Māa̍ti̍u̍ 28

Chi̍i̍sū mi̍i̍ŋgu̍ yōōmū

(Ma̍kī 16:1-10; Lu̍kū 24:1-12; Chɔ᷄ŋ 20:1-10)

1Mi̍ pāa̍le̍ pɛ̍ŋgīāālē Chu̍ūwa̍ lē hīāū. Mɛ̄ɛ̍ pāa̍le̍ŋ lē wa̍ sīɔ̍ɔ̍, Mēēle̍ Mākāli᷅ŋ ni̍, a̍ Mēēli̍o̍o̍ ō pīlɔ̍ɔ̄, ma̍ cha᷄ŋ o̍ pāa̍le̍ kpu̍yālē lēŋ chōo̍ ma̍ kūā le̍ sɛ̄īyo̍ tōfāa̍. 2O̍ lēpīlɛ̍ ni᷄ŋ kpe̍, mi̍ lɛ̄ŋnde̍ŋ lē kāndū nyīīyāa̍ ta̍u̍ ta̍u̍. Mi̍ ki̍i̍la̍nɔ̍ Māsānɔ̄ɔ̍ Mɛ̄lɛ̄ka̍a̍ cha᷄ŋ ɛ̄chɛ̍nɛ̄ mbo̍ tūāl lɛ̄ŋ. Mbo̍ fāŋā pōu̍ wa̍ o̍ sɛ̄ī būūlōo̍ ho̍ō sōndōo̍ wo̍, mbo̍ chāl lēchōo̍. 3Wānā ndu̍ o̍o̍ che᷅ ndu̍ dīōndɔ̄ɔ̍ pɛ̍, to̍fa̍ wɔ̍ ko̍ mɛ̄ɛ̍ nyɛ̄ ŋūāla̍lɛ̍īyo̍ yɔ̄nūŋ nu̍a̍ā mī pa̍ŋgēlo̍o̍ tīu̍ si̍lɔ̍ yɛ̍. Nyɛ̄la̍ŋ ndu̍ lēkɔ̄ɔ̍ la̍ wa̍ lā hūmbū fo̍ fo̍ bɛ̍ndū. 4Mi̍ sīōōŋnde̍ bīī so̍vɛ̄i̍ya̍a̍ wa̍ sɛ̄īyo̍ māndāa̍ wa̍, mā nyīīyā kpa᷅ kpā bɛ̄ndū, ma̍ wōū. Ma̍ yɔ̄nu᷄ŋ māā wānāā vīlɛ̍i̍.

5Mi̍ ki̍i̍la̍nɔ̍ Mɛ̄lɛ̄ka̍a̍ ho̍ō sūāā nāa̍ wāŋ lāāndūa̍a̍ ha̍ā chūā. Mbo̍ dīmūl nda̍ āā, “Lā yɔ᷅ŋ īsīōōŋ te̍. I̍ si̍nā māā Chi̍i̍su̍ ō nda̍ ba᷄ŋ o̍ yɔ̄m sīŋgāfīlāa̍ chōo̍ wo̍ māā ndu̍ nya̍ chō nūūvīa̍a̍ ni̍. 6Ō cho̍ lɛ̍ na̍nu᷄ŋ te̍. Ō mīīŋgu̍ yōōmū mɛ̄ɛ̍ o̍ di̍mi̍ māā ō chō mīīŋgū yōōmū yɛ̍. Lā hu᷄ŋ mī lā hu᷄ŋ to̍fā nāa̍ o̍ wa̍ ō yāmbāā wa̍.” 7O̍ ko̍ŋ kɔ̍ɔ̍lī, mi̍ ki̍i̍la̍nɔ̍ Mɛ̄lɛ̄ka̍a̍ ho̍ō dīmūl nda̍ āā, “Lā kɔ̍ ni̍ko̍ chɔ̍ chɔ̍ mī lā kɔ̍ di̍mūl bu̍ɛ̍i̍yāā ndūa̍a̍ māā ō mīīŋgu̍ yōōmū, ndu̍yɛ̍, māā ō chō kɔ̄la̍ŋ pɔ̄ɔ̄ nya̍ lāchī Kāli̍lī. Lo̍ŋ nya̍ chō ndu̍ chɔ̄ ni̍. Yōōŋgōo̍ ho̍ō ya̍ chu̍u̍ nya̍ ni̍.”

