa lamar quta thiyanakat jutapxatayna. 18Jupanakasti Jesusar ist'iri, usunakapat qullatäñatakiw jutapxatayna. Khitinakatix ñanqha ajayunakan t'aqhisiyatäpkän ukanakas k'umarachatäpxarakïnwa. 19Jaqinakasti taqiniw Jesusarux llamkt'añ munapxäna, ch'amapampi taqinirus jupan waliptayatap layku.

Kusisïwinaka

(Mt 5.1-12)

20Jesusasti yatiqirinakapar uñkatasaw säna:

“Kusisiñanïpxtaw jan kunaninakaxa, Diosan qhapaq markapax jumanakankiwa.

21“Kusisiñanïpxtaw manq'at jichha awtjayasirinakaxa, jumanakasti sist'atäxapxätawa.

“Kusisiñanïpxtaw jichha jachirinakaxa, qhiparusti larusipxätawa.

22“Kusisiñanïpxtaw kunapachatix jaqinakax uñisipkätam, jupanak taypit jaqunukupkätam, kunayman jan wali sapkätam, sutinakamsa ñanqha sutjam amuyapkani, Jaqin Yuqap layku ukapachaxa. 23Wal kusisipxam, uka t'aqhisiñ urun k'uchisipxam, jumanakasti alaxpachan jach'a waxt'äwi katuqapxäta; uka jaqinakan nayra awkinakapax uka pachparak profetanakarux lurapxäna.

24“Ukampis ¡qamirinaka, kunakïpkäta, kusisiñanakam niyaw katuqxapxtaxa!

25“¡Ay, kunakïpkät jichha sist'atanaka, jumanakax awtjayasipxätawa!

“¡Ay, kamachapkakït jichha larusirinaka, jumanakax llakisiñatsa jachapxätawa!

26“¡Ay, kunakïpkäta, kunapachatix taqinis jumanakar jach'achapkätam ukapachaxa, nayra awkinakapax uka pachparak k'ari profetanakar lurapxäna!

Uñisirinakar munasiñxata

(Mt 5.38-48; 7.12)

27“Ukampis khitinakatix ist'apkista ukanakarux sapxsmawa: Uñisirinakamarux munapxam, uñisipktam ukanakarux aski lurapxam, 28ñanqhachirinakamarux suma arumpi kutt'ayapxam, p'inqachjirinakamatakix Diosat mayipxam. 29Maynitix maysa ajanumat nuwantätamxa, maysampachat nuwantayasim; maynitix patxa isim iqarätamxa, manqha isimamppach churxam. 30Khitis jumat kunsa maykätam ukarux churam; khitis jumat kunsa aparätamxa, jan kutt'ayxit samti. 31Kunjämtix jumanakax mayninakamp uñjatäñ munapxtaxa, ukhamarakiy jumanakax mayninakarux uñjapxam.

32“Jumanakatix jumanakar muniriruk munapxätaxa, ¿kuna askirak lurapxtasti? Juchararanakas uk luraskarakiwa. 33Jan ukax, jumanakatix aski lurapktam ukanakaruki aski lurapxäta ukaxa, ¿kuna askirak lurapxtasti? Juchararanakas ukham luraskarakiwa. 34Jumanakatix juk'amp katuqañatak khitirus mayt'apxsta ukampix ¿kuna askirak lurapxtasti? Juchararanakas jucharar masinakapat juk'amp katuqañatakix mayt'asipkarakiwa. 35Ukampis jumanakax uñisirinakamar munapxañamawa, aski lurapxañamaraki, jan kun katuqañ suyasak mayt'apxam. Ukhamat jumanakan katuqañamax jach'äni, jumanakasti Alaxpach Dios Awkin wawanakapäpxätawa. Diosax jupar jan yuspagaririnakatsa, juchararanakatsa khuyapt'ayasiwa. 36Jumanakax khuyapayasirïpxam, kunjämtix Awkimax khuyapayasirïki ukhama.

Mayninakar jan juchañchañxata

(Mt 7.1-5)

37“Jan yaqhanakarux juchañchapxamti, Diosasti janirakiw jumanakarux juchañchapkätamti. Pampachapxam, Diosasti pampachapxarakïtamwa. 38Yaqhanakarux churapxam, jumanakarusti Diosaw churapxätam. Diosasti wayaqanakamarux wali phuqt'at churapxätam, suma thalantt'ata, limintt'ataraki. Kunjämtix yaqhanakarux lurapkäta uka pachparak Diosax jumanakampix lurani”.

39Jesusasti aka uñtasïwit amuyt'ayi: “¿Mä juykhu jaqisti, juykhu masiparux irpaspati? ¿Janit panpachani mä p'iyar jalantapkaspaxa? 40Janiw khiti yatiqiris yatichiripat juk'ampïkiti, yatiqañ tukuyxaspa ukkhakiw yatichiripjamäxaspa.

41“¿Kunatsa jilaman nayrapan jisk'a q'añux utjki uk uñch'uktaxa, nayraman jach'a lawa utjki uka janïr apskasaxa? 42¿Kunjämarak jilamarusti sañ muntasti, ‘Jilata, nayramat uka jisk'a q'añu apst'äma’ sasa, juman nayraman mä jach'a lawa utjaskipansti? ¡K'ari chuyman jaqi!, nayraqat nayramankkis uka jach'a lawa apsusim, ukat jumax jilaman nayrapan jisk'a q'añux utjkis uk apsuñatak sum uñjäta.

Mä quqax achupat uñt'atawa

(Mt 7.17-20; 12.34-35)

43“Janiw suma quqax jan wali achunak churirix utjkaspati, janirakiw jan wali quqas suma achu churirix utjkaspati. 44Ukhamasti sapa quqapï achupat uñt'ataxa: janiw higo achux ch'aphinakat pallaraskiti, janirakiw uva achunakas ch'aphirar alinakat apthapiskiti. 45Suma jaqix sumanak arsu, suma chuymanïtap layku, qhuru jaqisti jan walinak arsuraki, jan wali chuymanïtap layku. Ukhamasti kunatix chuymapan phuqt'atäki ukat parli.

Uta lurir pani jaqinaka

(Mt 7.24-27)

46“¿Kunatarak jumanakasti: ‘Tatay, Tatay’ sapxista, ukat janirak kuntix sapksma uk lurapktasti? 47Nayax sapxsmawa, khititix nayar jutki, ist'karakitu, ukat kuntix siskta uk lurkaraki ukaxa, 48manqha allsusin mä qarqa patxar utacht'asir jaqimp sasiwa. Kunapachatix may jawirax wal sartanki ukkhaxa, umax ch'amampiw uka utarux jaqkatti, ukatsti janirakiw unxtaykiti qarqxankatap layku. 49Ukampis khititix ist'kitu, ukatsti janirak kuntix siskta uk lurki ukax, ch'alla patar utachasir jaqimpi sasiwa; ukarusti jawirax wal sartanisin uka utar jaqkatti, ukat uka utarux tinkuyi, ukhamat q'al t'unjasiwayi”.

Currently Selected:

LUCAS 6: AYOPD

Highlight

Copy