Māa̍ti̍u̍ 9

Chi̍i̍sū si̍ŋgi̍ po̍ bɛ̍vɛ̍i̍yo̍

(Ma̍kī 2:1-12; Lu̍kū 5:17-26)

1O̍ ko̍ŋ kɔ̍ɔ̍lī, mi̍ Chi̍i̍sū he᷅l o̍ dɛ̄ndɔ̄ɔ̍ ni᷄ŋ mbo̍ mīīŋgū o̍ mɛ̄ŋmā ībūŋga᷄ŋ lēe̍lōo̍ o̍ chi̍e̍e̍ o̍ wa̍ īchāli̍ wo̍. 2Mi̍ wānāā pūm ā hūŋ a̍ wāna̍ nāa̍ o̍ mbōōmāa̍ ni᷄ŋ. Mɛ̄ɛ̍ Chi̍i̍sū che᷅ mɛ̄ɛ̍ kpɛ̍ pūa̍a̍ ha̍ā lāāla̍ŋ a̍ ndu̍ yɛ̄, mbo̍ dīmūl po̍ bɛ̍vɛ̍i̍yo̍ āā, “Pōo̍, ta̍mbū kɔ̄l te̍. Yɔ̄ŋndā nūmnda̍ wɔ̍ɔ̍ŋnda̍ŋ lā chō lā mālna᷄ŋ.”

3Mɛ̄ɛ̍ Chi̍i̍sū di̍mi̍ dīōm kōŋ, mi̍ wānāa̍ pɛ̍ɛ̍kū wa᷅ŋnda̍ sāwāla̍ Mɛ̄lɛ̄ka̍la̍ŋ nda̍ ā pūm ā kāndū dīmu̍la᷅ŋndo̍ āā, “Pōo̍ ho̍ō chō dīōla̍ Mɛ̄lɛ̄ka̍la̍ŋ tɛ̄ɛ̄mbūūwo̍.”

4Kɛ̍ ndu̍yɛ̍, mi̍ Chi̍i̍sū si̍nā nyɛ̄ nda̍ wa̍ yīya᷄ŋndo̍ o̍ kɔ̄ltā ndāla̍ŋ ni᷄ŋ ndo̍. Mbo̍ lō lo̍ŋ mbo̍ nyūnā nda̍ āā, “Lā vɛ᷅ mi̍ lā wā yīya᷄ŋnda̍ wɔ̍ɔ̍ŋndā wāā le̍nde̍ la̍ŋ? 5Tōsāa̍ mī wānā bɛ̍vɛ̍i̍yo̍ ō kūɛ̄ a̍ dīmūllo̍ ndu̍ āā, ‘Yɔ̄ŋndā nūmnda̍ wɔ̍ɔ̍ŋnda̍ŋ lā chō lā mālna᷄ŋ,’ o̍ kūɛ̍ɛ̍nɛ̍ hi̍o̍ū yɛ̄ wā bɛ̍ɛ̍ŋ le̍ mī wāna̍ chi̍o̍o̍ tōsa̍? Dīmūllo̍ ndu̍ āā, ‘Yɔ̄ŋndā nūmnda̍ wɔ̍ɔ̍ŋnda̍ŋ lā chō lā mālna᷄ŋ,’ ndu̍ hi̍o̍ū wā bɛ̍ɛ̍ŋ. 6Le̍la̍ŋ, I̍ cho̍ pōo̍ ho̍ō sīŋgī mī lā sīna̍ māā wāna̍ nda̍ vēēlū āā, Po̍ Wānā Pɔ̍nɔ̍ɔ̍ wo̍ nɔ̄ vɛ̄lɛ̄ kpāāyāa̍ o̍ chi̍e̍ēŋndo̍ chōo̍ mbō ma᷄l wāŋnda̍ le̍ yɔ̄ŋndā ndāla̍ wɔ̍ɔ̍ŋnda̍ŋ.” O̍ ko̍ŋ kɔ̍ɔ̍lī, mbo̍ dīmūl po̍ bɛ̍vɛ̍i̍yo̍ āā, “Chɔ̍ŋ mā chu̍a̍ mbōōmā nu̍mndo̍ mā kūɛ̄nu᷄ŋ o̍ nūmndo̍.”

