1 Samueri 22
22
C: DHAVHIDHI SOMUPANDUKI
Kuurayiwa kwakaitwa vapristi naSauro
1Dhavhidhi akabva ipapo ndokutizira kubako raAdhuramu. Kuzoti vakoma vake nemhuri yose yokwababa vake vazvinzwa vakadzika ikoko kwaaiva. 2Munhu wose akanga akasuwa naakanga ari muchikwereti naakanga asingagutsikane noupenyu vakandounganidzana kwaari, akabva ava mutungamiri wavo. Aiva navarume vanoda kukwana makumi mana.
3Dhavhidhi akabvapo akaenda kuMizipe yokuMoabhu. Akati kuna mambo weMoabhu, “Ndinokumbira kuti mundichengeterewo baba vangu naamai vangu kusvikira ndaona zvandichaitirwa naMwari?” 4Akavaitira musha kwamambo weMoabhu, vakagarako naye nguva yose yakanga iye Dhavhidhi achigara mubako.
5Asi muporofita Gadhi akataurira Dhavhidhi kuti, “Chirega kunge ucharamba ugere mubako iri. Ibva zvako pano uende kunyika yokwaJudha.” Saka Dhavhidhi akabvapo ndokuenda kusango reHereti.
6Shoko rakasvika kuna Sauro rokuti Dhavhidhi pamwechete navanhu vake vaaiva navo vava kuzikanwa kwavari. Izvozvo Sauro aigara kuGibhea pamuti womutamarisiki, pfumo riri mumaoko, akakutwa namakurukota ake ose. 7Sauro akati kumakurukota ake aya akanga akamukuta, “Teererai munzwe imi vaBhenjamini! Heya munoti, iye mwanakomana waJese angabva akutii mose mukwane minda nemimwewo yemigirepisi nhai? Munofunga kuti achakupai mose zvigaro zvokutungamirira zvikwata zvezviuru nezvikwata zvamazana here, 8zvamadai kundimukira mose? Hezvi mwanakomana wangu anoita bangano nomwanakomana waJese, hapana kana mumwechete wenyu anondiudza. Hakuna ane hanya neni, kana anondirumawo nzeve kuti mwana wangu akasoka gurukota rangu zano rokundihwandira zviripo nhasi izvi!”
9Dhoegi muEdhomu akanga amirewo namakurukota aSauro akapindura achiti, “Ndakaona mwanakomana waJese achisvika kuNobhu kwaAhimereki mwanakomana waAhitubhu. 10Abhimereki akamunzwira kuna Tenzi akamupa chokudya ndokumupawo bakatwa raGoriati muFirisitia.” 11Mambo akatumira vanhu kundodaidza mupristi Ahimereki mwanakomana waAhitubhu pamwechete nevemhuri yokwababa vake vose vaiva vapristi kuNobhu, vose ndokubva vauya kwamambo.
12Sauro akati, “Imi mwana waAhitubhu chimbonzwai!” Ahimereki akati, “Ndokuno changamire.”
13Sauro ndokuti kwaari, “Ko iyemi mapindwa neiko kutoita zvenyu bangano rokundimukira nomwana waJese, zvokutosvika zvenyu pakumupa chingwa nebakatwa nokutomunzwira zvenyu kuna Mwari mamiriro ezvinhu, zvava kutomupa nhasi kundipandukira nokutondihwandira.”
14Ahimereki akapindura mambo achiti, “Pamakurukota enyu ose zvawo ndiani akatendeka saDhavhidhi, anotova mukuwasha wenyu imi mambo, mukuru mukuru wavanokuchengetedzai, anoremekedzwa kwazvo mumuzinda menyu? 15Ko iye nhasi ndopandatanga here kunzwira Dhavhidhi zvinhu kuna Mwari? Aiwaka! Regai zvenyu kundipa mhosva ini muranda wenyu kana kupa mhosva vose vemhuri yekwababa vangu nokuti hapana kana kai zvako kandiri kuziva panyaya iyi.”
16Mambo akati, “Ahimereki unotofa chete iwewe nevemhuri yokwababa vako vose.” 17Mambo ndokuti kune vokumuchengetedza vakanga vakamukuta vaya, “Navoi vapristi vaTenzi ava, vaurayei nokuti naivowo vane rimwe naDhavhidhi vakatozviziva zvavo kuti ari kutiza asi zvokuti vasvitsewo shoko irori munzeve dzangu havana.” Asi makurukota ake iye mambo zvakavapata mumwoyo kuti vasimudze ruoko kuuraya vapristi vaTenzi. 18Mambo ndokuti kuna Dhoegi, “Zvino iwe chiita izvozvi uraya vapristi ava.” Dhoegi muEdhomu akabva angotiwo navo vapristi kuuraya. Musi iwoyo akauraya makumi masere avarume, navarume vashanu vapfeki veefodhi dzerineni. 19Kozotiwo Nobhu, guta ravapristi, akaripedza namapakatwa kubvira kuvarume kusvikira kuvakadzi navana pamwechete navachiri kuyamwa nemombe namadhongi nehwai nembudzi. Akazvipedza namapakatwa.
20Asi mumwe mwana waAhimereki mukomana ainzi Abhiatari akapunyuka akatizira kuna Dhavhidhi. 21Abhiatari akataurira Dhavhidhi kuti, “Sauro akauraya vapristi vaTenzi.” 22Dhavhidhi akati kuna Abhiatari, “Ndakazviziva zvangu musi iwo uya pandakaona Dhoegi ariko kuti achaudza chete Sauro. Ndini ndakaurayisa vanhu vose vemhuri yokwababa vako. 23Chigara zvako neni, usatye nokuti mumwecheteyo ari kutsvaka zvokundiuraya ndiye ari kutsvaka zvokukuurayawo, uri mumaoko angu unotonyatsochengeteka.”
Currently Selected:
1 Samueri 22: SCLBD
Highlight
Share
Copy
Want to have your highlights saved across all your devices? Sign up or sign in
Shona Common Language Bible © Bible Society of Zimbabwe, 2008.
