Māa̍ti̍u̍ 17

Mɛ̄lɛ̄ka̍ māŋga̍la̍ Chi̍i̍sū bu̍ɛ̍i̍yāā ndūa̍a̍ o̍ hɔ̄l

(Ma̍kī 9:2-13; Lu̍kū 9:28-36)

1Mɛ̄ɛ̍ pālɛ̍i̍ hīōū ī ŋɔ᷄mpu᷅m, mi̍ Chi̍i̍sū chu̍ā Pītɛ̍ a̍ Chēmi̍si̍ nda̍ Chɔ᷄ŋ pɔ̍mbɔ̄ ndɔ̄, ma̍ hēl o̍ pēmbīī pūm chōo̍. Lo̍ŋ nda̍ wa̍ ni̍, nda̍ kpe̍e̍le̍. 2O̍ ko̍ŋ, mi̍ Mɛ̄lɛ̄ka̍ māŋgālā Chi̍i̍su̍ nda̍ o̍ hɔ̄l lē pīlɛ̍ be̍lu᷄ŋ, ā wa̍ ndu̍ pa̍ to̍fāa̍. Mi̍ hɔ̄lla̍ yɔ̄nu᷄ŋ ndu̍ ma̍lākā mālākā bɛ̄ndū, mɛ̄ɛ̍ wānā cha᷅ pa̍a̍le̍ŋ nu̍a̍ā yɛ̍. Nyɛ̄la̍ wa̍ ndu̍ lēkɔ̄ɔ̍ la̍ŋ bɛ̍ɛ̍, mi̍ lā sīmnu᷄ŋ la̍ hu̍mbū fo̍ fo̍ bɛ̍ndū bɛ̄ndū. 3O̍ ko̍ŋ kɔ̍ɔ̍lī, mi̍ bu̍ɛ̍i̍yāā yāa̍wa̍ ha̍ā ā lō o̍ ko̍ŋ ma̍ chā Mūu̍sē nda̍ Īla̍a̍chā. Ma̍ chā nda̍ ā chō sūūki̍āŋndo̍ nda̍ Chi̍i̍sū wa̍ā. 4O̍ ko̍ŋ, mi̍ Pītɛ̍ di̍mūl Chi̍i̍sū āā, “Māsānɔ̄ɔ̍, ō bɛ̄nda̍ bɛ̍ɛ̍ mi̍ ŋ̄ wā na̍nu᷄ŋ. Tē ō wā hɛ̍na᷄ŋ nu̍m pɛ̍, mɛ̄ɛ̍ I̍ to̍o̍sīāā wɔ̍ būu̍ŋnda̍ŋ lā yāa̍ le̍ nya̍, ō pīlɛ̍ le̍ nūm, ō pīlɛ̍ le̍ Mūu̍sē, ō pīlɛ̍ le̍ Īla̍a̍chā.”

5Pītɛ̍ lo̍ sūɛ̍i̍ mi̍ yu̍mbu̍ yu̍mbu̍ bɛ̍ndōo̍ hu᷄ŋ ku̍mbū nda̍ kpu̍. O̍ ko̍ŋ, ma̍ tūɛ̄ī mi̍ dīōmndo̍ sūāā o̍ yu̍mbu̍ yu̍mbo̍o̍ ho̍ō ni᷄ŋ āā, “Po̍ nī ka̍a̍lāa̍ cho̍ ho̍ō ni̍. I̍ hi̍ni̍ kɔ̄l ta̍u̍ a̍ ndu̍. Lā tūe̍i̍ ndu̍ dīōm.”

