Māa̍ti̍u̍ 23

Chi̍i̍sū si̍la̍ a̍ wānāa̍ pɛ̍ɛ̍kū wa᷅ŋnda̍ sāwāla̍ŋ nda̍ a̍ ku̍ndā Fālīsi̍īya̍ o̍kɔ̄ɔ̄

(Ma̍kī 12:38-39; Lu̍kū 11:43, 46; 20:45, 46)

1O̍ ko̍ŋ kɔ̍ɔ̍lī, mi̍ Chi̍i̍sū su̍a̍ā nāa̍ fāŋgā bɛ̍ndōo̍ chūā hɔ̄lāā tūlu̍ a̍ bu̍ɛ̍i̍yāā ndūa̍a̍. Mbo̍ dīmī āā, 2“Wānāa̍ pɛ̍ɛ̍kū wa᷅ŋnda̍ sāwāla̍ Mɛ̄lɛ̄ka̍la̍ŋ nda̍, a̍ ku̍ndā Fālīsi̍īya̍ nda̍ nɔ̍ le̍ sāwāla̍ Mɛ̄lɛ̄ka̍ ke̍ Mūu̍sē la̍ŋ tɛ̄ɛ̄sīa̍a̍ ni̍. 3Le̍la̍ŋ, lā tūe̍i̍ nda̍ dīōm. Ndu̍yɛ̍, lā tōsa̍ nyɛ᷅ o̍ nyɛ̄ nda̍ dīmu̍l nya̍. Kɛ̍, lā chu̍ā ka̍ālā ndāla̍ŋ te̍. Kāni̍, sɔ̄ɔ̍ŋ nda̍ dīmūl chāāŋnda̍ māā ā tōsa̍ wo̍ŋ, nda̍ pi̍la̍ chɛ᷅l le̍ mu̍ŋ tōsāa̍ le̍. 4Tē ā bīī pɛ̍, ā tōōsi̍a̍a̍ wōlɔ̄ɔ̄lā lūsu̍lɛ̍i̍la̍ŋ ā hāndu̍ chāāŋnda̍ o̍ lēbōl. Kɛ̍ bāa̍ bɛ̍ɛ̍, nda̍ pi̍la̍ ā ye̍ē le̍ nda̍ la̍ŋ mālā le̍. 5Nyɛ̄ o̍ nyɛ̄ nda̍ tōsa̍ le̍ wāŋnda̍ chɔ̄mndo̍ ko̍ni̍ māā ā chō bɔ̄ɔ̍ wa̍nāā pīɛ̄īyāā Mɛ̄lɛ̄ka̍. Nyɛ̄lā wāŋnda̍ lāndūŋ a̍ dīo̍m Mɛ̄lɛ̄ka̍a̍ ō pōōnyīāā lēchōo̍ la̍ŋ, tē ā chē la̍ nda̍la̍ŋ pɛ̍, tōsāa̍ la̍ŋ lā bɛ̄ndū bɛ̍ndū fo̍o̍dōō le̍ chɔ̄mnɔ᷄ŋndo̍. Ma̍ bɛ̄ndi̍ mīsāla̍ŋ o̍ nyɛ̄lā nda̍ wōūnūŋ nda̍ŋ lɔ᷅ndɔ̍ bɛ̍ndū, le̍ mī wāŋnda̍ sīna̍ māā ā chō wānāā pīɛ̄īyāā Mɛ̄lɛ̄ka̍ā bɛ̄ndū. 6O̍ bɔ̄ŋa᷅ŋnda̍ŋ bɛ̍ɛ̍ ā kūɛ̄ pɛ̍, o̍ kpe̍ŋgbe̍i̍la̍ tāse̍la̍ŋ nda̍ hɛ̄nāŋ cha̍lle̍ ni̍. O̍ tōŋgōla̍ Chu̍ūwa̍ pīɛ̄ī Mɛ̍lɛ̄ka̍ la̍ŋ ni᷄ŋ bɛ̍ɛ̍ ā kūɛ̄ pɛ̍, o̍ kpe̍ŋgbe̍i̍la̍ hi̍a̍ū la᷅ŋ kpo̍u̍ na̍ŋɔ̄ɔ̄ la̍ŋ nda̍ hɛ̄nāŋ cha̍lle̍ ni̍. 