GÉNESIS 5
5
Adanan wawanakapa
(1 Cr 1.1-4)
1Diosax jupar uñtasit jaqirux luräna. 2Chacha, warmi luräna,#5.2 Mt 19.4; Mc 10.6. ukatsti aski waxt'äwi churarakïna. Jupanakarusti “Jaqinaka” sutimpiw uchäna.
3Adanasti patak kimsa tunkan maranïnwa kunapachatix Set sat wawapax yurkän ukapachaxa, uka wawapasti jupa kipkakipunïnwa. 4Uka qhipatsti Adanax kimsaqallq patak marampiw jakaskäna, ukatsti walja yuqall wawani, imill wawanakanïnwa, 5ukhamasti Adán chachax llätunk patak kimsa tunkan maranïkän ukkhaw jiwxäna.
6Set chachasti patak phisqan maranïnwa kunapachatix Enós sat wawapax yurkän ukapachaxa. 7Uka qhipatsti Set chachax kimsaqallq patak paqallqun marampiw jakaskäna, ukatsti walja yuqall wawani, imill wawanakanïnwa. 8Ukhamasti Set chachax llätunk patak tunka payan maranïkän ukkhaw jiwxäna.
9Enós chachasti llätunk tunka maranïnwa kunapachatix Cainán wawapax yurkän ukapachaxa. 10Uka qhipatsti Enós chachax kimsaqallq patak tunka phisqan marampiw jakaskäna, Enós chachax walja yuqall wawani, imill wawanakanïnwa. 11Ukhamasti Enós chachax llätunk patak phisqan maranïkän ukkhaw jiwxäna.
12Cainán sat chachasti paqallq tunk maranïnwa, kunapachatix Mahalalel wawapax yurkän ukapachaxa. 13Uka qhipatsti Cainán chachax kimsaqallq patak pusi tunka marampiw jakaskäna, ukatsti walja yuqall wawani, imill wawanakanïnwa. 14Ukhamasti Cainán chachax llätunk patak tunkan maranïkän ukkhaw jiwxäna.
15Mahalalel chachax suxta tunk phisqan maranïnwa, kunapachatix Jared sat wawapax yurkän ukapachaxa. 16Uka qhipatsti, Mahalalel chachax kimsaqallq patak kimsa tunkan marampiw jakaskäna, ukatsti walja yuqall wawani, imill wawanakanïnwa. 17Ukhamasti Mahalalel chachax kimsaqallq patak llätunk tunka phisqan maranïkän ukkhaw jiwxäna.
18Jared chachax patak suxta tunk payan maranïnwa, kunapachatix Henoc wawapax yurkän ukapachaxa. 19Uka qhipatsti, Jared chachax kimsaqallq patak marampiw jakaskäna, ukatsti walja yuqall wawani, imill wawanakanïnwa. 20Ukhamasti Jared chachax llätunk patak suxta tunk payan maranïkän ukkhaw jiwxäna.
21Henoc chachax suxta tunk phisqan maranïnwa, kunapachatix Matusalén wawapax yurkän ukapachaxa. 22Henoc chachasti Tatit Diosan munañaparjamapuniw sarnaqäna. Matusalén wawapan yuritapatsti, Henoc chachax kimsa patak maranakampiw jakaskäna, yuqanakani, phuchhanakani kuna; 23ukhamasti kimsa patak suxta tunk phisqan maranakaw jakäna. 24Henoc chachan Tatit Diosan munañaparjam sarnaqatapatxa, mä uruw chhaqtxäna, Tatiturakiw juparux irpasxatayna.
25Matusalén chachax patak kimsaqallq tunk paqallquni maranïnwa, kunapachatix Lámec sat wawapax yurkän ukapachaxa. 26Uka qhipatsti Matusalén chachax paqallq patak kimsaqallq tunk payan marampiw jakaskäna, ukatsti walja yuqall wawani, imill wawanakanïnwa 27Ukhamasti Matusalén chachax llätunk patak suxta tunk llätunkan maranïkäna ukkhaw jiwxäna.
28Lámec chachax pataka kimsaqallq tunk payan maranïnwa kunapachatix wawapax yurkän ukkhaxa, 29uka wawaparusti Noé sasaw sutichäna,#5.29 Noé sutisti hebreo arunxa samart'ayistaniwa sañ muni. sarakïnwa: “Tatit Diosaw aka uraqirux ñanqhachi, yapuchañasatakisti wali ch'ama tukuñasawa; ukampis aka wawaw uka ch'ama tukutasatxa samarayxistani” sasa. 30Noen yuritapatsti, Lámec chachax patak llätunk tunk phisqan marampiw jakaskäna, ukatsti walja yuqall wawani, imill wawanakanïnwa; 31ukhamasti paqallq patak paqallq tunk paqallquni maraw jakäna. Ukapachaw jiwxarakïna.
32Noesti phisqa patak maranïxänwa, kunapachatix Sem, Cam, Jafet wawanakapax yurkän ukkhaxa.
Currently Selected:
GÉNESIS 5: AYOPD
Highlight
Share
Copy
Want to have your highlights saved across all your devices? Sign up or sign in
Biblia Aymara ©Sociedad Bíblica Boliviana 1997.
Mapas ©Sociedades Bíblicas Unidas, 1996
