2 MACABEOS 13
13
Menelaoj wañupusqan
[1 Mac. 6.28-30]
1Pachaj tawa chunka isq'onniyoj watapi, Judaswan runasninwan yachasqanku Antíoco Eupátor Judeaman jamusqanta yupa runasniyoj. 2Willasqankutaj Lisiaspis jamushasqanta. Lisiasqa Antiocota uywasqa. Kunanqa paypa sutimpi kamachej kasqa. Sapa uj rishasqa griego soldadoswan. Soldadosqa kasqanku pachaj chunka waranqayoj chakipi rejkuna, caballopi rejkunataj phishqa waranqa kinsa pachajniyoj runas. Chaymanta, apashasqanku iskay chunka iskayniyoj elefantesta. Apashasqankutaj kinsa pachaj carretonesta. Chay carretonespa ruedasninkuman jatuchaj hocesta wataykusqanku.
3Menelaopis paykunaman k'askaykusqa. Chay puraj uyaqa mana yuyashasqachu llajtanta yanapayta, manachayqa atiyniyojpuni sayayta. 4Chantaqa, Diosninchej, tukuy reykunaj reynin, Antíocoj sonqonta t'impuchisqa chay sajra sonqoj contrampi. Lisiasqa Antiocoman willakusqa Menelaolla juchayoj kasqanta tukuy chay llakiymanta. Chayta uyarispataj, rey nisqa Menelaota pusanankuta Berea llajtaman, chaypi wañuchisqa kanampaj, chay llajtayojkuna yachasqankuman jina. 5Bereapi kasqa nin uj torre iskay chunka iskayniyoj metroyoj. Chay torreqa ushphawan junt'a kasqa. Chaypi kasqa uj muyoj máquina. Chay maquinaqa sapa ladomanta k'umuykusqa kasqa ushpha t'oqoman. 6Chay Berea llajtayojkunaqa yachasqanku chayman wijch'uykuyta templomanta suwakojkunata, chantá ima sajra kajtapis ruwajkunata. 7Chay jinamanta wañusqa Menelaoqa, chay sajra runa. Nitaj p'ampasqachu kasqa. 8Ajinapuni wañunan karqa pichus chay chhika millaykunata ruwarqa altarpa contrampi. Altar ninaqa, altar ushphapis ch'uya kanku ari. Ajinamanta Menelaoqa ushphapi wañuporqa.
Antiocoqa judioswan allinyakapun
[1 Mac. 6.31-63]
9Rey Antíoco rishasqa nin, sonqompi munaspa judiosta llakichiyta, paypa tatan llakichisqanmanta aswan sinch'ita. 10Chayta yachaspataj, Judasqa nisqa runasninman tuta p'unchay Diosmanta mañakunankuta judiosta yanapananta ama leypis, llajtapis, santo templopis chinkachisqa kanampaj. 11Nisqataj Judasqa runasninman Diosmanta mañakunankuta ama Diospa ayllun urmanampaj Diospaj rimajkunaj makisninkupi. Diospa ayllonqa ñak'aymanta llojsisharqa ari llakiymanta. 12Tukuyninkutaj uj sonqolla, mana sayk'uspa Diosmanta mañakusqanku, waqaspa, mana mikhuspa, k'umuykukuspa ima. Chayta ruwasqanku kinsa día junt'ata. Chaymantataj Judasqa paykunata sonqochasqa, nisqataj wakichisqasña kanankuta.
13Judasqa, kurajkunawan parlaytawantaj, nisqa runasninman llojsinankuta, mana suyaspa reyqa Judeaman chayamunanta llajtata jap'ikapoj. Ajinamanta, ñaupajta llojsispa, Diospa yanapayninwan atenqanku reyta atipayta. 14Judasqa sonqonta churaspa kay mundota ruwajpi, runasninman nisqa may kallpawan maqanakunankuta wañojtinkupis, Diospa leyninrayku, templorayku, Jerusalenrayku, Judearayku, costumbresninkurayku ima. Chantataj, runasninwan Modín qayllapi jarakusqa.
15Judasqa runasninman yachachisqa qhaparinankuta: Diosqa atipachiwasun, nispa. Chaymantataj, wakin wapu waynaswan khuska, chaupi tutapi yaykusqa reypa jaranman. Chaypi wañuchisqa yaqha iskay waranqa runasta. Chantaqa, wañuchillasqankutaj aswan jatun kaj elefantesta purichejkunasnintinta. 16Chaypi kashajkunaqa mayta manchachikusqanku. Tukuy ima pejtu pejtullata saqespa, kusisqas atipasqankumanta, ripullasqanku. 17Q'ayantin, paqarimushajtin, tukuy ima tukusqaña kasqa Diosninchej Judasta yanapasqanrayku.
Antiocoqa uj tratota judioswan ruwan
18Chaykama reyqa yachasqaña judiosqa may kallpayoj kasqankuta. Chayrayku, atipanampajqa, munashasqa judiosta pantachiyta. 19Qayllasqa Bet-Surman. Chay Bet-Surqa judiospa jatun perqachasqa llajtanku kasqa. Judiosqa mana pasachisqankuchu. Chantataj, atipachikusqaña judioswanqa. 20Chaymanta Judasqa, chay ukhupi kajkunaman jaywachimusqa tukuy imata kausanankupaj. 21Kasqa nin uj judío Ródoco sutiyoj, pichus reypa soldadosninman willaj imatachus judiosqa pakayllamanta ruwayta munasharqanku chayta. Judiosqa mask'asqanku chay runastaqa. Tariytawantaj wañuchisqanku. 22Watejmantañataj reyqa parlasqa Bet-Sur llajtayojkunaman. Q'apinakusqankumantataj ripusqa. Chaymanta risqa maqanakoj Judaswan runasninwan ima. Tinkunakusqanku. Judastaj atipasqa. 23Chantaqa, reyman willasqanku Filipo oqharikusqanta Antioquía llajtapi. Filipota saqespa reyqa paypa sutimpi chaypi kamachinampaj. May phutisqa judiosta wajyachimusqa. Nisqataj munasqanta paykunaj ninankuta junt'ayta. Chaymanta, juramentota ruwaspa, prometesqa maychus kajta ruwayta. Allinyakuspataj, uj rikuchikuta jaywasqa, temploman respetowan yaykusqa, ashkha qolqetataj qosqa. 24Chaymanta, Macabeota saludaykusqa. Chantá Hegemonidasta saqesqa kamachejta jina kamachinampaj Tolemaidamantapacha Gerrakama. 25Chayta ruwaytawantaj Tolemaidaman ripusqa. Chaypitaj, chay llajtayojkunaqa phiñasqas kasqanku chay tratota ruwasqanmanta. May phiñasqas munasqanku chay tratota p'akichiyta. 26Chaymantataj Lisiasqa, uj tarimamanta parlaspa, rikuchisqa chay tratoqa sumaj kasqanta. Parlayninwan chay ch'ajwaqa thañikapusqa. Runastaj llamp'u sonqoyojña qhepakusqanku. Chaymanta Antioquiaman kutimpusqa. Chaymin reypa jamusqanqa ripusqan ima.
Currently Selected:
2 MACABEOS 13: QCHSB
Highlight
Share
Copy
Want to have your highlights saved across all your devices? Sign up or sign in
Qheshwa Biblia DC © Sociedades Bíblicas Unidas, 1986.