7Ā hɛ̄nāŋ tē wāŋnda̍ wa̍ nda̍ yīlɔ̄ɔ̍ o̍ lɔ̍ɔ̍la̍ŋ ni᷄ŋ fāŋgāa̍ o̍ hɔ̄l pɛ̍, ā sūŋgu᷄ŋ mɔ̍si̍lta̍ŋ o̍ lēbōl. Ndu̍yɛ̍ o̍ ko̍ŋ kɔ̍ɔ̍lī, ā yēēmā mī wāŋnda̍ wa̍ nda̍ vēēlōo̍ āā, wānāā bɛ̄ndūa̍a̍. 8-10Nya̍ kpo̍u̍, nyɔ̄ɔ̍ ō pīlɛ̍ kpe̍ nya̍ chō Mɛ̄lɛ̄ka̍ o̍ hɔ̄l ni̍. Le̍la̍ŋ, lā chɛ᷅l mā vēēlu̍ nya̍ wānāā bɛ̄ndūa̍a̍ la̍ŋ te̍. Ndu̍yɛ̍, lā ve̍e̍lū wānā o̍ wānā nya̍ tɛ̄ɛ̄ŋ chi̍e̍ēŋ na̍nu᷄ŋ āā, ‘Fi̍nyā nāa̍,’ kɛ̄lɛ̄ŋgāā, ‘Ma̍sānɔ̄ nāa̍,’ le̍. Chāa̍ŋāā nāa̍ la̍ŋ nya̍ nɔ̄ ni̍ mī lā vēēla᷅ŋ. Kāni̍ fo̍ndōle̍, wānā bɛ̍ndu̍ pɛ̍ɛ̍kū nya̍ wo̍ ō pīlɛ̍ kpe̍ nya̍ nɔ̄ ni̍. Ndu̍yɛ̍, Fi̍nyāa̍ ō pīlɛ̍ kpe̍ nya̍ nɔ̄ ni̍, ndu̍ cho̍ Mɛ̄lɛ̄ka̍ Fi̍nyā nyā o̍ cho̍ ɛ̄chɛ̍nɛ̄ wo̍ ni̍. Ndu̍yɛ̍, o̍ ko̍ŋ kɔ̍ɔ̍lī, Māsānɔ̄ɔ̍ ō pīlɛ̍ nya̍ nɔ̄ ni̍, ndu̍ yɔ̍nūŋ māā Ki̍li̍tī ni̍, wāna̍ Mɛ̄lɛ̄ka̍ chu̍a̍ būŋgɛ̄i̍ māā ō chō vīōmɔ̄ɔ̄ le̍ wāŋnda̍ pīŋīo̍o̍ wo̍. 11Wāna̍ hi̍o̍ū kpo̍u̍ nya̍ tɛ̄ɛ̄ŋ ndo̍, ō wa̍ bu̍ɛ̍īyo̍ le̍ nya̍. 12Kāni̍, wānā o̍ wāna̍ he̍e̍lu̍ ndu̍ pi̍la̍ pɛ̍, Mɛ̄lɛ̄ka̍ tūsi̍ ndu̍ tōōlō. Kɛ̍, wānā o̍ wāna̍ tu̍si̍ ndu̍ pi̍la̍ tōōlō pɛ̍, Mɛ̄lɛ̄ka̍ hēēlu̍ ndu̍.”

