Māa̍ti̍u̍ 26

Ā kɛ̄ɛ̄si̍a̍a̍ le̍ Chi̍i̍su̍ dīyɔ̄ɔ̍

(Ma̍kī 14:1-2; Lu̍kū 22:1-2; Chɔ᷄ŋ 11:45-53)

1Mɛ̄ɛ̍ Chi̍i̍sū chi̍i̍ dīōmnda̍ŋ nda᷅ŋ dīmī kpo̍u̍, mbo̍ dīmūl bu̍ɛ̍i̍yāā ndūa̍a̍ āā, 2“Lā sīnā māā ō lo̍ ni᷅ŋ pālɛ̍i̍ ī ŋīi̍ŋ le̍ mī bɔ̄ŋa᷅ŋ lōōna᷄ŋndo̍ a̍ hīōūwɔ̄ɔ̍ chōo̍ o̍kɔ̄ɔ̄ ō fūūlu̍u̍. A̍ bōōndi̍i̍ ke̍ŋ, ā māl ni̍ŋ wa᷅na̍ nda̍ vēēlū āā, Po̍ Wānā Pɔ̍nɔ̍ɔ̍ wo̍ wāŋnda̍ o̍ bā le̍ mā ba᷄ŋ ndu̍ o̍ yɔ̄m sīŋgāfīlāa̍ chōo̍ mā dīī ndu̍.”

3O̍ ko̍ŋ kɔ̍ɔ̍lī, mi̍ wānāā bɛ̄ndūa̍a̍ sōlīāā lāsa̍lāa̍ a̍ lāŋgba̍ā kālla̍ kūā ma̍ kɔ̍ bi̍ī bɔ̄ŋa᷅ŋndo̍ o̍ chīɛ̄ī māsa̍ wānāā sōlīāā lāsa̍lāa̍, dīōla̍ŋ āā, Ka̍ya̍fāā. 4Ma̍ kɛ̄ɛ̄sīāā le̍ Chi̍i̍su̍ bīyɔ̄ɔ̍ sɔ̍ɔ̍ sɔ̍ɔ̍ wāŋnda̍ si̍nā a̍ ndi̍ o̍kɔ̄ɔ̄ le̍, o̍ ko̍ŋ kɔ̍ɔ̍lī, mī nda̍ a̍a̍ di̍ī ndu̍. 5Ma̍ dīmī āā, “Kɛ̍, ŋ̄ to̍sāŋ sūɛ̍i̍ he̍ī a̍ te̍le̍ŋ bɔ̄ŋa᷅ŋ lōōna᷄ŋndo̍ ho̍ō le̍. Tē ŋ̄ tōsa̍ ndi̍ a̍ bōōnde̍i̍ he̍ī pɛ̍, wāŋnda̍ chō sɔ̍ŋgɔ̄ɔ̍ mālɔ̄ɔ̄.”

Chūā pīlɛ̍ tāla̍ si̍ɛ̍ndīi̍ya̍ŋ Chi̍i̍su̍ o̍ lēbōl

(Ma̍kī 14:3-9; Chɔ᷄ŋ 12:1-8)

6Bōōndi̍i̍ pi᷅lɛ̍, Chi̍i̍sū wa̍ Bɛ̍ta̍nī chi̍e̍e̍ o̍ chīɛ̍i̍ Sa̍i̍mɔ̄ŋndo̍, ō ndu̍ o̍o̍ nɔ̍ pāāndū nāā wɔ̄ɔ̍ŋndo̍ ō pūm lēkɔ̄ɔ̍ wo̍. 7Mɛ̄ɛ̍ o̍ wa̍ īchāli̍ nyɛ̍ dīa̍a̍ dīo̍o̍, mi̍ chūā pīlɛ̍ hūŋ a̍ si̍ɛ̍ndīi̍ma̍ ba̍ā kālā ka̍lā mā pūm o̍ sānī pu̍m ni᷄ŋ māā bāābɔ̍ɔ̍ŋ. Hūnɔ̄ɔ̍ a̍ ma̍ŋ mbo̍ tālā ma̍ŋ Chi̍i̍sū o̍ lēbōl. 8Mɛ̄ɛ̍ bu̍ɛ̍i̍yāa̍ Chi̍i̍sūa̍a̍ chē nyɛ̄ chūa̍a̍ ho̍ō tōsa̍ wo̍, mi̍ sūɛ̍i̍ nɛ̄ī nda̍. Ma̍ dīmī āā, “Nu̍a̍ wɔ̍ nyɛ̍ tɛ̄ɛ̄mbāā. 9Wānā ndu̍ o̍o̍ pi̍sī si̍ɛ̍ndīi̍ya̍ŋ ma᷅ŋ a̍ nyɛ̄ sɔ̄lāā bānā ba̍na̍ mī wānā ndu̍ o̍o̍ ke̍ wānāā tāmbɛ̍i̍ya̍ ka̍ni̍ŋ mu̍ŋ.”