7Mi̍ po̍ bɛ̍vɛ̍i̍yo̍ cha᷄ŋ mbo̍ kūānu᷄ŋ o̍ ndu̍ lo̍. 8O̍ ko̍ŋ kɔ̍ɔ̍lī, mɛ̄ɛ̍ wāŋnda̍ chē nyɛ̍ yɔ̍nu̍ŋ ndo̍, mi̍ kɔ̄ndɔ̄fi̍llo̍ bīī nda̍. Ndu̍yɛ̍, ma̍ sāŋgālā Mɛ̄lɛ̄ka̍ le̍ mɛ̄ɛ̍ o̍ ke̍ wāŋndā chīe̍e̍ya̍ kpāāyā wa̍ā nu̍a̍ā yɛ̍.

Chi̍i̍sū di̍mu̍l Māa̍ti̍u̍ māā ō to᷄l ndu̍ kɔ̄ɔ̄lī

(Ma̍kī 2:13-17; Lu̍kū 5:27-32)

9Mi̍ Chi̍i̍sū fa̍ŋa᷄ŋ o̍ fo̍ndāŋ kōŋ. Mɛ̄ɛ̍ o̍ wa̍ hīōūwɔ̄ɔ̍, mbo̍ chā po̍ kɔ̍sɔ̄ŋnɔ̄ɔ̍ dīōla̍ŋ āā, Māa̍ti̍u̍. Ō wa̍ īchāli̍ o̍ chīɛ̄ī kɔ̍sɔ̄ŋndo̍. Mi̍ Chi̍i̍sū di̍mūl ndu̍ āā, “Hu̍ŋ mā sīmnu᷄ŋ bu̍ɛ̍ī nī.” Mi̍ Māa̍ti̍u̍ cha̍ŋ mbo̍ tūāl ndu̍ kɔ̄ɔ̄lī.

10O̍ ko̍ŋ kɔ̍ɔ̍lī, mɛ̄ɛ̍ Chi̍i̍sū wa̍ nyɛ̄ dīa̍a̍ dīo̍o̍ nda̍ bu̍ɛ̍i̍yāā ndūa̍a̍ o̍ Māa̍ti̍u̍ lo̍ chi̍ɛ̍ī ni̍ŋ, mi̍ kɔ̍sɔ̄ŋnda̍ ā hūŋ ta̍u̍ nda̍ wānāā yɔ̄ŋ wɔ̄ɔ̍ŋāā chēle̍ŋ, ma̍ wā nyɛ̄ dīa̍a̍ kōŋ dīo̍o̍ lātūlu̍ nda̍ nda̍ā. 11Mi̍ wāŋnda̍ ā pūm o̍ ku̍ndā Fālīsi̍īya̍ chōo̍ a̍ cha᷅ nda̍. Ma̍ lō lo̍ŋ ma̍ nyūnā bu̍ɛ̍i̍yāa̍ Chi̍i̍sūa̍a̍ āā, “Vɛ᷅ mī ti̍chɛ̄i̍nɔ̄ nyāa̍ dīā nyɛ̄ dīa̍a̍ nda̍ kɔ̍sɔ̄ŋnda̍ a̍ wānāā yɔ̄ŋ wɔ̄ɔ̍ŋnda̍?”