Chi̍i̍sū pɛ̍ɛ̍sa̍ wānāa̍ nɔ̍ sōndō yēēlɛ̍i̍yo̍ wa̍

(Ma̍kī 12:40; Lu̍kū 11:39-42, 44, 52; 20:47)

13Mi̍ Chi̍i̍sū hi̍a̍ū lāchī a̍ sūɛ̍i̍ āā, “Nyɛ̄ nɛ̄īyāa̍ chō le̍ nya̍ wānāa̍ pɛ̍ɛ̍kū wa᷅ŋnda̍ sāwāla̍ Mɛ̄lɛ̄ka̍la̍ŋ nda̍, a̍ nya̍ ku̍ndā Fālīsi̍īya̍. Lā chō wānāā sōndō yēēlɛ̍i̍ya̍a̍ bɛ̍ndū. Mī lā hēu̍ chāāŋnda̍ nɛ̄īyo̍ māā Mɛ̄lɛ̄ka̍ wa᷅ nda̍ chōo̍ Ma̍sāa̍ le̍. Nya̍ chɛ᷅l mī Mɛ̄lɛ̄ka̍ wa̍ nya̍ chōo̍ Ma̍sāa̍ le̍. Ndu̍yɛ̍, chāāŋāa̍ cho̍ kīndīo̍o̍ le̍ mī Mɛ̄lɛ̄ka̍ wa̍ nda̍ chōo̍ Ma̍sāa̍ wa̍, mī lā hēu̍ nda̍ nɛ̄īyo̍. [14Nyɛ̄ nɛ̄īyāa̍ chō le̍ nya̍ wānāa̍ pɛ̍ɛ̍kū wa᷅ŋnda̍ sāwāla̍ Mɛ̄lɛ̄ka̍la̍ŋ nda̍, a̍ nya̍ ku̍ndā Fālīsi̍īya̍. Lā chō wānāā sōndō yēēlɛ̍i̍ya̍a̍ bɛ̍ndū. Wāŋ lāāndūāā pīāāndāā ndāa̍ wū wa̍, nyɛ̄m nda᷄ŋ dīo̍o̍. O̍ ko̍ŋ kɔ̍ɔ̍lī, lā chɛ᷄ŋ pɛ̍, lā tōl pīɛ̄īlē vīlɛ̄ī vīlɛ̄īle̍ŋ o̍ Mɛ̄lɛ̄ka̍ lo̍ le̍ chɔ̄mnɔ᷄ŋndo̍ wāŋnda̍ o̍ hɔ̄l. Kɛ̍ ndu̍yɛ̍, nya̍ hi̍a̍ū ni̍ŋ nyɛ̍ pālāa̍ sɔ̄lā a̍ wānā o̍ wānā.]

15“Nyɛ̄ nɛ̄īyāa̍ chō le̍ nya̍ wānāa̍ pɛ̍ɛ̍kū wa᷅ŋnda̍ sāwāla̍ Mɛ̄lɛ̄ka̍la̍ŋ nda̍ a̍ nya̍ ku̍ndā Fālīsi̍īya̍. Lā chō wānāā sōndō yēēlɛ̍i̍ya̍a̍ bɛ̍ndū. Mī lā kūɛ̄ bā o̍ bā fe̍e̍, le̍ wāŋndo̍ ō pīlɛ̍ kpe̍ kɔ᷅llo̍ mūlīo̍o̍ le̍ mbō pīɛ̍i̍ Mɛ̄lɛ̄ka̍ mɛ̄ɛ̍ nya̍ pīɛ̄ī Mɛ̍lɛ̄ka̍ yɛ̍. Kɛ̍ ndu̍yɛ̍, o̍ ko̍ŋ kɔ̍ɔ̍lī, tē lā mūli̍ ndu̍ pɛ̍, lā tōsa̍ ndu̍ bɛ̍ɛ̍ ō hu᷄ŋ si̍mnu᷄ŋ wa̍nā ku̍a̍ā o̍ fo̍ndāŋ nyɛ̄ pālāa̍ nāa̍ Mɛ̄lɛ̄ka̍ dūāū wa̍nāā yɔ̄ŋ wɔ̄ɔ̍ŋnda̍ wa̍, mɛ̄ɛ̍ nya̍ pi̍la̍ chō hūnɔ̄ɔ̄ lākɔ̄ lo̍ŋ yɛ̍.