10O̍ ko̍ŋ kɔ̍ɔ̍lī, mi̍ Chi̍i̍sū si̍nā a̍ nyɛ̄ nda̍ wa̍ dīmīo̍o̍ wo̍ o̍kɔ̄ɔ̄. Mbo̍ dīmūl nda̍ āā, “Lā pɛ̍ɛ̍sā chūa̍a̍ ho̍ō le̍. Kāni̍ fu̍u̍le̍, sūɛ̍i̍ kɛ̍ndɛ̄ī bɛ̄ndūe̍i̍ pi̍la̍ o̍ to̍sa̍ a̍ ya̍ ni̍. 11Wānāā tāmbɛ̍i̍ya̍ nda̍ nda̍ chō nya̍ tɛ̄ɛ̄ŋ le̍ lɔ̍ɔ̍ lɔ̍ɔ̍. Kɛ̍, ya̍ I̍ ve᷅ ni̍ŋ nya̍ tɛ̄ɛ̄ŋ lɔ̍ɔ̍ lɔ̍ɔ̍ le̍. 12Si̍ɛ̍ndīi̍ma̍ chūa̍a̍ ho̍ō tāla̍ ma᷅ŋ ya̍ chōo̍ wa̍ŋ, ō chō māchūāā dīāllūŋ nu᷄ŋ bɛ̄ɛ̄ndīāā le̍ mu̍ŋ hūnɔ̄ɔ̄ wōūwo̍ o̍ sɛ̄īyo̍ ni᷄ŋ. 13Ndu̍yɛ̍, lā sīna̍ pɛ̍ŋgu̍ māā bā o̍ bā fe̍e̍ Yōōŋgū Kɛ̄ndɛ̍ Mɛ̄lɛ̄ka̍a̍ ho̍ō dīmi̍ŋ o̍ chi̍e̍ēŋndo̍ ni᷄ŋ pɛ̍, wāŋnda̍ chō dīmī a̍ nyɛ̄ chūa̍a̍ ho̍ō tōsa̍ wo̍ o̍kɔ̄ɔ̄ le̍ ndu̍ lōōnɔ᷄ŋndo̍.”

Chu̍dā bi̍ī ka̍ni̍o̍ŋ le̍ Chi̍i̍sū

(Ma̍kī 14:10, 11; Lu̍kū 22:3-6)

14O̍ pāa̍le̍ pi᷅lɛ̍ lē le̍ŋ chōo̍ kpe̍, mi̍ bu̍ɛ̍i̍yāā ndūāā tɔ̍ a̍ ā ŋīɔ̍ɔ̍ŋnda̍ ō pīlɔ̍ɔ̄ ō nda̍ a̍a̍ ve̍e̍lū āā Chu̍dā Īsīka̍a̍līɔ̄ɔ̄ wo̍, mbo̍ kūā nāa̍ wānāā bɛ̄ndūāā sōlīāā lāsa̍lāa̍ chūā. 15Mbo̍ kɔ̍ nyu̍nā nda̍ āā, “Tē I̍ ma̍la̍ nya̍ Chi̍i̍su̍ bīyɔ̄ɔ̍ pɛ̍, ō yɛ̄ɛ̍nɛ̍ nya̍ kē yɛ̍ ya̍?” O̍ ko̍ŋ, ma̍ chɔ̄m ka̍ni̍ŋ hu̍mbo᷄ŋ be̍le̍-ya̍a̍ ma̍ kē ndu̍. 16Chɔ̍ŋ ni᷅ŋ a̍ bōōndi̍i̍ ke̍ŋ, mi̍ Chu̍dā sa̍ā nɛ̄īla̍ŋ nūūvīa̍a̍ le̍ mɛ̄ɛ̍ o̍ lo̍o̍kū mbō tōsa̍ mā tīu̍ Chi̍i̍sū bā yɛ̍.

Chi̍i̍sū nda̍ bu̍ɛ̍i̍yāā ndūa̍a̍ ā dē nyɛ̄ dīāā lōōna᷄ŋndo̍ a̍ hīōūwɔ̄ɔ̍ chōo̍ o̍kɔ̄ɔ̄

(Ma̍kī 14:12-21; Lu̍kū 22:7-13, 21-23; Chɔ᷄ŋ 13:21-30)

17Pāa̍le̍ pi᷅lɛ̍ mi̍ Chi̍i̍sū bu̍ɛ̍i̍yāā ndūa̍a̍ hūŋ nāa̍ ndu̍ chu̍a̍ a̍ nyūnāa̍. Ma̍ nyūnā ndu̍ āā, “Kūɛ̍ɛ̍nɛ̍ na̍a̍ ŋ̄ bɛ̄ɛ̄ndi̍a̍a̍ yɛ̍ le̍ mā dē nyɛ̄ dīāā bɔ̄ŋa᷅ŋ lōōna᷄ŋndo̍ a̍ hīōūwɔ̄ɔ̍ chōo̍ o̍kɔ̄ɔ̄?” Ndu̍yɛ̍, pāa̍le̍ tāse̍le̍ wāŋnda̍ dīā bēe̍dīi̍yo̍ ō nda̍ do̍ū yi̍i̍sīi̍ le̍ wo̍, le̍ŋ le̍ wa̍ le̍ŋ ni̍.

18Mi̍ Chi̍i̍sū mu̍lī āā, “Lā kɔ̍ chi̍e̍e̍ mī lā kɔ̍ di̍mūl po̍ pi᷅lɛ̍ lo̍ŋ āā, ‘Ti̍chā dīmi̍ āā, Bōōndi̍i̍ nīi̍ fūūlu̍u̍. Ya̍ ni̍ a̍ bu̍ɛ̍i̍yāā nīa̍a̍ o̍ chīɛ̄ī nūmndo̍ na̍a̍ ŋ̄ chō bɔ̄ŋa᷅ŋ lōōna᷄ŋndo̍ bīyɔ̄ɔ̄ a̍ hīōūwɔ̄ɔ̍ chōo̍ o̍kɔ̄ɔ̄ ni̍.’ ”

19Mi̍ bu̍ɛ̍īya̍ tōsā mɛ̄ɛ̍ Chi̍i̍sū chɔ̍m nda̍ yɛ̍. Ma̍ kūā ma̍ tōōsīāā nyɛ̄ dīāā kōŋ.

