Māa̍ti̍u̍ 6

Chi̍i̍sū pɛ̍ɛ̍ku̍ a̍ wānāā tāmbɛ̍i̍ya̍ mālāa̍ o̍kɔ̄ɔ̄

1Mi̍ Chi̍i̍sū hi̍a̍ū lāchī a̍ pɛ̄ɛ̄kōo̍ āā, “Sɔ̄ɔ̍ŋ nya̍ tōsā le̍ chō nya̍ chō wānāa̍ Mɛ̄lɛ̄ka̍a̍ wo̍ŋ, lā mānda̍ŋ a̍ mɛ̄ɛ̍ nya̍ tōsā mu̍ŋ yɛ̍. Lā to̍sā mu̍ŋ le̍ hāli̍ kpe̍ŋ mī wāŋnda̍ chē nya̍ le̍. Kāni̍ fo̍ndōle̍, tē lā tōsa̍ mu̍ŋ le̍ hāli̍ kpe̍ŋ mī wāŋnda̍ chē pɛ̍, mɛ̄ɛ̍ Mɛ̄lɛ̄ka̍ Fi̍nyā nyā o̍ cho̍ o̍ fo̍ndāŋ ndɔ̄ɔ̍ wo̍, ō ke᷅ lɛ̍ nya̍ nyɛ̄ le̍ mu̍ŋ tōsāa̍ le̍.

2“Le̍la̍ŋ, te̍le̍ŋ o̍ te̍le̍ŋ tē a̍ wa̍ wānāā tāmbɛ̍i̍ya̍ kɛ̄ndɛ̄i̍ tōsāllo̍ pɛ̍, to̍sā fɛ̍ɛ̍ŋ mī wāŋnda̍ kpo̍u̍ a̍ si̍na̍ mɛ̄ɛ̍ wānāā sōndō yēēlɛ̍i̍ya̍ ā tōsā yɛ̍ le̍. Kāni̍ fo̍ndōle̍, nda̍ nda̍, tē ā wa̍ wānāā tāmbɛ̍i̍ya̍ kɛ̄ndɛ̄i̍ tōsāllo̍ pɛ̍, o̍ chīɛ̄īlā Chu̍ūwa̍ pīɛ̄ī Mɛ̍lɛ̄ka̍la̍ŋ ni᷄ŋ a̍ nāa̍ fāŋgāa̍ wā wa̍, lo̍ŋ nda̍ tōsāl nda̍ kɛ̄ndɛ̄i̍ ni̍ le̍ mī wāŋnda̍ chē nda̍ mā chāndu̍ nda̍. Mī di̍mu̍l nya̍, wānāā wāā le̍nde̍ wa̍, nda̍ nda̍ chīi̍ pāāwāa̍ o̍ nda̍a̍ sɔ̄lā. 3Le̍la̍ŋ, tē lā wa̍ wānāā tāmbɛ̍i̍ya̍ kɛ̄ndɛ̄i̍ tōsāllo̍ pɛ̍, lā to̍sā mī wānā si̍na̍ le̍. Chāa̍ŋ nu᷄m ŋ̄ hīni̍ kɔ̄llo̍ bɛ̍ɛ̍, to̍sā mbō sīna̍ le̍. 4Tē a̍ to̍sa̍ ndi̍ pɛ̍ sɔ̍ɔ̍ sɔ̍ɔ̍, mɛ̄ɛ̍ Mɛ̄lɛ̄ka̍ Fi̍nyā nūm o̍ si̍nā ho̍ō sɔ̄ɔ̍ŋ wāŋnda̍ tōsā o̍ sɔ̍ɔ̍ sɔ̍ɔ̍ wo̍ ni᷄ŋ ndo̍ŋ ndo̍, ndu̍ nɔ̍lā mbō ke̍ nu̍m nyɛ̄ kɛ̄ndɛ̄ le̍ ke̍ŋ.”