12Mi̍ Chi̍i̍sū tu̍ɛ̍ī nyɛ̄ nda̍ dīmi̍ wo̍. Mbo̍ lō lo̍ŋ mbo̍ mūlūl nda̍ āā, “Wānāa̍ cho̍ kɛ̍ndi̍a̍a̍ wa̍ ā hēu̍ ba̍ a̍ wāna̍ chi̍ɔ̍ū wa᷅ŋnda̍ wo̍ le̍, mɛ̄ɛ̍ wānāa̍ cho̍ a̍ nāāla̍ŋ nda̍.” 13Mbo̍ dīmūl nda̍ āā, “Lā kɔ̍ ki̍ndī, dīōmnda̍ di̍mi̍ŋ la᷅ŋ o̍ Yāu̍ Mɛ̄lɛ̄ka̍a̍ ni᷄ŋ nda̍ŋ, mī lā sīna̍ tɛ̄ɛ̄sīāā ndɔ̄ɔ̍ pɛ̄ŋgu̍. Mi̍ Yāu̍ Mɛ̄lɛ̄ka̍a̍ dīmī āā, ‘Ō cho̍ vi̍sīa̍a̍ sa̍lāa̍ sōlīo̍o̍ le̍ ya̍ Mɛ̄lɛ̄ka̍ hɛ̄na̍ŋ te̍. Nyɛ̄ ya̍ I̍ hɛ̍na̍ŋ ndo̍ ndu̍ cho̍ wāŋndā chīe̍e̍ya̍ nyīɛ̍ɛ̍ye̍ tūīīnɔ᷄ŋndo̍ ni̍.’ ” Mi̍ Chi̍i̍sū hi̍a̍ū lāchī a̍ sūɛ̍i̍ āā, “I̍ hi̍ŋ le̍ wānāā sa̍kpō vēēlū le̍. I̍ hi᷅ŋ māhūnāā le̍ wānāā yɔ̄ŋ wɔ̄ɔ̍ŋnda̍ dīmūllo̍ mā ma᷄l yɔ̄ŋndā ndāla̍ wɔ̍ɔ̍ŋnda̍ŋ, mā sīmnu᷄ŋ bu̍ɛ̍i̍yāā nī.”

Ā nyūna̍ Chi̍i̍sū a̍ su᷅mndo̍ bīyɔ̄ɔ̍ o̍kɔ̄ɔ̄

(Ma̍kī 2:18-22; Lu̍kū 5:33-39)

14Bōōndi̍i̍ pi᷅lɛ̍, mi̍ bu̍ɛ̍i̍yāa̍ Chɔ᷄ŋ Wānā Yi̍ŋāa̍ wa̍ ā pūm ā hūŋ nāa̍ Chi̍i̍sū chu̍a̍. Ma̍ nyūnā ndu̍ āā, “Vɛ᷅ na̍a̍ ni̍, ku̍ndā Fālīsi̍īya̍ ni̍, mī ŋ̄ bīī su᷅mndo̍ te̍le̍ŋnda̍ ka̍ ka̍, kɛ̍, bu̍ɛ̍i̍yāā nūmnda̍ nda̍, ā bi̍ī su᷅m te̍ nɛ̍?”

15Mi̍ Chi̍i̍sū lo᷅ lo̍ŋ mbo̍ dīmūl nda̍ āā, “Mīālāa̍ hi᷅ŋ wāna̍ cho̍ la̍nɔ̍ɔ̍ chūa̍a̍ wo̍ o̍ bɛ̄ŋgu̍ cho̍o̍ wa̍, tē wāna̍ cho̍ la̍nɔ̍ɔ̍ chūa̍a̍ wo̍ chō wɔ̄ nda̍ tɛ̄ɛ̄ŋ pɛ̍, mīālāā kāŋ ō cho̍ ku̍e̍e̍ kpo̍so̍ŋ mā wa̍ a̍ kɔ̄lta̍ŋ lā tāmbɛ̍i̍ le̍. Kɛ̍ ndu̍yɛ̍ te̍le̍ŋ cho̍ fūūlūū mā fāŋa̍ wāna̍ cho̍ la̍nɔ̍ɔ̍ chūa̍a̍ wo̍ nda̍ tɛ̄ɛ̄ŋ. Tē ā fāŋa̍ ndu̍ nda̍ tɛ̄ɛ̄ŋ pɛ̍, o̍ ko̍ŋ nda̍ bīī ni̍ŋ su᷅mndo̍ ni̍.”