20Mɛ̄ɛ̍ nyūmnda̍ŋ mā to᷄l, mi̍ Chi̍i̍sū nda̍ bu̍ɛ̍i̍yāā ndūa̍a̍ chāl nyɛ̄ dīa̍a̍ dīo̍o̍. 21Mɛ̄ɛ̍ nda̍ wa̍ nyɛ̄ dīa̍a̍ ho̍ō dīo̍o̍, mbo̍ dīmūl bu̍ɛ̍i̍yāā ndūa̍a̍ āā, “Mī di̍mu̍l nya̍, nya̍ cha̍l ha̍ā wa̍, wānā pi᷅lɛ̍ chō nya̍ tɛ̄ɛ̄ŋ ō chō ya̍ hūnɔ̄ɔ̄ pīsī.”

22Mi̍ mɔ̍nɛ̍i̍ bīī bu̍ɛ̍i̍yāā ndūa̍a̍ ta̍u̍. Ma̍ kāndū dīmīo̍o̍ ā pīlɛ̍ŋ pi̍lɛ̍ŋnda̍ āā, “Ya̍ ō cho̍ ya̍ le̍, Māsānɔ̄ɔ̍. Ya̍ ō cho̍ ya̍ le̍ Māsānɔ̄ɔ̍.”

23Mi̍ Chi̍i̍sū di̍mūl nda̍ āā, “Wāna̍ na̍a̍ ŋ̄ dīā nyɛ̍ dīa̍a̍ o̍ hɛ̄ŋgɛ̍i̍ pi᷅lɔ̍ɔ̍ ni᷄ŋ na̍a̍ ndu̍ wo̍, ndu̍ kpe̍e̍kpe̍i̍ cho̍ ya̍ pīsī ni̍. 24Ndu̍yɛ̍, wāna̍ nda̍ vēēlū āā, Po̍ Wānā Pɔ̍nɔ̍ɔ̍ wo̍ nɔ̄ le̍ pīɔ̍mndo̍ sɔ̄lāa̍, mɛ̄ɛ̍ i̍ di̍mi̍ŋ o̍ Yāu̍ Mɛ̄lɛ̄ka̍a̍ ni᷄ŋ māā ō chō wu̍ yɛ̍. Kɛ̍ ndu̍yɛ̍, wāna̍ cho̍ ndu̍ pīsī wo̍, nyɛ̄ pālāa̍ wā ni̍ŋ bɔ̍ɔ̍ le̍ ndu̍. Ndu̍ o̍o̍ na᷅ŋ bɛ̍ɛ̍ māā nda̍ a̍a̍ vi̍a̍lū bɛ̍ɛ̍ wa̍nā ko̍ŋ kpo̍so̍ŋ te̍.”

25Mi̍ Chu̍dā, o̍ wa̍ ndu̍ hūnɔ̄ɔ̄ pīsī wo̍ lō o̍ ko̍ŋ, ndu̍ bɛ̍ɛ̍ mbo̍ dīmī āā, “Ya̍ ō cho̍ ya̍ le̍, Ti̍chā.”

Mi̍ Chi̍i̍sū di̍mūl ndu̍ āā, “Nūm kpe̍e̍kpe̍i̍.”

Mɛ̄ɛ̍ nyɛ̄ dīāā wānāā lāāla᷄ŋnda̍ kāndu̍ŋ yɛ̍

(Ma̍kī 14:22-26; Lu̍kū 22:14-20; Kɔ̄li̍ŋtīāŋ Tāso̍o̍ 11:23-25)

26Mɛ̄ɛ̍ nda̍ wa̍ nyɛ̄ dīa̍a̍ dīo̍o̍, mi̍ Chi̍i̍sū chu̍ā bēe̍dīi̍yo̍. Mbo̍ mēl Mɛ̄lɛ̄ka̍ ba̍li̍ka̍. Mbo̍ yīmī yīmī. Mbo̍ kē bu̍ɛ̍i̍yāā ndūa̍a̍. Mbo̍ dīmūl nda̍ āā, “Lā bīi̍ mī lā dē. Dīāllūŋ nu᷄ŋ cho̍ mu᷅ŋ ni̍.”

27O̍ ko̍ŋ kɔ̍ɔ̍lī, mbo̍ chūā tāālāa̍ mbo̍ mēl Mɛ̄lɛ̄ka̍ ba̍li̍ka̍. Mbo̍ kē nda̍. Mbo̍ dīmūl nda̍ āā, “Nya̍ kpe̍de̍ lā ko᷄l. 28Kōo̍ma̍ nīa̍ŋ ma̍ cho̍ ma᷅ŋ ni̍. A̍ kōo̍ma̍ nīa̍ŋ Mɛ̄lɛ̄ka̍ yīi̍ kpe̍ma̍a̍ nda̍ ŋ̄wāŋndā chīe̍e̍ ni̍. Ma̍ŋ ma̍ ta̍la̍ le̍ wānāā fāŋgā fa̍ŋgā ni̍, le̍ mī Mɛ̄lɛ̄ka̍ ma᷄l nda̍ le̍ yɔ̄ŋndā ndāla̍ wɔ̍ɔ̍ŋnda̍ŋ. 29Mī di̍mu̍l nya̍ tōnya̍a̍, I̍ cho̍ lɛ̍ mūɛ̄īya̍ŋ ma᷅ŋ kōlɔ̄ɔ̄ le̍ ha̍a̍a̍ mbō lo̍ o̍ ko̍ŋ mbō fūūlu̍u̍ a̍ pāa̍le̍ ya̍ I̍ cho̍ mūɛ̄īmā sɛ̄nɛ̄īya̍ŋ kōlɔ̄ɔ̄ na̍a̍ nya̍ā o̍ Māsāle̍ Mɛ̄lɛ̄ka̍ Fi̍nyā nūu̍ le̍ŋ ni᷄ŋ ndo̍.”