16“Nyɛ̄ nɛ̄īyāa̍ chō le̍ nya̍. Lā chō ko̍ māā wānāā sūmɛ̍i̍ya̍ a̍ ki̍ndī le̍ chāāŋāā ndāā wa̍nāā sūmɛ̍i̍ya̍ tīnda̍a̍ sēēlāl lo̍ wa̍. Nya̍ di̍mi̍ ni̍ āā, ‘Ā yɔ᷄ŋ bɛ̍ɛ̍ mī wāŋndo̍ ō chu̍a̍ bu̍ŋgɛ̄i̍, o̍ ko̍ŋ kɔ̍ɔ̍lī, mbō mēna̍ŋ o̍ chīɛ̍i̍ Mɛ̄lɛ̄ka̍a̍, māā mbō tōsa̍ bɛ̍ɛ̍ su̍ɛ̍i̍ o̍ chu̍a̍ ke̍ŋ bu̍ŋgɛ̄i̍ le̍ tōsāa̍ ve̍ le̍ ō ve᷅ i̍sɔ̍ɔ̍ le̍.’ Kɛ̍ ndu̍yɛ̍, mi̍ lā dīmī āā, ‘Tē wāŋndo̍ chu̍a̍ būŋgɛ̄i̍, o̍ ko̍ŋ kɔ̍ɔ̍lī, mbō mēna̍ŋ o̍ nyɛ᷄m cho̍ o̍ chīɛ̍i̍ Mɛ̄lɛ̄ka̍a̍ ni᷄ŋ ma̍ tōōsīāā mu̍ŋ a̍ ko̍o̍līi̍yo̍ŋ ndo̍ŋ pɛ̍, māā, ō chō kūēē mɛ̄ɛ̍ mbō tōsa̍ sūɛ̍i̍ o̍ chu̍a̍ ke̍ŋ bu̍ŋgɛ̄i̍ le̍ tōsāa̍ ve̍.’ 17Lā chō dīɔ̄māā sūmɛ̍i̍ya̍a̍ bɛ̍ndū. Chīɛ̍i̍ Mɛ̄lɛ̄ka̍a̍ a̍ nyɛ᷄m cho̍ o̍ chīɛ̍i̍ Mɛ̄lɛ̄ka̍a̍ ni᷄ŋ mi̍ ŋ̄ wā ŋ̄ tōōsīāā a̍ ko̍o̍līi̍yo̍ŋ ndo̍ŋ, o̍ kūɛ̍ɛ̍nɛ̍ hi̍o̍ū yɛ̄? Ndu̍yɛ̍, māā chīɛ̍i̍ Mɛ̄lɛ̄ka̍a̍, ndu̍ si̍i̍ŋgu̍u̍ nyɛ̄m mu᷅ŋ nyɛ᷄m cho̍ ŋ̄ yɔ̄ŋga᷄ŋ le̍ Mɛ̄lɛ̄ka̍ wo̍ŋ ni̍. 18Mi̍ lā dīmī vɛ̄lɛ̄ āā, ‘Ā yɔ᷄ŋ bɛ̍ɛ̍ mī wāŋndo̍ chu̍a̍ bu̍ŋgɛ̄i̍, o̍ ko̍ŋ kɔ̍ɔ̍lī, mbō mēna̍ŋ o̍ ma̍āŋ nda̍ sōlī sa̍lāa̍ wo̍, māā mbō tōsa̍ bɛ̍ɛ̍ su̍ɛ̍i̍ o̍ chu̍a̍ ke̍ŋ bu̍ŋgɛ̄i̍ le̍ tōsāa̍ ve̍ le̍, ō ve᷅ i̍sɔ̍ɔ̍ le̍.’ Kɛ̍, mi̍ lā dīmī āā, ‘Tē wāŋndo̍ chu̍a̍ pɛ̍ bu̍ŋgɛ̄i̍, o̍ ko̍ŋ kɔ̍ɔ̍lī, mbō mēna̍ŋ o̍ sa̍lā nda̍ hāndū o̍ ma̍āŋndo̍ chōo̍ wo̍ pɛ̍, māā ō chō kūēē mɛ̄ɛ̍ mbō tōsa̍ nyɛ̄ o̍ chu̍a̍ ko̍ŋ bu̍ŋgɛ̄i̍ yo̍.’ 19Lā chō wānāā sūmɛ̍i̍ya̍a̍ bɛ̍ndū. Ma̍āŋ nda̍ sōlī sa̍lāa̍ wo̍ a̍ sa̍lā nda̍ hāndū o̍ ma̍āŋ kōŋ chōo̍ wo̍, o̍ kūɛ̍ɛ̍nɛ̍ hi̍o̍ū yɛ̄? Ndu̍yɛ̍, māā ma̍āŋ nda̍ sōlī sa̍lāa̍ wo̍ ndu̍ si̍i̍ŋgu̍u̍ sa̍lā kōŋ sa̍la̍ cho̍ ō yɔ̄ŋga᷄ŋ o̍ Mɛ̄lɛ̄ka̍ lo̍ wo̍ ni̍. 20Le̍la̍ŋ tē wāŋndo̍ chu̍a̍ būŋgɛ̄i̍, o̍ ko̍ŋ kɔ̍ɔ̍lī, mbō mēna̍ŋ o̍ ma̍āŋ nda̍ sōlī sa̍lāa̍ wo̍ pɛ̍, mɛ̄ɛ̍ ō chīi̍ mēna᷄ŋ o̍ ma̍āŋ kōŋ a̍ sa̍la̍ cho̍ lēchōo̍ wo̍ fa̍ū. 21Ndu̍yɛ̍, tē wāŋndo̍ chu̍a̍ būŋgɛ̄i̍, o̍ ko̍ŋ kɔ̍ɔ̍lī, mbō mēna̍ŋ o̍ chīɛ̍i̍ Mɛ̄lɛ̄ka̍a̍ pɛ̍, mɛ̄ɛ̍ ō chīi̍ mēna᷄ŋ o̍ chīɛ̍i̍ Mɛ̄lɛ̄ka̍a̍ a̍ Mɛ̄lɛ̄ka̍ pi̍la̍ o̍ cho̍ o̍ chīɛ̄ī kālāa̍ ni᷄ŋ ndo̍. 22Ndu̍yɛ̍ vɛ̍lɛ̄, tē wāŋndo̍ chu̍a̍ būŋgɛ̄i̍, o̍ ko̍ŋ kɔ̍ɔ̍lī, mbō mēna̍ŋ o̍ fo̍nda᷄ŋ Mɛ̄lɛ̄ka̍a̍ pɛ̍, mɛ̄ɛ̍ ō chīi̍ mēna᷄ŋ o̍ kpe̍ŋgbe̍i̍ lēmāsa̍ Mɛ̄lɛ̄ka̍a̍ a̍ Mɛ̄lɛ̄ka̍ pi̍la̍ o̍ cha̍l o̍ kpe̍ŋgbe̍i̍ ka̍lāa̍ chōo̍ wo̍.

