GÉNESIS 7
7
Diosan umampi taripatapa
1Uka qhipatsti Tatitux Noé chacharuw sarakïna: “Taqi jaqinak taypin juma sapakiw aka pachan nayan munañaxarjam sarnaqtaxa. Uka layku, jichhax wila masinakamamp arcar mantam. 2Q'uma uywanakatsti, paqallq qachumpi, paqallq urqumpi irpantam, jan q'uma uywanakatsti mä qachumpi mä urqumpi irpantarakim. 3Taqi jamach'inakatsti paqallqu urqumpi, paqallqu qachump irpantam, ukhamat taqi uka kunayman jamach'inakax aka uraqin utjaskañapataki, 4akat paqallq ururusti nayax mä jach'a jallu puriyanï, ukasti pusi tunka urumpi, pusi tunka arumampiw jallux purintani. ¡Aka uraqitsti taqi kunatix jakki, kuntix nayax lurkta ukanak q'al tukjä!” sasa. 5Noé chachasti, kunjämtix Tatitux siskatayna ukham luräna.
6Kunapachatix umax aka uraqi chhaqtaykän ukkhasti, Noé chachax suxta patak maranïnwa. 7Uma taripäwit qhispiñatakisti, Noé chachax arcaruw mantxäna yuqanakapampi, warmipampi, yuxch'anakapamp kuna. 8Q'uma animalanaka, jan q'uma animalanaka, thuqnaqir animalanaka, uraqinjam qatatnaqtir animalanaka, taqi ukanakaw 9Noé chachamp chikax arcar mantapxäna, payat payata, urquni qachuni, kunjämtix Diosax siskatayna ukhamarjama.
10Paqallq uru phuqhasxipansti, jallux walipuniw purintäna, uraqsa chhaqtayxarakïnwa. 11Payïr phaxsitsti, tunka paqallqun uruw saraqxäna. Noé chachasti ukapachax suxta patak maranïnwa. Uka pachpa uruw manqhankir jach'a qutan jalsunakapax phalläna, alaxpachatsa jallux walipuniw purintäna. 12Pusi tunka urumpi, pusi tunka arumampiw#7.12 Pusi tunka jakhüwisti Biblianxa walja chiqan utji, amuyatax walja jaya pachanakäkaspas ukham qhanañchi (Gn 50.3; Ex 16.35; 24.18; Nm 13.25). Mä tuqitxa, mä yant'ana, jan ukax mä jan walt'añan jutatap yatiyaraki (Nm 14.34; Dt 8.2-3; Mc 1.13). jallux uraqxar purintäna. 13Uka pachpa uruw Noé chachax arcar mantxäna: Sem, Cam, Jafet yuqanakapampi, warmipampi, kimsa yuxch'apamp kuna. 14Jupanakamp chikasti pampankir kunayman animalanaka, uywañ animalanaka, uraqin qatatnaqtir animalanaka, kunayman jamach'inak kunaw mantapxäna. 15Taqi animalanakaw Noé chachamp chikax payat payata arcarux mantapxäna. 16Taqi animalanakatsti mä urqumpi, mä qachumpiw mantapxäna, kunjämtix Diosax Noé chachar siskatayna ukhamarjama, ukat Tatitux arcan punkup jist'antxäna.
17Jallusti pusi tunka uruw uraqir purintäna. Uman alayar makhatatapatxa arcax uraqit tuytxänwa, ukatsti uma patan tuyxäna. 18Umax juk'amp juk'ampiw makhatäna, arcasti uka uma patan tuyuskakïnwa. 19Umasti sintipuniw makhatxäna, jach'a alay qullunaksa q'al chhaqtayxäna, 20taqi jach'a qullunak chhaqtayatatsa, umax mä paqallqu metrompjam makhataskakïnwa. 21Ukhamaw aka uraqin taqi jakir jaqinakax jiwarapxäna, jamach'inakasa, uywañ animalanakasa, pampankir animalanakasa, uraqinjam qatatnaqtir animalanakasa. 22Taqi kunatix uraqin utjkäna, jakapkäna, samsupkarakïna, ukanakas taqiw jiwarapxäna.#7.21-22 2 P 3.6. 23Khitinakatix Noé chachampi arcankapkän jupanakakiw qhispipxäna, ukat uksarusti, jaqisa, uywañ animalanakasa, jamach'inakasa, uraqinjam qatatnaqtir animalanakas q'ala tukjataw uñjasipxäna. 24Uraqisti, patak phisqa tunkan urunakaw umampi chhaqtayat uñjasïna.
Currently Selected:
GÉNESIS 7: AYOPD
Highlight
Share
Copy
Want to have your highlights saved across all your devices? Sign up or sign in
Biblia Aymara ©Sociedad Bíblica Boliviana 1997.
Mapas ©Sociedades Bíblicas Unidas, 1996