30O̍ ko̍ŋ kɔ̍ɔ̍lī, ma̍ sōlī chōndi̍i̍ bɔ̄ŋa᷅ŋ lōōna᷄ŋnde̍ a̍ hīōūwɔ̄ɔ̍ chōo̍ o̍kɔ̄ɔ̄. Ma̍ kūā o̍ Pēmbīī Yɔ̄mīī Ɔ̄li̍fīi̍ve̍ ve̍ chōo̍.

Chi̍i̍sū di̍mi̍ māā Pītɛ̍ cho̍ ndu̍ kɛ̄ɛ̄

(Ma̍kī 14:27-31; Lu̍kū 22:31-34; Chɔ᷄ŋ 13:36-38)

31Mi̍ Chi̍i̍sū di̍mūl bu̍ɛ̍i̍yāā ndūa̍a̍ āā, “Chūɛ̄llɛ̄ŋ nya̍ fa̍ū lā chō ya̍ mālɔ̄ɔ̄ mī lā nyāānu̍ŋ. Ka̍ni̍ fo̍ndōle̍, Yāu̍ Mɛ̄lɛ̄ka̍a̍ dīmi̍ āā, ‘I̍ cho̍ wāna̍ cho̍ sāa̍ māndāa̍ wo̍ dīyɔ̄ɔ̄, o̍ ko̍ŋ kɔ̍ɔ̍lī, mī sāā ku̍ndāa̍ ā sāŋnu̍ŋ.’ ” 32Mi̍ Chi̍i̍sū hi̍a̍ū lāchī a̍ sūɛ̍i̍ āā, “Kɛ̍, tē I̍ mi̍i̍ŋgu̍ yōōmū pɛ̍, I̍ cho̍ lākɔ̄ nya̍ lāchī Kāli̍lī.”

33Mi̍ Pītɛ̍ di̍mūl Chi̍i̍su̍ āā, “Ā yɔ᷄ŋ bɛ̍ɛ̍ mī bu̍ɛ̍īya̍ ā tūa̍a̍ kpo̍u̍ mā ma᷄l nu̍m mā nyāānu̍ŋ, kɛ̍ ya̍ ya̍, i̍ me᷅l nu̍m te̍.”

34Mi̍ Chi̍i̍sū di̍mūl Pītɛ̍ āā, “Mī di̍mu̍l nu̍m, lɔ̍ɔ̍pa̍ sɔ̄ɔ̍ kōōwā si̍ɔ̍dīi̍ ā chō vīīnɔ᷄ŋ lē yāa̍ māā a̍ si̍nā ya̍ le̍.”

35Mi̍ Pītɛ̍ mu̍lī āā, “Ŋ̄ wū ma̍wu̍a̍ā na̍a̍ nūm, kɛ̍, I̍ vi̍i̍nūŋ māā I̍ si̍nā nu̍m te̍ le̍.”

Bu̍ɛ̍īya̍ a̍ pīli̍a̍a̍ kpo̍u̍ nda̍ bɛ̍ɛ̍, mɛ̄ɛ̍ Pītɛ̍ di̍mi̍ yɛ̍, le̍nde̍ ko̍ni̍ nda̍ dīmi̍ ni̍.

Chi̍i̍sū pi̍ɛ̍i̍ Mɛ̄lɛ̄ka̍ o̍ fo̍ndāŋndo̍ dīōla̍ŋ āā, Kɛ̄sɛ̍ma̍nī

(Ma̍kī 14:32-42; Lu̍kū 22:39-46)

36O̍ ko̍ŋ kɔ̍ɔ̍lī, mi̍ Chi̍i̍sū ku̍ā a̍ bu̍ɛ̍i̍yāā ndūa̍a̍ kɔ̄ɔ̄lī o̍ fo̍ndāŋ pīlɛ̍ dīōla̍ŋ āā, Kɛ̄sɛ̍ma̍nī. Mbo̍ dīmūl nda̍ āā, “Lā cha᷄l na̍nū. I̍ cho̍ lākɔ̄ nda̍ mī kɔ̍ pi̍ɛ̍ī Mɛ̄lɛ̄ka̍.” 37Mbo̍ kūā a̍ Pītɛ̍ a̍ pūa̍a̍ ŋi̍ɔ̍ɔ̍ŋāa̍ Sɛ̍bɛ̍dīī. Mi̍ mɔ̍nɛ̍i̍ bɛ̍ndūe̍i̍ pīā o̍ kɔ̄l ndɔ̄ɔ̍ ni᷄ŋ. Mi̍ kɔ̄l ndɔ̄ɔ̍ tāmbū ta̍u̍. 38Mbo̍ lō o̍ ko̍ŋ mbo̍ dīmūl nda̍ āā, “Mɔ̍nɛ̍i̍ cho̍ o̍ kɔ̄l nūu̍ ni᷄ŋ nde̍ ī chō fāŋgā. Ī lō ko̍ mī ī dīī ya̍. Lā lo̍ pɔ̍ɔ̍ na̍nu᷄ŋ, ndu̍yɛ̍, lā wa᷅ ā pūɛ̄ya᷄ŋ te̍.”

39Mɛ̄ɛ̍ o̍ ku̍ɛ̄ ti᷄ŋ lāchī, mbo̍ hīnī lɛ̄ŋ sa̍na̍a̍ a̍ hɔ̄lla̍ ā kūūmbāā lɛ̄ŋ. Mbo̍ pīɛ̄ī Mɛ̄lɛ̄ka̍ āā, “Fi̍nyā nūu̍, tē ī yɔ̄nūŋ pɛ̍, mɛ̄ɛ̍ chɛ᷅l mī I̍ ko̍l a̍ tāāla̍ īmɔ̍nɔ̍ɔ̍ ho̍ō le̍. Kɛ̍ ndu̍yɛ̍, nyɛ̄ ŋ̄ hɛ̄na̍ŋ ndo̍ ndu̍ ŋ̄ tōsa̍ ni̍. Ō cho̍ nyɛ᷅ ya̍ ya̍ hɛ̍nāŋ ndo̍ le̍.”

