GÉNESIS 6
6
Runaspa sajra ruwasqasnin
1Maypachachus runas kay jallp'a patapi mirayta qallarejtinku, warmi wawasninku karqa. 2Diospa wawasnintaj paykunawan casarakorqanku sumaj warmista rikuspa, ajllakuspataj munasqankuman jina. 3Señortaj nerqa: Mana saqesajchu runasqa kay jallp'a patapi wiñaypaj kausanankuta, imaraykuchus paykunaqa aychalla kanku. Chayrayku kausanqanku pachaj iskay chunkayoj watasllata.
4Chaypacha jatuchaj runas rikhurerqanku jallp'a patapi, Diospa wawasnin runaspa ususisninkuwan casarajtinku wawasniyoj kanankupaj. Chay qhepatapis kallarqankupuni. Paykuna karqanku manchay kallpasniyoj, mentasqastaj unay tiempospi.
5Señor rikorqa runaspa ashkha millay sajra ruwasqasninkuta, qhepamampis tukuy sajrallatapuni ruwayta yuyasqankuta. 6Chayrayku Señorqa pesachikorqa runasta ruwasqanmanta, mayta sonqonta nanachikuspa. 7Señorqa nerqa: Jallp'a patamanta q'alata chinkachisaj kay ruwasqasniy runasta; jinallataj uywasta, pampata qhatatakojkunata, p'isqostawan. Anchata pesachikuni kaykunata ruwasqaymanta. 8Chaywampis Noeqa Diospa ñaupaqempi khuyakuyta tarerqa.
Noeqa arcata ruwan
9Kay jina karqa Noepa kausaynin: Noeqa cheqan karqa, sumaj runataj chay tiempo runa mita ukhupi, Diosta kasuspapuni. Ajinaqa pay k'atalla Diospa munasqanta ruwarqa. 10Noepata kinsa wawasnin karqa, Sem, Cam, Jafetwan.
11Diospa ñaupaqempi mundoqa imaymana juchawan junt'a karqa, chejninakuywan ima. 12-13Runasqa juchapi pejtusqas karqanku. Chayrayku Dios chay jina millay juchararasta rikuspa, nerqa Noeman: Noqa tukuchisaj kay runasta. Paykunaj juchallikusqankurayku imaymana jucha mundoman junt'an. Chayrayku tukuchisaj paykunata tukuy jallp'antinta. 14Qantaj ruway uj arcata gofer maderamanta. Ukhumpitaj ruway ashkha cuartosta. Jinaspataj mach'awan lluch'aranki ukhunta jawantawan tukuy lajrasninta ama yaku yaykunampaj. 15Kay jinata ruwanki: Sayt'unman ruwanki pachaj kinsa chunka phishqayoj metrosniyojta, kinrayninmantaj iskay chunka iskayniyoj khuskanniyojta, patamantaj chunka kinsayoj khuskanniyoj metrosta. 16Chanta ruway kinsa alto patasniyojta, uj ventanayojta, chaytaj cachun techo uramanta khuskan metropi; uj ladompitaj punkunta ruwanki. 17Noqa jatun parata parachimusaj yakoqa mundota p'ampanankama, mundopi tukuy kausajkunata chinkachinampaj. Jallp'a patapi tukuy ima kausajkuna wañonqanku. 18Qanwantaj ruwasaj uj tratota. Qan yaykunki arcaman, jinallataj yaykonqanku wawasniyki, warmiyki, qhachunisniyki ima. 19Chanta arcaman apaykunki uj china orqota sapa uj animalesmanta kay mundopi kaj chhicamanta; chay animales qanwan kanqanku kausanankupaj. 20Qanwan khuska yaykonqanku tukuy laya animalesmanta iskaykama: P'isqosmanta, uywasmanta, tukuy qhatatakoj animalesmanta ima, kausanankupaj. 21Jinallataj tukuy laya mikhunata tantay, waqaychaytaj qan mikhunaykipaj, jinallataj animales mikhunankupajpis. 22Ajinata Noeqa ruwarqa, Dios imaynatachus payman nisqanman jina.
Currently Selected:
GÉNESIS 6: QCHSB
Highlight
Share
Copy
Want to have your highlights saved across all your devices? Sign up or sign in
Qheshwa Biblia DC © Sociedades Bíblicas Unidas, 1986.