8O̍ ko̍ŋ kɔ̍ɔ̍lī, mi̍ wāŋ lāāndūa̍a̍ ha̍ā fāŋa᷄ŋ o̍ sɛ̄īyo̍ chɔ̍ chɔ̍. Sīōōŋnde̍ wa̍ nda̍, kɛ̍ ndu̍yɛ̍, ā wa̍ vɛ̄lɛ̄ a̍ kɔ̄l kɛ̄ndɛ̄ ta̍u̍. Ma̍ kūā a̍ kīlta̍ŋ le̍ mā kɔ̍ di̍mūl bu̍ɛ̍i̍yāā ndūa̍a̍.

9Kɛ̍ ā lo̍ kɔ̄la̍ŋ, o̍ lēpīlɛ̍ ni᷄ŋ kpe̍, ma̍ chā Chi̍i̍su̍ nda̍ lāchī. Mbo̍ yīl nda̍ āā, “Lā wo̍sɛ̄.” Ma̍ kūā nāa̍ ndu̍ chu̍a̍ ma̍ bāŋ wūla̍ŋ ndu̍ o̍ lābɛ̄ŋgu̍ ni̍ŋ ma̍ bīī ndu̍ bɛ̄ŋgu̍la̍ŋ ma̍ sāŋgālā ndu̍. 10Mi̍ Chi̍i̍sū di̍mūl nda̍ āā, “Lā yɔ᷅ŋ īsīōōŋ te̍. Lā kɔ̍ mī lā kɔ̍ di̍mūl pɔ̄mbūāā nīa̍a̍ mā kūɛ̄ Kāli̍lī mī ŋ̄ chīīki̍āŋ lo̍ŋ.”

Ko̍na̍ so̍vɛ̄i̍ya̍ dɔ̄ūnu᷄ŋ ndo̍

11Mɛ̄ɛ̍ wāŋ lāāndūa̍a̍ wa̍ kɔ̄la̍ŋ, mi̍ so̍vɛ̄i̍ya̍a̍ wa̍ sɛ̄īyo̍ māndāa̍ wa̍ ā ti᷄ŋ mīīŋgū Chūlu̍sɛ̄lɛ̄m chi̍e̍e̍. Mɛ̄ɛ̍ nda̍ mīīŋgu̍, ma̍ kɔ̍ do̍u̍nu᷄ŋ wānāā bɛ̄ndūa̍a̍ sōlīāā lāsa̍lāa̍ a̍ nyɛ̄ o̍ nyɛ̍ yɔ̍nu̍ŋ. 12Mi̍ wānāā bɛ̄ndūa̍a̍ ha̍ā nda̍ lāŋgba̍ā kālla̍ ma̍ kɛ̄ɛ̄sīāā a̍ ndi̍ o̍kɔ̄ɔ̄. Ma̍ kē so̍vɛ̄i̍ya̍ nyɛ̄ sɔ̄lāa̍ ta̍u̍. 13O̍ ko̍ŋ kɔ̍ɔ̍lī, ma̍ dīmūl nda̍ āā, “Nyɛ̄ nya̍ nɔ̄ mī lā dīmi̍ wo̍ cho̍ ni̍ āā, ‘A̍ bōōndi̍i̍ na̍a̍ ŋ̄ wa̍ o̍ mālɔ̄ ve̍, mi̍ bu̍ɛ̍i̍yāā ndūa̍a̍ hūŋ a̍ nyūmnda̍ŋ ma̍ hu᷄ŋ chi̍i̍mbu̍u̍ dīāllūŋ ndɔ᷄ŋ.’ 14Tē ō wa̍ pɛ̍ mī māsa̍ māLu̍o̍ma᷅ŋndo̍ tūēī a̍ ndi̍ o̍kɔ̄ɔ̄, ŋ̄ nɔ̄lā mī ŋ̄ sōō nāa̍ ndu̍ chu̍a̍. Ā yɔ᷅ŋ nya̍ nyɛ̄ le̍.”