Chi̍i̍sū pɛ̍ɛ̍ku̍ wāŋnda̍ mɛ̄ɛ̍ nda̍ pīɛ̄ī Mɛ̍lɛ̄ka̍ yɛ̍

(Lu̍kū 11:2-4)

5Mi̍ Chi̍i̍sū pɛ̍ɛ̍kū wāŋnda̍ āā, “Tē lā wa̍ Mɛ̄lɛ̄ka̍ pīɛ̄īyo̍ pɛ̍, lā to̍sā mɛ̄ɛ̍ wānāā sōndō yēēlɛ̍i̍ya̍ ā tōsā yɛ̍ le̍. Kāni̍ fu̍u̍le̍, nda̍ nda̍, ā wa̍ Mɛ̄lɛ̄ka̍ pīɛ̄īyo̍ pɛ̍, o̍ chīɛ̄īlā Chu̍ūwa̍ pīɛ̄ī Mɛ̍lɛ̄ka̍la̍ŋ a̍ nāa̍ wāŋnda̍ nɔ̄lā mā chē nda̍ wa̍, lo̍ŋ nda̍ hɛ̄nāŋ si̍si̍la̍ŋ ni̍. Kāni̍ fo̍ndōle̍, ā hɛ̄nāŋ mī wāŋnda̍ wa̍ nda̍ chɔ̄ɔ̍. Mī di̍mu̍l nya̍ tōnya̍a̍, nda̍ nda̍ chīi̍ pāāwāa̍ o̍ nda̍a̍ sɔ̄lā. 6Le̍la̍ŋ, wānā wa̍ Mɛ̄lɛ̄ka̍ pīɛ̄īyo̍ pɛ̍, lu̍ɛ̍i̍ o̍ nūmndo̍ chi̍ɛ̍ī ni̍ŋ nu᷄m pīlɛ̍ kpe̍ mā pi̍ɛ̍i̍ Mɛ̄lɛ̄ka̍ Fi̍nyā nūm ō wāna̍ chi̍e̍e̍ cho̍ ho̍ō chɔ̄ le̍ wo̍. Tē a̍ to̍sa̍ le̍nde̍ pɛ̍, Mɛ̄lɛ̄ka̍ Fi̍nyā nūm o̍ si̍nā sɔ̍ɔ̍ŋ sɔ̍ɔ̍ sɔ̍ɔ̍ wo̍ŋ ndo̍ ō ke̍ nu̍m nyɛ̄ kɛ̄ndɛ̄ le̍ ko̍ŋ.

7“Tē lā wa̍ Mɛ̄lɛ̄ka̍ pīɛ̄īyo̍ pɛ̍, lā di̍mī dīōmnda̍ŋ le̍ dīmīo̍o̍ le̍ŋ, mɛ̄ɛ̍ wānāa̍ cho̍ a̍ Chu̍ū le̍ wa̍ ā tōsā yɛ̍ le̍. Kāni̍ fo̍ndōle̍, nda̍ nda̍ yīya̍ŋ māā tē ā sōō pɛ̍ di̍ōmnda̍ŋ ta̍u̍ ta̍u̍ o̍ pīɛ̄īle̍ŋ ni᷄ŋ, mɛ̄ɛ̍ Mɛ̄lɛ̄ka̍ mūli̍ pīɛ̄īlē ndāle̍ŋ le̍ ko̍ŋ. 8Le̍la̍ŋ, lā chu̍ā ka̍ā ndāa̍ le̍. Mɛ̄lɛ̄ka̍ Fi̍nyā nyā ndu̍ si̍nā nyɛ᷅ o̍ nyɛ̄ nya̍ hāu̍ bā le̍ ndu̍ lɔ̍ɔ̍pa̍ bɛ̍ɛ̍ nya̍ nyūnā ndu̍. 9Tē lā wa̍ Mɛ̄lɛ̄ka̍ pīɛ̄īyo̍ pɛ̍, lā dīmi̍ nu̍a̍ā āā,

‘Mɛ̄lɛ̄ka̍ Fi̍nyā nāa̍, nu᷄m cho̍ ho̍ō ɛ̄chɛ̍nɛ̄ wo̍,

ŋ̄ chō nu̍m pīɛ̄īyo̍ māā wāŋnda̍ ā ke̍ nu̍m bɛ̄ɛ̄le̍ŋ māā nūm kpe̍e̍kpe̍i̍ cho̍ Mɛ̄lɛ̄ka̍ ni̍.

10Wa̍ ni̍ko̍ ma̍sāa̍ ŋ̄wāŋndā chīe̍e̍ cho̍o̍ kpo̍u̍.

To̍sa̍ a̍ sa̍bū māā wāŋnda̍ kpo̍u̍ o̍ chi̍e̍ēŋndo̍ chōo̍ ā tōsa̍ nyɛ᷅ ŋ̄ hɛ̄na̍ŋ ndo̍, mɛ̄ɛ̍ nyɛ̄ ŋ̄ hɛ̄na̍ŋ ndo̍ ō tōsa̍ŋ ɛ̄chɛ̍nɛ̄ yɛ̍.