16Mi̍ Chi̍i̍sū hi̍a̍ū lāchī a̍ nda̍ dīmūllo̍ o̍ lētāle̍ ni᷄ŋ āā, “Wānā be̍ŋūl tɛ̍ɛ̍ŋgēi̍ o̍ dōmā pa̍a̍ndōo̍ a̍ pɛ̄ŋgɛ̍i̍ kōlā sɛ̍nɛ̄īyo̍ le̍. Tē wānā ba̍ŋu̍l a̍ ndi̍ pɛ̍, tē ō lo̍ o̍ ko̍ŋ mī pɛ̄ŋgɛ̍i̍ kōlā sɛ̍nɛ̄īye̍ ī ŋɔ̄ūnu᷄ŋ pɛ̍, dōmā pa̍a̍ndōo̍ chɔ̄ɔ̄lu̍ kīōlū. O̍ ko̍ŋ, tɛ̄ɛ̄ŋgēi̍ ī hīōū māā pāāndū. 17Le̍nde̍ ko̍ni̍, wānā do̍ū yɛ̍ŋgīa̍ŋ o̍ bɔ̄lɔ̍ yāu̍ vīsīo̍o̍ ō pāāndōo̍ ni᷄ŋ te̍. Kāni̍ fo̍ndōle̍, tē ā dɔ̄ū pɛ̍, yɛ̍ŋgīa̍ŋ mā chō hēlɔ̄ɔ̄ mī mā kīndu᷄ŋ. O̍ ko̍ŋ, mī mā būli̍ bɔ̄lɔ̄ ka̍lāa̍. Ndu̍yɛ̍, mī mūɛ̄īmā kāla᷄ŋ mā lūlnu̍ŋ mī bɔ̄lɔ̄ɔ̍ bɛ̍ɛ̍ ndu̍ ta̍mbu̍. O̍ bɔ̄lɔ̍ yāu̍ vīsīo̍o̍ ō sɛ̄nɛ̄īyo̍ ni᷄ŋ wānā du̍a̍ū yɛ̍ŋgīa̍ŋ ni̍. Ko̍ŋ to̍sā ni̍, mūɛ̄īya̍ŋ mā lūlnu̍ŋ te̍, ndu̍yɛ̍ bɔ̄lɔ̄ɔ̍ bɛ̍ɛ̍, ō te̍mbū le̍.”

Chūāāmbɔ̄ vi᷅ wo̍ a̍ chu̍a̍ pi̍la̍ŋ Chi̍i̍sū wo̍

(Ma̍kī 5:21-43; Lu̍kū 8:40-56)

18Chi̍i̍sū lo̍ sūɛ̍i̍, mi̍ wānā bɛ̍ndū Chu̍ūwa̍ ō pūm hūŋ nāa̍ ndu̍ chu̍a̍. Mɛ̄ɛ̍ o̍ hi᷅ŋ, mbo̍ hu᷄ŋ ba᷅ŋ wūla̍ŋ Chi̍i̍sū o̍ lābɛ̄ŋgu̍ ni̍ŋ. Mbo̍ dīmūl ndu̍ āā, “Chūā nūu̍ lāŋga̍ wu᷅ su̍ŋ su̍ŋ. Le̍la̍ŋ, ŋ̄ kɔ̍ o̍ chīɛ̄ī nūu̍ mā kɔ̍ ha̍ndū ndu̍ bāla̍ŋ chōo̍. Kāni̍ fo̍ndōle̍, tē a̍ ha̍ndu̍ ndu̍ bāla̍ŋ chōo̍ pɛ̍, ō nɔ̄lā mbō mīīŋgu̍ vɛ̄lɛ̄ yōōmū.”

19Mi̍ Chi̍i̍sū cha̍ŋ mbo̍ tūāl ndu̍ kɔ̄ɔ̄lī nda̍ bu̍ɛ̍i̍yāā ndūa̍a̍.