6Mɛ̄ɛ̍ bu̍ɛ̍īya̍ ha̍ā tūēī dīo̍m wa̍ sūɛ̍i̍ yo̍, mi̍ sīōōŋnde̍ bīī nda̍ ta̍u̍ ta̍u̍. Ma̍ dēl lɛ̄ŋ kpo̍u̍. 7O̍ ko̍ŋ kɔ̍ɔ̍lī, mi̍ Chi̍i̍sū hu᷅ŋ nāa̍ nda̍ chūā mbo̍ pīla᷄ŋ nda̍. Mbo̍ dīmūl nda̍ āā, “Lā chɔ᷄ŋ. Lā yɔ᷅ŋ īsīōōŋ te̍.” 8Mɛ̄ɛ̍ nda̍ chɛ᷄ŋ, ma̍ mɛ̄ɛ̄ndīa̍ŋ si̍lɔ̍. Kɛ̍, ā chi̍ lɛ̍ wānā o̍ wānā che᷅le̍ŋ te̍ mɛ̄ɛ̍ Chi̍i̍sū.

9Mɛ̄ɛ̍ Chi̍i̍sū nda̍ bu̍ɛ̍i̍yāā yāa̍wa̍ ā wa̍ mīīŋgōo̍ ma̍ wā pēmbēi̍ tōlɔ̄ɔ̍, mbo̍ sīlā nda̍. Mbo̍ dīmūl nda̍ āā, “Nyɛ̄ nya̍ chē ho̍ō o̍ yi̍lāŋndo̍ ni᷄ŋ ndo̍, lā di̍mūl wānā o̍ wānā a̍ ndu̍ o̍kɔ̄ɔ̄ le̍, mɛ̄ɛ̍ mbō lo̍ o̍ ko̍ŋ mī wāna̍ nda̍ vēēlū āā, Po̍ Wānā Pɔ̍nɔ̍ɔ̍ wo̍ ō mīīŋgu̍ yōōmū.”

10O̍ ko̍ŋ kɔ̍ɔ̍lī, mi̍ bu̍ɛ̍i̍yāā ndūa̍a̍ ha̍ā nyūnā ndu̍ āā, “Le̍ yɛ̄ɛ̍nɛ̍ wānāa̍ pɛ̍ɛ̍kū wa᷅ŋnda̍ sāwāla̍ Mɛ̄lɛ̄ka̍la̍ŋ nda̍ ā dīmi̍ yɛ̄ āā, ‘Mɛ̄ɛ̍ mī Īla̍a̍chā hi᷅ŋ fɛ̍lɛ̍ŋ?’ ”

11Mi̍ Chi̍i̍sū mu̍lī nda̍ dīōm āā, “Le̍nde̍ i̍ cho̍ ni̍. Mɛ̄ɛ̍ mī Īla̍a̍chā hi᷅ŋ fɛ̍lɛ̍ŋ. Ndu̍yɛ̍, ō hīŋ pɛ̍, ō hu᷄ŋ bɛ̍ɛ̍ndīāā pɔ̄ɔ̄ nyɛ̄ o̍ nyɛ̄. 12Kɛ̍ ndu̍yɛ̍, mī di̍mu̍l nya̍, Īla̍a̍chā chi̍i̍ ni᷅ŋ hūnɔ̄ɔ̄. Kɛ̍, wāŋnda̍ ā sīna̍ pɛ̍ŋgu̍ māā ndu̍ le̍. O̍ ko̍ŋ, ma̍ tōsā nyɛ̄ o̍ nyɛ̄ nda̍ yēēma̍ a̍ ndu̍. Ndu̍yɛ̍, le̍nde̍ ko̍ni̍ nda̍ chō wāna̍ nda̍ vēēlū āā, Po̍ Wānā Pɔ̍nɔ̍ɔ̍ wo̍ nyɛ̄ pālāa̍ tūsī chōo̍ ni̍.”

13O̍ ko̍ŋ kɔ̍ɔ̍lī, mi̍ bu̍ɛ̍i̍yāā ndūa̍a̍ sīnā pɛ̄ŋgu̍ māā a̍ Chɔ᷄ŋ Wānā Yi̍ŋāa̍ o̍kɔ̄ɔ̄ o̍ wa̍ sūɛ̍i̍ ni̍.