11To̍sa̍ a̍ sa̍bū mī ŋ̄ sɔ̄la̍ nyɛ̄ dīāā na̍a̍ ŋ̄ dīā pa̍a̍le̍ hāūle᷅ŋ ndo̍.

12Ma̍l na̍a̍ le̍ yɔ̄ŋndā wɔ̄ɔ̍ŋndā na̍a̍ ŋ̄ tōsa̍ la̍ŋ, mɛ̄ɛ̍ na̍a̍ ŋ̄ māl wānāa̍ to̍sāl na̍a̍ ŋ̄ wɔ̄ɔ̍ŋndo̍ŋ nda̍ yɛ̍.

13To̍sa̍ a̍ sa̍bū tɔ̄ɔ̄nda᷄ŋ ka̍lā ko̍māl na̍a̍ mī ŋ̄ tōsa̍ yɔ̄ŋ wɔ̄ɔ̍ŋndo̍ le̍.

Ma̍nda̍ na̍a̍ yɔ̄ŋi̍ Māsa̍ Nyi̍nāā Wɔ̄ɔ̍ŋnda̍ ō tīu̍ na̍a̍ bā.’ ”

14Mi̍ Chi̍i̍sū hi̍a̍ū lāchī a̍ sūɛ̍i̍ āā, “Tē lā ma᷄l wāŋnda̍ le̍ sɔ̄ɔ̍ŋ wɔ̍ɔ̍ŋ nda̍ tōsa̍l nya̍ wo̍ŋ pɛ̍, Mɛ̄lɛ̄ka̍ Fi̍nyā nyā o̍ cho̍ o̍ fo̍ndāŋ ndɔ̄ɔ̍ wo̍, ndu̍ bɛ̍ɛ̍ ō ma᷄l nya̍ le̍ yɔ̄ŋndā wɔ̄ɔ̍ŋndā nya̍ tōsa̍ la̍ŋ. 15Kɛ̍ ndu̍yɛ̍, tē lā kɛ̄ɛ̍ le̍ wāŋnda̍ mālɔ̄ɔ̄ le̍ sɔ̄ɔ̍ŋ wɔ̍ɔ̍ŋ nda̍ tōsa̍l nya̍ wo̍ŋ pɛ̍, mɛ̄ɛ̍ Mɛ̄lɛ̄ka̍ Fi̍nyā nyā bɛ̍ɛ̍ ō me᷅l nya̍ le̍ yɔ̄ŋndā wɔ̄ɔ̍ŋndā nya̍ tōsa̍ la̍ŋ kpo̍so̍ŋ te̍.”

Pɛ̄ɛ̄kōo̍ a̍ mɛ̄ɛ̍ wānā bi̍ī su᷅mndo̍ yɛ̍

16“Tē lā wa̍ o̍ su᷅mndo̍ ni᷄ŋ pɛ̍, lā yi̍ī hɔ̄lla̍ mɛ̄ɛ̍ wānāā sōndōlā yēēlɛ̍i̍ya̍ ā tōsā yɛ̍ le̍. Kāni̍ fo̍ndōle̍, nda̍ nda̍, tē ā wa̍ o̍ su᷅mndo̍ ni᷄ŋ pɛ̍, ā bīī ā tōsa̍ hɔ̄lla̍ mɛ̄ɛ̍ nyɛ̄ wā wānā nɛ̍ī le̍ hāli̍ kpe̍ŋ mī wāŋnda̍ sīna̍ māā ā chō o̍ su᷅mndo̍ ni᷄ŋ. Mī di̍mu̍l nya̍ tōnya̍a̍, wānāa̍ to̍sā le̍nde̍ wa̍, nda̍ chīi̍ pāāwāa̍ o̍ nda̍a̍ sɔ̄lā. 17Kɛ̍ nya̍ nya̍, tē lā wa̍ o̍ su᷅mndo̍ ni᷄ŋ pɛ̍, lā pūlu̍ hɔ᷅lla̍ fo̍ mī lā sāāndi̍a̍a̍ yīīŋnde̍ nyɛ̄ kɛ̄ndɛ̍ī. 18O̍ ko̍ŋ, wānā o̍ wānā che᷅le̍ŋ si̍nā māā lā chō o̍ su᷅m ni᷄ŋ te̍, mɛ̄ɛ̍ Mɛ̄lɛ̄ka̍ Fi̍nyā nyā ō wānā o̍ wānā cho̍ ho̍ō chɔ̄ le̍ wo̍. Tē lā tōsa̍ le̍nde̍ pɛ̍, mɛ̄ɛ̍ Mɛ̄lɛ̄ka̍ Fi̍nyā nyā o̍ si̍nā ho̍ō sɔ̄ɔ̍ŋ wāŋnda̍ to̍sā o̍ sɔ̍ɔ̍ sɔ̍ɔ̍ wo̍ ni᷄ŋ ndo̍ŋ ndo̍, ndu̍ nɔ̍lā mbō ke̍ nya̍ nyɛ̄ kɛ̄ndɛ̄ kɛ̍ndɛ̄.”