40Mbo̍ mīīŋgū nāa̍ bu̍ɛ̍i̍yāā ndūa̍a̍ chūā. Mīīŋgōo̍, mbo̍ kōmāl nda̍ o̍ mālɔ̄. Mbo̍ nyūnā Pītɛ̍ āā, “Vɛ᷅ lā nɔ̍lā mī lā wa̍ lāhɔ̄l, ndu̍yɛ̍, mī lā wa̍ ā bɛ̄ɛ̄ndīa̍ŋ a̍ ya̍ la̍tu̍lu̍ le̍ ha̍vɛ̍i̍yo̍ ō pīlɛ̍ bɛ̍ɛ̍ le̍? 41Lā wa᷅ ā pūɛ̄ya᷄ŋ te̍. Ndu̍yɛ̍, lā pīɛ̍i̍ Mɛ̄lɛ̄ka̍ māā tē nyi̍nā wɔ̄ɔ̍ŋndo̍ tɔ̄ɔ̄nda̍ŋ nya̍ pɛ̍, māā lā to̍sā yɔ᷅ŋ wɔ̄ɔ̍ŋ te̍. Lā chō ā chɛ̄lāā le̍ he̍ī tōsāa̍ o̍ kɔ̄lta̍ŋ ni᷄ŋ, kɛ̍, dīāllo̍ŋ mu̍ŋ cho̍ nya̍ ŋ̄ vīlɛ̍i̍ pɛ̍.”

42Mi̍ Chi̍i̍sū ku̍ā vɛ̄lɛ̄ dīi̍ŋ ndɔ̄ɔ̍ mbo̍ pīɛ̄ī Mɛ̄lɛ̄ka̍ āā, “Fi̍nyā nūu̍, tē ō wa̍ pɛ̍ māā a̍ fe̍ŋā ya̍ tāāla̍ īmɔ̍nɔ̍ɔ̍ ho̍ō kūēē le̍, mɛ̄ɛ̍ mī ko̍l a̍ ndu̍, mɛ̄ɛ̍ to̍sa̍ nyɛ᷅ ŋ̄ hɛ̄na̍ŋ ndo̍.” 43Mbo̍ mīīŋgū vɛ̄lɛ̄. Mbo̍ kōmāl nda̍ vɛ̄lɛ̄ o̍ lūa̍a̍ŋ. Le̍ hɔ̄lta̍ŋ kūmbīo̍o̍ bɛ̍ɛ̍, ō wa̍ nda̍ o̍ bā ō kālā.

44Mi̍ Chi̍i̍sū mɛ̍ī nda̍ vɛ̄lɛ̄ mbo̍ kūā o̍ yāa̍ ndɔ̄ɔ̍. Mbo̍ kɔ̍ pi̍ɛ̍ī Mɛ̄lɛ̄ka̍ a̍ dīōmndā pīlɛ̍ lā lāŋ dīmīo̍o̍. 45O̍ ko̍ŋ kɔ̍ɔ̍lī, mbo̍ mīīŋgū nāa̍ nda̍ chūā. Mbo̍ dīmūl nda̍ āā, “Lā chō wɔ̄ o̍ lūa̍a̍ŋ? Lā chō wɔ̄ pɛ̄ŋgīo̍o̍ kɛ᷅? Lā tōfa̍ wɔ̍. Bōōnde̍i̍ fūūlu̍u̍ le̍ mā ma᷄l wāna̍ nda̍ vēēlū āā Po̍ Wānā Pɔ̍nɔ̍ɔ̍ wo̍ wānāā yɔ̄ŋ wɔ̄ɔ̍ŋnda̍ o̍ bā. 46Lā chɔ᷄ŋ ŋ̄ kɔ̄ŋnu᷅ŋ. Ā chē wāna̍ cho̍ ya̍ pīsīo̍o̍ wo̍ hūnɔ̄ɔ̍.”

Ā mɛ̄ɛ̍ nda̍ bīī Chi̍i̍sū yɛ̍ o̍kɔ̄ɔ̄

(Ma̍kī 14:43-50; Lu̍kū 22:47-53; Chɔ᷄ŋ 18:3-12)

47Chi̍i̍sū lo̍ sūɛ̍i̍ mi̍ bu̍ɛ̍i̍yāā ndūāā tɔ̍ a̍ ā ŋīɔ̍ɔ̍ŋnda̍ ō pīlɔ̍ɔ̍ ndu̍ yɔ̍nūŋ māā Chu̍dā ni̍, mbo̍ hūŋ a̍ wāŋnda̍ fāŋgā bɛ̍ndōo̍. Mɔ̄ɔ̍ŋ wa̍ nda̍ o̍ lābā a̍ yɔ̄mīī bīŋgīe̍i̍. Ndu̍yɛ̍, wānāā bɛ̄ndūa̍a̍ so̍lī sa̍lāa̍ o̍ Mɛ̄lɛ̄ka̍ lo̍ wa̍ a̍ lāŋgba̍ā kālāā Chu̍ūwa̍ nda̍ ve᷅m nda̍ ni̍. 48Mi̍ wāna̍ wa̍ Chi̍i̍su̍ pīsīo̍o̍ wo̍ chɔ̄m nda̍ māā tāāmāsi̍ āā, “Tē ŋ̄ kūɛ̄ pɛ̍, wāna̍ ya̍ I̍ cho̍ kɔ̄ma᷄ŋ mī sɔ̍sa̍ ndu̍ kūu̍wo̍ wo̍, mɛ̄ɛ̍ ndu̍ ni̍. Lā bīi̍ ndu̍.”

