JUAN 12

Mä warmix q'apkir qullampiw Jesusan kayupar warxati#12.0 Juanan aka luräwit qillqatapasti, Mateo, Marcos, Lucas, ukanakan qillqatapat mayjawa. Mt 26.6-13; Mc 14.3-9; Lc 7.36-50.

(Mt 26.6-13; Mc 14.3-9)

1Pascua jach'a urutak suxtürükipan Jesusax Betania markaruw saräna, jupax jaktaykatayna uka Lazarox kawkintix jakkäna uka markaru. 2Ukan Jesusar manq'ayañatak wakichapxäna; Lazarosti Jesusamp chikaw manq'añatak qunt'atäskäna, Marta kullakapasti manq'a churarakïna.#12.2 Lc 10.40. 3María kullakapasti, nardo quqat apsut chikat litro q'apkir qulla apanïna, uka qullasti wali jila alanïnwa, ukampiw Jesusan kayupar warxatäna, ukatsti ñik'utapampiw phiskhurarakïna. Uka q'apkir qullasti utpacharuw q'aphipampix phuqhantäna. 4Ukatsti yatiqirinakapat maynïri, khititix Jesusar aljantañapäkän uka Judas Iscariotex sänwa:

5—Aka q'apkir qullax jan utjirininakar yanapt'añatak kimsa patak qullqir aljatäñapaw wakisïna —sasa.

6Judasax janiw jan utjirininakat khuyapayasisin arskänti, jan ukasti lunthatätapat ukham arsüna, jupax qullqi katurit utt'ayatänwa,#12.6 Jn 13.29. uka qullqitsti lunthatasirïnwa. 7Jesusasti juparux sänwa:

—Juparux jan kunsa kamsamti, uka q'apkir qullxa, nayan imäwix urutakiw imaskäna.#12.7 Mt 26.8-12. 8Jumanak taypin jan utjirininakax utjapuniniwa,#12.8 Dt 15.11. ukampis nayax janiw wiñay jumanak taypinkkäti —sasa.

Judionakax Lazaror jiwayañ amtapxi

9Judionakat waljaniw Jesusan Betaniankatap yatipxäna, ukat ukar sarapxäna, jupanakasti janiw Jesusar uñjirikit sarapkänxa, jan ukasti, jiwatat jaktaykatayna uka Lazaror uñjiriw sarapxarakïna. 10Ukatsti sacerdotenakan jilïrinakapax Lazarompiruw jiwayañ amtapxäna, 11jupa layku walja judionakan Jesusar iyawsañatak t'aqaqtapxatap layku.

Jesusax Jerusalén markaruw manti

(Mt 21.1-11; Mc 11.1-11; Lc 19.28-40)

12Walja jaqipuniw Pascua urutak Jerusalén markar sarapxäna. Qhipürusti, Jesusan uka markar puriniñap yatipxäna. 13Ukatsti palmerat layminak khuchhurasin Jesusar katuqiriw mistunipxäna, akham arnaqt'asisa:

—¡Diosaxay, qhispiyapxita! ¡Tatitun sutipar jutirix qullanäpan! ¡Israelan Reyipax qullanäpan! —sasa.#12.13 Sal 118.25-26; 1 Mac 13.51; Lc 19.38.

14Jesusax mä asno jikxatäna, ukaruw lat'xatawayäna, kunjämtix Qillqatan siski ukhamarjama:

15“Sión marka, jan axsaramti;#12.15 Is 40.9; Sof 3.16.

uñtam, Reyimaw jutaski,

mä asnor lat'xatataw jutaski.”#12.15 Zac 9.9.

16Yatiqirinakapax akanak janiw qalltan amuyt'apkänti; kunapachatix Jesusax alaxpachar aptatäxän ukkhakiw taqi akanakat jupxat qillqatäskatapa, ukhamarjam phuqhasiskatap amtapxäna.

17Jesusax Lazaror amay imäwit jach'at art'asin jiwatat jaktaykäna uk uñjir jaqinakasti, kuntix uñjapkatayna uk yatiyapxäna. 18Ukat jaqinakax Jesusar jikxatir mistunipxäna, uka muspharkañ luratap yatisina. 19Ukatsti fariseonakax jupanakkamaw sasipxäna:

—Jumanakax uñjxapxtawa, janiw kunas lurañjamäkiti. Taqiniw jupar arkapxi —sasa.

Griego jaqinakaw Jesusar thaqhapxi

20Jerusalenar Pascua urun yupaychir sarapkatayna uka jaqinakatxa, griego jaqinakaw ukankarakïna.#12.20 Griegonaka: jupanakax yaqha markat jutirinakäpxänwa, judionakan saräwipampiw yatthaptapxäna. Jupanakax janiw judionakäpkänti, qhipatsti Jesusaruw iyawsapxarakïna. 21Jupanakasti Feliperuw jikxatapxäna, jupax Galilea uraqinkir Betsaida markankirïnwa, ukat jupar achikt'asipxäna:

—Tata Felipe, Jesusar uñjañ munapxta —sasa.

22Felipesti Andresaruw yatiyäna, ukatsti paninpachaw Jesusar yatiyir sarapxäna. 23Jesusasti jupanakarux sänwa:

—Jaqin Yuqapan jach'añchatäñap urux purinxiwa. 24Qhanak sapxsma, mä trigo achutix uraqin jan jiwkaspaxa, mä sapa achukïskaspawa; ukampis jiwchi ukasti, walja achu churani. 25Khititix jakañapar munki ukax apt'asiniwa; khititix akapachan jakañapar jan yäqki ukasti, wiñay jakañatakiw uk imasini.#12.25 Mt 10.38-39; 16.24-25; Mc 8.34-35; Lc 9.23-24; 14.27; 17.33. 26Maynitix luqtañ munchituxa, arkitpan, nayar arkiristi, nayamp chikaw utjasini. Nayar arkasin luqtirirusti, Awkixaw jach'añchaskani —sasa.