Chi̍i̍sū pɛ̍ɛ̍ku̍ a̍ sūllo̍ chūūŋgīa̍a̍ ɛ̄chɛ̍nɛ̄ o̍kɔ̄ɔ̄

(Lu̍kū 12:33-34)

19Mi̍ Chi̍i̍sū pɛ̍ɛ̍kū wāŋnda̍ āā, “Lā chu̍u̍ŋgīāā nyɛ̄m sūla᷄ŋ chi̍e̍ēŋ na̍nu᷄ŋ te̍. Kāni̍ fo̍ndōle̍, nyɛ̄m sūla᷄ŋ chi̍e̍ēŋ na̍nu᷄ŋ, mu̍ŋ mu̍ŋ mī ŋ̄ sɔ̄wa̍, ndu̍yɛ̍, kāāŋgūa̍a̍ nɔ̄lā mā tɛ̄ɛ̄mbu̍u̍ mu̍ŋ. O̍ ko̍ŋ kɔ̍ɔ̍lī, vīīya̍ nɔ̄lā mā pɛ̄l chīɛ̄īyo̍ mā lūɛ̄ī mā chīīmbu̍u̍. 20Nyɛ̄m sūla᷄ŋ ɛ̄chɛ̍nɛ̄, mu̍ŋ nya̍ chūūŋgi̍a̍a̍ ni̍. Kāni̍, lo̍ŋ ndu̍ ndu̍, nyɛ̄m nūmndo̍ŋ ŋ̄ sɔ̍wā le̍, kāāŋgūa̍a̍ tɛ̍ɛ̍mbūū le̍, ndu̍yɛ̍, vīyāā lu̍e̍ī mā chīīmbu̍u̍ le̍. 21Nāa̍ wāŋndo̍ kɛ̄sī nyɛ᷅m ndɔ᷄ŋ ba̍ā kāla᷄ŋ nda̍, lo̍ŋ ko̍ni̍ kɔ̄l ndɔ̄ɔ̍ wā ni̍.”

Hɔ̄lta̍ŋ lā chō māchūāā māā la̍mbūi̍

(Lu̍kū 11:34-36)

22“Hɔ̄ltā ŋ̄ nɔ̄ la̍ŋ lā chō māchūāā la̍mbūi̍yo̍ le̍ dīāllūŋ nūmndo̍ŋ. Le̍la̍ŋ, tē hɔ̄ltā nūmnda̍ŋ lā chō nyɛ̄ kɛ̄ndɛ̍ī pɛ̍, ŋ̄ tēŋgāā wa̍ke̍e̍ dīāllūŋ nūmndo̍ŋ kpo̍u̍ ŋ̄ wa᷅ le̍ni̍ŋ a̍ nyɛ̄ wa̍wo̍ŋndo̍ ni̍. 23Kɛ̍, tē hɔ̄ltā nūmnda̍ŋ lā cho̍ la̍ kɛ̍ndɛ̄ le̍, dīāllūŋ nūmndo̍ŋ fa̍ū o̍ nyūmnda̍ŋ ni᷄ŋ kpi᷅ŋgbi̍ ŋ̍ wa᷅ ni̍. Ndu̍yɛ̍, tē ō wa̍ pɛ̍ māā nyɛ̄ wa̍wo̍ŋ nɔ̍ le̍ wāa̍ o̍ dīāllūŋ nūmndo̍ŋ ni᷄ŋ ndo̍ mbō sīmnu᷄ŋ ma̍nyu̍m pɛ̍, mɛ̄ɛ̍ nyūmmā kāla᷄ŋ mā wā bɔ̍ɔ̍ kpi᷅ŋgbi̍ bɛ̍ndū.”