49Mɛ̄ɛ̍ Chu̍dā hi᷅ŋ dɔ̍ɔ̍, mbo̍ kūā sa̍kpō nāa̍ Chi̍i̍sū chu̍a̍. Mbo̍ yīl ndu̍ āā, “Māsānɔ̄ɔ̍, i̍sɛ̄.” Mbo̍ kɔ̄ma᷄ŋ ndu̍ mbo̍ sɔ̄sā ndu̍ kūu̍wo̍.

50Mi̍ Chi̍i̍sū mu̍lī āā, “Chāa̍ŋ nūu̍, to̍sa̍ nyɛ᷅ ŋ̄ hīŋ tōsā wo̍.”

O̍ ko̍ŋ, mi̍ pūa̍a̍ fūlā ma̍ bīī Chi̍i̍sū. Ma̍ sāā ndu̍ mɔ̍ndɔ̍ mɔ̍ndɔ̍ bɛ̍ndū. 51Mi̍ wānāa̍ wa̍ Chi̍i̍su̍ kɔ̄ɔ̄lī wa̍ ō pīlɔ̍ɔ̄ nāŋ mūɛ̄ī ndūɛ̍i̍ ya̍ū. Mbo̍ lɔ̄wā chɛ̄ māsa̍ wānāā sōlīāā lāsa̍lāa̍. Mbo̍ kīālū ndu̍ nīle̍ŋ kpa̍li̍. 52Mi̍ Chi̍i̍sū lo᷅ o̍ ko̍ŋ mbo̍ dīmūl ndu̍ āā, “Mi̍ŋgi̍ mu̍ɛ̍ī nūmnde̍ o̍ bōo̍ ni᷄ŋ. Kāni̍ fu̍u̍le̍, wānāa̍ sɔ̍ŋgā a̍ mūɛ̍i̍ ya̍, a̍ mūɛ̍i̍ nda̍ dīī nda̍ ni̍. 53Si̍na̍ pɛ̍ŋgu̍ māā tē I̍ di̍mu̍l Fi̍nyā nūu̍ pɛ̍ le̍ mālāa̍, ō nɔ̄lā mbō māla̍ ya̍. Ō nɔ̄lā mbō yɔ᷄ŋ ki̍i̍la̍a̍ ndūa̍a̍ wāa̍la̍ fa̍ŋgā o̍ lēpīlɛ̍ ni᷄ŋ kpe̍. 54Kɛ̍, tē I̍ to̍sa̍ le̍nde̍ pɛ̍, vɛ̄ɛ̍nɛ̍ nyɛ᷅ Yāu̍ Mɛ̄lɛ̄ka̍a̍ dīmi̍ māā ō chō yɔ̄nɔ᷄ŋndo̍ ō yɔ̄nūŋ yɛ̍? Ndu̍yɛ̍, māā nu̍a̍ā Yāu̍ Mɛ̄lɛ̄ka̍a̍ dīmi̍ ni̍ māā ī nɔ̄ le̍ yɔ̄nɔ᷄ŋndo̍.”

55A̍ bōōndi̍i̍ ke̍ŋ, mi̍ Chi̍i̍sū di̍mūl fāŋgā ko̍ŋ āā, “Lā vɛ᷅ hūnɔ̄ɔ̍ a̍ mɔ̄ɔ̍ŋ a̍ yɔ̄mīī bīŋgīe̍i̍ le̍ ya̍ bīyɔ̄ɔ̍ mɛ̄ɛ̍ nda̍ yɔ̄ŋ ko̍ āā, vīīnɔ̄ɔ̍ ya̍ cho̍ ni̍? Lēpāa̍ o̍ lēpāa̍ I̍ cho̍ cha᷄lle̍ o̍ chīɛ̄ī na̍a̍ ŋ̄ sōlī sa̍lāa̍ wo̍ ni᷄ŋ mī pɛ̍ɛ̍kū wa᷅ŋnda̍. Lā bīi̍ ya̍ pɛ̄ŋgu̍ ko̍ŋ te̍. 56Kɛ̍, he̍ī yɔ̄nu̍ŋ le̍ mī nyɛ̄ wānāa̍ su̍a̍ā le̍ Mɛ̄lɛ̄ka̍ wa̍ ā pōōnyi̍a̍a̍ wo̍ ō yɔ̄nu̍ŋ.”

O̍ ko̍ŋ kɔ̍ɔ̍lī, mi̍ Chi̍i̍sū bu̍ɛ̍i̍yāā ndūa̍a̍ kpo̍u̍ a̍ ma᷅l ndu̍ ma̍ nyāānu᷄ŋ.

Ā kūɛ̄ a̍ Chi̍i̍sū nāa̍ lāŋgba̍ā kālāa̍ ki̍a̍lū ya᷅ma̍ŋ nda̍ chūā

(Ma̍kī 14:53-65; Lu̍kū 22:54, 55, 63-71; Chɔ᷄ŋ 18:13-14, 19-24)

