JUAN 7

3. Jesusan pachpa markapan jan katuqatätapa

(7.1—12.50)

Jesusan jilanakapax janiw jupar iyawsapkänti

1Uka qhipatsti, Jesusax Galilea tuqinakan sarnaqäna. Janiw Judeankañ munkänti ukan judionakan jiwayañ munapxatap layku. 2Judionakan Chhujllanaka,#7.2 Chhujllanaka: Israelitanakax yapu apthapiñ tukuyataruw aka phunchhäwi lurapxirïna. Jupanakax nayra awkinakapan Egiptot mistunisin wasaran sarnaqatap amtañatakiw layminakat chhujllanak lurapxirïna (Lv 23.33-43; Dt 16.13). sata kusisiñ uru jak'ankipansti, 3Jesusan jilanakapax sapxänwa:

—Janis akar qhiparkam, Judea uraqir sarxam, kuntix akan lurkta ukanak arkirinakaman uñjapxañapataki. 4Maynitix uñt'ayasiñ munchixa, janiw jamasan kuns lurkaspati. Jumax lurkta ukanakxa, taqi jaqin uñjkañay luram —sasa.

5Janiw jilanakapas Jesusar iyawsapkänti. 6Ukat Jesusax jupanakar säna:

—Janïraw pachaxax purinkiti, ukampis jumanakatakix kuna pachas walikiwa. 7Akapachankirinakax janiw jumanakar uñisipkiristamti; ukampis nayarux uñisipxituwa, nayan jupanakar jan wali luratanakap irkatatax layku. 8Jumanakax phunchhäwir sarasipkakim; nayax janiw sarkäti. Janïraw pachäkiti nayax khitïtsa uk yatipxañapataki —sasa.

9Uk sasinsti, Galilean qhiparxäna.

Jesusax chhujlla utanaka sat phunchhäwinkiwa

10Jilanakap sarxipansti, Jesusax jan khitir kamsasaw jamasatak uka phunchhäwirux saräna. 11Judionakasti ukan thaqhapxäna, sapxarakïnwa:

—¿Kawkinkarakpach uka jaqisti? —sasa.

12Jaqinak taypin walpun jupat parlapxäna. Mayninakax sapxänwa: “Suma jaqiwa” sasa; mayninakasti sapxarakïnwa: “Janiw wali jaqïkiti, jaqirux sallqjiwa” sasa.

13Ukampis janiw khitis Jesusxat qhan parlkänti, judionakar axsaratap layku.

14Chika phunchhäwinkipan Jesusax Tatitun utapar mantäna, ukatsti yatichañ qalltäna. 15Judionakasti muspharataw sapxäna:

—¿Kunjämatarak aka jaqisti jan yatiqkasin taqi ukanak yatisti? —sasa.

16Jesusasti jupanakarux sänwa:

—Yatichäwixax janiw nayankkiti, jan ukasti khithankitu ukankiwa. 17Khititix Diosan munañap lurañ munki ukakiw uñt'ani, yatichäwixan Diosat jutatapa, jan ukax, nayankatapa. 18Khititix jupa pachpat parlki ukax, jaqimp jach'añchayasiñak thaqhi; ukampis khititix jupar khithanki ukar jach'añchayañatak parlki ukan arunakapax chiqawa, janirakiw jupan kuna ñanqha luratapas utjkiti.

19“Chiqpachansa Moisesaw kamachi churapxtam. Uksti janiw jumanakat maynis phuqhapktati. ¿Kunatarak jiwayañ munapxistasti?” sasa.

20Jaqinakasti sapxarakïnwa:

—Ñanqha ajayunïtawa.#7.20 Mc 3.22,30. ¿Khitirak jiwayañ muntamsti? —sasa.

21Jesusasti jupanakarux sarakïnwa:

—Sábado urun mä muspharkañ lurataxat jumanakax wal muspharapxtaxa. 22Moisesax circuncisión#7.22 Circuncisión: Gn 17.10-27; Lv 12.3. luräwi phuqhañ churapxtam, (ukasti janiw Moisesat jutkiti, jan ukasti, nayra awkinakamat juti), jumanakasti sábado urunpach mä jaqirux circuncisión katuqayasipkaktawa.#7.22 Circuncisión luräwix, wawan yuritapat kimsaqallqu uru saraqatar phuqhañänwa, uka urux sábado urüskpasa, phuqhañapunïnwa. 23Jichhasti walikiwa, jumanakatix Moisesan kamachip jan p'akintañ munas sábado urun wawarux circuncisión katuqayasipkakstaxa, ¿kunatarak nayatak arusipxta sábado urun mä jaqir k'umarachataxatsti? 24Janiy aliq uñkatasak taripapxamti. Taripapxät ukkhasti, kunatix chiqäki ukhamarjamay lurapxam —sasa.#7.24 Lv 19.15.

Jesusax khitïkäntix jupax ukxat parli

25Ukatsti Jerusalenankirinakat yaqhipanakaw jiskt'apxäna:

—¿Janit akasti jiwayañatak thaqhapki uka jaqïkisti? 26Ukaxay taqin uñjkañaw parlaski, janiw khitis kuns kamskiti. Jan ukax ¿marka apnaqir jilïrinakax chiqach aka jaqin Cristötap iyawsapxpachaxa? 27Ukampis jiwasanakax yatipxtanwa aka jaqin kawkit jutatapsa; Cristox jutkani ukapachax janiw khitis kawkit jutatapsa yatkaniti —sasa.