23“Nyɛ̄ nɛ̄īyāa̍ chō le̍ nya̍, nya̍ wānāa̍ pɛ̍ɛ̍kū wa᷅ŋnda̍ sāwāla̍ Mɛ̄lɛ̄ka̍la̍ŋ nda̍ a̍ nya̍ ku̍ndā Fālīsi̍īya̍. Lā chō wānāā sōndō yēēlɛ̍i̍ya̍a̍ bɛ̍ndū. Kāni̍, mī lā tōsa̍ mɛ̄ɛ̍ o̍ cho̍ o̍ ka̍ā nyāa̍ ni᷄ŋ yɛ̍. Ā yɔ᷄ŋ bɛ̍ɛ̍ āā nyɛ̄m ta̍a̍ni̍ŋ nya̍ dūāū o̍ nyɛ̄ dīa̍a̍ wo̍ŋ, mɛ̄ɛ̍ mi̍ŋtī, a̍ di̍īl, a̍ ki̍u̍mīŋ, ŋ̍ cho̍ nu̍a̍ā yɛ̍, tē lā sɔ̄la̍ mu̍ŋ pɛ̍, lā yɔ̄ŋgu̍ ta̍la̍ma̍ Mɛ̄lɛ̄ka̍a̍ mɛ̄ɛ̍ sāwāla̍ Mɛ̄lɛ̄ka̍la̍ŋ lā dīmi̍ yɛ̍. Kɛ̍ ndu̍yɛ̍, sɔ̄ɔ̍ŋ le̍bo᷅l kpe̍e̍kpe̍i̍ sāwāla̍ ka̍lāla̍ŋ lā pɛ̄ɛ̄ku̍ māā wāŋnda̍ tōsa̍ wo̍ŋ, mī lā kpēēŋā mu̍ŋ i̍kɛ̍i̍. Mu̍ŋ cho̍ ni̍, a̍ ve᷅ wa᷅na̍ lāka̍fā le̍, mā wa̍ wāna̍ īnyīɛ̍ɛ̍, a̍ wāa̍ wānā sa̍kpō. Lā nɔ̄ mī lā tōsa̍ sɔ̄ɔ̍ŋ le̍bo̍llo̍ŋ mu᷅ŋ. O̍ ko̍ŋ kɔ̍ɔ̍lī ni᷅ŋ, mī lā tōsa̍ sɔ̄ɔ̍ŋ ŋ̄ pīlɔ᷅ŋ. 24Lā chō ko̍ māā wānāā sūmɛ̍i̍ya̍ a̍ ki̍ndī le̍ chāāŋāā ndāā wa̍nāā sūmɛ̍i̍ya̍ tīnda̍la̍ŋ sēēlāl lo̍ wa̍. Mī lā mānda̍ŋ a̍ sāwāla̍ pɔ᷅m pɔ̍mbɔ̄la̍ŋ chūa̍a̍ a̍ nyɛ̄ dīa̍a̍ o̍kɔ̄ɔ̄. Nyāā pɔ̄mbūa̍a̍ ō pīlɛ̍ bɛ̍ɛ̍ de̍l o̍ nyɛ̄ nya̍ chō kōlɔ̄ɔ̍ wo̍ ni᷄ŋ pɛ̍, sōlīo̍o̍ nya̍ sōlī po̍ ni̍. Kɛ̍ ndu̍yɛ̍, mɛ̄ɛ̍ nyɔ̍mi̍ɔ̍ɔ̍ chō nu̍a̍ā yɛ̍ mī lā mēl ko̍ŋ.