Lā la̍ndu᷄ŋ kɔ̍l le̍ nyɛ̄ dīa̍a̍ a̍ nyɛ̄ chūɛ̄ɛ̄na᷄ŋndo̍ le̍

(Lu̍kū 16:13; 12:22-31)

24“Bu̍ɛ̍ī o̍ bu̍ɛ̍ī cho̍ mbō wa̍ le̍ ma̍sāā ŋīɔ̍ɔ̍ŋ te̍. Kāni̍ fu̍u̍le̍, tē ho̍ō o̍ ka̍a̍la̍ ni̍, ō tu᷄l ō pīlɔ̍ɔ̄ lēyɛ̄. Tē ho̍ō o̍ di̍i̍ku̍ŋ ni̍, ō di̍i̍kūŋ o̍ pi᷅lɔ̍ɔ̄ le̍. Le̍la̍ŋ, wānā le̍ndūŋ kɔ̍l o̍ nyɛ̄ sɔ̄lāa̍, mā nɔ̍la̍ Mɛ̄lɛ̄ka̍ sāāŋgīāl te̍.

25“Le̍la̍ŋ mī di̍mu̍l nya̍, lā bu̍u̍la᷄ŋ le̍ nyɛ̄ nya̍ dīā wo̍ a̍ nyɛ̄ nya̍ kōl mī lā wa̍ yōōmū wo̍ le̍. Ndu̍yɛ̍, lā bu̍u̍la᷄ŋ le̍ nyɛ̄ nya̍ wōūnūŋ ndo̍ le̍. Kāni̍, yōōmū nya̍ nɔ̄ wo̍, ndu̍ hi̍o̍ū a̍ nyɛ̄ dīa̍a̍. Ndu̍yɛ̍, dīāllūŋ nya᷄ŋ mu̍ŋ hi̍o̍ū a̍ nyɛ̄ chūɛ̄ɛ̄na᷄ŋndo̍. 26Lā yīya̍ŋ ndɔ̍ a̍ yōūwa̍ o̍kɔ̄ɔ̄. Yōūwa̍ to̍sā ŋ̍chi̍ɛ̍ɛ̍ le̍, kɛ̄lɛ̄ŋgāā mā nɔ̄ īchīɛ̄ɛ̄ le̍ kōūwɔ̄ɔ̄. Ā do̍ū nyɛ̍ dīāā o̍ ko̍nda̍ le̍. Kɛ̍ ndu̍yɛ̍, o̍ ko̍ŋ ni̍ŋ kpo̍u̍, mī Mɛ̄lɛ̄ka̍ Fi̍nyā nyā o̍ ke̍ nda̍ nyɛ̄ nda̍ dīā wo̍. Lā hīu̍ yo̍ūwa̍ po̍lo̍ŋ te̍? Nya̍ hi̍o̍ū po̍lo̍ŋ. 27Ndu̍yɛ̍, ā yɔ᷄ŋ bɛ̍ɛ̍ mī lā būūla̍ŋ le̍ mu᷅ŋ kpo̍u̍, lā nɔ̄lā pa̍ mī lā chɔ̄ɔ̄lu̍ yōōmūlā nyāla̍ŋ bɛ̄ndī le̍ pāa̍le̍ŋ lē pīlɛ̍ bɛ̍ɛ̍ kpe̍? Lā nɔ̍lā le̍.