15O̍ ko̍ŋ kɔ̍ɔ̍lī, mi̍ so̍vɛ̄i̍ya̍ bīī nyɛ̄ sɔ̄lāa̍. Ma̍ tōsā mɛ̄ɛ̍ nda̍ dīmu̍l nda̍ yɛ̍. Le̍la̍ŋ, pāa̍le̍ hāūle᷅ŋ bɛ̍ɛ̍, ko̍na̍ so̍vɛ̄i̍ya̍ dɔ̄ɔ̄nu᷄ŋ ko̍ŋ ndo̍ ndu̍ ko̍ni̍ cho̍ Chu̍ūwa̍ o̍ sōndō ni̍.

Nyɛ̄ Chi̍i̍sū ve᷅m bu̍ɛ̍īya̍ le̍ tōsāa̍ wo̍

(Ma̍kī 16:14-18; Lu̍kū 24:36-49; Chɔ᷄ŋ 20:19-23; Wa̍lta̍ Wānāa̍ Chi̍i̍sūa̍a̍ 1:6-8)

16Mi̍ bu̍ɛ̍i̍yāā ŋ̄wāŋ tɔ̍ a̍ wānā pi᷅li̍a̍a̍ kūā o̍ lɛ̄ŋndē Kāli̍līle̍ŋ ni᷄ŋ. Ma̍ kɔ̍ he᷅l o̍ pēmbēi̍ chōo̍ nāa̍ Chi̍i̍sū di̍mu̍l nda̍ māā ā kɔ̍ wa̍. 17Mɛ̄ɛ̍ nda̍ chē ndu̍, ma̍ bāŋ wūla̍ŋ le̍ ndu̍, ma̍ sāŋgālā ndu̍. Kɛ̍, ā pūm ā lāāla̍ŋ māā ndu̍ le̍. 18Mi̍ Chi̍i̍sū sɔ̍ɔ̍ŋgūū nda̍ īkɛ̄i̍ mbo̍ dīmūl nda̍ āā, “Mɛ̄lɛ̄ka̍ ke̍ ya̍ kpāāyāa̍ nyɛ̄ o̍ nyɛ̄ chōo̍, cho̍o̍ cho̍o̍ ni̍ a̍ o̍ chi̍e̍ēŋndo̍ chōo̍. 19Le̍la̍ŋ, lā kɔ̍ o̍ ŋ̄wāŋndā chīe̍e̍ lo̍ ba᷅ o̍ bā fe̍e̍ mī lā sīīŋgu̍u̍ nda̍ bu̍ɛ̍i̍yāā nī mī lā yīŋ nda̍ yīŋɔ̄ɔ̍ Mɛ̄lɛ̄ka̍a̍. Lā wa̍ nda̍ yīŋɔ̄ɔ̍ pɛ̍, lā pɛ̄l dīōla̍ Mɛ̄lɛ̄ka̍ Fi̍nyāa̍, a̍ Po̍ ndɔ̄ɔ̍, a̍ Nyi̍na̍ Mɛ̄lɛ̄ka̍a̍. 20Mī lā pɛ̄ɛ̄ku̍ nda̍ mā tōsa̍ nyɛ̄ o̍ nyɛ̄ ya̍ di̍mu̍l nya̍ le̍ tōsāa̍. Ndu̍yɛ̍, lā kɛ̄si̍ŋ o̍ lākɔ̄l māā I̍ cho̍ wā lātūlu̍ a̍ nya̍ ha̍a̍a̍ mbō lo̍ o̍ ko̍ŋ mī chi̍e̍ēŋndo̍ ho̍ō fūūlu̍u̍ o̍ mɛ̄ɛ̄lu̍la̍ŋ.”

Currently Selected:

Māa̍ti̍u̍ 28: YM

Highlight

Copy