25“Nyɛ̄ nɛ̄īyāa̍ chō le̍ nya̍, nya̍ wānāa̍ pɛ̍ɛ̍kū wa᷅ŋnda̍ sāwāla̍ Mɛ̄lɛ̄ka̍la̍ŋ nda̍, a̍ nya̍ ku̍ndā Fālīsi̍īya̍. Lā chō wānāā sōndō yēēlɛ̍i̍ya̍a̍ bɛ̍ndū. Tāālāla̍ nya̍ kōl le̍ni̍ŋ nda̍ŋ, a̍ hɛ̄ŋgɛ̍i̍la̍ nya̍ dīā nyɛ̍ dīa̍a̍ la̍ŋ, mī lā tūe̍i̍ la̍ŋ tūēī pūm o̍ kɔ̄ɔ̍. Kɛ̍ ndu̍yɛ̍, tāālāla̍ la̍ŋ a̍ hɛ̄ŋgɛ̍i̍la̍ la̍ŋ, lēni᷄ŋ ko̍ni̍ nya̍ dīā nyɛ᷅m nya̍ pōōndīāā wa᷅ŋnda̍ o̍ lābā wo̍ŋ ni̍, a̍ nyɛ̄m nya̍ sɔ̄lā o̍ hɔ̄ltē bɛ̄ndūle̍ŋ ni᷄ŋ ndo̍ŋ. 26A̍ a̍a̍ nya̍ Fālīsi̍īyāā sūmɛ̍i̍ya̍ ha̍ā. Lā tōsa̍ wɔ̍ fɛ̍lɛ̍ŋ mī nyɛ᷄m cho̍ o̍ tāālāa̍ ni᷄ŋ ndo̍ŋ ŋ̄ wa̍ nyɛ̄m dīāndāā. O̍ ko̍ŋ, tāālā ka̍lāa̍ nɔ̄lā mbō dēndū o̍ kɔ̄ɔ̍.

27“Nya̍ wānāa̍ pɛ̍ɛ̍kū wa᷅ŋnda̍ sāwāla̍ Mɛ̄lɛ̄ka̍la̍ŋ nda̍ a̍ nya̍ ku̍ndā Fālīsi̍īya̍, nyɛ̄ nɛ̄īyāa̍ chō le̍ nya̍. Lā chō wānāā sōndō yēēlɛ̍i̍ya̍a̍ bɛ̄ndū. Lā chō māchūāā mɛ̄ɛ̍ sɛ̄īla̍ nda̍ kūmbū wa᷅ŋ vīlɛ̍i̍ya̍ la̍ŋ lā chō yɛ̍, lā nda̍ sūū pɔ̍u̍ hu̍mbōo̍ la̍ŋ. Lā kɛ̄ndɛ̄ o̍ kɔ̄ɔ̍, kɛ̍ lēni᷄ŋ pāālā wāŋ vīlɛ̍i̍ya̍ a̍ nyɛ̄m tūmu̍lɛ̍i̍yo̍ŋ kpo̍so̍ŋ. 28Le̍nde̍ ko̍ni̍ nya̍ chō ni̍. Mī lā chɔ᷄m wāŋndā chīe̍e̍ya̍ o̍ hɔ̄l māā lā chō wānāā kɛ̄ndɛ̄. Kɛ̍ ndu̍yɛ̍, mɛ̄ɛ̄māā sōndō yēēlɛ̍i̍yo̍ ko̍ni̍ nya̍ nɔ̄ ni̍, kɔ̄ltā nyāla̍ŋ lā chōnu᷄ŋ la̍ pi̍a̍ā cha̍ a̍ kɔ̄l vēsɛ̍i̍yo̍.”