20A̍ bōōndi̍i̍ ke̍ŋ, mi̍ chūā pīlɛ̍ hūŋ Chi̍i̍su̍ a̍ mākɔ̄ɔ̄. Ndu̍yɛ̍, le̍ wɔ̄sīla̍ŋ tɔ̍ a̍ lā tīɔ̍ɔ̍ŋ chūa̍a̍ ho̍ō chō a̍ nāā ŋ̄wāŋ lāāndū wɔ̄ɔ̍ŋ pūm. Mɛ̄ɛ̄ o̍ hi᷅ŋ Chi̍i̍sū a̍ mākɔ̄ɔ̄, mbo̍ pīla᷄ŋ do᷅ma̍ ndɔ̄ɔ̍ bɔ̄ɔ̄le̍ŋ. 21Kāni̍ fo̍ndōle̍, mbo̍ yīya᷄ŋ māā ō wa̍ bɛ̍ɛ̍ do᷅ma̍ Chi̍i̍sōo̍ si̍i̍ o̍ pi̍la̍ŋ ni̍ māā ō nɔ̄lā mbō sēŋgū. Mɛ̄ɛ̍ le̍ he̍ī, o̍ pi̍la̍ŋ do᷅ma̍ Chi̍i̍sōo̍ ni̍.

22O̍ ko̍ŋ kɔ̍ɔ̍lī, mi̍ Chi̍i̍sū mu̍li᷄ŋ mbo̍ chā ndu̍. Mbo̍ dīmūl ndu̍ āā, “Hi̍o̍u̍ la̍chi̍ a̍ tīīnda᷄ŋndo̍ nɔ̄ɔ̍, chūā nūu̍. Tīīnda᷄ŋ ŋ̄ dɔ̄ū o̍ Mɛ̄lɛ̄ka̍ ni᷄ŋ ndo̍ tōsa̍ ma̍ sɔ̄lā sīōŋgɔ̄ɔ̍.” Mi̍ chūa̍a̍ ho̍ō sīāŋgū o̍ lē pīlɛ̍ ni᷄ŋ kpe̍.

23O̍ ko̍ŋ kɔ̍ɔ̍lī, mi̍ Chi̍i̍sū fu̍u̍lūū o̍ chīɛ̄ī wānā bɛ̍ndōo̍. Mɛ̄ɛ̍ o̍ fu̍u̍lu̍u̍, mbo̍ kōmāl wānāā nyɛ̄ chāa̍ hi᷅ŋ nda̍ a̍ fāŋgāa̍ ta̍u̍. Nyɛ̄ o̍ nyɛ̄ wa̍ wɛ̍i̍kā wɛ̍i̍kā bɛ̄ndū bɛ̍ndū. 24Mi̍ Chi̍i̍sū di̍mūl nda̍ āā, “Nya̍ kpo̍u̍ lā fūla̍ o̍ bɛ̍ɛ̄. Chūāāmbɔ̄ɔ̍ vi̍ le̍. O̍ lūa̍a̍ŋ o̍ cho̍ ni̍.” Mɛ̄ɛ̍ o̍ di̍mi̍ le̍nde̍, ma̍ sa̍āŋ ndu̍ māmɔ̄ɔ̍. 25Kɛ̍ mɛ̄ɛ̍ nda̍ sōli̍ wāŋnda̍ o̍ bɛ̍ɛ̄, mi̍ Chi̍i̍sū lu̍ɛ̍ī o̍ chīɛ̄ī chūāāmbɔ̄ɔ̍ wa̍ īhīni̍ wo̍. Mbo̍ sāā ndu̍ bāa̍. Mi̍ chūāāmbɔ̄ɔ̍ cha᷄ŋ. 26O̍ ko̍ŋ kɔ̍ɔ̍lī, mi̍ tɔ̍ɔ̍ tīū si̍lɔ̍ o̍ būŋgɛ̄ī kēŋ ni᷄ŋ a̍ nyɛ̍ yɔ̍nu̍ŋ ndo̍ o̍kɔ̄ɔ̄.

