Tsumo 6
6
Kumiririra chikwereti chomumwe
1Mwanangu ukati ndiwe wokumiririra
chikwereti chomumwe
uchitsidza panzvimbo pomumwe,
2kana wateewa mukutaura
kwomuromo wako
wabatwa mumazwi omuromo wako
3zvaunofanira kuita ndezvizvi, mwanangu,
kuitira kuti uzvinunure
nokuti unenge watowira mumaoko
omumwe wako.
Enda uzvirereke
utadzise mumwe wako iyeyo kudya rinopisa.
4Usambobvuma zvako kuti
meso ako abatwe nehope
kana kutsomwaira nehope.
5Zvinunure semhara kumuvhimi
kana seshiri mumaoko omutei weshiri.
Tsimbe yomunhu
6Iwe tsimbe, enda kumujuru
uongorore maitiro awo
udzidze ungwaru.
7Mujuru hauna mambo,
hauna muchinda kana mutongi
8asi unogadzirira sadza rawo muzhizha
unounganidza chokudya chawo pakukohwa.
9Uchasvika riniko wakarara nhaiwe tsimbe
uchamuka riniko muhope dzako?
10Izvo zvokuti,
“Regai ndimboti kotsire kashoma.”
“Regai ndimboti tsomwaire kashoma.
Ndimboti maoko gumbate kuzorora.”
11Urombo hunobva hwati pauri
tutururu serombe
uye kushaiwa kunouya kwauri
somunhu akapakata zvombo zvokurwa.
Nhubu yomunhu
12Nhubu munhu akaipa
anongofamba achikanganisa mashoko.
13Anochonya maziso
anotondeka netsoka dzake
achinongedzera nongedzera neminwe yake.
14Anoronga twaanoronga nomwoyo wakashata
achiramba achingokonzera manyongori.
15Nhamo inoyerekana yamuwira,
nenguva isipi anotyorwa-tyorwa
zvisina karapiro.
Zvinhu zvinomwe zvisingadiwe naMwari
16Pane zvinhu zvitanhatu
zvisingadiwi naTenzi
zvinotosvika zvinomwe
zvinosemesa kwaari, zvinoti:
17Kuzvikudza, nokunyepa
maoko anodeura ropa risina mhosva
18nomwoyo unoronga zvirongwa zvakaipa
netsoka dzinomhanyirira kune zvakaipa
19chapupu chenhema chinotaura manyepo
munhu anomutsa gakava pakati pehama.
Yambiro nezveupombwe nomukadzi womuridzi
20Mwanangu chengeta mitemo yababa vako,
usakande pasi mirao yaamai vako
21isungirire mumwoyo mako
isungirire muhuro mako nguva dzose.
22Kana wofamba inokutungamirira,
kana worara inokuchengetedza.
Kana wakasvinura inokurukura newe.
23Chandinodariro ndechokuti
mutemo mwenje, murao chiedza
kutsiurwa nokudzidziswa
ndiwo mafambiro ohupenyu
24kuitira kuti zvikudzivirire
kumukadzi wakaipa
kururimi rwunotapira
rwomukadzi pfambi.
25Usatorwe mwoyo norunako rwake
usabatwe kumeso netsiye dzake.
26Nokuti pfambi inogona kutengwa nemari yechingwa
asi mukadzi womumwe anonanga zvokutora
upenyu hwakakosha hwomunhu.
27Munhu angatakure moto pachipfuva,
hanzu dzake dzikarega kutsva here?
28Kana kuti munhu angafambe
pamavhunze anopisa,
tsoka dzake dzikarega kutsva here?
29Ndizvo zvakaita munhu
anoenda kumukadzi womumwe
hakuna anomubata bata akarega kurangwa.
30Handiti vanhu vanoshora mbavha here
inenge yaba kuti irape nzara yayo?
31Asi ikabatwa inoripiswa kakapetwa kanomwe
inobvisa upfumi hwose hwomumusha mayo.
32Munhu anoita upombwe haana njere,
anoita zvakadai kuzviuraya
33chaanowana ipapa maronda nokushorwa
uye kuzvidzwa kwako hakufe kwakabva
34nokuti shanje inoitisa munhu hasha,
kana wotsividza anotsividza zvisina tsitsi
35zvokuti pakaripwa haambozviona
kana kugadzana mwoyo
nokumupa kwako zvipo zvakawanda.
Currently Selected:
Tsumo 6: SCLBD
Highlight
Share
Copy
Want to have your highlights saved across all your devices? Sign up or sign in
Shona Common Language Bible © Bible Society of Zimbabwe, 2008.