Chi̍i̍sū di̍mi̍ a̍ mɛ̄ɛ̍ Mɛ̄lɛ̄ka̍ tūsī ni̍ŋ wa᷅ŋnda̍ ha̍ā nyɛ̄ pālāa̍ chōo̍ yɛ̍

(Lu̍kū 11:47-51)

29Mi̍ Chi̍i̍sū di̍mī āā, “Nyɛ̄ nɛ̄īyāa̍ chō le̍ nya̍, nya̍ wānāa̍ pɛ̍ɛ̍kū wa᷅ŋnda̍ sāwāla̍ Mɛ̄lɛ̄ka̍la̍ŋ nda̍, a̍ nya̍ ku̍ndā Fālīsi̍īya̍. Lā chō wānāā sōndō yēēlɛ̍i̍ya̍a̍ bɛ̍ndū. Wānāā nda̍ a̍a̍ su̍a̍ā le̍ Mɛ̄lɛ̄ka̍ sīndɛ̄ wa̍, a̍ wānāā sa̍kpūa̍a̍, mī lā chɔ̄ū sɛ̄īla̍ ndāla̍ŋ, ndu̍yɛ̍ mī lā bɛ̄ɛ̄ndi̍a̍a̍ la̍ŋ nyɛ̄ kɛ̄ndɛ̍ī. 30Ndu̍yɛ̍, lā dīmi̍ māā tē nya̍ a̍a̍ wa̍ te̍le̍ŋ fi̍nyāā nāā ma̍māa̍ ā wa̍ sīndɛ̄ wo̍ pɛ̍, māā lā ve̍ to̍sā mɛ̄ɛ̍ nda̍ tōsa̍ ma̍ dīī wānāa̍ su̍a̍ā le̍ Mɛ̄lɛ̄ka̍ wa̍ yɛ̍ le̍. 31Mɛ̄ɛ̍ o̍ dīōmnda̍ŋ nda᷅ŋ ni᷄ŋ, lā sɔ̄lɔ̍la̍ŋ māā wānāa̍ nda̍ a̍a̍ di̍ū ka̍ŋ wa̍nāa̍ su̍a̍ā le̍ Mɛ̄lɛ̄ka̍ wa̍ māā o̍ pūlālē ndāle̍ŋ chōo̍ nya̍ fūla̍ ni̍. 32Mɛ̄ɛ̍ i̍ cho̍ yɛ̄ le̍nde̍ yɛ̍, mɛ̄ɛ̍ lā sīo̍u̍ ni̍ko̍ wa̍li̍ fi̍nyāā nyāā ma̍māa̍ kāndu̍ wo̍ lēbōl sōlī. 33Lā wɔ̄u̍. Lā chō kɛ̄ūwāā bɛ̄ndū. Ndu̍yɛ̍, lā nɔ᷅ o̍ kɔ̄l kpo̍so̍ŋ māā kɔ̄la̍ŋ o̍ nyɛ̄ nɛ̄īyāā fɛ̍ɛ̍ŋ fɛ̍ɛ̍ŋndo̍ ni᷄ŋ o̍ bi̍ndū ni̍ŋ nya̍ le̍. 34Le̍la̍ŋ, mī di̍mu̍l nya̍, I̍ cho̍ wānāa̍ su̍a̍ā le̍ Mɛ̄lɛ̄ka̍ wa̍ vīōmɔ̄ɔ̄ nāa̍ nya̍ chūā a̍ wānāa̍ si̍nā nyɛ᷅ Mɛ̄lɛ̄ka̍ dīmi̍ wo̍ wa̍, a̍ wānāa̍ pɛ̍ɛ̍kū wa᷅ŋnda̍ a̍ nɛ̄i̍ Mɛ̄lɛ̄ka̍a̍ o̍kɔ̄ɔ̄ wa̍. Ndu̍yɛ̍, lā chō ā pūm dīyɔ̄ɔ̄ o̍ yɔ̄m sīŋgāfīlāa̍ chōo̍ mī lā lɔ̄ɔ̄ ā pūm o̍ chīɛ̄īlā nyāla̍ pi̍ɛ̍i̍yāā Mɛ̄lɛ̄ka̍ la̍ŋ ni᷄ŋ. O̍ ko̍ŋ kɔ̍ɔ̍lī, mī lā tīsa̍ nda̍ tōūwɔ̄ɔ̍ o̍ chi̍o̍o̍ŋ, mī lā tūsī nda̍ nyɛ̄ pālāa̍ chōo̍. 35Vīōmɔ̄ɔ̄ ya̍ I̍ cho̍ wāŋnda̍ ha̍ā nāa̍ nya̍ chūā wo̍, le̍ hāli̍ kpe̍ŋ mī Mɛ̄lɛ̄ka̍ tūsi̍ nya̍ nyɛ̄ pālāa̍ chōo̍. Kāni̍ fu̍u̍le̍, le̍ wānāā sa̍kpūa̍a̍ kpo̍u̍ ā nya̍ Chu̍ūwa̍ dīu̍ wa̍, chɔ̍ŋ a̍ pīɔ̍m wānā sa̍kpōo̍ E̍bɛ̄ɛ̄l, mbo̍ kūā le̍nde̍ a̍ pīɔ̍m Sɛ̄kāla̍yā wo̍, po̍ Bɛ̄lu̍a̍kā wo̍, ō nya̍ Chu̍ūwa̍ dīī o̍ chīɛ̍i̍ Mɛ̄lɛ̄ka̍a̍ tɛ̄ɛ̄ŋ a̍ ma̍āŋ nda̍ sōlī sa̍lāa̍ wo̍ wo̍. 36Mī di̍mu̍l nya̍, Mɛ̄lɛ̄ka̍ chō wānāa̍ cho̍ yōōmū o̍ pālɛ̍i̍ he̍ī ni᷄ŋ nda̍ nyɛ̄ pālāa̍ tūsī chōo̍ le̍ wānāā nda̍ dīu̍ ha̍ā wa̍.”