28Ukanak ist'asinsti, Jesusax Tatitun utapan yatichkasin jach'at arsüna:

—¡Jumanakax uñt'apxistawa, kawkit jutataxsa yatipxaraktawa! Ukampis janiw nayan munañaxat jutkti, jan ukasti, khititix chiqäki ukan khithanitaw jutta, juparusti jumanakax janiw uñt'apktati. 29Nayax juparux uñt'twa, jupat jutatax layku, juparakiw khithanitu —sasa.

30Ukatsti katuntañ munapxäna, ukampis janiw khitis katuntirjamäkänti; jupar katuntañ pachan janïr purinitap layku. 31Waljaniw jupar iyawsapxäna, ukat sapxarakïna:

—Cristox jutkani ukkhasti ¿aka jaqit sipan juk'amp muspharkañanakti lurpachänisti? —sasa.

Fariseonakax Jesusar katuntañ munapxi

32Fariseonakasti kuntix jaqinakax Jesusxat parlapkän uk ist'apxäna; ukat jilïr sacerdotenakampi, fariseonakampix, Jesusar katjayañatakiw Tatitun utap uñjirinakar khithapxäna. 33Ukatsti Jesusax sarakïnwa:

—Nayasti jumanakampix mä juk'a pachakiw akankä, ukatsti khithankitu ukaruw kuttawayxä. 34Jumanakax thaqhapxitätawa, ukampis janiw jikxatapkitätati, kawkirutix nayax sarkä ukarusti, janiw jutapkasmati.

35Judionakasti jupanakkamaw jiskt'asipxäna:

—¿Kawkirurak sarxpachänisti, jiwasanakan jupar jan jikxatañatakisti? ¿Jaya markanakar ananukut judionakan ukarut sarpachäni, ukatsti Diosar jan uñt'ir jaqinakar yatichirich sarpachänixa? 36¿Kun sañsa muni akham arsutapampixa: “Thaqhapxitätawa, ukampis janiw jikxatapkitätati, kawkirutix nayax sarkä ukarusti, janiw jutapkasmati”, sasasti?

Jesusax jakañ churir umawa

37-38Phunchhäwi tukuy urux juk'amp jach'a urünwa. Ukürusti, Jesusax sayt'asisin jach'at arsüna:

—Khititix umat pharjatäskchi ukax nayar jutpan, nayar iyawsiristi, ukat umt'arakpan. Kamisatix Qillqatan siski: “Nayar iyawsirin chuymapatxa, jakaskir umani jawiranakaw jalsuni” —sasa.

39Ukampix Jesusax sañ munäna, khitinakatix iyawsapkani ukanakax Qullan Ajayu katuqapxani; Qullan Ajayux janïraw jupanak taypinkkänti, Jesusan alaxpachar janïr aptatätap layku.

Jesusat amuyasax t'aqanuqtapxiwa

40Uka arunak ist'asinsti, ukankirinakat yaqhipanakax sapxänwa:

—Aka jaqix profetäpachawa —sasa.

41Mayninakasti sapxänwa:

—Akax Cristowa —sasa.

Ukampis mayninakax sapxarakïnwa:

—¿Kamisarak Cristosti Galileat jutaspasti? 42Qillqatan siwa: “Cristox David reyit saraqirïñapawa,#7.42 2 S 7.12-13; Sal 89.3-4 (4-5); 132.11-12. Belenankirïñaparakiwa#7.42 Miq 5.2 (1). Davidan pachpa markapata” —sasa.

43Jaqinak taypinsti, jupat amuyasax t'aqanuqtañaw utjäna. 44Mayninakax katuntat apañ munapxäna, ukampis janiw khitis katuntirjamäkänti.

Jilïrinakax janiw Jesusar iyawsapkänti

45Tatitun utap uñjirinakasti, jilïr sacerdotenakan ukaru, fariseonakan ukaruw kutt'awayxapxäna, jupanakasti jiskt'apxänwa:

—¿Kunatarak Jesusar jan irpanipxtasti? —sasa.

46Tatitun utap uñjirinakasti sapxänwa:

—¡Janipuniw khitis jupjam parlkiti! —sasa.

47Fariseonakax ukxarux sarakïnwa:

—¿Jumanakas sallqjayasipxaraktati? 48¿Khitirak jilïr jaqinakata, jan ukax, fariseonakat jupar iyawsisti? 49Ukampis kamachi jan uñt'ir jaqinakax ñanqhachatawa.#7.49 Dt 27.26; 28.15; Sal 119.21.

50Mä arumax Jesusamp parlir sarkatayna uka Nicodemo fariseow jupanakar säna:#7.50 Jn 3.1-10.

51—Kamachinakasarjamax janiw khiti jaqirus juchañchksnati, janitix nayraqat kuntix lurkatayna uk ist'kañäni ukaxa —sasa.

52Juparusti sapxarakïnwa:

—¿Jumax Galileankirirakïtati? Qillqatanak sum yatxatam, ukat yatïta jan khiti profetas Galileat jutatapa —sasa.

53Ukatsti sapa mayniw utaparkam sarawayxäna.

Currently Selected:

JUAN 7: AYOPD

Highlight

Copy