57Mi̍ wānāa̍ bi̍ī Chi̍i̍sū wa̍ kūā a̍ ndu̍ nāa̍ māsa̍ wānāā sōlīāā lāsa̍lāa̍ chūā, dīōla̍ŋ āā, Ka̍ya̍fāā. Wānāa̍ pɛ̍ɛ̍kū wa᷅ŋnda̍ sāwāla̍ Mɛ̄lɛ̄ka̍la̍ŋ nda̍ a̍ lāŋgba̍ā kālla̍ ā wa̍ ā chūūŋgi̍āŋ lo̍ŋ. 58Kɔ̄lā nda̍ wa̍ a̍ Chi̍i̍sū la̍ŋ, mi̍ Pītɛ̍ tu̍āl ndu̍ kɔ̄ɔ̄lī, kɛ̍, mbo̍ lōnu᷄ŋ ti̍ŋ kɔ̄ɔ̄lī. Ō lo̍ ndu̍ kɔ̄ɔ̄lī, ma̍ fūūlūū o̍ bɛ̍ɛ̄ chīɛ̄ī wānā bɛ̍ndu̍ so̍lī sa̍lāa̍ o̍ Mɛ̄lɛ̄ka̍ lo̍ wo̍. Pītɛ̍ ndu̍ o̍o̍ hɛ̍na̍ŋ mī ndu̍ o̍o̍ che᷅ nyɛ̄ nda̍ wa̍ Chi̍i̍su̍ yɔ̄ŋ ndo̍. O̍ ko̍ŋ, mbo̍ lūɛ̄ī o̍ bɛ̍ɛ̄ chīɛ̄ī wānā bɛ̍ndōo̍ ho̍ō mbo̍ chāl pūa̍a̍ so̍vɛ̄i̍ya̍ tɛ̄ɛ̄ŋ. 59Mi̍ wānāā bɛ̄ndūāā sōlīāā lāsa̍lāa̍ wa̍ a̍ lāŋgba̍ā kālāa̍ ki̍a̍lū ya᷅ma̍ŋ nda̍ kpo̍u̍ a̍ sa̍āŋ nɛ̍īla̍ŋ nūūvīa̍a̍ le̍ Chi̍i̍su̍ sūɛ̍i̍ lāchōōwɛ̄i̍ hōlɔ̄ɔ̍, le̍ hāli̍ kpe̍ŋ mā dīī ndu̍. 60Mi̍ se̍i̍yāā lāchōōwāā fāŋgā fa̍ŋgā fūlā ma̍ su̍a̍ā, kɛ̍, ā sēēlu̍ŋ su̍ɛ̍i̍ nda̍ nɔ̄lā mā dīī ndu̍ le̍ ndi̍ le̍. O̍ mɛ̄ɛ̄lu̍la̍ŋ kpɔ̍ŋ, mi̍ se̍īya̍ fūlā ā ŋīɔ̍ɔ̍ŋ. 61Ma̍ tɛ̄ndā se̍īle̍ŋ āā, “Mi̍ lāŋu̍nɔ̄ɔ̍ ho̍ō dīmī āā, ‘I̍ nɔ̍lā mī I̍ pɛ᷅l chīɛ̍i̍ Mɛ̄lɛ̄ka̍a̍ mī I̍ mi̍ŋgi̍ ndu̍ tāŋgūl o̍ pālɛ̍i̍ ya̍a̍ bɛ̍ŋgu̍.’ ”

62Mi̍ māsa̍ wānāā sōlīāā lāsa̍lāa̍ ō sīm mbo̍ nyūnā Chi̍i̍su̍ āā, “A̍ nɔ̍ di̍ōm o̍ dīōm o̍ sōndō le̍ mūlī le̍? Ī māā vɛ̄ɛ̄ nda̍ chō yɛ̄ he̍ī dīmīo̍o̍ a̍ nūm o̍kɔ̄ɔ̄?” 63Mi̍ Chi̍i̍sū me̍i̍nu᷄ŋ do̍ŋ. Mi̍ māsa̍ wānāā sōlīāā lāsa̍lāa̍ ō lō ko̍ŋ mbo̍ dīmūl vɛ̄lɛ̄ Chi̍i̍su̍ āā, “I̍ hɛ̍na̍ŋ nu̍m mā di̍mu̍l na̍a̍ le̍ Mɛ̄lɛ̄ka̍ bɛ̄ndōo̍, tē nu᷄m cho̍ Ki̍li̍tī ni̍, Po̍ Mɛ̄lɛ̄ka̍a̍, ndu̍ yɔ̍nūŋ ni̍, wāna̍ Mɛ̄lɛ̄ka̍ chu̍a̍ būŋgɛ̄i̍ māā ō chō vīōmɔ̄ɔ̄ le̍ wāŋnda̍ pīŋīo̍o̍ wo̍.”

64Mi̍ Chi̍i̍sū mu̍lūl ndu̍ āā, “M̍m̄, nyɛ̄ ŋ̄ dīmi̍ wo̍ chō tōnya̍. Kɛ̍, mī di̍mu̍l nya̍ kpo̍u̍, chɔ̍ŋ a̍ te̍le̍ŋndo̍ ho̍ō lā chō wāna̍ nda̍ vēēlū āā, Po̍ Wānā Pɔ̍nɔ̍ɔ̍ wo̍ chɔ̄ īchāli̍ o̍ fo̍ndāŋ lēbīɔ̍ɔ̍ o̍ bā kɛ̄ndɛ̍ Mɛ̄lɛ̄ka̍ nɔ̍ kpāāyāa̍ wo̍ chōo̍. Ndu̍yɛ̍, o̍ ko̍ŋ kɔ̍ɔ̍lī, lā chā ni̍ŋ ndu̍ hūnɔ̄ɔ̍ o̍ ha̍la̍a̍ ni᷄ŋ cho̍o̍ cho̍o̍.”

65Mɛ̄ɛ̍ Chi̍i̍sū di̍mi̍ dɔ̍ɔ̍ dīōmnda̍ŋ nda᷅ŋ, mi̍ māsa̍ wānāā sōlīāā lāsa̍lāa̍, ndu̍ pi̍la̍ sɛ̍ɛ̍sīa̍ŋ nyɛ᷅la̍ŋ lēkɔ̄ɔ̍. Mbo̍ dīmūl wānāā bɛ̄ndūa̍a̍ ha̍ā āā, “Ō tɛ̄ɛ̄mbu̍u̍ dīōla̍ Mɛ̄lɛ̄ka̍la̍ŋ. Se̍īyāā māāvɛ̄ɛ̄ na̍a̍ ŋ̄ yēēma̍ yɛ̄ vɛ̄lɛ̄? Nya̍ pi̍la̍ lā tūēī ni᷅ŋ mɛ̄ɛ̍ o̍ tɛ̍ɛ̍mbu̍u̍ dīōla̍ Mɛ̄lɛ̄ka̍la̍ŋ yɛ̍. 66Le̍la̍ŋ, ɔ̍ɔ̄ yāmɛ̍i̍ cho̍ nya̍ o̍ sōndō ve̍?”

