SAN LUCAS 3

Juan Bautistaj predicasqan

(Mt 3.1-12; Mr 1.1-8; Jn 1.19-28)

1Chunka phishqayoj watapi, kamachej Tiberio kamachishajtin; Poncio Pilato Judeapi kamachej karqa. Herodestaj Galileapi; wauqen Felipetaj Itureapi, Traconitepiwan; Lisaniastaj Abiliniapi. 2Chaypacha Anás, Caifaswan kuraj sacerdotes kashajtinku, Diospa palabran Zacariaspa wawan Juanman jamorqa, ch'in pampapi kashajtin. 3-4Tukuy Jordán mayu muyuynintimpitaj Juanqa predicarqa Diosman kutirina bautismomanta, juchas pampachasqa kanampaj, profeta Isaiaspa librompi escribisqaman jina: Uj runaj qhaparisqan ch'innejpi uyarikun: Señorpa ñanninta wakichiychej, purinasnintataj cheqanyachiychej. 5Tukuy wayq'o junt'asqa kanqa; pampachakonqataj tukuy orqo, tukuy moqo; wist'u ñankuna cheqanchasqas kanqa; rumirara ñankunapis pampachasqas. 6Tukuy runastaj Diospa salvacionninta rikonqanku.

7Juanwan bautizachikoj llojsimojkunamantaj nerqa: Katarikunaj miraynin! Pitaj yachachisorqachej Diospa jamoj k'ajaj phiñakuyninmanta ayqeytari? 8Allinta kausaychej ari, rikuchispa juchamanta kutirikusqaykichejta; ama qankunapuralla ninakuychejchu: Tatanchejqa Abraham nispa. Noqa niykichej, Diosqa kay rumismantapis atin oqhariyta Abrahampaj wawasta. 9Hachaqa ñapis wakisqaña kashan sach'asta saphinmanta urmachinapaj. Chayrayku, tukuy sach'a mana allinta poqojqa, urmachisqa, ninapitaj lauranqa.

10Runastaj taporqanku: Chantá imanasqaykutajri?, nispa.

11Juantaj kuticherqa: Pichus iskay p'achayoj kajqa, qochun mana kapojman, mikhunayoj kajpis ajinallatataj ruwachun.

12Jamullarqankutaj bautizachikoj impuestota cobrajkuna, Juantataj taporqanku: Maestro, imatataj kunan ruwasqayku?

13Paytaj kuticherqa: Kamachisqaman jina maychus kajllata cobraychej, ama astawanqa.

14Chantá wakin soldadospis tapullarqankutaj: Noqaykurí imanasqaykutaj?, nispa. Paytaj kuticherqa; Ama pimantapis ni imanta qhechuychejchu, nitaj pitapis qhasimanta tumpaychejchu. Pagollaykichejwan allin kakuychej.

15Chayta uyarispataj runasqa suyasharqanku, sonqonkupi yuyaspa, manachu Juanqa Cristo?, nispa. 16Juantaj kuticherqa tukuyman: Noqaqa cheqamanta yakuwan bautizaykichej. Qhepaytataj waj jamushan, Santo Espirituwan bautizaj, ninawantaj. Payqa noqamanta aswan atiyniyoj; chayrayku, ujut'asnimpa watusnillantapis mana phaskayta atiymanchu. 17Jorcapis makimpiña kashan, erapi trigota wayrachispa pirwaman jallch'anampaj; pajantataj ruphachinampaj mana thasnukoj ninapi.

18Ajinata kay yuyaykunaswan, wajkunaswan ima Juanqa runasman evangeliota willarqa. 19Chantá kamachej Herodesqa, Juanwan k'amichikorqa Herodiasrayku; tukuy sajrata ruwasqanmanta ima. Herodiasqa Felipe wauqempa warmin karqa. 20Chay tukuy sajra ruwasqasninmantaj astawan yaparqa, Juanta carcelman wisq'achispa.

Jesús bautizachikun

(Mt 3.13-17; Mr 1.9-11)

21Juanqa runasta bautizaytawan, Jesustapis bautizallarqataj. Jesús Diosmanta mañakushajtintaj cielo kicharikorqa. 22Santo Espiritutaj paypa patanman uraykamorqa paloma jina. Cielomantataj Dios nimorqa: Qanmin munasqa Churiy kanki, qannejta sonqo junt'asqa kani.

Jesuspa ñaupa tatasnimpa sutisnin

(Mt 1.1-17)

23Jesusqa predicayta qallarishaspa, kinsa chunka watayoj jina karqa. Creejtaj kanku Elejpa wawan Josejpa churin kasqanta. 24Kaytaj Matatpa wawan, Levéj wawan, Melquej wawan, Janaj wawan, Joséj wawan, 25Matatiaspa wawan, Amospa wawan, Nahumpa wawan, Eslej wawan, Nagaejpa wawan, 26Maatpa wawan, Matatiaspa wawan, Semeejpa wawan, Josejpa wawan, Judaj wawan, 27Joanaj wawan, Resaj wawan, Zorobabelpa wawan, Salatielpa wawan, Nerej wawan, 28Melquej wawan, Adej wawan, Cosampa wawan, Elmodampa wawan, Erpa wawan, 29Josuéj wawan, Eliezerpa wawan, Jorimpa wawan, Matatpa wawan, 30Levéj wawan, Simeompa wawan, Judaj wawan, Joséj wawan, Jonampa wawan, Eliaquimpa wawan, 31Meleaj wawan, Mainampa wawan, Matataj wawan, Natampa wawan, 32Davidpa wawan, Isaejpa wawan, Obedpa wawan, Boozpa wawan, Salmompa wawan, Naasompa wawan, 33Aminadadpa wawan, Arampa wawan, Esrompa wawan, Farespa wawan, Judaj wawan, 34Jacobpa wawan, Isaacpa wawan, Abrahampa wawan, Tarej wawan, Nacorpa wawan, 35Serugpa wawan, Ragaujpa wawan, Pelegpa wawan, Heberpa wawan, Salajpa wawan, 36Cainampa wawan, Arfaxadpa wawan, Sempa wawan, Noejpa wawan, Lamejpa wawan, 37Matusalempa wawan, Enocpa wawan, Jaredpa wawan, Mahalaleelpa wawan, Cainampa wawan, 38Enospa wawan, Setpa wawan, Adampa wawan, Diospa wawan.

Currently Selected:

SAN LUCAS 3: QCHSB

Highlight

Copy