Nyɛ̄ Chi̍i̍sū di̍mi̍ a̍ Chūlu̍sɛ̄lɛ̄m o̍kɔ̄ɔ̄ wo̍

(Lu̍kū 13:34, 35)

37Mi̍ Chi̍i̍sū hi̍a̍ū lāchī a̍ sūɛ̍i̍ āā, “A̍ a̍a̍ nya̍ wāŋnda̍ Chūlu̍sɛ̄lɛ̄m, te̍le̍ŋ o̍ te̍le̍ŋ, tē Mɛ̄lɛ̄ka̍ vēm wānāa̍ su̍a̍ā le̍ ndu̍ wa̍ nāa̍ nya̍ chūā pɛ̍, lā dīu̍ nda̍. Ndu̍yɛ̍, mī lā vīi̍ wānāā o̍ vi̍ām nāa̍ nya̍ chūā a̍ yōōŋgū ndɔ̄ɔ̍ wa̍ a̍ pōūta̍ŋ mī lā dīu̍ nda̍. Yēēmɛ̍i̍ wa̍ ya̍ te̍le̍ŋnda̍ ka̍ ka̍, le̍ mī ya̍ i̍i̍ chu̍u̍ŋgi̍a̍a̍ nya̍ kpo̍u̍ ya̍ o̍ ībūŋ, mɛ̄ɛ̍ sɔ̄ɔ̍ ko̍msa̍a̍ chūūŋgīāā chu̍a̍u̍wāā ndūa̍a̍ o̍ kūmba᷅ŋndā ndɔ̄la̍ŋ bɛ̄ŋgu̍ yɛ̍. Kɛ̍, lā chɛ᷄l te̍. 38Le̍la̍ŋ, lā kɛ̄si̍ŋ o̍ lākɔ̄l māā Mɛ̄lɛ̄ka̍ chō hūnɔ̄ɔ̄ chi̍e̍e̍ nyāa̍ bāa̍ fāŋā chōo̍ mbō pīɔ̍l. 39Ndu̍yɛ̍, mī di̍mu̍l nya̍, chɔ̍ŋ a̍ bōōnde̍i̍ he̍ī lā chi᷅ lɛ̍ ni̍ŋ ya̍ le̍ ha̍a̍a̍, mɛ̄ɛ̍ mbō lo̍ o̍ ko̍ŋ mī te̍le̍ŋ fu̍u̍lu̍u̍. Te̍le̍ŋ ko̍ŋ nya̍ dīmī ni̍ŋ ni̍ āā, ‘Nu᷄m hi᷅ŋ ho̍ō sɔ̍ŋgɔ̍ Māsānɔ̄ɔ̍ Mɛ̄lɛ̄ka̍a̍ wo̍, Mɛ̄lɛ̄ka̍ dɔ̄ū nu̍m sa̍lā bɔ̄ɔ̍.’ ”

Currently Selected:

Māa̍ti̍u̍ 23: YM

Highlight

Copy