28“Ɔ̍ɔ̄ le̍ sa̍bū nya̍ būūlāŋ le̍ nyɛ̄ chūɛ̄ɛ̄na᷄ŋndo̍ wo̍? Lā yīya̍ŋ ndɔ̍ a̍ pɔ̄mbīa̍ŋ yōndōo̍ ni᷄ŋ mɛ̄ɛ̍ ma̍ na̍ŋ yɛ̍. Mā sa̍a̍ŋgīāā mɛ̄ɛ̍ wāŋndā chīe̍e̍ya̍ sāāŋgīāā yɛ̍ le̍. Ndu̍yɛ̍, mā to̍o̍sīāā la̍nyɛ̍ le̍. Kɛ̍, o̍ ko̍ŋ ni̍ŋ kpo̍u̍, lā to̍fa̍ wɔ̍ mɛ̄ɛ̍ ma̍ na̍ŋ yɛ̍. 29Mī di̍mu̍l nya̍, mi̍ chē bɛ̍ɛ̍ mi̍ Māsāa̍ Sɔ̍lɔ̍mɔ̄ŋ ndu̍ o̍o̍ su᷅l sūllo̍ pi̍la̍, kɛ̍, ndu̍ o̍o̍ nɔ̍ nyɛ̍ chūɛ̄ɛ̄na᷄ŋndo̍ mbō fūūlu̍u̍ nāŋɔ̄ɔ̍ mɛ̄ɛ̍ pɔ̄mbīa̍ŋ mā chō yɛ̍ le̍. 30Lā tōfa̍ wɔ̍ mɛ̄ɛ̍ Mɛ̄lɛ̄ka̍ nɛ̄ŋi̍ bīl fo̍ndōo̍ ho̍ō yɛ̍. Mī bīllo̍ ho̍ō wa̍ yōōmū māā hāū. Kɛ̍, dīi̍māndɔ̄ɔ̍ ā lōm ndu̍ o̍ yīŋ. O̍ ko̍ŋ ni̍ŋ kpo̍u̍, mī Mɛ̄lɛ̄ka̍ nɛ̄ŋi̍ ndu̍ nu̍a̍ā kpɛ̍. Nāa̍ o̍ to̍sa̍ wɔ̄ a̍ bīllo̍ le̍nde̍, ō nɔ̄lā kpe̍e̍kpe̍i̍ mbō ke̍ nya̍ nyɛ̄ chūɛ̄ɛ̄na᷄ŋndo̍. Lā nɔ̍ la̍a̍la᷄ŋ bɔ̍ɔ̍ le̍ ma᷅.”

31Mi̍ Chi̍i̍sū hi̍a̍ū lāchī a̍ sūɛ̍i̍ āā, “Le̍la̍ŋ, lā wa᷅ o̍ kɔ̄l lānda᷄ŋ ni̍ŋ le̍ nyɛ̄ nya̍ dīā wo̍, a̍ nyɛ̄ nya̍ kōl lo̍, a̍ nyɛ̄ nya̍ wōūnūŋ ndo̍ le̍. Lā wa᷅ o̍ kɔ̄l lānda᷄ŋ ni̍ŋ le̍ nyɛ̄m mu᷅ŋ te̍. 32Kāni̍ fu̍u̍le̍, le̍ nyɔ̄ɔ̍ŋ mu᷅ŋ ko̍ni̍ wānāa̍ la̍a̍la̍ŋ te̍ wa̍ ā lāndu̍ŋ kɔ̍l ni̍. Kɛ̍, nya̍ nya̍, lā nɔ̍ mī lā wa̍ o̍ kɔ̄l lānda᷄ŋ ni̍ŋ le̍ mu̍ŋ te̍. Kāni̍ fo̍ndōle̍, Mɛ̄lɛ̄ka̍ fi̍nyā nyā ndu̍ si̍nā māā lā nɔ̄ le̍ nyɔ̄ɔ̍ŋ mu᷅ŋ sɔ̄lāa̍. 33Lā lāndu̍ŋ ndɔ̍ fɛ̍lɛ̍ŋ kɔ̍l le̍ mī Mɛ̄lɛ̄ka̍ wa̍ nya̍ chōo̍ ma̍sāa̍ mbō hīōū a̍ nyɛ̄ o̍ nyɛ̄ chēle̍ŋ. Ndu̍yɛ̍, mī lā lāndu̍ŋ kɔ̍l le̍ mī lā tōsa̍ nyɛ̄ Mɛ̄lɛ̄ka̍ hɛ̄na̍ŋ nya̍ le̍ tōsāa̍ wo̍. O̍ ko̍ŋ kɔ̍ɔ̍lī, nyɔ̄ɔ̍ŋ ŋ̄ tɔ̄ɔ̍ŋ bɛ̍ɛ̍ fa̍ū Mɛ̄lɛ̄ka̍ nɔ̄lā mbō ke̍ nya̍. 34Le̍la̍ŋ, lā la̍ndu᷄ŋ kɔ̍l le̍ sīɔ̄dīi̍ le̍. Sɔ̄ɔ̍ŋ kɔ̄l lānda᷄ŋndo̍ŋ le̍ sīɔ̄dīi̍ ŋ̄ chō ta̍u̍. Kɛ̍, mu̍ŋ mu̍ŋ, ŋ̍ wa̍ le̍ sīɔ̄dīi̍. Lā ha̍ndū sɔ̄ɔ̍ŋ kɔ̄l lānda᷄ŋ cho̍ le̍ sīɔ̄dīi̍ yo̍ŋ o̍ mu᷅ŋ hāū cho̍o̍ le̍.”

Currently Selected:

Māa̍ti̍u̍ 6: YM

Highlight

Copy