Chi̍i̍sū si̍ŋgi̍ wānāā sūmɛ̍i̍ya̍ nda̍ ndā ŋi̍ɔ̍ɔ̍ŋ

27O̍ ko̍ŋ kɔ̍ɔ̍lī, mi̍ Chi̍i̍sū fa̍ŋa᷄ŋ o̍ fo̍ndāŋ kōŋ. Mɛ̄ɛ̍ o̍ wa̍ hīōūwɔ̄ɔ̍, mi̍ wānāā sūmɛ̍i̍ya̍ nda̍ nda̍ ŋi̍ɔ̍ɔ̍ŋ ā wā ndu̍ tōlɔ̄ɔ̍ kɔ̄ɔ̄lī. Ā wa̍ kɔ̄la̍ŋ a̍ dīmīo̍o̍ chōo̍ cho̍o̍ ndu̍ a̍ mākɔ̄ɔ̄ āā, “Nūm Po̍ Dēēvi̍o̍o̍, tūīīnu̍ŋ na̍a̍ īnyīɛ̍ɛ̍ fɔ̍.”

28O̍ ko̍ŋ kɔ̍ɔ̍lī, mɛ̄ɛ̍ Chi̍i̍sū lu̍ɛ̍ī chīɛ̄ī ni̍ŋ, mi̍ pūa̍a̍ su̍mɛ̍i̍ya̍ ha̍ā lūɛ̄ī ndu̍ kɔ̄ɔ̄lī. Mi̍ Chi̍i̍sū lo᷅ lo̍ŋ mbo̍ nyūnā nda̍ āā vɛ̄ɛ̄, “Lā lāāla̍ŋ māā I̍ nɔ̍lā mī si̍ŋgi̍ nya̍?”

Ma̍ chɛ̄l āā, “E̍ī, Fāllo̍. Ŋ̄ lāāla̍ŋ māā ā nɔ̄lā na̍a̍ sīŋgī.”

29O̍ ko̍ŋ, mi̍ Chi̍i̍sū pi̍la᷄ŋ nda̍ hɔ̄lta̍ŋ. Mbo̍ dīmī āā, “Ī yɔ̄nu̍ŋ, kāni̍ fo̍ndōle̍, le̍ mɛ̄ɛ̍ nya̍ lāāla̍ŋ yɛ̍.” 30Mɛ̄ɛ̍ o̍ di̍mi̍ le̍nde̍, ma̍ kāndū chɔ̄ɔ̍. Mi̍ Chi̍i̍sū si̍lā nda̍ ō kālā ka̍lā āā, “Lā di̍mūl wānā o̍ wānā a̍ ndi̍ o̍kɔ̄ɔ̄ le̍.”

31Kɛ̍, mɛ̄ɛ̍ nda̍ kūɛ̄, ma̍ kɔ̍ sɛ̍ŋī Chi̍i̍su̍ tɔ̍ɔ̍ o̍ būŋgɛ̄ī kēŋ ni᷄ŋ fa̍ū.

Chi̍i̍sū to̍ū nyi̍nā lēbo̍bo̍ wa̍ pōo̍ kɔ̄ɔ̄lī wo̍

32Bōōndi̍i̍ pūa̍a̍ ŋi̍ɔ̍ɔ̍ŋnda̍ ā wa̍ fūlāa̍ ve̍, mi̍ wānāā pūm ā hūŋ a̍ po̍ bo̍bo̍nɔ̍ɔ̍ nāa̍ Chi̍i̍sū chu̍a̍. Nyi̍nā wɔ̄ɔ̍ŋndo̍ wa̍ bo̍bo̍nɔ̍ɔ̍ ho̍ō kɔ̄ɔ̄lī. Ndu̍yɛ̍, nyi̍nā wɔ̄ɔ̍ŋ kōŋ ndu̍ ndu̍ o̍o̍ to̍sā ndu̍ ni̍ ō su̍ū le̍. 33Kɛ̍, mɛ̄ɛ̍ Chi̍i̍sū to̍ū dɔ̍ɔ̍ nyi̍nā kōŋ ndu̍ kɔ̄ɔ̄lī, mi̍ pōo̍ sūāā bɛ̍ɛ̍. O̍ ko̍ŋ kɔ̍ɔ̍lī, mi̍ kɔ̄ndɔ̄fi̍llo̍ bīī wāŋnda̍ kpe̍de̍. Ma̍ sa̍āŋ di̍mīo̍o̍ āā, “Lē pīlɛ̍ bɛ̍ɛ̍ ī wāā nu̍a̍ā ī yɔ̄nu̍ŋ ndɔ̍ o̍ lɛ̄ŋndē I̍sɔ̄lūɛ̄īle̍ŋ nde᷅ŋ ni᷄ŋ te̍.”

