SAN MARCOS 13

Templo urmananmanta

(Mt 24.1-2; Lc 21.5-6)

1Jesús templomanta llojsimushajtin, ujnin yachachisqan payman nerqa: Maestro, qhawariy, kay chhikachachaj rumis, wasispis kay chhika jatuchaj!

2Jesustaj kuticherqa: Kay jatuchaj wasista rikunkichu? Mana rumi patapi rumi qhepakonqachu; thuñikuspa tukuynin urmanqa.

Ñak'ariykuna kanqa

(Mt 24.3-28; Lc 21.7-24; 17.22-24)

3-4Jesús tiyaykukorqa Olivos orqopi, temploj chimpampi. Pedro, Santiago, Andrés imataj sapallampi taporqanku: Willawayku ari, mayk'ajtaj kay tukuy ima kanqari? Ima señaltaj rikhurimonqa kay tukuy ima junt'akunampajri?

5Jesustaj kutichispa, yachachiyta qallarerqa: Allinta qhawakuychej, pajtataj pipis ch'aukiyasunkichejman. 6Ashkhas ari sutiypi jamonqanku: Noqa Cristo kani, nispa. Ajinamanta ashkha runata pantachenqanku.

7Maypachachus guerrasmanta parlajta uyarinkichej, chayrí, ch'ajwasmanta chayqa, ama mancharikuychejchu. Chay tukuy ima kanampuni tiyan. Chaywampis manaraj kay pachaj tukukuyninchu. 8Uj nación waj naciompa contranta oqharikonqa, uj reinotaj waj reinoj contranta. Kaynejpi jaqaynejpitaj jallp'a kuyuykuna kanqa; yarqhaykunataj, ch'ajwas ima. Kay tukuy imataj nacichikojpa nanaynimpa qallariynin jina.

9Chayrayku qankuna sumajta qhawakuychej; imaraykuchus, jap'ichispa juntasninkuman pusasonqachej, sinagogaspitaj jasut'isonqachej. Noqarayku kuraj kamachejkunaman, reyesman ima pusasonqachej; noqamantataj parlankichej paykuna yachanankupaj. 10Evangelioqa ñaupajta tukuy llajtaspi willakunan tiyan. 11Maypachachus jap'ichispa kamachejkunaman pusasunkichejman chayqa, ama manchachikunkichejchu, nitaj yuyaychejchu imatachus ninaykichejta; astawanqa, imatachus chaypacha Dios yuyaychasunkichej, chayllata parlaychej. Mana qankunachu parlankichej, Santo Espiritumin qankunanejta parlanqa. 12Wauqeqa, wauqellantataj wañuchichenqa, tatapis wawanta. Wawaspis tatasninkoj contranta oqharikuspa wañuchenqanku. 13Noqarayku tukuy runaspa chejninan kankichej. Pichus tukukuykama sinch'ita sayajtaj, salvasqa kanqa.

14Rikunkichej millay ch'inyachejta, mana kanampi kajta. Pichus escribisqata leejqa entiendechun. Chaypacha Judeapi kajkunaqa orqo patasman ayqechunku. 15Chay diapi, pillapis wasin patapi kashaspaqa, ama uraykamuchunchu wasinmanta imasnintapis orqhoj. 16Chajrapi kajpis nillataj wasinman kutirichunchu, p'achanta oqharimoj. 17Chay p'unchaypi, ay, wijsayoj warmismanta, ñuñoj wawasniyojmantapis! 18Diosmanta mañakuychej, ama chay ayqenaykichej chiri tiempopi kanampaj. 19Chay p'unchaykunapeqa manchay llakiykuna kanqa; chay jina llakiykunaqa mana jayk'ajpis rikukorqachu, Dios kay mundota ruwasqanmantapacha kunankama; nillataj qhepamampis kanqachu. 20Manachus Señor jaqay p'unchaykunata juch'uyyachinman karqa chayqa, mana pipis salvasqachu kanman karqa; astawanqa, ajllasqasninrayku chay p'unchaykunata juch'uyyacherqa.

21Chaypachachus pipis nisunkichejman: Qhawaychej, kaypi Cristo kashan, chayrí jaqaypi Cristo kashan, nispa chayqa, ama kasuychejchu. 22Rikhurimonqankutaj llullamanta Cristos, llullamanta profetas ima. Paykunataj señalesta, milagrosta ima ruwaspa, runasta ch'aukiyanqanku, atispaqa Diospa ajllasqasnintinta. 23Chayrayku qhawakuychej, imaraykuchus kaytaqa ñaupajtaña willarqaykichej.

Runaj Churimpa jamuynin

(Mt 24.29-35, 42-44; Lc 21.25-36)

24Chay ñak'ariy p'unchaykunaj qhepanta inti laqhayaykonqa, killapis manaña k'anchamonqachu. 25Qoyllorkunapis urmaramonqanku, janaj pacha atiykunapis kuyurenqanku. 26Chaypacha Runaj Churinta rikonqanku phuyupi jamushajta, jatun atiywan, k'anchaywan ima. 27Paytaj angelesninta kachamonqa mundoj tawantin cheqamanta tantanankupaj Diospa ajllasqasninta; jallp'aj cantonmanta ujnin cantonkama.

Higo sach'amanta yachakuna

28Jesús nillarqataj: Yachakuychej higo sach'amanta kay rijch'anachinata; maypachachus ramasnin q'omeryayta, laqheytataj qallarinku, chaypacha yachankichej q'oñi tiempo qayllapiña kasqanta. 29Ajinallatataj, qankunapis kay tukuy ima rikhurimojtenqa, yachaychej Runaj Churin qayllapiña kasqanta. 30Cheqamanta kayta niykichej; manaraj kay kunan tiempo runaspa miraynin tukukushajtin, kay tukuy ima jamunan tiyan. 31Janaj pacha kay pachapis tukukonqa, palabrasniyrí mana tukukonqankuchu.

32Chay p'unchaymantaqa, chay horamantapis, mana pipis yachanchu, ni janaj pachapi angelespis, nitaj Churipis. Dios Tatalla chaymantaqa yachan.

33Chayrayku qankunaqa, allinta qhawakuychej, ama puñurpayaspa [Diosmanta mañakuychej], imaraykuchus mana yachankichejchu mayk'ajchus chay p'unchay chayamunanta. 34Kayqa karu llajtaman ripojman rijch'akun. Wasinta saqespa atiyta qorqa sapa uj kamachisninman. Punku qhawajtapis nerqa allinta qhawananta. 35Chayrayku, ama puñuspa qhawaychej, imaraykuchus mana yachankichejchu mayk'ajchus wasiyoj chayamunanta; ch'isiyaykuytachus, chayrí chaupi tutatachus, chayrí gallo waqaytachus, manachayrí sut'iyaytachus. 36Pajtataj wasiyoj chayarparimunman, puñushajtataj taripasunkichejman. 37Chayrayku, imatachus qankunaman niykichej, chayllatataj runasmampis nini: Ama puñuspa qhawaychej.

Currently Selected:

SAN MARCOS 13: QCHSB

Highlight

Copy