Chi̍i̍sū si̍ŋgi̍ pōo̍mbɔ̄ nāā wōūvɛ̍i̍yo̍

(Ma̍kī 9:14-29; Lu̍kū 9:37-43a)

14O̍ ko̍ŋ kɔ̍ɔ̍lī, mi̍ Chi̍i̍sū nda̍ bu̍ɛ̍i̍yāā ndūa̍a̍ ā hūŋ nāa̍ fāŋgāa̍ wa̍ o̍ pēmbēi̍ bɛ̄ŋgu̍ wa̍. Mɛ̄ɛ̍ nda̍ fūūlu̍u̍, mi̍ po̍ pi᷅lɛ̍ hūŋ mbo̍ hu᷄ŋ ba᷅ŋ wūla̍ŋ Chi̍i̍sū o̍ lābɛ̄ŋgu̍ ni̍ŋ. 15Mbo̍ dīmūl Chi̍i̍sū āā, “Fāllo̍, yāndi̍i̍ tūīīnu̍ŋ po̍ nūu̍ īnyīɛ̍ɛ̍ fɔ̍. Nāā wōūvɛ̍i̍yo̍ cho̍ ndu̍ ni̍. Tē ō chu̍a̍ ndu̍ pɛ̍, ō bīōndu̍ŋ. Ndu̍yɛ̍ te̍le̍ŋnda̍ ka̍ ka̍, ō bīōndu̍ŋ pɛ̍, o̍ yīŋ bɛ̍ɛ̍ dēlɔ̄ɔ̍, o̍ pēēlo̍ bɛ̍ɛ̍. 16Mi̍ hu᷅ŋ a̍ ndu̍ nāa̍ bu̍ɛ̍i̍yāā nūmnda̍ chūā. Kɛ̍, ā nɔ̄la̍ ndu̍ sīŋgī le̍.”

17Mi̍ Chi̍i̍sū di̍mī āā, “E̍e̍e̍ nya̍ wāŋnda̍ ha̍ā, lā nɔ̍ la̍a̍la᷄ŋ te̍ ma᷅. Ndu̍yɛ̍, lā chō wānāā tūūndu̍ɛ̍i̍. I̍ vi̍o̍ū ni᷅ŋ a̍ nya̍ la̍tu̍lu̍ ma᷅. I̍ sa̍ŋga̍ ni᷅ŋ a̍ nya̍ bīūwɔ᷄ŋndo̍ fɔ̍” Mbo̍ dīmūl ndu̍ āā, “Hu̍ŋ a̍ po̍ nu̍mndo̍ na̍nū.” 18Mi̍ Chi̍i̍sū di̍mūl nyi̍nā wɔ̄ɔ̍ŋ wa̍ pōo̍mbɔ̄ɔ̍ kɔ̄ɔ̄lī wo̍ māā o̍ fāŋa̍ŋ ndu̍ kɔ̄ɔ̄lī. Mi̍ nyi̍nā wɔ̄ɔ̍ŋ kōŋ fāŋa᷄ŋ ndu̍ kɔ̄ɔ̄lī. Mi̍ pōo̍mbɔ̄ɔ̍ sīāŋgū o̍ fōōfō ko̍ŋ chōo̍.

19O̍ ko̍ŋ kɔ̍ɔ̍lī, mi̍ Chi̍i̍sū bu̍ɛ̍i̍yāā ndūa̍a̍ ā kūā nāa̍ ndu̍ chu̍a̍ nda̍ kpe̍e̍le̍. Ma̍ nyūnā ndu̍ āā, “Māsānɔ̄ɔ̍, vɛ᷅ mi̍ ŋ̄ būmbā nyi̍nā wɔ̄ɔ̍ŋ kōŋ tōūwɔ̄ɔ̄ pōo̍mbɔ̄ɔ̍ ho̍ō kɔ̄ɔ̄lī?”