34Kɛ̍ ndu̍yɛ̍, mi̍ ku̍ndā Fālīsi̍īya̍ nda̍ dīmī āā, “Māsa̍ nyi̍nāā wɔ̄ɔ̍ŋnda̍ ndu̍ ke᷅ Chi̍i̍su̍ kpāāyāa̍ le̍ nyi̍nāā wɔ̄ɔ̍ŋnda̍ tōūwɔ̄ɔ̍ wāŋnda̍ kɔ̄ɔ̄lī ni̍.”

Nyīɛ̍ɛ̍ye̍ bīī Chi̍i̍su̍ le̍ wāŋnda̍

35Mi̍ Chi̍i̍sū ba̍lū o̍ chi̍o̍o̍ŋ a̍ sɔ̄ndɔ̄kɔ̍ltā ka̍ ka̍. Mbo̍ pɛ̄ɛ̄kū wāŋnda̍ o̍ chīɛ̄īlā Chu̍ūwa̍ pīɛ̄ī Mɛ̍lɛ̄ka̍ la̍ŋ ni᷄ŋ. Mbo̍ dīmūl wāŋnda̍ yōōŋgū kɛ̄ndɔ̄ɔ̍ a̍ māsāle̍ Mɛ̄lɛ̄ka̍le̍ŋ o̍kɔ̄ɔ̄. O̍ ko̍ŋ kɔ̍ɔ̍lī, mbo̍ sīŋgī wāŋnda̍ a̍ nāālā yɛ̍ yɛ̍la̍ fa̍ŋgā. 36Mɛ̄ɛ̍ Chi̍i̍sū che᷅ wāŋnda̍ ā chō fāŋgāa̍ le̍nde̍, mi̍ nyīɛ̍ɛ̍ye̍ bīī ndu̍ le̍ nda̍. Kāni̍ fo̍ndōle̍, mɛ̄ɛ̄ sāa̍ wā nu̍a̍ā ā nɔ᷅ wa̍nā ma̍ndāā le̍ yɛ̍, le̍nde̍ nda̍ wa̍ ni̍. Kɔ̄lta̍ŋ lā wa̍ nda̍ lā lāāsi̍ɛ̍i̍ pɛ̍ a̍ būūla᷄ŋnda̍ŋ. Nda̍ a̍a̍ si̍nā nāa̍ o̍ nāa̍ nda̍ a̍a̍ ku̍ā mā sɔ̄la̍ mālāa̍ le̍. 37Mi̍ Chi̍i̍sū lo᷅ o̍ ko̍ŋ mbo̍ dīmūl bu̍ɛ̍i̍yāā ndūa̍a̍ o̍ lētāle̍ ni᷄ŋ āā, “Chīɛ̍i̍ vēsa̍ ta̍u̍ le̍ kōūwɔ̄ɔ̍, kɛ̍, wānāā kūāūwāa̍ ā cho̍ a̍ bɔ̍ɔ̍ le̍. 38Le̍la̍ŋ lā dīmu̍l wa᷅na̍ nɔ̍ chīɛ̍i̍ yo̍ mbō yɔ᷄ŋ wānāā wa̍lla̍ mā kūu̍ ndu̍ ndi̍.”

Currently Selected:

Māa̍ti̍u̍ 9: YM

Highlight

Copy