Jesusax jiwañapat yatiyi

27“Jichhax wali llakt'atätwa; ¿kamsarakïsti? ¿‘Awkixay, aka t'aqhisiñat qhispiyita, säti’? Janiwa. Nayax uka urun t'aqhisiñatakiw jutta.#12.27 Mt 26.36-46; Mc 14.32-42; Lc 22.39-46. 28Awkixay, sutimax jach'añchatäpan.

Ukapachaw alaxpachat mä arux ist'asïna: “Nayax jupar jach'añchawayxtwa, wasitampis jupar jach'añchaskakïwa” sasa.

29Ukawjan ist'ir jaqinakasti sapxänwa: Qhixu qhixuwa, sasa; mayninakasti sapxarakïnwa:

—Mä angelaw jupar arxayi —sasa.

30Jesusasti jupanakarux sarakïnwa:

—Uka arux janiw nayïpanti ist'aski, jan ukasti jumanakïpan ist'asi. 31Jichhapï akapachax taripatänixa, jichharakiw akapach apnaqiris jaqunukutänixa.#12.31 Akapach apnaqiri: ukax supayawa (Jn 14.30; 16.11; 2 Co 4.4; Ef 2.1-2; 1 Jn 5.19). 32Kunapachatix cruzar ch'akkatasin aptapkitani ukkhasti, taqiniw nayarux iyawsapxitani —sasa.

33Jesusan ukham satapampix, kunjämtix jiwkani uk sañ munäna. 34Jaqinakasti sapxarakïnwa:

—¿Kunatarak Jaqin Yuqapax cruzan ch'akkatas aptatäniwa sistasti? ¿Khitirak Jaqin Yuqapasti? Kamachi tuqiw nanakax yatipxta Criston wiñayatak jakañapa —sasa.#12.34 Sal 89.4 (5), 36-37 (37-38); 110.4; Is 9.7 (6); Ez 37.25; Dn 7.14.

35Jesusasti jupanakarux sänwa:

—Mä juk'a urunakakiw qhanax jumanak taypinkani. Qhana utjkipan sarnaqapxam, ch'amakamp jan katjayasiñataki; ch'amakan sarnaqiristi janiw kawksar saratapsa yatkiti. 36Qhanankir jaqïpxañamatakix qhana utjkipan, qhanar iyawsapxam.

Ukanak arsusinsti, Jesusax sarawayxänwa, ukatsti jupanakat imantasxarakïnwa.

Judionakax janiw Jesusar iyawsapkiti

37Jesusax walja muspharkañanak jupanak nayraqatan lurkchïn ukasa, janiw judionakax jupar iyawsapkänti; 38kuntix Isaías profetax qillqkäna ukanakaw phuqhasiñapäna:

“Tatay, ¿khitirak arunakasar iyawsisti?

¿Khitirurak Tatitusti ch'amap uñacht'ayisti?” sasa.#12.38 Is 53.1.

39Ukhamasti janiw iyawsirjamäpkänti; ukat Isaías profetax qillqäna akham sasa:

40“Diosax jupanakarux juykhu tukuyi

jupanakan jan uñjapxañapataki,

chuymanakap qalarayi

jupanakan jan amuyt'apxañapataki;

jupanakan nayar jan kuttanipxañapataki,

jupanakar jan k'umarachañaxataki.”#12.40 Is 6.10; Mt 13.14-15; Hch 28.26-27.

41Isaías profetasti, Jesusan jach'a kankañap uñjatap laykuw ukham qillqäna,#12.41 Is 6.1-5. jupatarak ukham arsüna.

42Ukhamäkipansa, judionakat waljaniw Jesusar iyawsapxäna, wali aytat jilïri jaqinakatsa iyawsapxarakïnwa. Ukampis jupanakax fariseonakar axsarasaw jan qhan arsupkänti, sinagogat jan jaqunukuyasiñataki. 43Jupanakax jaqimp aytayasiñak munapxäna, Diosamp jach'añchayasiñat sipana.

Jesusan arunakapax jaqinakaruw juchañchani

44Jesusax jach'at arsusin jupanakarux säna: “Khititix nayar iyawskitu ukax, khithankitu uka Awkixaruw iyawsaraki. 45Khititix nayar uñjkituxa, khithankitu ukaruw uñjaraki.#12.45 Mt 10.40; Mc 9.37; Jn 13.10; 14.9. 46Nayax qhanätwa, ukat akapachar qhantir jutta. Khititix nayar iyawskitani ukax janiw ch'amakan sarnaqkaniti. 47Ukampis khititix arunakax ist'i, ukat ukarjam jan phuqki ukarux janiw nayax juchañchkti; janiw nayax akapachar juchañchir jutkti, jan ukasti qhispiyiriw jutta. 48Khititix nayar jisk'achkitu, ukatsti janirak arunakaxarjam lurki ukatakixa, niyaw juchañchiripax utjxi; kawkïr arunaktix nayax arskta ukanakaw qhipa urun jupar juchañchaskani.#12.48 Jn 3.17-18; 8.12. 49Nayax janiw naya pachpat parlkti; jan ukasti nayar khithankitu uka Awkiw yatiyitu kuntix arsuñaxäki, yatichañaxäki uka. 50Nayax yattwa, khitinakatix Awkixan kamachip phuqhapkani ukanakax wiñay jakañanïpxaniwa. Ukhamasti, nayax arsupksma ukanakax kunjämtix Awkix arsuñaxatak maykitu ukhamarak arsta.”

Currently Selected:

JUAN 12: AYOPD

Highlight

Copy