20Mi̍ Chi̍i̍sū mu̍lī nda̍ dīōm āā, “Lā būmba̍ fo̍ndōle̍. Lā nɔ̍ la̍a̍la᷄ŋ bɔ̍ɔ̍ le̍. Mī di̍mūl nya̍, tē lā nɔ̄ lāāla᷄ŋndo̍ pɛ̍ ā yɔ᷄ŋ bɛ̍ɛ̍ mbō wa̍ mɛ̄sɛ̄lāa̍ mɛ̄ɛ̍ ku̍lu̍ mɛ̍sɛ̍lɛ̍i̍ yɔ̄m nda̍ vēēlū ho̍ō āā, Mɔ̍si̍tāā wo̍ chō nu̍a̍ā yɛ̍ pɛ̍, lā dīmūl Pēmbēi̍ he̍ī āā, ‘Fa̍ŋa̍ŋ na̍nu᷄ŋ mā kūɛ̄ nda̍.’ Ndu̍yɛ̍, ī nɔ̄lā mī ī fāŋa̍ŋ mī ī kūɛ̄. Tē lā nɔ̄ lāāla᷄ŋndo̍ pɛ̍, nyɛ̄ o̍ nyɛ̄ cho̍ mī lā būmba̍ ndu̍ tōsā le̍. [21Le̍ mī wānā nɔ̍la̍ nyi̍nā wɔ̄ɔ̍ŋ wāā le̍nde̍ to̍u̍wɔ̄ɔ̄ wāŋndo̍ kɔ̄ɔ̄lī mɛ̄ɛ̍ Mɛ̄lɛ̄ka̍ pīɛ̄īyo̍ a̍ su᷅mndo̍ bīyɔ̄ɔ̍. Tē ō cho̍ ko̍ŋ te̍, wānā nɔ̍lā le̍.]”

Chi̍i̍sū so̍ō vɛ̄lɛ̄ a̍ pīɔ̍m ndɔ̄ɔ̍ o̍kɔ̄ɔ̄

(Ma̍kī 9:30-32; Lu̍kū 9:43b-45)

22Te̍le̍ŋ pi᷅lɛ̍, mɛ̄ɛ̍ bu̍ɛ̍i̍yāa̍ Chi̍i̍sūa̍a̍ kpo̍u̍ ā wa̍ ā chu̍u̍ŋgi̍āŋ na̍a̍ pi᷅lɛ̍ o̍ lɛ̄ŋndē Kāli̍līle̍ŋ ni᷄ŋ, mi̍ Chi̍i̍sū di̍mūl nda̍ āā, “Wāna̍ nda̍ vēēlū āā, Po̍ Wānā Pɔ̍nɔ̍ɔ̍ wo̍ ā chō ndu̍ mālɔ̄ɔ̄ wāŋnda̍ o̍ bā. 23Ndu̍yɛ̍, tē ā ma᷄l ndu̍ wāŋnda̍ o̍ bā pɛ̍, ā dīī ndu̍. Kɛ̍ ndu̍yɛ̍, tē pālɛ̍i̍ hīōū pɛ̍ i̍ ya̍a̍, o̍ ko̍ŋ kɔ̍ɔ̍lī, Mɛ̄lɛ̄ka̍ mīŋgi̍ ndu̍ yōōmū.”

Mɛ̄ɛ̍ o̍ di̍mi̍ le̍nde̍, mi̍ mɔ̍nɛ̍i̍ bīī bu̍ɛ̍i̍yāā ndūa̍a̍ ta̍u̍ ta̍u̍.