Ma̍ mūlī āā, “Ō nɔ̄ mbō sɔ̄la̍ pīɔ̍mndo̍.”

67O̍ ko̍ŋ kɔ̍ɔ̍lī, ma̍ tūfū ndu̍ lɔ̄lūa̍ŋ o̍ hɔ̄l. Ma̍ lūāā ndu̍. 68Ā lɔ̄ɔ̄ pɛ̍, ā dīmu̍l ndu̍ āā, “Nūm Ki̍li̍tī, wāna̍ Mɛ̄lɛ̄ka̍ chu̍a̍ būŋgɛ̄i̍ māā ō chō vīōmɔ̄ɔ̄ le̍ wāŋnda̍ pīŋīo̍o̍ wo̍, tē wāna̍ su̍a̍ā le̍ Mɛ̄lɛ̄ka̍ wo̍ ŋ̄ chō ni̍, mɛ̄ɛ̍ chɔ̍m ndɔ̍ na̍a̍ wāna̍ lɔ̍ɔ̄ nu̍m ndo̍.”

Pītɛ̍ vi̍i̍nu̍ŋ māā ō si̍nā Chi̍i̍sū le̍

(Ma̍kī 14:66-72; Lu̍kū 22:56-62; Chɔ᷄ŋ 18:15-18, 25-27)

69Mɛ̄ɛ̍ Pītɛ̍ wa̍ īchāli̍ o̍ bɛ̍ɛ̄ chīɛ̄ī māsa̍ wānāā sōlīāā lāsa̍lāa̍, mi̍ māsā ko̍ŋ bu̍ɛ̍ī ndɔ̄ lāāndū pīlɛ̍ hūŋ nāa̍ Pītɛ̍ chu̍a̍. Mbo̍ dīmūl ndu̍ āā, “Nūm bɛ̍ɛ̍ a̍ wa̍ Chi̍i̍su̍ fu̍la̍ ho̍ō Kāli̍lī wo̍ kɔ̄ɔ̄lī.”

70Kɛ̍, mi̍ Pītɛ̍ vi̍i̍nu᷄ŋ nda̍ kpo̍u̍ o̍ hɔ̄l. Mbo̍ dīmī āā, “I̍ si̍nā bɛ̍ɛ̍ nyɛ᷅ ŋ̄ chō dīmīo̍o̍ wo̍ pɛ̄ŋgu̍ le̍.” 71Mbo̍ fāŋa᷄ŋ mbo̍ kūānu᷄ŋ o̍ dīō kpāki̍ wa̍ bi̍ɔ̍ɔ̍ ō bālāā wo̍. Mi̍ bu̍ɛ̍ī lāāndū chēle̍ŋ chā ndu̍. Mbo̍ dīmūl pūa̍a̍ wa̍ lo̍ŋ nda̍ āā, “Pōo̍ ho̍ō wa̍ā, nda̍ wa̍ Chi̍i̍su̍ fu̍la̍ Na̍a̍sa̍lūɛ̄ī yo̍ kɔ̄ɔ̄lī ni̍.”

72Mi̍ Pītɛ̍ vi̍i̍nu᷄ŋ vɛ̍lɛ̄ āā, “Le̍ Mɛ̄lɛ̄ka̍ fɔ̍, I̍ si̍nā ndu̍ le̍.”

73Vīōūwɔ̄ɔ̍ vɛ̄lɛ̄ kpɛ̍ɛ̍, mi̍ pūa̍a̍ wa̍ īsīsi̍ lo̍ŋ nda̍ hūŋ nāa̍ Pītɛ̍ chu̍a̍. Ma̍ dīmī āā, “Nūm bɛ̍ɛ̍, bu̍ɛ̍ī ndɔ̄ɔ̍ kpe̍e̍kpe̍i̍ ŋ̄ chō ni̍. O̍ sūɛ̍i̍ ŋ̄ sūāā ve̍ ko̍ni̍ wānā si̍nā ni̍.”

74O̍ ko̍ŋ, mi̍ Pītɛ̍ me̍na᷄ŋ āā, “Mɛ̄lɛ̄ka̍ tūsi̍ ya̍ nyɛ̄ pālāa̍ chōo̍, tē ō cho̍ to᷅nya̍a̍ le̍ ya̍ I̍ cho̍ dīmīo̍o̍ le̍. I̍ si̍nā la᷅ŋu̍nɔ̄ kōŋ te̍.”

Dīmīo̍o̍ dɔ̍ɔ̍ le̍nde̍, mi̍ sɔ̄ɔ̍ kōōwā. 75Mi̍ Pītɛ̍ lo̍o̍nu᷄ŋ nyɛ᷅ Chi̍i̍sū di̍mu̍l ndu̍ wo̍ āā, “Lɔ̍ɔ̍pa̍ sɔ̄ɔ̍ kōōwā, ā chō dīmī lēyāa̍ māā a̍ si̍nā ya̍ le̍.” Mbo̍ fūlā mbo̍ kɔ̍ cha᷅ŋ cha᷄ŋndo̍ pi̍la̍.

Currently Selected:

Māa̍ti̍u̍ 26: YM

Highlight

Copy