Chi̍i̍sū yɔ̍ŋgu̍ chūūŋgīa̍a̍ le̍ chīɛ̄ī Chu̍ūwa̍ sōlī sa̍lāa̍ wo̍

24Mɛ̄ɛ̍ Chi̍i̍sū nda̍ bu̍ɛ̍i̍yāā ndūa̍a̍ ā hīŋ Kēpa̍a̍nīɔ̄m, mi̍ wānāa̍ bi̍ī chu̍u̍ŋgīāā Chu̍ūwa̍ yɔ̄ŋgū le̍ bɔ̄nɔ̍ chīɛ̄ī nda̍ sōlī sa̍lāa̍ wo̍ wa̍ ā hūŋ nāa̍ Pītɛ̍ chūā. Ma̍ nyūnā ndu̍ āā, “Wānā nya̍ bānāa̍ ō yɔ̄ŋgū pa̍ chu̍u̍ŋgīāā na̍a̍ ŋ̄ yɔ̄ŋgū le̍ chīɛ̄ī na̍a̍ ŋ̄ sōlī sa̍lāa̍ wo̍?”

25Mi̍ Pītɛ̍ mu̍lī āā, “E̍ī, mbō yɔ̄ŋgu̍.”

Mɛ̄ɛ̍ Pītɛ̍ ku̍ɛ̄ chīɛ̄ī ni̍ŋ lɔ̍ɔ̍ pa̍ bɛ̍ɛ̍ o̍ su̍a̍ā a̍ ndi̍ o̍kɔ̄ɔ̄, Chi̍i̍sū fɛ̍ɛ̍ŋ so̍ō. Mbo̍ dīmī āā, “Sa̍i̍mɔ̄ŋ, chɔ̍m ndɔ̍ ya̍ nyɛ̄ nūm yi̍ya̍ŋ a̍ sūɛ̍i̍ he̍ī o̍kɔ̄ɔ̄ wo̍. Ō nɛ̄ɛ̍ni̍a̍ā wānāa̍ cho̍ lɛ̄ŋnde̍ŋ bōlle̍ŋ nda̍ ā bīī yɛ̍ pāāwāa̍ a̍ ta̍la̍ma̍a̍ o̍ bā? Chūāūwāā ndāa̍ wo̍o̍, wānāā lēkāa̍wa̍ wo̍o̍, nɛ̄ɛ̍ni̍a̍ā o̍ bā nda̍ bīī yɛ̍?”

26Mi̍ Pītɛ̍ mu̍lī āā, “Wānāā lēkāa̍wa̍ o̍ bā nda̍ bīī ni̍.”

Mi̍ Chi̍i̍sū di̍mī āā, “Mɛ̄ɛ̍ ko̍ŋ chɔ̍m māā wānāa̍ cho̍ lɛ̄ŋnde̍ŋ bōlle̍ŋ nda̍ māā chūāūwāā ndāa̍ ā nɔ̍ mā yɔ̄ŋgu̍ le̍ wa᷅. 27Kɛ̍ ndu̍yɛ̍, I̍ ye̍e̍ma̍ mī tɛ̄ɛ̄mbu̍u̍ nda̍ kɔ̄l te̍. Le̍la̍ŋ, kɔ̍ do̍ŋnde̍ o̍ mɛ̄ŋmā ībūŋga᷄ŋ. Sūū tāse̍ ŋ̄ chō chūā pe̍kēkē wo̍, to̍fa̍ ndu̍ o̍ sōndō. Ā chō ka̍ni̍e̍i̍ sāālɔ᷄ŋ ndu̍ o̍ sōndō. Ka̍ni̍i̍ ke̍ŋ chō wā tūu̍le̍ŋ le̍ chūūŋgīāā chīɛ̄ī na̍a̍ ŋ̄ sōlī sa̍lāa̍ wo̍ le̍ na̍a̍ nya̍ā. A̍ chu̍a̍ pɛ̍, a̍ kɔ̍ yɔ̍ŋgū nda̍ chūūŋgīa̍a̍ o̍ na̍a̍.”

Currently Selected:

Māa̍ti̍u̍ 17: YM

Highlight

Copy